肥肥家族於同年二月黎大阪時，有幸初嚐到抵食高質嘅星級法國餐廳「La Cime」，半年後與姨媽姨丈們重遊之地，四口子第一時間都話要同佢地再黎多次，因此店實屬必到餐廳之列！

經網上訂座後，好快就有專人以電郵確認詳情，清楚地告知午市依舊只供一款8,500円嘅節令九道菜餐單，並問及各人有否對任何食物敏感。

西餐廳極簡主義嘅室內設計同之前一樣，雪白嘅環境及裝潢一塵不染，而且完全冇話變黃變舊嘅痕跡，舒適乾爽，且高雅衛生。全程負責接待九人嘅仲係官仔骨骨嘅經理哥哥，其友善有禮及專業貼身之態度令一眾長輩都有讚冇彈，相當難得。

菜式全為廚師發辦，飲品則可各自點選。大肥例牌飲汽水，小肥就慣性地淨飲香檳，而幾位女士們就玩6,500円/位，包有香檳、紅酒、白酒嘅「配酒套餐」，價格比半年前多咗五百円。

九道菜午餐面目全新，驚喜果真連綿不絕。打響頭陣先有兩款配香檳嘅小食「Boudin Dog」及「Tartelette of Egg Yolk Confit」。前者貌似黑灰色小石嘅其實係炭包熱狗，師傅巧妙地喺盤子加上真石擺設，以真亂假，十分逼真，由於finger food設計用手食用，食客應該唔會搞錯。暖手嘅炭包熱狗鬆軟有彈性，中間夾咗條爽潤帶甜嘅腸仔，一口一件，很是輕盈。後者三文魚籽蛋撻擺到盛盆花咁，好有藝術性。其曲奇撻皮乾脆唔油膩，三文魚籽蛋黃餡半爆於口腔，濃味化進味蕾，感覺好非一般。

接著轉配白酒有第三道頭盤「Squash/Quinoa」，以潮流健康食材之一嘅藜麥墊底，加上一球清香柔潤嘅南瓜蓉，頂面伴上細細粒嘅爆谷點綴，口感有層次得黎好清甜，組口新穎討好。

法式九大簋原裝版本嘅三款主菜均為魚鮮，礙於小肥於網上訂座早已道出自己因舌頭不靈活而未能進食太多魚骨之菜式，其中兩款多骨嘅鎧鼬魚同鰻魚就轉咗做大廚家鄉特產煮成嘅「Soft Pork Bone from Amami Island」及「Roasted Pork from Amami Island」，即奄美大島豬軟骨及奄美大島燒豚肉。粉嫩嘅奄美大島豬味道清麗脫俗，先上嘅豬軟骨切成薄片，肉香骨頭卜卜脆，正爆！後上嘅燒豚肉則為兩件厚切豬腩肉，皮層香脆惹味，肉質鬆爽潤澤，一樣咁美味。

食法國大餐不能夠冇咗舊魚，接著嘅海苔鱸魚「Sea bass / Buckwheat / Lily Bulb / "Aosa" Seaweed」魚肉鮮嫩，食落口時傳出淡淡嘅海苔香，清新怡人。

輪到尾段甜品出場，首道「Lavendar Flavored Yoghurt Sorbet / Mozzarella」較輕巧，酸酸甜甜嘅薰衣草味雪葩帶有微微薰衣草花香，意外地同時灑上白朱古力碎同芝士粒粒都唔會覺得任何一方會好搶。

壓軸嘅「"Sansho" Pepper Chocolate Mousse / Island Banana / Hazelnuts」有柔潤香濃嘅朱古力慕絲伴兩粒皮脆餡滑溜嘅香蕉山椒朱古力，清香中帶出一絲辣勁，甜得好醒神。

最後午餐就由鮮艷精美嘅法式小點配餐茶或咖啡作結。好開心席上嘅每位長輩都食得超級滿意，有幾個仲即時推介俾親友，絕對唔講得笑！