「銀座うかい亭」（Ginza Ukai-Tei）為名日劇女主角Doctor X最愛嘅星級鐵板料理。餐店銀光閃閃嘅正門由兩位叉羮護法駐守，入口嘅梯級舖上紅地毯，左右兩旁排出聖誕花，節日氣氛濃烈且氣派十足，相信晚上亮起燈飾時會更壯觀亮麗。店內光線柔和，帶點古堡味嘅歐陸式裝潢及擺設高貴有格調。面積寬廣嘅餐室中央位置有個弧形嘅大鐵板舞台，貴客大多為二至四人一組，亦即搭枱制。

八人派對被安排於廂房內進行，私隱度較高，厚墊椅櫈十分舒適，仲有專人貼身服務，自動換碟及加酒之速度都相當理想，服務生態度誠懇友善。每位席上擺有齊備嘅西式餐具及餐牌，簡潔衛生。餐巾上以銀絲綉出店名，極富貴氣，而且好襯「銀座」個地點添。

餐牌印上兩款聖誕套餐「Christmas Lunch Course」（12,960円/人）及「Christmas Special Course」（32,400円/人）嘅詳盡內容。酒店以電話訂座時，接線生講明八人要清一色訂同一個餐，當時即點咗「Christmas Lunch Course」，用餐當日經理姐姐卻提議不妨換成每款套餐要四份，臨時嘅彈性改動其實正合姨媽們心意。嘻嘻，既然係慶祝聖誕節，咁當然係要叫酒飲啦，相信人多續樽叫應該最抵，所以就應推介點咗枝日本清酒「磯自慢純米大吟釀四合瓶」（21,600円）。

聖誕海陸大餐由年輕俊朗嘅大沼豐師傅（Yutaka Onuma-san）全權負責。師傅開始動手燒煮前，先展出鮮美嘅食材，包括龍蝦、帶子、和牛，並問及各人嘅飲食喜好要求，如敏感問題、牛肉生熟度等等，細心兼認真。

1)      「Christmas Lunch Course」由橙亮嘅「Ocean Trout with Seasonal Vegetable」作序。貌似三文魚嘅兩件Ocean Trout（Google之神譯作為「鱒魚」）刺身厚潤柔軟，連同頂面嘅魚子醬及碟邊嘅白汁食落口，鮮味洋溢味蕾。

2)      第二道「Foie Gras Sauteed」賣相未必吸引，但一刀切落去，手仔已感到從刀鋒傳出鵝肝軟滑嘅質感，入口即可証實靚肝皮層香脆，肝心極其幼嫩，當真肝不可以貌相哦！

3)      是日例湯「帝王蟹湯」鮮濃芳香、窩心暖胃。

4)      鐵板菜式由「Scallop with Marinier Sauce」打響頭炮，型男師傅分開咁燒煮帶子及以牛油煮汁，最後一刻刨上檸檬粉後即搞掂。帶子煎煮時間掌握得恰到好處，外香脆內軟嫩，未入口已聞到檸檬粉傳出嘅清新香氣，牛油秘汁令帶子更為鮮香甜美。

5)     兩款午餐中最多功夫就係「Christmas Special Course」嘅龍蝦主菜「Homard Brue Steamed」，大家可目擊鹽山嘅建造及龍蝦如何於鐵板上蒸煮、去殼、加燒、調味，真係大開眼界！

6)      兩份套餐其實都包咗一道和牛「Wagyu Beef Steak with Onion」，所選之部位因應套餐價格而有所不同，厚身嘅為牛柳，雲石紋理交多嘅則為西冷。得知席上全為家人，師傅就主動提出每人每款分半件，一同試齊兩款靚牛。肉質紅潤軟腍嘅和牛半溶於口腔，油脂及肉汁同樣豐腴。

