國泰航空「寰宇堂」商務貴賓室主要分「風味坊」及「咖啡閣」兩個區域，前者主要係高櫈吧位，後者則為較舒適o既梳化椅。雙方間隔都好開揚，可惜駐場服務生完全唔主動，感覺也太hea 了。

「風味坊」個自助區內可見多款凍熱飲品及點心小食，當中牛肉燒賣最搶手同最好味。食客亦可於開放式廚房點選即叫即煮o既雲吞湯麵、擔擔麵、魚蛋湯河粉、野菜稻庭烏冬及三款包品。如相所示，魚蛋河同野菜稻庭烏冬個賣相都唔係咁得，食落更加係淡而無味，件生煎包則包皮過厚，餡料乾嚡，講真都幾恐怖。

國泰航空「寰宇堂」頭等貴賓室比起隔壁o既商務貴賓室明顯豪華得多。頭等貴賓室主要分為「浴泉居」、「逸雅閣」及「凱旋吧」三個區域，環境時尚雅致，服務生亦體貼好客得多。

比商務貴賓室多咗o既「浴泉居」其實係設有浴缸o既大洗手間，設施齊備，且極之寬敞。「凱旋吧」為酒吧及客廳區，當中o既厚墊梳化椅仲有獨立式可選，私人空間足，貴客更可無限享用多款酒品；香檳都有三款可選，包括粉紅香檳「Moet & Chandon Rose Imperial NV」，XO仔同媽咪有酒飲當然係唔怕航班延誤啦！

國泰航空商務艙o既座位闊就夠闊，無奈機上唔多夠冷氣，只穿短袖T裇o既小肥唯有狂飲凍水解熱。

短途航班包有簡單晚餐及限定酒水：

1)      前菜之時令鮮果有西瓜、奇異果、火龍果、哈蜜瓜及菠蘿，酸多過甜，不過大肥話齋，飛機餐唔可以要求太高。

2)      主菜其中一款為「烤澳洲牛柳伴馬德拉酒汁，配薯蓉，菠菜及胡蘿蔔」，牛柳個味道還可以，但肉質偏咗少少韌同嚡，唔係細佬杯茶囉。

3)      哥哥話令外一款主菜「香蒜辣汁蝦球，配白飯，芥蘭及胡蘿蔔」啲蝦夠大隻同爽，個汁香辣惹味，意外地比個牛柳主菜美佳。

為怕天有不測之風雲，或難預計週末交通，家人早已決定入住小表弟舉辦婚宴之酒店「台北國賓大飯店」（Ambassador Hotel Taipei）。由於航機延誤上數小時，舅父雖訂好專車接機，四人到達酒店都已過凌晨兩點。不過夜啲到都有好處o既，街道上零塞車，辦理入住手續又唔洗排隊，爽呀！

小肥見識少，其實當第一次聽到「台北國賓大飯店」個名時，真係以為酒店係好中式嗰啲大飯店，完全冇諗到除咗個大堂掛著大紅燈籠外，店內四周連房間及商務中心都極為洋化，絕對係一間高級酒店！