雖則入住「Fraser Residence Nankai」包哂早餐，無奈家人都話試過一次就唔會再返轉頭，所以喺大阪第二日就決定喺附近一家咖啡屋「BROTHERS Cafe Namba Store」度食個西式早餐，先出發去神戶。

於咖啡店門外可見主打班戟之黑板餐牌。店子樓底高高，感覺就好似個大客廳咁，輕鬆寫意。洋式嘅裝潢簡潔企理，窗邊單人座位好似張書枱般咁有詩意。

多頁餐牌中日對照，並附有彩圖，簡單易明。餐具全為自助式，並清楚列出免費上網資料。

哥哥叫咗個香濃鬆脆嘅芝士四重奏多士早午餐「Quattro Formaggi Toast」，除咗沙律、薯條，980円仲包埋杯飲品，十分豐富。

嗜甜嘅XO仔就要咗個招牌朱古力香蕉班戟「Chocolate Banana Pancake」（1,080円）。三塊薄薄嘅班戟熱辣香軟；旁邊嘅焦糖香蕉外脆內腍，極之清香；連同香滑嘅忌廉、朱古力醬及粒粒朱古力碎包住黎食，超正呀！另加300円要咗杯香滑清涼嘅凍咖啡。

首次黎神戶玩，話就話就係一天遊，但其實只會逗留大半日，為爭取時間，第一餐當然係要食聞名世界嘅神戶牛啦！從日本飲食網得知市內有間極受本地人歡迎嘅神戶和牛專門店「石田」，每間店嘅分別在於烹調和牛之方法，XO仔單憑天氣寒冷就揀咗去食涮涮鍋分店「すき焼きしゃぶしゃぶ神戸牛 石田」。

經酒店訂座簡易順利，當中確認詳情亦附帶埋地圖，不過當日卻因遇上多條道路封閉，結果就行錯咗去第二間分店，幸好集團旗下嘅店舖都喺附近，接待員一發現狀況，即通知嗰邊嘅服務生走過黎親自帶路，體貼程度實在令人太感動啦！

店子門面有個日式禪陣，流露著傳統和風設計。所有散座均為獨立式廂房，以木造敞門分格，私人空間足。每間房仲有個衣櫃俾食客掛起外衣及存放隨身物，唔洗食完一陣味咁行出街，感覺超級衛生。每個爐頭頂都有個大大嘅抽氣機同射燈，各方面都諗得十分周到。

餐牌首頁先展出神戶和牛証書，為貴客先打下強心針。靚靚媽咪真係眼利，竟然俾佢留意到港人愛飲嘅十四代本丸清酒一合只售1,080円，比起香港平多多聲！

店子午市提供多款壽喜燒及燒牛肉套餐，1,280円至4,800円食神戶和牛真係幾化算架。但因家人都係諗住黎食和式涮涮鍋，所以就大部份人都叫咗客包有小食、前菜、140g嘅特選神戶和牛、雜菜、飯或烏冬及甜品嘅涮涮鍋套餐「特選神戶牛しゃぶしゃぶ」；一客6,900円，加埋稅即7,452円。

是日小食為濕潤爽甜嘅薯蓉沙律。四式前菜以拼盤呈上，相中左起分別為燉蛋、和牛壽司、芋頭件及漬物：和牛壽司輕輕燒過，半溶於口腔又唔會好溜。芋頭件則清新爽脆。最有驚喜反而係個燉蛋，因為清甜嫩滑嘅燉蛋內暗藏鬆爽嘅和牛。

主角神戶和牛嘅紅白雲石紋理均勻清澈，每片大得黎切得夠薄，外表已夠震撼！輕輕烚過嘅和牛入口即溶於口腔，軟滑柔潤，神戶牛果然零舍不同。接著成籃上嘅雜菜款色多，且每款都咁新鮮高質。籃中個人最愛就係幾款日本靚菇。熱食最後仲有煙韌彈牙嘅烏冬。

上甜品前，每人先有一杯有助消化嘅焙茶。涮涮鍋套餐以節令果物作結，當中橙美嘅日本柿十分清甜，提子亦爽潤非常。

「すき焼きしゃぶしゃぶ神戸牛石田」可稱為高級涮涮鍋及壽喜燒專門店，店內散座全為獨立式廂房，既舒適又衛生。服務生不單友善有禮，而且極體貼入微，陣店神戶牛肉高質美味，價錢絕對合理，實屬神戶必到之餐店也！

