名店集中地「Ginza Six」新建於2017年，屬銀座區內規模最大嘅購物中心，地庫層嘅商店主要都係同飲食有關，吸引到XO仔嘅係舖面尤其鮮明嘅「10FACTORY 銀座店」！

小店源於「柑橘王國」愛媛縣，品牌以不同品種嘅愛媛縣柑橘製出果汁、汽水、果醬、糖果、朱古力、雪糕等柑橘美食。店內有售肥肥家族最愛嘅朱古力柑橘乾；由於家人都比較抗拒白朱古力，細佬可以慳返少少。兩款朱古力柑橘乾中，「Orangette」（324円/件）嘅柑橘果乾明顯較為厚潤，朱古力脆皮同柑橘果香兩者嘅甜味好夾。不過更為乾脆嘅「Chocolate Mikan Rusk」（324円/件）就少咗份嚼勁，而且味道冇咁甜濃，唔係咁啱細佬口味。

全店最具人氣就係要排隊購買嘅柑橘飲品及甜品，有果汁、茶、汽水、酒、雪糕等七款可選。小肥第一杯先飲橙亮嘅柑橘果汁「Fresh-Squeezed Mikan Juice」（680円/杯）。鮮榨果汁十分清涼，而且鮮甜無比，實不用錯過，必喝推介也！至於杯柑橘啤酒「Mikan Biiru」（680円/杯）其實即係柑橘果汁溝啤酒，飲落唔似啤酒之餘仲失掉咗柑橘本身嘅鮮甜，組合有啲不知所謂，超唔掂囉！

柑橘產品專門店「10FACTORY 銀座店」簡潔亮麗，服務生和藹友善，柑橘果汁及朱古力柑橘乾鮮美可口，只係獨創嘅柑橘啤酒出咗事。

長輩要求食天婦羅，除咗要好食之外另附條件係要好坐，結果當然係要搵地膽幫手，由哥哥位日本女朋友推薦擁有六十多年歷史嘅老字號「てんぷら山の上 ギンザ」（Tempura Yamanoue Ginza）。如店名所示，「山嶺上的天婦羅」母店位於「Hilltop Hotel」山頂位置，為東京第一間能成為酒店餐廳嘅天婦羅店，神級地位不容忽視。

天婦羅專門店於2017年首設分店，所選嘅銀座區及Ginza Six商場均份量非凡！店子以木為主嘅裝潢簡約樸實，門面及用餐大堂嘅空間感一樣咁足，完全不失格調或氣派。店內並無花巧之裝飾或擺設，用上嘅全為木造餐桌及椅櫈，令開揚嘅間隔更覺通爽。最入一邊為最旺場嘅吧位，圍繞著幾位即炸美食嘅師傅。離廚房最遠嘅就係窗邊有靚景睇嘅散座。八人派對被安排入座最中央嘅長枱，每位席上都有自用嘅隔油網架及餐具，講究得黎好衛生。

埋位先送上熱毛巾。得悉家人來自香港，哥哥仔即主動以國語溝通及推介餐飲，並換上中文版餐牌，既親切又周到！大家都應推介揀咗12,000円/位或8,000円/位嘅「廚師發辦」作午餐，分別在於前者多兩味天婦羅及包有更豐盛嘅主食選擇。每客「廚師發辦」均配備調味三寶，即蘿蔔蓉、天婦羅秘汁、鹽。小肥所點嘅8,000円「廚師發辦」包有八款天婦羅：兩件活海老、兩款魚、星鰻、蓮藕、舞茸菇、茄子、伏見青椒。哥哥點嗰客12,000円「廚師發辦」就多咗慈菇同紫蘇海膽兩款天婦羅，另外魚魚亦為升呢版。新鮮炸出嘅天婦羅由姐姐仔索油後續件分配於各人嘅私家隔油網架上：

1)      兩隻天婦羅蝦嘅頭同身係分開上嘅，新鮮即炸嘅蝦頭極易入口，咬落鬆脆冇渣。

2)      修長嘅蝦身層炸皮巧薄不油膩，橙白紋理鮮明嘅蝦肉爽脆彈牙，十分清甜。

3)      天婦羅蓮藕超級厚身，幸好炸漿輕盈，蓮藕入口清爽得很，真係食到索索聲架！

4)      伏見青椒半爽半腍，意外地除咗有陣獨特嘅香味之外，仲有點回甘。

5)      茄子同蓮藕一樣咁厚，質感爽中帶腍。

6)      最後件舞茸菇芳香脆潤，可口味佳。

7)      唔係幾夠飽嘅幾位男仕結果要追加精選項目。所選嘅蠔隻名為「牡蠣」（1,500円），肥嘟嘟嘅外表已覺吸引，吃畢個個都有讚冇彈，証明堅掂！

8)      各款午市套餐可選嘅單尾不同，餐廳特意印出圖文並茂嘅「主食餐牌」，另貴客簡單易明得多。細佬所點嘅「蓋飯」包有甘甜味雜錦天婦羅蓋飯、醬菜、味噌湯。甘甜味雜錦天婦羅蓋飯個白飯底粒粒飽滿肥潤，舖面嘅雜錦天婦羅巧脆惹味。味噌湯內含蜆肉，味道鮮濃。伴配嘅醬菜清新爽脆，可一解熱氣。

