7月2日 上午10:00 乘CX450飛台北桃園，11:30左右已在第一航廈入境B1層的巴士乘車處乘國光1819號到台北車站，沿途冇塞車，45分鐘就到台北車站外門口，馬上乘的士直去東龍飯店，70幾台幣的士費就到飯店，好過乘捷運兜來兜去。

東龍飯店位置好，旺中帶靜，夜晚唔太嘈，雖然唔係咩嘢豪華五星酒店，但房裡設備算唔錯，雪櫃、風筒、小電視都有，床舖舒適，浴室乾淨，大家都非常滿意!  本身嘅Package係包CX機票來回(時間係30天內使用)+包稅+兩晚東龍飯店連早餐， 共HK$3,244/2人，即HK$1,622/人，仲想要求咩嘢，抵過返大陸長隆玩3日兩夜啦!

 

舊年嚟台灣, 都幫襯咗勝博殿兩次, 今次專登帶另一半嘅哥哥嚟試吓。

由於在東龍飯店check in 及上房擺好行李後, 都已經成2點半, 而萬華區勝博殿就在東龍飯店隔兩條街, 只行5分鐘, 所以順便去食個遲來的午餐。 網上好多人讚九州杏子日式豬排, 但台灣朋友講普遍的台灣人較喜歡勝博殿, 除價錢平少少外, 最好係冇限供應高麗菜、蘿蔔或牛蒡及黑豆作沙律, 而白飯及面豉湯亦無限添加, 淨食高麗菜沙律都抵啦! 而且冇因為係無限添加而材料馬虎, 所有嘅材料都係非常新鮮同講究。 

淡水黃昏景特別靚, 而且不是假日, 淡水周圍都不是太多遊人, 慢走細嘗淡水周遭, 陪覺寫意呢!

淡水分店的乾杯冇ATT 4 FUN 信義店咁熱鬧, 可能此店地方較小, 二樓只有5張坐4人的枱, 當然亦不及信義店的氣氛, 淡水分店嘅感覺與一般燒烤店差不多, 雖然如此, 幸好食物質素仍保持到, 比香港牛角好好多, 不過台灣朋友介紹我去另一間燒肉店, 叫胡同燒肉, 有多間分店, 下次再嚟台北, 一定會去試吓。

03/07/2013, 一早起床享用完飯店提供嘅簡單早餐, 就向今日主要的景點 - 十分出發......  

舊年因打風, 令我未能盡慶玩到平溪及十分, 今日天朗氣清, 終於可以睇到十分沿途的真正面貌。乘捷運到台北車站, 剛巧送走了10:10莒光號去瑞芳嘅火車, 唯有搭下一班10:32嘅區間車, 由於區間車係站站停, 所以用咗成50分鐘先至到瑞芳,  幸好都比我搭到11:45嘅小火車去十分, 見仲有20分鐘, 出去瑞芳火車站外兜個小圈先...... 

 

只得20分鐘, 決定在火車站對面向左走走, 這邊有兩間麵包店, 舖面都幾吸引, 但都係比呢間 "幾分甜" 吸引咗入去幫襯....

原來呢間 "幾分甜" 亦係集團式經營, 佢哋張D麵包分咗名次, 所以我就跟佢排嘅名次買咗三種包喇! 

第一名係飛碟麵包, 50台幣, 比一般包大, 包面上有一層類似糖漿舖在頂部, 味道不太甜, 糖漿可吊出整個包的味道, 其實可以講此包係牛角包的改良版,  正喎! 

第二名係酥烤羅宋, 38台幣, 比一般包大少少, 麵包內是冇餡, 軟綿綿, 好香奶味, 美味可口, Good! 

第三名係丹麥菠蘿, 32台幣, 亦係一個大包, 其實亦是香港菠蘿包嘅改良版, 呢個包上面的菠蘿皮唔會咁容易跌出嚟或散哂, 個包亦好軟, 都唔錯! 