同哥哥喺「元町一番街」度買完手信後，兩兄弟就約咗班長輩喺「神戶大丸」入面會合。最早到步嘅大肥爸爸見商場內有間門面都幾光鮮嘅咖啡店「AfternoonTea TEAROOM Daimaru Kobe Store」咁啱有九個位喎，所以就入咗去食住等。

店子門外擺出彩圖餐牌吸引食客。餐桌上有自助式餐具及餐紙，不過個人覺得張枱非常黐立立；服務生態度唔係話差，不過喺日本黎講似乎衛生同服務都唔係咁達標囉。

餐牌日英對照，又附帶彩圖，十分簡單易明。

1)      Iced Café au Lait（690円）：如相所示，細佬杯凍咖啡歐蕾無論係頂面啲咖啡定係底層嘅牛奶色澤都一樣咁稀，飲落咖啡味欠奉，牛奶味就好似開粉唔夠粉咁，690円一啲都唔平，XO仔真係飲到喊呀！

2)      Orange Earl Grey Short Cake（760円）：同姨丈分咗個季節性嘅香橙伯爵茶蛋糕。單憑外表睇都幾靚嘅，可惜食落糕身好嚡口，忌廉都唔得幼滑，當中嘅伯爵茶味同香橙都有陣苦澀味，請恕小肥未能推介。

神戶秋季天氣比香港寒冷得多，見日頭食完涮涮鍋，晚餐就安排去食火力更猛嘅燒肉放題。XO仔同樣喺日本飲食網頁中挑選咗間人氣店「三宮 炭火焼肉 新撰組」，並經酒店訂座。

天黑後，店舖都有霓紅燈照明，故亦易搵得多。用餐大堂全為木造枱櫈，合併式散座每四人一個爐及一個抽油煙機。幸好九人早已訂座，有得坐房。廂房面積唔算好大，不過都有衣櫃擺放外衣及隨身物，唯一唔方便之處在於出入要上落，對年長嘅團友有點困難，同埋座位並無椅背，飲大兩杯會有啲危險。

訂位時已經連九人嘅6,500円晚市套餐都定好，飲品包咗兩小時放題，可於限定飲品牌上任選，但每人每次只可以叫一杯，仲要飲完一手交一手，絕不容許浪費飲料。食物款式則全權由廚房決定，大家只需見野就燒，燒好就食。食前大肥爸爸又再一次為桌上嘅五角形筷子鼓掌。

店內年輕嘅服務生都非常好客落力，由新炭燒起，到中途見火力唔夠即自動加炭，十分專業；不過最安心就係見到有位可用國語溝通嘅妹妹仔。

1)      海鮮拼盤：每人都有一隻鮮鮑、蝦及蜆，當中蝦隻爽厚脆身。靚靚媽咪三姊妹全為隱世廚神，燒野當然係難唔到佢地啦，不過細佬真係冇諗過佢地可以就地取材，大玩清酒燒蜆及清酒鮑魚！嘩，清酒猶如畫龍點睛，令本身甜甜嘅蜆隻及鮑魚更為鮮香醇美，掂呀！

2)      牛脷：牛脷連肥膏方塊及檸檬上。哥哥熟巧地於燒板上塗上肥膏，邊燒邊滴上檸檬汁，燒出黎薄薄嘅牛脷爽潤帶脆，美味得很！

3)      生洋蔥沙律：可一解熱氣嘅生洋蔥沙律爽脆惹味。

4)      和牛拼盤：全晚之最一定要數紅白紋理分明，且色澤鮮美嘅六式和牛拼盤！由於和牛不同部位嘅質感有所不同，師傅就預先切成不同形狀供貴客享用，明顯製作絕不馬虎。分開兩碟上嘅六款和牛鬆軟多汁，肉香鮮甜，確真冇得彈！

5)      豬肉及雞肉：豬肉同雞肉質素唔係差，只係當食完和牛先上就難免會覺得比唔上。。。

6)      泡菜：泡菜香辣爽脆。

7)      內臟拼盤：壓軸上場嘅內臟拼盤內含腸臟及豬腰，咬落索索聲，姨丈同小肥都食得勁興奮！