9)      甜品可選咖啡味或綠茶味雪糕，均伴上紅豆蓉，清涼不溜滯。

天婦羅專門店「てんぷら山の上 ギンザ」環境寬廣樸實，服務生友善且有幹勁，待客之道盡顯誠意。午市「廚師發辦」用材上乘，質高美味，只係唯一價格偏高，不過考慮到此乃名酒店餐廳於高級商場開設之分店，論其舒適度、衛生要求及專業態度都係咁有水準，高價都變得可以接受。

早兩日先見識過日本卡通精品天堂「東京駅一番街」（Tokyo Character Street），買到XO仔同媽咪手仔都軟埋，真係冇諗過一山還有一山高，喺原宿竟然發現到個向上發展嘅精品天堂大廈「Kiddyland」，比「東京駅一番街」絕對有過之而無不及呀！

「Kiddyland」合共有五層高，雖然有𨋢搭，但每層樓梯嘅牆身都畫滿可愛嘅卡通，所以好多人都唔怕續層行，可以邊購物邊打卡，身心一樣咁健康。每層嘅精品款式及主題都唔同，其中最勁一定係自己擁有成個地牢嘅Snoopy Town啦！日本人嘅一樓（1/F）即係地面嗰層，推嘅都係新興人氣產品及潮流貨款；對上一層嘅2/F大多賣來佬野，包括迪士尼、星球大戰、芝麻街、迷你兵團等；3/F主要都係模型；而頂樓就由鬆弛熊同Sanrio分。全店可免費享用Wi-Fi，不同樓層亦設有收銀部，海外顧客如購買滿五千円更可憑護照即場退稅，所以大家記得要集齊好想買嘅精品先一次過埋單。有心睇的話會發現不少過氣嘅好野以特價發售，嘻嘻，小肥由下午買到天都黑齊，當然係執都寶啦！

別號「亞洲搶錢天團」嘅韓國明卡通Line Friends於世界多個角落都設有分店，其中原宿店於2018年裝修成東京旗艦店「Line Friends Flagship Store Harajuku」後重新開幕，吸引Line粉天天排隊入場。小肥於網上嘅資訊睇到旗艦店有售原宿店限定商品，所以點都要抽時間去𥄫𥄫。點知去到先發現樓底勁高嘅店子大就夠大型，不過所販賣嘅精品款式同喺香港見到嘅冇乜分別，更加係搵唔到所謂之限定商品囉，結果十分鐘已經行哂三層！反而最多及最受歡迎就係啲打卡位，要同巨型嘅Brown Brown合照仲排哂長龍，似乎個個黎親都係為影相打卡多過購物。

「たでの葉」（Robatayaki Tadenoha）隱藏於青山區內一幢不起眼嘅大廈二樓，從附近四周嘅環境及門外嘅氣味當真難以察覺到爐端燒店嘅存在。行上樓梯，步入餐室，發現全店十二個吧位均圍繞著老闆兼主廚小鶴清史氏（Kiyofumi Kozuru）先生嘅爐端大舞台，一人負責哂切、串、燒、煮等工序，透明度極高，唯一室內光線較暗，令拍攝難度增加。

小店由小鶴伉儷主理，男主內、女主外，合拍得非常之有默契。XO仔啲日文屬有限公司，小鶴太太特意寫埋漢字黎溝通，態度堅認真！小鶴先生提及自己家鄉好多狩獵者，所以有窿路入到高質嘅野味食材。餐店只有一款廚師發辦晚餐，10,000円/位，節令菜式當日先會知有乜，故未有餐牌提供。

餐具下嘅餐墊以型格書法道出店子務求貴客可於歡樂時光中以美食充電嘅「Power Spot」（能量景點）理念，有意思極！大大頁飲品牌有張黃色皺紙墊底，配埋桌上嘅小燈籠，感覺好似返咗古代咁。酒鬼們應推介試咗樽有年份嘅「2017年新政天鷲絨ヴィリジアン（Viridian）」日本清酒（7,200円/樽）；帶有乳酸味嘅酒品清爽到好似有氣咁，相當獨特。

