酒店內其實有兩個地方都可以用房費包咗嘅早餐券，其中一度就係三十二樓嘅行政酒廊，據悉該處座位及餐飲項目都比較少。深知大肥爸爸最愛多元化，所以哥哥就話不如喺酒店設於二樓嘅咖啡室「Checkers」內享用較多野食嘅自助歐陸式早餐。

餐室每朝早六點半開始就會開放俾啲住客食早餐，閒日收十點，週末收十一點。入座後服務生都會先呈上咖啡或茶，接著就由貴客自取食物。自助區有多款果汁、茶包、麵包、水果、咸點、熱食可選，當中個人主攻朱古力牛角包、燒賣、乳酪、粟米湯、同粥。開放式廚房內有位廚師哥哥即場煎蛋及炒蛋，當然大家亦可點奄列啦！

多得蕃薯Uncle每天都有細閱五份報紙嘅習慣，每份仲要係由頭版睇到尾頁，中間大小專欄及廣告都唔放過嗰隻，方才知悉大阪有間抵食高質嘅星級法國餐廳「La Cime」，肥肥家族當然係要第一時間見識吓啦！

從官方網站已清楚了解餐室午市只供一款8,500円嘅九道菜餐單，晚市則一率為18,000円嘅十二道菜餐單，另加稅。網上訂座流程由用餐日期一個月前開始，逢週日休息，小肥跟隨指示就輕而易舉地於一個月之前成功為午餐訂好位。負責人於二十四小內以電郵確認回覆，告知大廚會用節令食材烹調精美午餐，並問及各人有否對任何食物敏感，相當詳細，未到大阪已感其服務態度專業。

由梅田出發，乘坐地鐵往離餐店最近嘅本町站只需約五分鐘，由車站行去餐廳再要八至十分鐘，個人覺得絕對方便。身為地舖嘅西餐廳以不甚起眼嘅黑白色作門面，室內亦無花巧嘅裝潢，彷彿正要用極簡主義嘅室內設計向貴客道出相等於「請留意美饌」嘅訊息，有意思極！店子面積不大，但勝在樓底高，環境潔淨企理，簡單用上鮮花擺設已夠雅致，就連洗手間都寬廣舒適過人。

四口子初次光臨「La Cime」，官仔骨骨嘅經理哥哥眼見小肥手持相機，即友善地提點因店內有其他食客，希望細佬可喺不影響他人用餐嘅情況下拍照，XO仔話哂都係醒字派，當然明白點做啦！

餐桌上每個座位前面都有整齊嘅餐具及當日嘅精選餐單，另附一份飲品牌。食物早已喺訂座時選好，故大家只需點選飲品，當中可揀單杯美酒、汽水、原枝洋酒、甚至可任由侍酒師即玩配酒添。家中以靚靚媽咪最識飲同最飲得，外遊都唔怕會飲醉嗰隻，所以只有佢一人玩6,000円嘅「配酒套餐」。媽媽大讚餐廳所揀選嘅香檳、紅酒、白酒、清酒同啲菜式相合得黎唔會互相衝突，而且質量絕非等閒之輩，價錢實為超值也！

九道菜午餐先由鬼佬白蘿蔔所烹調嘅馬卡龍前菜作序。「White carrot & almond」鬆化潤滑得黎極之輕盈，以大大件假木高盤承載又增添份純樸，可謂美貌與美味並重。

第二道「Herring on the buckwheat chip」嘅木盒擺盤同樣有種大自然feel。一口吃下富彈性嘅鯡魚刺身及墊底超脆嘅蕎麥脆片，脆中帶韌嘅同時又散發著清香微甜。

冷盤最後一味為色彩鮮黃嘅「Squid & citrus fruit with dried mullet roe」。半透光嘅烏賊粒粒質感爽柔，以清新嘅日向夏及鮮濃嘅烏魚子點綴調味已夠芬芳醒神。

進入第二段嘅熱食環節，即由靚仔經理續一喺面前為「Oxtail with Scallop & Cauliflower」淋上熱熱嘅忌廉汁，於碟子上繪出一幅精美嘅食物圖。藏喺椰菜花幼絲下嘅牛尾極之軟腍，連同乾巧脆薄嘅椰菜花、香脆惹味嘅瑤柱碎及濃滑嘅忌廉汁食，口感有層次得黎味道非常和諧。

接著嘅「Abalone sauter with lotus root & apios」係咁多味最綠色嘅一款，當中鮑魚鮮甜厚潤得黎帶陣陣香草嘅氣色，都幾得意。

試問法國大餐又點可以少舊魚呢，何況仲係兩星名法國料理嘅「La Cime」？！「Yellow Grouper "Aohata" with mountain vegetable & yogurt sauce」以鮮綠嘅蕗薹菜汁唧成葫蘆邊界綑著簾鯛魚件，菜式嘅外表實在吸睛。厚身嘅簾鯛魚肉白滑幼嫩，輕巧嘅乳酪泡沫剛好提升鮮度，效果極之簡潔！