其實最想買佢哋嘅冠軍作品 - 雞蛋布丁, 一盒有9個, 230元台幣, 用個雞蛋殼裝住D布丁, 賣相好靚, 亦唔太貴, 但佢話買後要馬上雪藏兼只有三日食用期, 所以未能買嚟做手信。

順利搭到11:45嘅菁銅線小火車, 今次只會到十分, 不去平溪, 因時間不許可。  

上次天氣差只能在菁桐站逗留, 未能去十分及平溪, 今次補番數遊十分。

由於從來未曾放過天燈, 想同另一半玩吓; 當日天朗氣清, 唯獨不是晚上, 因晚上放天燈較有氣氛。整個十分賣天燈嘅價都一樣, 亦可同佢講吓價, 我只揀咗單色, 開價100元台幣, 都唔太貴所以都冇講價, 寫吓畫吓都撹咗成個鐘, 最後順利把天燈放上天, 希望願望成真啦！

其實整條十分老街好短, 行吓買吓食吓, 一個多鐘已行完, 想搭火車去下一站平溪或回瑞芳, 亦要等個幾鐘至有火車, 為有喺火車站左邊一間小麵店坐底食D嘢, 順便等火車麻.....

小麵店全店冇冷氣, 我哋揀咗外面坐, 較涼爽。點咗3碗細招牌牛腩根麵,一碟清炒珠蔥, 一碟沙拉白筍, 承惠560台幣。雖然只叫細牛腩根麵, 份量都算OK, 忘記叫佢小辣, 結果店主好慷慨, 一大匙嘅辣醬, 使整碗麵都係紅紅的, 當然超辣, 另一半同佢阿哥見到都滴哂汗, 感覺更加熱, 其實頭幾淡麵真係幾辣, 食落就習慣了,  辣度是可以接受嘅。 牛腩方面, 炆得好焾, 牛根焾中帶爽, 好家庭式的風味呢!  店主介紹我哋食清炒珠蔥同白筍, 前者樣子同蔥分別不大, 但味道就完全不一樣, 珠蔥口感似韮菜, 但冇韮菜咁味濃, 珠蔥帶點甜及菜味較鮮, 今次係我第一次食, 阿哥話香港都有得賣, 但不常見, 有時見到唔留意, 亦會誤會珠蔥係一般嘅蔥; 另一好食之選就係白筍, 台灣較流行用沙拉醬撈白筍食, 但店主的沙拉醬味道較淡, 所以冇搶走白筍的爽甜味, 夏天食此感覺很好, 所以此碟亦是全部最貴的, 要200元台幣。

由於一早已約了台灣朋友歡聚, 所以未能再到平溪及九份, 要馬上搭回火車由瑞芳返台北。

返到台北已是3:45, 回酒店洗個面又出發去忠孝東路應約。

台灣朋友真攪鬼, 帶咗我哋去呢間忍者餐廳, 呢度唔單止只係食嘢咁簡單, 佢哋仲會同每位客人玩吓把戲, 攪吓氣氛。 進入餐廳大廳前, 先要在門口大聲叫 " Ninja", 機關門打開, 一道雨簾在入口處, 要忍者知客擔傘至入到去。 餐廳裝修以黑色做主調, 所以都幾暗, 因此影出嚟嘅相片較黑。

台灣朋友叫咗個八人套餐, 應該要成4988元台幣另計加一, 其實有一個套餐較平, 壽司刺身天婦羅小食連飲品, 每人價398台幣, 但朋友話4988嗰個D嘢食比較正, 佢做東道主, 唔准我比錢, 所以reject咗我嘅提議。

未食嘢前, 有忍者店員走埋嚟同每枱客人玩魔術, 令到每個客人都好開心。

上菜了, 忍者女待應先向我哋奉上雞尾酒,  然後幫我哋分好每份食物, 佢哋笑容可掬, 好細心, 真係抵讚!

