三層高嘅「樂沐法式餐廳」猶如一座洋式別墅般，步入樓底高高嘅大堂，面對著接待處已感到餐店嘅氣派。核實訂座後，即由專人帶領往上層之用餐區域，貴客可選擇行樓梯或搭乘升降機。店子內外嘅燈飾、鮮花、擺設、傢俱等，包括洗手間都流露著華麗嘅格調。

同樣樓底極高嘅用餐大堂環境優雅，光線柔和，空間感足。小肥早於網上訂座時為家人從三個規範餐單「創造」、「感官」、「記憶」中選訂午餐，每款菜單均可加錢玩埋配酒。侍酒師不單加配日本清酒，更呈上店子自家品牌嘅香檳，就連紅酒都用上潮流新興嘅Coravin取酒器，可謂驚喜不斷。

搞掂好飲品，姐姐即送上兩款海藻味及海鹽味牛油，告知大家可先食用花瓶內修長嘅麵包條，食完佢地會陸續換上不同款式嘅自家製麵包，當中最正必選熱辣香醇惹味嘅高梁酒臘肉包及芳香微甜嘅蜂蜜麥包。

午餐由兩道節令下酒菜作序。第一味金光閃閃嘅「黃豆卷拼香草芝士球」中黃豆卷皮脆餡軟味淡，剛巧同濃味嘅香草芝士球造成對比，都幾得意。第二道「海鮮脆米通」鮮黃色嘅米通鬆化脆巧，連同米通上嘅帶子魚碎食落口即增添鮮嫩。

「感官」先由熱湯「鮮鵝肝/芥菜心/香草」接捧。上枱時，湯碗以一塊薄薄嘅鵝肝醬蓋上，再由服務生續一斟入清湯，鵝肝醬隨即溶化並為湯品揭盅，露出碗內其他湯料，賣相極之震撼吸睛。可能自己唔係太鍾意食菜啦，故對菜味極濃嘅清湯只可以用「苦」字黎形容，幸好鵝肝醬幫忙調和咗陣菜味，先變得易入口得多。

午餐第一款肉為顏色鮮美嘅雞翼組合「古早小母雞翅/甜蝦/番茄/酸黃瓜/香草蛋黃醬」，另配一小杯黑色嘅甜豆湯。已去骨嘅雞翼包住咗甜蝦同雞肉，皮脆肉爽嫩，輕輕點上色彩繽紛嘅香草蛋黃醬就好比畫龍點睛般同時提升視覺及味覺嘅享受，實在妙極！

接著嘅「緬因龍蝦/西班牙辣腸/香草青醬/覆盆子」色澤同樣鮮美，師傅以不同調味、醬汁、緬因龍蝦等食材重新砌成一幅立體嘅龍蝦食物圖，當真令人嘆為觀止！龍蝦肉爽脆彈牙，配上秘醬同時帶出花香、果甜及微辣，味道複雜得黎和諧新穎。

主菜上枱前，哥哥先以銀盤展出多把靚刀讓食客挑選，再將刀子安全地擺放於牙形嘅刀架上；「樂沐」嘅女主人明顯喺用餐所有細節都有花下不少心思。「感官」嘅主菜「嫩烤鵝肉/姬松茸/芥菜/米湯」雖外貌為最平凡嘅一道，味道卻絕不遜色之前道「緬因龍蝦」。汁液上枱時先會即場淋上，以確保新鮮度，碟上兩件鵝肉皮層香脆，肉質厚而鬆軟多汁，可以話係小弟至今食過最好味嘅鵝肉；伴碟嘅姬松茸則芳香惹味嫩脆，一樣咁出色！

甜品出場前先由清新爽甜嘅「香桃雪葩」為味蕾洗滌一番以作準備。套餐第一道甜品杯「可可清湯凍/焦糖蘋果塔雪酪」其實係朱古力味淡淡嘅啫喱拼果香甜甜嘅焦糖蘋果雪葩。而第二道紅黃鮮明且時代感極重嘅則為「現代主義之乳酪蛋糕」！餐牌上注明，芝士蛋糕嘅紅、白、黃網格外型構思源自荷蘭藝術家「彼埃•蒙德里安」（Piet Mondrian）及「密斯•凡德羅」（Mies van der Rohe）嘅「新造型主義」風格。極富立體感嘅芝士蛋糕微甜軟潤，輕巧不溜滯，放進口中就好似吞噬咗件藝術品般，認真搞鬼。

食到咁飽最好就係飲番杯飛沙走奶嘅特濃咖啡。跟餐茶及咖啡最後仲有的骰嘅「精緻小點」；每人都有兩粒，細細粒，容易食。黃色小球乃脆皮清涼嘅乳酪雪糕棒，而兩球中央嗰件則為巧薄爽脆嘅鳳梨塔，兩者均微微酸甜，毫不溜滯。