一入Shin-sen-gumi（漢字為「新撰組」，據說係日本以前一個武士組織個名）個門口就見倒兩位師傅企左喺左手邊既炭爐旁準備為客人燒野食。餐廳座位唔算多，大概坐倒三十人。顧客可以選擇坐近炭爐既位置既，不過個人覺得太煙同太熱啦。散枱就比較迫，坐到密麻麻，但亦因此氣氛變得非常熱鬧。

服務生大部份都係好夠中氣既後生仔女，雖然髮形同髮色都好前衛，不過態度絕對友善，而且超級落力。佢地成晚都喺度互相用日文大聲溝通，識少少扮代表既XO仔只聽得出有時佢地喺度歡迎客人，有時感謝顧客落單，其他就… 全晚最high既時刻就係當熟客既舅父請大家飲啤酒時，佢地會好有禮貌地行黎我地張枱前面一齊乾杯，大叫多謝，然後行個鞠躬禮。

一間食客多到要成日排隊既餐廳，食材自然用得快，所以差唔多日日有貨黎，擔保新鮮。Shin-sen-gumi既串燒全部都係用炭爐燒，可以話係Ichiban中既Ichiban！雖然餐廳室內既燒肉味道比較濃烈（一Ｄ都冇誇張架：喺依度食完飯，返到屋企一定要沖涼洗頭兼洗衫！），不過因為師傅不斷喺度睇火，撥扇，先之可以保證食物唔會出現「外熱內涷」或者「外熟內生」既情況。

個爐咁近，食物上枱時夠哂熱辣辣，爸爸勁讚。師傅喺大部份既串燒面都輕輕搽左層甜甜既燒汁，好啱我地屋企人口味。哥哥仔好有心機地教我地用餐廳秘製既Yuzu Kosho（柚子青椒醬）點Ｄ串燒食；雖則好有特色，不過在下覺得個醬有少少喧賓奪主，所以唔係每樣串燒都適合點。我地全部人對當晚既食物都非常滿意，而家就等小弟推介一下啦：

串燒雞腎（每串USD 1.95）：爽口得黎唔乾，而且比香港食倒既大粒。

串燒雞肝（每串USD 1.95）：都係好大隻，咬落好軟熟，同最重要係一Ｄ都唔乾同唔粉。

串燒雞丸（每串USD 2）：「賣飛佛」之一；肉質幼嫩，又夠肉汁，加上甜甜既燒汁，無得彈呀！

串燒雞翼（每串USD 2）：燒雞翼其實好考耐性既，因為好容易燒燶左層皮而內部既肉都未係全熟得哂。師傅既手勢真係一流，能夠做出皮脆，肉嫩，多汁，真係拍爛手掌呀。

串燒雞軟骨（每串USD 1.95）：埋到位重聽倒Ｄ吱吱聲既油聲，好high！雞軟骨非常香脆。師傅只係用左鹽黎調味，所以就點左哥仔介紹既柚子青椒醬，mmm… 味道更覺清香醒胃。

串燒豬五花（每串USD 1.95）：聽落好似好唔健康，不過食完包你讚；大家諗下呀 ~ 連怕肥同怕油既媽咪都要encore，可想而知好味程度好成點啦！因為用炭爐慢慢燒，其實好多肥膏已經溶解哂，所以入口唔會覺得成口油。再者，應該就係依Ｄ肥膏先可以令到串豬肉咁香嫩。

串燒牛脷（每串USD 2.35）：牛脷厚度適中，爽滑香口。

Soboro Don（細碗USD 3；大碗USD 6）：家中有幾位都係冇飯不歡既，所以我地就叫左碗招牌雞飯食。飯面既雞肉碎同串燒雞肉丸既味道差唔多，都係咁嫩同帶Ｄ甜味既，超級受小朋友歡迎。

後記：

1)      唔記得左邊個食家曾經講過，一間餐館既衛生分唔可以單靠餐桌同樓面既清潔程度，一定要睇埋個洗手間，因為負責處理食物既廚師都要用架嘛。其實日本人經營既餐廳都已經係一個信心既保證；小弟用既洗手間係男女共用既，真係好大好乾淨，而且抽氣好勁，唔讚唔得！

2)      睇睇卡片背面先知道Shin-sen-Gumi喺加州有成十間分店，當中有麵店，串燒店，同火鍋店，真係唔講得笑。