港龍航空飛機座位尚算新淨，唯一洗手間同其他航空公司一樣都係難以辟除異味。服務生態度良好有禮，飛機空中膳食則有待改善。

KA 212 航班早上八點五十五分離開香港，到達布吉島機場為當地時間中午時份，全程三個半鐘左右，故飛機上有早餐供應。

泰藉新娘子所揀選o既「Centara Grand Beach Resort Phuket」屬渡假村酒店，合共有六間室內外o既酒吧及餐廳，腳下就係Karon海灘，住客大多都係熱愛陽光與海灘o既遊客及享愛浪漫o既情侶，難怪賣點為沙灘式黃昏婚禮。

酒店離布吉機場約一個鐘頭車程，可代安排機場接送服務，最多可坐三位乘客o既私家車每程收費1,800泰銖，最多可坐八位乘客o既小巴每程收費2,000泰銖，似乎人多着數得多。大家要留意，路途十分迂迴崎嶇，同XO仔一樣會暈車浪o既朋友記緊上車前要食定暈浪丸，事關細佬食咗藥都差啲要嘔，一上房已經要休息上半個鐘頭。

哥哥俾小肥喺房度小休片刻，兩點九先一齊行去酒店入面間咖啡室餐廳「The Cove」享用輕鬆午膳。

情人節將近，餐聽門外已經開始見到鮮紅色o既佈置。間隔開揚o既「The Cove」窗門全開，只靠風扇通風，個人覺得唔係好夠涼爽。下午茶時間客人稀疏，反而室內見到唔少細蚊仔、烏蠅同雀仔，感覺唔多衛生，眼見XO仔被蚊針到極不自然，哥哥就解釋話泰國喺咁架啦。

木口木面o既服務生態度懶散，帶位落單樣樣都慢成拍，唔問仲冇碟用添，真係唔多似歡迎食客光臨囉！

食物方面，質素尚算勉強合格：

1)      Coffee Frappe – Double Espresso, Vanilla & Whipping Cream (THB 170)：咖啡凍飲有飲管提供，不過中間過杰未溶透，所以飲唔到，不過醇濃甜美o既味道非常討好。

2)      Complimentary Bread Basket – 跟香草汁上o既麵包連和暖都唔算，不過免費贈送冇得好講。

3)      Kao Phad Pineapple - Pineapple Fried Rice 泰式鳳梨炒飯 (THB 240)：炒飯以新鮮菠蘿殼承載，睇頭十足，估計酒店每日開咁多隻菠蘿，應該屬善用資源之舉。炒飯可以話係素食，用「咖哩蔬菜生果炒飯」黎形容就最為貼切，因為材料中並無肉類，只有蔬菜同生果，而且調味主材極似咖哩粉。

4)      Tom Yam Goong 東陰公湯 (THB 290) – 湯王哥哥叫咗碗少辣o既東陰公，話湯料質素屬中上。

「The Cove」每晚都有唔同主題o既自助晚餐，當日星期三為「Surf & Turf BBQ」燒烤海陸大餐之夜，大人每位1,100泰銖，不包酒水，另收加一服務費，一啲都唔抵食。

食飯中途有兩場半個鐘頭o既歌舞表演，客氣啲講句，細佬唔係好識欣賞囉！客人唔多，服務生人數仲少過表演者，態度同下午時份一樣唔多友善。

飛黎飛去，極不衛生