上次與家人訪台時，其中一間令長輩們留下美好及深刻印象嘅餐廳就係「邊田庄」，所以今次婚宴之旅結束前都想再度光顧。

闊別一年多，餐店仍用上美艷嘅鮮花裝飾，環境依然典雅華麗，衛生舒適。此外，年輕嘅服務生一樣溫婉好客，細心體貼。

眼見餐牌上嘅菜式冇變，就連價格都未有提升，XO仔就好放心地翻點之前覺得美味嘅鎮店佳餚，另加幾款青菜：

1)      芝麻牛蒡（NT 280）：唯一保持水準嘅芝麻牛蒡修長香脆，輕巧易入口。

2)      油淋去骨雞（NT 380）：第一次黎時，去骨雞明明以藤篩承載住，淋上嘅油都會慢慢滴落藤篩底嗰隻碟上，但今次卻換上平平無奇嘅白碟上，雖然旁邊都插有兩朵鮮花，但就少咗份田園味道，外表不及之前震撼，細佬因有比較下就覺得差咁啲野囉。如果唔理外表的話，平心而論，其實油淋去骨雞肉質仲係咁香嫩潤滑，食落惹味得黎一啲都唔油膩。

3)      豆酥鮮蚵豆腐（NT 280）：因自己對餸菜太有信心，所以未有拍下太多照片，包括依味豆腐在內，還望大家見諒。以熱鍋燒住上嘅豆酥鮮蚵豆腐夠就夠新鮮熱辣，但同上次比鮮蚵份量就明顯少咗，而且不再肥美。

4)      淮陽小籠湯包（NT 180/八隻）：小籠湯包依舊以木盒呈上，上枱時木邊可見蒸煮後留下嘅倒汗水。如相所示，細小嘅湯包皮層偏厚，入面唔多夠湯汁之餘，個豬肉餡心更略為嚡口同冇味，也太失敗了。

5)      紅燒獅子頭（NT 360）：以熱鍋上嘅紅燒獅子頭一客有四件。相中可隱約見到獅子頭呈深啡色，但係要食落先講得出獅子頭太瘦，因為用得唔夠肥豬肉就變得乾乾嚡嚡，不吃也吧！

6)      酥炸蒜香肥腸（NT 380）：酥炸肥腸擺盤同之前一樣，只係當對比新舊照片時就知份量少咗，面對通貨膨脹，人家將貨就價都好應該。問題係炸大腸雖則香口，但咬落質感偏韌，質量可謂大不如前。

7)      培根梨山高麗菜（NT240）：因為今次同行嘅家人都鍾意食菜，所以就點多咗幾款青菜，其中此味高麗菜色澤翠綠，入口清新爽脆，實屬正菜也！

8)      鹹蛋山苦瓜（NT 260）：黃金苦瓜喺香港就食得多，台灣版鹹蛋山苦瓜同港式黃金苦瓜最大不同之處就係個鹹蛋山原來係鹹蛋黃醬黎嘅，故效果較為輕巧。切成幼絲嘅苦瓜極之爽脆，混入鹹蛋黃醬食可真甘香味佳。

9)      雞汁娃娃菜（NT280）：滾住上嘅娃娃菜清甜軟腍，奶黃色嘅雞湯底香濃甜美且毫不油膩，盡顯簡單美！

10)  冰花楓糖露（免費贈送）：冰花楓糖露芳香潤喉，清涼微甜，雖免費贈送但都絕無欺場。

國泰航空設於桃園國際機場嘅貴賓室面積寬廣開揚，最重要係冷氣足，故極為舒適。貴賓室除咗有電腦室同梳化客廳之外，最受歡迎就係個自助餐廳區。

用餐區有多張合拼式及卡位散座，落單處旁仲有一列圍繞住開放式廚房嘅吧位。肥肥家族原本已有打算返港後先食晚餐，所以都係飲住等，後因螢幕顯示出航機一再延誤，見唔係太對路就去咗餐廳度邊食邊等，飲完奶茶再轉飲埋酒：

1)      Bubble Milk Tea：台灣出品嘅珍珠奶茶香滑清涼，冇得頂呀！

2)      燒賣：燒賣應該係即食貨式，雖然唔及平時飲茶嗰啲好食，不過就係個貴賓室入面最好食嘅點心，叫做可以頂得住。。。

3)      蕃茄蛋沙律三文治：三文治個包不單硬，而且仲勁乾同嚡，大肥爸爸連碗都咬得蹦，卻未能咬得爛個麵包，相信唔洗細佬多加形容啦！

4)      生煎包：淨睇相都應該估到個生煎包皮層厚硬，餡少且毫無肉汁，失敗過失敗！

5)      湯米粉：餐牌上唯一最好食就係碗米粉，因米粉幼嫩，湯底夠清，入面兩粒貢丸又大又惹味。

國泰航空商務艙嘅獨立座位闊落且空間感足，不過都係嗰句，機艙冷氣唔夠凍，夜機冇太陽曬住都一樣坐到出哂汗，幸好機上有靚香檳無限添飲，可助XO仔一解熱氣。

航班飛行時間只有個幾鐘，但都包咗份簡單嘅晚餐：

1)      麵包：餐包鬆就夠鬆，無奈質感又乾又嚡，塗上牛油都無補於事。

2)      巴馬火腿蜜瓜卷伴小龍蝦芥末馬鈴薯沙律：沙律看似鮮美清爽，可惜巴馬火腿食落淡而無味，除咗啲菜夠爽脆之外，其他乜都好嚡，食到細佬搖哂頭，唯有飲多兩杯自我安慰啦！

3)      塔香炒雞球配蛋炒飯及白菜：小肥可能唔識分辨芥蘭同菜心，但係都可以幾肯定餐碟上嗰條係小棠菜喎。。。「國泰」作為香港代表嘅航空公司，是否理應用返香港人熟悉嘅蔬菜名呢？！單憑相片都應該睇得出小棠菜乾噌噌，咬得真係好辛苦。主角塔香炒雞球惹味就夠惹味，不過啲雞肉好嚡，就連個蛋炒飯都乾硬過人，當真太令人失望了！

4)      香芒芝士蛋糕：甜品香芒芝士蛋糕微甜柔軟，係成份飛機餐中叫做最好味嘅一道。