全日空航空公司嘅商務搭客於成田機場出境後共有兩個「ANA Lounge」貴賓室可選，團長好自然地就揀咗離閘口較近嗰個。

接待大堂擺放出超型嘅Star Wars版模型飛機，震撼到連唔係星粉嘅小肥都忍唔住要影返幅相留念。睇到展出嘅金牌先知原來航空公司同酒店一樣有一至五星等級分，全日空榮獲五星殊榮當真係實至名歸！

樓上貴賓室內嘅大廳前方擺有幾張二至四人嘅圓枱仔，後方則排出幾行獨立式梳化位，或許後者私隱度較高，所以一早已坐滿旅客。隔離就係光鮮企理嘅自助餐飲部。拍牆嘅飲品區有精選酒品、咖啡機、鮮奶、汽水、果汁等等。XO仔最興奮就係見到部朝日生啤機！專業到啲啤酒杯全部都係雪喺雪櫃入面，有哂日英對照兼附彩圖嘅操作說明，有得玩又有得飲，絕對歡樂！

自選食物都算幾國際化吓，不過就唔算特別吸引，當中有三文治、沙律、壽司、飯團、味噌湯、麻婆豆腐、肉丸等。嘻嘻，有旅遊達人哥哥帶領，八人當然係唔會錯過最入位置頗為隱蔽嘅「Noodle Bar」啦！麵檔其實有多款熱食可選，包括烏冬、蕎麥麵、拉麵，咖哩飯等，即叫即煮，好似快餐店咁等機仔一響就有得食。細佬所點嘅豚骨拉麵呈奶白色嘅豚骨湯底甜濃香滑，拉麵煙韌彈牙，份量剛剛好唔會太多，加配一杯清爽嘅朝日生啤確真歡樂！