「東京凱悅酒店」房費所包嘅早餐券適用於酒店三樓之「日本料理 佳香」，早上七至十時可享用和式自助早餐（原價3,100円/大人；連稅3,683円/大人）。

日本餐廳以木為主嘅間隔感覺十分溫和舒適，室內外可見簡樸嘅屏風、禪式石池及靚花擺設，雅致得很。聖誕期間，店內坐滿食客，為怕影響他人，細佬不便於用餐區內隨便拍照。團友們未能一齊坐，不過都被安排入座鄰近嘅二至四人散座。

和式早餐每人包咗一客燒魚、麵豉湯及飯或粥：

1)      燒魚皮層香脆，不過就勁多骨，對XO仔黎講實在係太高難度啦！

2)      麵豉湯清香暖胃。

3)      粥品上枱前都係用火煲住嘅。大大碗白粥熱辣辣，而且軟綿綿。

自助餐飲區內有不少送粥嘅濃味配料，包括漬物、關東煮，當中個人鍾情食獅子狗卷。健康之選有生果、果汁、乳酪、清水。其餘有香腸、煙肉、雜菜、炒蛋、沙律等。熱食中最有驚喜就係芳香無比、爽潤巧脆嘅天婦羅舞茸菇，送粥一流！

講真遊日本絕少會揀中餐食，因為個心總覺得日本版嘅中華料理唔可以同香港食到嘅媲美。機緣巧合下，於家庭聚會中跟叔公嬸婆坐埋一枱，大談食經時得知兩位長輩每次去東京玩都必定要訂位去「日本橋 紫苑」食翅翅，肥肥家族聽到流哂口水，所以就決定去見識吓！

餐店位於日本橋三越本店新館十樓。正月將近，接待處旁展出多款迎春精美禮盒。店子設有兩間私人廂房，分別可容納八人及十二人。樓底雖然唔算高，不過勝在有地毯吸音，厚墊椅櫈亦十分舒適，個人只係略嫌冬天嘅暖氣過強，越食越熱。四人被安排入座用餐大堂靜靜嘅一角，半邊為梳化。舖有白色枱布嘅餐桌上簡單擺有自用餐巾及筷子，埋位續一派上熱毛巾，衛生潔淨。

適逢平安夜，午餐就點咗樽細粉紅色香檳碰碰杯。有一點好奇怪，就係香檳開咗後就一直放喺枱上，未有放入冰桶保凍，喺二十多度高溫下迅即變暖；此外，成餐飯都冇服務生為三人斟添酒品，結果要自己黎，感覺好似唔係太專業囉！唔想咁早飲酒嘅哥哥就叫咗壺台灣清香凍頂鳥龍茶（540円/位）。

厚本餐牌中、英、日對照，推介菜式更附有彩圖。最意外就係遇上水魚節，有成頁咁多嘅水魚菜式，小肥喺香港都未見過。出門前得到叔公同嬸婆教路，午餐每人只需點一份「紅燒排翅毛鹿鮫」（21,600円/位）已經夠哂飽。以鐵鍋滾住上枱嘅「紅燒排翅毛鹿鮫」比細佬個頭還要大，賣相震撼到連附近嘅食客都忍唔住要八吓四口子食緊乜，認真唔講得笑！大大梳靚翅不僅熱力十足，而且每份都係咁厚身，實屬勁量級！翅翅質感半腍半爽，芬芳潤滑，紅燒湯底鮮濃甜美，極品也！請留意，貴客可另加2,160円由上湯底轉為蟹湯底，不過哥哥同媽咪都話原味更出色。

靚靚媽咪同姨媽們愛購物，不過除咗衫褲鞋襪之外，最令大家瘋狂嘅都要數卡通精品，嘻嘻，依方面XO仔絕對遺傳到佢地啲基因呀！家人畢竟不同年代出生，陪著長大嘅卡通人物亦好唔一樣，上網找尋購物熱點時竟然俾細佬發現東京車站內原來有條「東京駅一番街」（Tokyo Character Street），有齊大家心儀嘅蠟筆小新、鬆弛熊、Hello Kitty、比卡超、龍貓、P助等角色嘅精品店，就連外國代表史努比自己都有個Snoopy Town！食嘅、擺嘅、玩嘅乜都有，款式琳瑯滿目，特價貨品同扭蛋抵過香港多多聲，絕對稱得上為精品天堂！買夠五千円仲可以憑護照退稅，不過大家要記緊於購物前先去服務櫃檯登記及索取「免稅收理單」哦！

第一次喺東京過聖誕節，平安夜就一反傳統地棄選西餐，於日本名飲食網「食べログ」（Tabelog）度揀咗間超高評價3.95分（最高4分）嘅「東京肉しゃぶ家」（Tokyo Niku Shabuya）食日式涮涮鍋，一於烚吓烚吓咁過。