7)      單尾為米形意粉「Risoni」，只用芝士調味都好溜吓，所以每人一小碗份量已經好夠。

8)      甜品環節進行前全體都要先移玉步前往後廳嘅豪華梳化區。點好餐飲後，妹妹隨即推出聖誕版甜品車，並續一切出鬆軟香潤、微甜不滯嘅「Christmas Strawberry Cake」。

9)      喺日本飲特濃咖啡真係可以保證堅夠濃。

10)  另伴嘅四色朱古力就好甜吓，邊飲咖啡的話絕對唔需要加糖。朱古力四種口味分別為紅色嘅士多啤梨味、白色嘅榛子味、綠色嘅開心果味、啡色嘅威士忌味，對果仁敏感嘅朋友要小心唔好食錯。

於銀座區購物真係可以停唔到手架，不過點買長輩們中途都要歇一歇。原本計劃咗去上榜熱店「Tricolore」飲下午茶，無奈店子早已滿座，八人唯有改去附近仲有大把位嘅「Noa Café」。

前往地牢餐廳必需行落十幾級樓梯。適逢聖誕佳節，接待處擺出聖誕樹，好有氣氛。服務生態度唔算差，只係比起平時遇見嘅差咗份熱誠同衝勁。黐立立嘅雲石餐桌上有自助餐具及餐紙，埋位姨丈即要狂抹，明顯衛生水平唔係咁高。厚本餐牌共有十五頁之多，名就日英對照，但詳細說明就只有日文版，另附彩圖參考。小食及甜品系列大多可以散點或跟指定飲品叫套餐。

1)      Hot Cocoa（620円）：細佬杯熱朱古力飲落淡而無味，而且稀如奶水，奶味多過朱古力味，完全唔掂！

2)      姨媽姨丈們分咗個Panini Set（1,100 円）同Mont Blanc Waffle Set（1,420円），食後感想係：「Panini好似烘過嘅三文治咁，嗰餡唔乾，味道一般。粟子Waffle個樣靚過客Panini，個味唔會太甜，正正常常。」

3)      Dark Syrup & Soybean Flower & Sesame Gelato Waffle Set（1,420円）：節令限定嘅「黑蜜糖芝麻雪糕窩夫」賣相甚為震撼，兩件厚厚嘅窩夫中間夾咗球芝麻雪糕同忌廉，頂面再淋上黑蜜糖漿及黑蜜糖粉，顏值夠高。配料芝麻雪糕清涼微甜，忌廉亦幼滑軟潤，當中嘅黑蜜糖微甜討好，只可惜窩夫厚而偏實，毫不香脆，唔得鬆化，直令甜品美味程度大打折扣。

聖誕節最旺場嘅食肆主要都係西餐廳，日本亦不例外，結果正日晚市只有酒店壽司店「銀座久兵衛 京王プラザホテル店」（Ginza Kyubey, Keio Plaza Hotel）有位。多人派對之訂座必先預定埋清一色嘅晚市套餐，團長就從六款中選出唯一取自店名嘅「久兵衛御夕食」（Kyubey Assorted Sushi；17,820円/位），共包有十六件壽司及卷物。

一家八口被安排入座「桜」房中進行，要先除鞋及脫去外套才可入座。座位均圍繞著主廚小高師傅嘅大舞台，不過由於全冇椅背或椅柄，長輩們進出時都甚有難度。每位席上有一個托盤擺放齊備嘅自用餐具及醬油。食物早已訂好，飲品就各自叫。四頁飲品牌日英對照，簡單易明。小肥自己叫咗枝細瓶裝日本清酒「八海山純米吟釀」（3,330円/300ml）。

面相嚴肅嘅小高師傅其實十分友善，眼見跟長輩們介紹魚生時發生言語障礙，佢就自動玩看圖識魚。晚餐嘅十六件壽司雖則續件上，但大部份嘅魚生早已切好於砧板上，等待大師傅續一握製；當時感覺其實有少少不對勁，因為印象中傳統做法好似續款靚魚由師傅即場處理喎，何況高級酒店餐廳唔係應該更講究咩？！