1)      晚餐由豐盛嘅九小碟前菜拼盤作序，不同大小及形狀嘅碟盤十分吸睛。建議由十一點方向開始順時針方向食，順序亦即三文魚籽、芝麻菠菜伴蓮藕、山葵腐皮、熊肉絲、炸慈菇、味噌白鴨肉、水魚啫喱、蘿蔔，中央為豆腐乾拼香菇：

a)      拼盤上嘅三款小杯中，晶瑩橙美嘅三文魚籽濕潤惹味；芝麻菠菜伴蓮藕清新帶爽；而腍身嘅腐皮食落有點兒微微辣勁，都幾得意。

b)      第一味食到嘅野味熊肉絲混入咗醃蘿蔔絲，食落好似火腿絲咁，其實唔係好食得出熊肉有咩特別味。

c)      慈菇一向俾XO仔嘅印象係粉粉地同苦苦地，師傅巧妙地將慈菇切碎後炸煮，炸慈菇變得香脆鬆爽，易入口及討好得多。

d)      長輩果然係學識廣博，一聽到葫蘆碟上為「味噌白鴨肉」時，即諗到「連城白鴨」乃清朝貢品，屬珍饈也！搓成肉丸形嘅味噌白鴨肉內含洋蔥碎，甜濃爽潤。

e)      九款小點中最得小肥歡心嘅就係半透明嘅水魚啫喱方磚！啫喱清涼厚潤，入面嘅水魚裙邊清脆甜美，滋補養顏，超正！最後中間件豆腐乾一啲都唔乾，濕潤得黎有彈性，簡單加上兩片火腿已成功加添咸香。

2)      食完九小碟後，師傅戴著特製厚手套於高溫嘅黑炭沙堆嘅熱爐燒煮出嘅野味亦迅即陸續登場。打頭陣嘅為貌似八爪魚嘅燒水魚！細佬炆水魚同水魚湯都有食過，不過似乎爐端燒嘅水魚肉先最鮮甜及有嚼口，骨膠原豐沛都毫不溜滯。

3)      如相所示，燒鱔粗身得黎閃出光澤，頂面以紫蘇葉碎點綴令菜式芳香撲鼻。大肥爸爸同姨媽姨丈們都大讚靚鱔皮脆肉滑，啲肉仲要係滑到不得了嗰隻喎！

4)      食完兩道濃味嘅海鮮後，先有一碗仔清香怡神嘅金菇菠菜為味蕾洗滌一番。

5)      接棒嘅野鹿好似比翼雙飛咁，小燈籠旁放上伴配嘅鹽粉，擺盤精美得很！燒野鹿肉嘅外表與牛扒無異，紅潤粉嫩嘅野鹿肉油脂不多，質感軟腍，輕輕塗上金黃嘅辣根及灑上鹽粉足已吊出鮮香嘅味道。

6)      整晚之最必選黑色圓盒內鮮紅潤澤嘅野鴨內臟刺身！金碗內嘅野鴨內臟分別有鴨肝、鴨腎、鴨心，撈埋隻亮麗嘅日本生鵪鶉蛋黃，三款刺身柔順嫩滑，鮮美醒神！

7)      食完頂級嘅野鴨內臟刺身後即輪到燒野鴨肉。嘩，燒鴨皮層香脆中仍保持滑溜，鴨肉軟嫩可口，拼上大蒜更覺鮮香惹味，冇得彈呀！

8)      好似牛肉咁，燒野鹿都可以有不同燒法、切法、食法。切成幼條嘅薄燒野鹿扒鬆爽得黎肉汁豐腴甜美，個人覺得比第一款燒鹿肉更堅！

9)      吃畢兩種紅肉，師傅就安排咗一小碗酸味消滯嘅海帶漬物間場。

10)  壓軸嘅野味為滾住上嘅芹菜野豬五花腩煲，由小鶴太太續一分派。上枱時已聞到翠綠嘅芹菜傳出嘅芬芳，菜下嘅野豬五花腩肉不單巧薄，肥瘦比例更加係層次分明，簡單烚過肉質已夠鮮爽香潤，真係食到嗦嗦聲架！

11)  吃畢多道咁補嘅野味混身熱血，大廚以野生山藥磨煮成糊仔狀作單尾，可一解熱氣及油膩，妙哉！

12)  甜品柑橘類水果二重奏為晚白柚拼凸頂柑（デコポン），兩者均微酸帶甜，輕盈得黎有助腸胃消化。

店名取自「蓼葉」嘅「たでの葉」（Robatayaki Tadenoha）暗居於青山區內，室內並無花巧之裝潢，只有開放式爐端大廚房，由年輕嘅小鶴夫婦經營。十二個座位天天爆滿，全因店主待客誠懇，野味宴高質獨特，驚喜美味，豐盛難忘！客人彷如置身於鬧市中嘅鄉村大屋中享用剛捕獲嘅獵物般，締造出非一般嘅味覺旅程，屬「到此一遊」的好餐廳也！