去旅行揀地方食飯，不外乎經親友介紹或跟隨旅遊網、書籍或雜誌推廣。舊年遊京都時，第一個午餐就去咗超閃旅遊書介紹嘅「モリタ屋」（Moritaya）；全因為睇到於明治二年創業嘅餐店擁有自家牧場，壽喜燒及涮涮鍋均只限供應極品京都和牛。

「モリタ屋」有多間分店，細佬當然係挑選咗間離酒店最近，唔洗行出街，步行只需五分鐘嘅「JR京都伊勢丹分店」啦！雖然人多要訂位兼訂埋指定午市套餐，幸得酒店幫忙，XO仔又預足時間，來回幾次電郵迅即搞掂，極之簡易。九人仲被安排入座窗邊最佳位置，一邊進食可一邊欣賞藍天白雲下嘅京都鐵塔及靚景，真爽！

店子午市套餐可選牛扒、壽喜燒、涮涮鍋、或油燒，價格以和牛級數而定。深知家人都怕極級和牛超強嘅油份，故小肥亦只為各人揀咗中間價位嘅「松」及「竹」。原本全部人都要點食同一款套餐架，好彩酒店成功爭取到四加五嘅組合，家人方才可以分批試壽喜燒及油燒京都牛，當真感激酒店及餐廳雙方都咁通情達理！

翻閱桌上嘅餐牌時，發現原來午市仲有個「最高的飯菜」之「極み」（一人前 10,260円）午餐，包齊五色冷盤、和牛頭盤、和牛壽司、特選壽喜燒、涮涮鍋、油燒、湯、飯及甜品。不過講真除咗肥肥家族三大壯漢可以食得哂整份「極み」之外，相信其他長輩都未必有能力一人食一份；嘻嘻，等下次再黎京都時先叫黎試試。

可能負責我地張枱位嬸嬸諗住溝通會有問題，起初佢都有少少冷淡，但之後聽到小弟可以簡單日語對答後，即變得好客得多。佢解釋話食物一般都會由食客自己燒煮，不過得知席上冇人有食油燒和牛嘅經驗，佢就好好心機地重複示範咗兩次，細心得很。並教路食油燒和牛有三種食法：第一種係原汁原味、第二種係點檸檬醬油、第三種就係XO仔誤以為係薯蓉嘅蘿蔔蓉混醬油；個人覺得第三種蘿蔔蓉混醬油清新解熱得最合襯。

午餐順序由前菜食起，指定項目有清脆嘅薯仔及鮮嫩嘅蟹肉沙律。「松」級套餐比「竹」級貴少少，所以前菜都多咗舊。。。惹味嘅燒和牛。

オイル焼き「松」（5,724円）：燒煮前，京都和牛色澤鮮紅，雲石紋理分明，油脂分布均勻，賣相超掂！嬸嬸教話以慢火燒至底部油份有聲出，邊邊位開始轉色，即可返轉燒埋第二面。小肥食牛一向越生越愛，意外地今次件五六成熟嘅油燒和牛肉質鬆爽，咬落更覺肉汁豐盛，肉香甜美，正爆！跟餐仲有一大盤色彩繽紛，新鮮爽脆，好睇又好食嘅蔬菜。另附清新醒胃嘅漬物及暖胃嘅白飯同麵豉湯。飯後再以一杯熱茶及爽甜嘅生果作結，腸胃確真大滿足。

好多謝超閃旅遊書咁好介紹，讓肥肥家族認識到「モリタ屋」，輕鬆舒適地初次品嚐到油燒京都和牛。餐店環境優雅有景睇，抽氣足，服務生友善，油燒京都和牛絕對貨真價實，食到長輩們都話要推薦俾親友，証明夠堅！