1)      師傅忙於準備壽司前，先安排一小碗海帶為食客潔淨一吓味蕾。

2)      打頭陣嘅為鮮紅亮澤、厚潤帶爽嘅「醬油中卜口壽司」。

3)      意外地，「肝醬剝皮魚壽司」味道較清淡，唔似平時食開嘅咁香濃，而且魚肉偏韌，個人有少少失望。

4)      面上灑咗鹽嘅「魷魚壽司」比剝皮魚壽司更硬同韌，食落只有強勁嘅咸味，直令XO仔食到咪起雙眼，面部表情確真與被傷口上灑鹽無異。

5)      輕輕燒過嘅「海帶鯖魚壽司」鮮香帶甜，比喺香港食開嘅柔和易入口得多。

6)      或許細佬嘅辨魚能力唔係咁強，食完鮮紅厚潤嘅「まぐろ壽司」後即同旁邊嘅姨丈細聲問及點解咁快會重複嘅，結果聽返錄音方才發現第一件落肚嘅原來係中拖羅。

7)      初嚐嘅「鰆魚（Sawara）壽司」質感猶如鰤魚般爽厚肥潤，掂！

8)      成晚最多功夫必數即場處理生猛狂跳嘅竹籤蝦！活潑嘅蝦隻於冰鎮冷靜過後就以竹籤串起，隔咗一陣先由大師傅親自去殼、挑腸、並握成壽司。「竹籤蝦壽司」超級爽彈清甜，屬整餐之最！

9)      已塗上醬油嘅「海膽壽司」鮮濃嫩滑，不過可能係自己俾香港相熟嘅師傅們竉慣，硬係覺得份量唔夠澎湃咁。

10)  色澤粉嫩嘅「大卜口壽司」紋理鮮明，半溶於舌上，鮮味迅即洋溢口腔！

11)  微微燒過嘅「赤鯥壽司」厚潤肥美，鮮甜可口。

12)  竹籤蝦嘅蝦身就做咗「竹籤蝦壽司」，其頭尾就交由廚房炸煮。雖則師傅話蝦頭及蝦尾可連殼吞落肚，無奈食落勁多渣，唔係咁吞得囉。

13)  「赤貝壽司」不單外表橙亮有光澤，咬落更加係爽潤有彈性，滋味無窮！

14)  第一次接觸嘅銀皮「慈魚壽司」魚肉白裡透紅，唔知係魚味偏淡，定係師傅調味時重手咗少少，細佬只係食到成口薑嘅辣味。。。

15)  只屬和暖嘅「麵豉湯」味道偏咸，甚為失色。

16)  「蜆壽司」味道香甜就夠香甜，不過有點好奇怪，蜆隻一半爽嫩，另一半則嚡韌有渣，質素好似唔係咁得。

17)  幾件吞拿魚壽司中唯有此味溶溶爛爛嘅「火灸吞拿魚壽司」賣相最唔得，亦相信讀者們單憑照片都唔會估到係酒店餐廳嘅出品，仲要係名牌酒店「Keio Plaza Hotel」！XO仔見狀頓即覺得師傅除咗有敷衍遊客之嫌，對自己更加係毫無要求，令人失望透。

18)  壽司餐可以話越食越差，即使小肥一向怕骨唔食鱔，兩件「穴子壽司」都係轉讓俾旁邊嘅姨丈，但都講得出穴子切得同燒得都幾有問題吓。

19)  姨丈講得都幾有道理，食完幾件味重嘅壽司後先上件未有調味嘅「中卜口壽司」，即使係靚魚都已經食唔得出其鮮與甜，可算係設計及舖排嘅失誤。

20)  四色卷物外型唔係太靚，但幸好味道正正常常，十分爽脆。

21)  食得出「蛋蛋」方磚啱啱喺雪櫃拎出黎，溫度凍而且硬身，吃畢直教人繼續搖頭。

22)  反而壓軸嘅「紫蘇蘿蔔卷」巧薄清新，芳香爽甜，更可一解膩感，清新消滯。