食方面真係非常滿意, 最正就係飛標炒飯, 好貼題嘅炒飯造型, 材料豐富, 而且炒得好乾身, 粒粒飯又不偏硬, 炒得好好; 其次係刺身, 好新鮮; 沙律亦好大盤, 醋同麻醬與蔬菜配合得好好, 另一造型特別係燒雞串, 在雞串下面係用一把未開光的日本刀作裝飾, 真有意思。整個餐八個菜+雞尾酒一大壺+水果拼盤, 除了蔬菜火鍋同炒雜菇味道較一般外,  其他菜式的確唔錯。

食到8:00PM, "戲玉" 嚟喇, 一位辣妹出場, 佢著住小Tub Top, 超短熱褲, 大跳辣身舞, 每台男士都會有份參與同辣妹跳吓舞,  辣妹嚟到我哋呢枱, 我另一台灣朋友跳咗出去同佢一齊跳, 令到我哋幾位男士冇緣與辣妹一齊玩, 最後, 辣妹選了另一枱的少男一齊在吧枱上跳, 辣妹攞咗一筒冰, 解了該少男的褲頭, 然後將冰倒進....... 

辣火冰息後,  忍者女待應又出動與眾同樂, 與每枱玩猜迷語, 輸咗就要由女待應將 "豉油", "白醋" , "辣椒"等醬汁注射到口中, 真好玩兼攪嘢......                


PS : 如果係外國人, 餐廳會送給每位外國人兩支小試管雞尾酒 。另8月中忍者餐廳大改革,冇咗辣妹跳舞同玩魔術, 會有其他新玩意推出。

喺忍者餐廳食完飯, 一班台灣朋友話未飲夠, 未玩夠, 要繼續唱, 玩, 跳......仲要同我哋飮勝。

台灣朋友帶咗我哋去一間 Live Band (1人電子琴)音樂餐廳, 可以在此延續唱, 飲, 食, 跳........

啱啱食完晚飯, 都仲有七成飽, 台灣朋友又叫了幾碟小菜、小食及開了一支威士忌, 就咁比佢不停添酒, 我就靜靜加冰溝淡D酒......呢間餐廳多數招呼熟客, 當日係平日, 未有坐滿, 但都有七成客人, 客人主要嚟呢度唔係食嘢, 喺嚟飲酒, 唱歌及跳舞, 台灣朋友喺呢度嘅熟客, 經常在此流連, 亦啱啱同餐廳訂了一箱威士忌, 所以開咗一支同我哋品賞, 唉哎! 紅酒就好D, 威士忌對我有難度麻......

其實餐廳d小菜唔差嫁, 但分量就唔大, 每人少少試吓, 另一半就叫了芒果沙冰, 較細杯, 價錢比忍者餐廳貴, 佢話忍者餐廳好飲D喎。餐廳現場氣氛唔錯, 晚上九點後, 台灣嘅餐廳及酒吧可以吸煙。台上客人即席點歌現場唱Live, 香港好似冇咗呢種形式嘅卡啦OK好耐喇, 真係有懷舊感。每枱客人可唱最多三首歌, 個個客人歌喉都不俗, 而其他客人亦隨歌起舞, 在酒精嘅醺陶下, 每個客人都非常陶醉。值得一讚餐廳琴師, 佢不但彈得一手好琴, 和音唱功一流外, 對客人亦非常nice。 台上有一個小小圖書館, 珍藏住琴師嘅歌譜, 客人隨意點中英文歌, 佢亦隨手就拿起彈奏歌曲, 指揮客人入歌, 唔怪得佢嘅玻璃Tips盤載得滿滿啦!

 

由於時間緊逼, 喺長富時尚旅店check 完 in, 馬上去江記華隆買豬肉紙。

由中山站乘捷運至民權西路站, 再轉黃色蘆洲線去大橋頭站, 在1號出口出, 過對面馬路, 沿民權西路行至大路口, 向左轉入延平北路, 見萊爾富便利店, 就過對面馬路, 就在此有一小路口直入至迪化街, 再轉右, 其實轉右第二間舖就係江記華隆喇。

江記華隆係冇試食, 入去就直接買, 我共買了7盒原味豬肉紙 (270元台幣)及一盒櫻花蝦豬肉紙 (300元台幣), 可用紙箱盡入8盒, 老板娘話唔好寄倉, 要Hand Carry, 佢哋唔收信用咭, 要Cash嫁, 要買此手信, 記住留番D現金呀!