餐店木造嘅門面有射燈照明，於街道上十分起眼，只係外國人未必識睇其日文嘅招牌。小店一眼睇哂，只有十二個圍繞住師傅大舞台嘅吧位，光亮簡潔，晚市要分兩輪都合情合理。裝潢中最可愛就係牆上一幅著住和服嘅狗仔畫像。細問下，得知講得一口流利國語嘅店主兼主廚高忠伸先生為韓日混血兒，2016年創立嘅店舖為與太太之愛情結精，通往廚房通道之紅白門簾正正印上二人嘅芳名，濃情厚愛盡在不言中！

飲品選擇中，日本清酒九成九都只可以續杯叫，姨媽們見係聖誕節就決定豪啲飲十四代（1,250円/盒），可惜酒品唔知開咗幾多日，飲落當中應有之酒味已經揮發咗大半。聖誕期間，餐廳只提供一款廚師發辦聖誕大餐，每位22,000円，另加8%稅，訂座時必先預繳五成訂金：

1)      為平安夜晚餐作序嘅兩片薄切牛脷色澤粉嫩，輕輕燒過足以令其質感鬆爽軟潤，用金碟承載更顯佳節盛宴貴氣十足。

2)      同樣以金盤呈上嘅兩件北海道 ニシン（Nishin）魚籽刺身顏色同口感都一樣咁清新，不用點上調味已夠鮮爽。

3)      另配嘅牛尾湯好暖胃，不過就有少少嚡同粉，唔係咁啱小弟口味。

4)      和牛海膽卷橙紅嘅配搭十分鮮艷，一口食落去，黏上甜豉油嘅和牛薄片及海膽刺身同時化於舌上，兩款海陸主材嘅芳香及鮮甜慢慢滲進味蕾，美妙極！

5)      或許係個人對牛尾嘅偏見，XO仔覺得清燉牛尾雖然好夠腍，不過其肉質及湯底均偏油膩同唔係咁夠味，反而頂面點綴嘅蔥絲勁清爽惹味。

6)      不知不覺已經食到第六道菜，唔講真係未必睇得出熱食嘅三款主材咁猛料，包括魚翅、鮑魚、海膽，咪即翅鮑膽？！舖面嘅一梳梳魚翅爽脆非常，撥開先見到魚翅塔原來以厚潤彈牙嘅鮮鮑及嫩滑嘅海膽墊底，組合口感豐富，鮮美可口。

7)      正當細佬以為翅鮑膽屬重頭戲，點知跟住上場嘅香箱蟹再另起高潮，因為席上嘅長輩全為蟹痴。嘻嘻，拆蟹重任當然係師傅預先做啦！已去殼嘅香箱蟹肉橙白艷麗、幼嫩柔軟、鮮甜無比，底層嘅碎柳混入橙美嘅蟹膏及蟹籽即增強厚潤濕脆，正蟹確真無懈可擊！

8)      既然店名「東京肉しゃぶ家」用上「肉しゃぶ」（Niku Shabu）而起，理應為其專長，海陸大餐亦不可缺少涮涮肉！靚肉上枱前先要擺好嗰陣，滾熱辣嘅火鍋每二人一組，調味嘅芝麻醬、酸汁、蔥碎、蘿蔔蓉、薑蓉則每人一份，設備及配料都係咁齊全，絕對講究，且衛生非常。三款肉品為不同部份之和牛，單憑其獨特嘅紅白紋理已睇得出油脂分佈及比率有所不同。下圖中最多雪花嘅和牛薄片每人一大塊，半溶於口，係一種充滿犯罪感嘅美味！件數最多嘅牛脷因切得夠薄，於滾湯中拖兩拖已夠熟，入口軟腍帶微微韌度，同頭盤輕輕燒過嗰兩片牛脷完全唔同。最後兩件和牛看似厚身，但烚完縮埋水後就剛剛好，咬落肉質超級柔順軟滑，每個部位都各有特色。除咗和牛之外，涮涮鍋環節每人仲有一杯仔正菜及雜菌，每款均芳香輕盈。

9)      肉食中壓軸上陣嘅和牛壽喜燒拌蛋黃泡泡外表鮮黃亮麗，夠哂搶眼！經過蛋黃泡泡洗禮嘅和牛壽喜燒尤其芬芳香滑，咀嚼時壽喜燒嘅甜味慢慢散發進口腔，真係甜到笑架！

10)  單尾嘅一碗清湯麵品十分暖胃。

11)  其實食完碗麵大家都已經攬住個肚肚話飽，誰不知結尾仲有個香箱蟹飯，師傅攞個蟹煲show quali嗰一刻也太震撼同吸引了，順便提及到飯品混入咗醋醋可有助消滯，XO仔心諗幾大就幾大啦，放緊假一於去盡佢，飽極都要騰出空間食多碗飯！香箱蟹飯個飯底粒粒飽滿肥潤，以香箱蟹肉、蟹膏、蟹籽撈製，集齊爽脆鮮嫩清甜於一身，正到暈呀！