整頓午餐以主菜「Pork from "AMAMI Island" with black radish & black rice」最為鮮紅艷麗。原來奄美大島正正係主廚嘅家鄉，唔怪得知主角會選以鄉下盛產嘅靚豬烹調。煮至粉色嘅島豚不單肥瘦均勻，而且爽口彈牙，兼肉汁豐盛，師傅以微酸嘅醬油及黑米點亮即減低膩感，何其精妙！

最後輪到甜品出場啦！打頭陣嘅「Compote kumquat with ginger flavored fromage blanc」外觀已夠橙光閃閃，亮麗晶瑩，入口更覺清甜爽潤，芳香柔滑。

味蕾以微涼嘅金橘及乳酪洗滌一番後，即由「Warm chocolate in baked pie with "Sakura" & "Sakekasu" sorbet」接棒。呈球狀嘅朱古力批外脆內軟，可可味香濃得黎完全唔會過甜，塗上清涼清新嘅酒粕櫻花雪葩未有互搶之餘，仲出奇地各自為對方突出其獨有嘅香氣，極之神奇！

法式九大簋以精美嘅法式小點配餐茶或咖啡劃上完美嘅感嘆號！

全因「Mの焼肉」喺多本旅遊刊物都有出現，當中主打嘅松阪牛肉插圖又相當吸引，眼見本店離入住嘅「希爾頓酒店大阪」唔遠，小肥唔洗多諗即以網上訂座，流程十分簡易。

餐店合共兩層高，環境雖然較為暗黑，但感覺仍不失衛生企理。四人被安排入座二樓之半獨立式廂房，好夠私人空間。店員中仲有位香港留學生，全晚可以廣東話溝通，份外親切。

打開餐牌一睇，最少有十一頁都係賣緊「松阪牛肉」，迅即明白到店名「Mの焼肉」中嘅「M」就係「松阪」（Matsuzaka）嘅縮寫。既然黎到松阪牛燒肉專門店用膳，肥肥家族就先點咗個包羅萬有嘅四人用「特選松阪牛のぜいたく盛り6種」（27,600円），另加壽司及飯麵。

1)      松阪牛赤身肉炙り寿司（480円/件）+ 松阪牛霜降り肉炙り寿司（580円/件）：餐店有兩款火炙松阪牛肉壽司，四人同屬牛魔王，故亦想即場試齊並作出比拼。平心而論，如果一次只係試一件，兩款獨立黎食都絕對肉香味佳。不過當同場加影時，如相所示，兩者色澤一鮮一暗，入口更覺赤身肉炙り寿司不及霜降り肉炙り寿司肥美軟潤，後者依100円真係抵加同抵俾架！

2)      特選松阪牛のぜいたく盛り6種（27,600円）：松阪牛肉拼盤上枱當真如餐牌上嘅彩圖般鮮紅奪目，非常吸睛。拼盤上合共有六種松阪牛肉，每款形狀不一，但厚度就差唔多。個人覺得松阪牛肉大多燒至四五成熟，仍帶少少紅就最軟熟香潤，不過其中亦有幾件真係學哥哥話齋要熟多少少先更富肉香同肉汁。總括黎講，松阪牛肉不同部位都一樣高質美味，點選拼盤可一次過品嚐多種款式，份量適中，個人誠意推介。

3)      塩タン（850円）：牛脷雖則超薄，但咬落勁爽脆柔潤，正！

4)      Mの肉丼（980円）：丼物嘅白飯底粒粒飽滿軟綿，只係舖面嘅牛肉肥膩咗少少，加上份量唔算好大碗，細佬會情願散叫松阪牛肉自己燒，想食飯就另點白飯。

5)      松阪牛すじラメン（680円）：拉麵個湯底清香熱辣且唔油膩，麵條亦煙韌彈牙，熟透嘅松阪牛肉薄片又一啲都唔乾嚡，680円可謂超值！

相信有睇開細佬寫作嘅朋友都會知道XO仔對阿根廷探戈熱愛嘅程度近年已開始國際化，去外國遊埠都會專登參加當地嘅晚會，務求一會各國舞林高手。

多得日籍好友穿針引線，小肥得以認識並參與大阪地下酒吧「Cafétin de Buenos Aires」舉行之週五晚阿根廷探戈舞會。駐場嘅探戈發燒友不但全為跳得之人，眼見生面口嘅XO仔初黎報到，更續一上前自我介紹及閒聊一番，面對著外出寒冷嘅天氣，感覺猶如雪中送炭般，既親切又溫暖。