江記華隆喺台灣賣比香港永安平差唔多一半, 原味永安賣$138, 櫻花蝦賣到158, 舊年去唔到買, 就响黑橋牌專門店同九份買咗D, 細細pack, 約十塊左右, 都賣150-180元台幣, 江記華隆大大盒仲有保鮮盒, 300G 賣270元, 反而化算好多。

去完江記華隆買手信, 馬上回長富旅店放低8盒豬肉紙, 即刻由中山站搭捷運到新開嘅東門站, 直行去到永康街口, 一上就見到鼎泰豐, 門口勁多人, 點都要攞張飛先, 知客小姐有禮地叫我哋睇吓食咩嘢先, 有枱就即刻叫菜, 咁就會好快有嘢食。諗住點都要等半個鐘, 點知佢五分鐘後就叫我哋個號碼。

由於已差唔多2:00, 又要掃街食其他嘢, 今晚又要食Buffet, 唯有叫精不叫多, 叫大家每樣只食一淡, 又再食下一家。

小籠包果然名不虛傳, 好正! 蝦肉餃子都唔錯, 另叫了炸排骨同涼伴小菜, 都好掂呀!  唔怪得中外聞名啦!

去完鼎泰豐, 就行入永康街, 搵度小月也。

度小月舖內裝修舒適, 但燈光較暗, 我哋只點了小份量嘅小食試味。肉臊飯細細碗, 每人真係一小啖, 肉汁味濃而不膩, 擔仔麵加蝦, 湯汁鮮甜, 麵條爽軟, 但最好味同最清新嘅味道, 就係龍蝦卵河粉卷, 如果唔係要繼續掃街, 真係叫多兩碟encore

完成度小月嘅「三啖」美食，馬上去下一站 - 永康牛肉麵。 

雖然在鼎泰豐、度小月只食幾啖，但個肚已經飽咗一半，不過為咗美食，點都要努力落去 ....

行到去永康牛肉麵，已是3：00，舖內唔係咁多人， 坐咗冇幾耐，舖內又坐滿客，大部份都係港人。

叫咗一碗細紅燒半筋半牛肉麵、一碗細清燉牛腩粉𢇁、一碟炆豬手。 紅燒牛筋同牛腩又焾又入味；清燉牛腩應係紅燒牛腩, 加咗清燉湯底都非常夾, 粉絲靱度剛好, 麵感亦爽；豬手五小件, 焾身但皮仍爽脆, 全部好食, 正呀! 

 

完成永康牛肉麵嘅 "任務", 輪到食甜品喇。

網上同旅遊書主要推介永康街的冰館, 經過其門, 非常擠擁, 帳篷下企位食, 而且冇冷氣, 愛吃甜品嘅另一半見到此環境, 就話唔想試。

就此同時, 有人派傳單, 叫我哋去試吓街尾一間專食芒果嘅甜品店, 仲推介佢哋嘅座位舒適有冷氣云云.....

後來去永康牛肉麵經過King Mango店舖, 大家一致決定食完牛肉麵, 就嚟呢度食芒果。    

走進King Mango店, 外面就下著滂沱大雨, 註定我哋一定要幫襯;  店內裝修似一間Cafe' , 比冰館舒適好多, 亦可坐室外, 不過主要是吸煙客人較多。由於要在兩小時後去食Buffet, 所以諗住試吓味, 叫兩個......點知..........

我哋叫咗一個新鮮芒果雪花冰, 一個新鮮草莓雪花冰, 除咗份量非常十足外, 生果新鮮味道又好, 真係冇入錯嚟。                                

PS  : 如要碗或碟，要加每份5元台幣                                   

今次再encore饕食天堂, 主要係帶阿哥嚟, 而另一半亦難忘此處又抵又平又靚嘅自助餐, 如下次再嚟台北, 仍會再嚟食, 不過會去京站店試。 台灣實在太多嘢未被我發掘，唔怪得咁多朋友每年都嚟台灣飲飲食食。為有下次再嚟台北尋覓新事物......                                  

今次使費主要係在食方面, 台北4天2人費用共如下:4天機票連稅及兩晚東龍住宿 HK$3,244  +  長富時尚旅店冇窗雙人房 HK$540  +  手信豬肉紙HK$516  +   飲、食、玩、交通費: HK$2,000  +   機場Hello Kitty 手信: HK$400 =  HK$6,700/2人，即每人HK$3,350，真係好抵玩呢！