今次真係非常多謝Openrice送咗1晚Hard Rock Hotel連2套金光來回船飛比我, Thank you vey much!!!

間房好大好開揚, 佈置好簡潔, 可望澳門機場同海景; 最好係張床, 每張有5呎; 廁所及浴室分開; 撘Lift要拍房卡, 保安唔錯, 不過check in/out時間就差D, 分別係3:00pm 同11:00am

check in 完, 去攞飛睇新濠天地嘅免費show - 龍騰, 10分鐘左右, 都幾好睇!

就係響上新濠天地Food Court自動電梯附近, 有個龍騰標誌同Counter, 就係嗰度攞飛

十多年前嚟過幾次, 總會嚟呢處食番個葡撻, 當時好似約HK$2-3, 但今次D葡撻售價已貴到成MOP8/個!

嘩! 咁嘅價, 我當然有期望啦! 唔知係食嘢多咗, 又或佢冇進步, 個葡撻都冇什特別, 比起舊年去中山金鑽酒店個Buffet嘅葡撻爭好遠, 我諗下次去澳門唔會再幫襯喇!

嗰日仲要排隊買, 生意唔優做, 可能太多人幫襯, 所以D員工同老板都做到"心火盛", 幫襯嘅客人大部份都係香港人同中國同胞, 我幫襯佢買蛋撻, 都係貪佢就腳, 隔離係新葡京啫!

原本想訂呢間新葡京酒店自助山餐廳嘅Buffet, 後來都喺卻步, 原因老人家食得唔多, 第二個價都幾貴, 4個人食約要HK$2,000左右, 所以嚟行吓個古董博物館酒店Lobby算數.......

相信係赌王嘅一部份國寶放響Lobby供諸同好, 令我大開眼界之餘, 亦感受到"赌"呢門生意前景非常樂觀, 果然係世界幾千年嘅文化.........

當日新葡京真係非常非常多國內同胞

由新葡京行到新馬路, 行到好熱好口渴, 入呢間叫保健牛奶公司食甜品兼休息吓

店舖阿姐話佢哋d牛奶是自家出品, 新鮮又無添加, 叫我哋放心食用

叫咗凍雙皮奶, 薑汁撞奶, 芒果奶昔, 全部都做得唔錯, 樣樣都唔係太甜

食完個甜品, 就去尋找 "杏仁餅手信之選" - 最香餅家

喺清平直街轉咗個圈, 終於搵到夜呣街喇! 真係行多咗路, 如果由福隆新街右上, 就會近d, 不過都算見到幾個"千奇百趣"景點

呢間最香餅家係家庭式經營, 以店舖門口個炭爐焗餅, 所以整間舖都好熱;  十個杏仁餅盒裝, 有果仁同冇果仁都同為MOP20, 共買15盒, 另買咗其他產品, 好似腰果酥MOP28, 棋子餅, 雞仔餅等, 個人覺得佢哋嘅杏仁餅好新鮮同最"似"樣嘅

終於食晚飯喇, 行到好累呢! 去咗新馬路新帆船餐廳食葡餐

原本想去文員網球會利安餐廳, 但另一半同佢阿媽都話好倦, 所以去咗"就腳"嘅新帆船

雖然價錢係貴咗d, 但出品都唔錯, 碟頭都幾大, order咗3個dish都夠我哋4個人食, 全部食咗MOP416連加一

一個美麗的葡式建築群 - 龍環葡韻; 第一幢是葡國人家庭住宅博物館, 逢星期日免費開放, 屋內保留著以前葡人家庭的家居佈置, 原來當時的澳門葡人都結合咗中西合壁的家居設計, 實而不華

另外三間葡式大宅分別改為展出葡國人的民族服飾, 澳門地方文化介紹及給藝術家作其作品展覽館, 當日是由一位越南女畫家辦畫展

由官也街走上一條經修飾的典雅樓梯,向左走約幾分鐘便到公園, 4座大宅全部面對住新落成的建築群 - 威尼斯人, 新濠天地等, 兩邊隔著一道"小海子"(填海時填剩的部份), 亦種了一片荷花, 影襯著兩處建築群, 一新一舊, 形成兩者強烈對比

一早喺Hard Rock 執好嘢check out, 因為新濠天地要在12:00am先至有車去官也街, 為有打的去官也街食早餐兼行龍環葡韻

早上的官也街水靜河飛, 冇咩食店開門, 行過呢間新好利, 好似喺另一間出名食豬排包嘅食店, 見幾多人幫襯, 在冇得揀之下, 就入埋去湊熱鬧

叫咗4份豬排包, 2個葡撻, 一熱一凍, 當然係熱好食D, 1杯凍盧薈蜜, 1杯凍菊花蜜, 承惠MOP127

講番個豬排包, 豬排好多油, 包唔脆, 豬排肉質一般, 味道仲一般, 簡直係非常普通嘅出品

唔知係咪D客人都係同我一樣, 嚟試吓就算, 唔會再試第二次

另外, 唔知係因為星期日關係, 食店係冇套餐之類選擇, 全部都要散叫, 所以呢個豬排包早餐都幾貴!!!

後記: 星期一早上去埋大利來食豬排三文冶, 原來早上冇豬仔包供應, 價錢好似係mop23, 比新好利貴1元, 雖然食唔番十多年前的口味, 但比新好利好些少啦!

成條官也街同以前真係唔同晒, 乾淨同有規劃咗好多, 周圍亦起咗好多新大廈同運動場, 而且仲修葺咗D路連接龍環葡韻等景點, 澳門政府真係好有"heart"做好旅遊業

去完龍環葡韻, 其中大宅有介紹莫義記, 話佢哋響80年前已在官也街賣雪糕, 所以都慕名想去幫襯吓......

行到埋去, D布甸, 大菜糕等甜品都係用個細小透明膠杯裝至約2/3左右, 最低消費都要MOP15, 本人覺得非常唔抵食, 但另一半話試吓, 就勉強買咗兩杯, 一杯係榴槤雪糕, 一杯係芒果雪糕, 諗住就算咁細杯, 好食都值嘅, 但好失望囉! 雖然佢唔係好甜, 但杯雪糕完全食唔出本身嘅生果味, 奶味都冇, 根本都唔夠滑溜; 而且仲咁孤寒, 得咁細杯, 冇嘢值得讚呀!

原來唔係老字號就可贏口碑同共鳴嘅!

今日下午喺Galaxy 嘅Food Court 會合朋友一齊食午飯, 朋友買了巨龍船票連銀河Food Court餐劵, 可在Food Court內其中5間店內享用指定套餐, 由於朋友買了來回船票, double咗套Food Court套餐, 所以約埋我哋一齊嚟試吓......

環繞food court一周, 雖然冇威尼斯人裡的food court咁多食肆, 但都企理整齊, 價錢都比新濠天地同威尼斯人平, 最低消費約$40左右, 依加呢張餐劵只須HK$29, 仲抵食!

講番個餐, 絕不欺場, 分量頗足, 粥套餐是一大碗粥+ 珍珠雞+中國茶, 粥底好綿, 好過去大家樂同一哥, 起碼材料足, 夠飽; 肉丸湯米+油菜+中國茶, 個湯底稍淡, 唔濃味, 由於當天都幾熱, 食呢個餐都幾舒服, 小朋友就選擇美式套餐, 基本上我哋都覺得唔錯同抵食, 唯一是人太多, 較難搵位

係Galaxy Food Court食完個Lunch, 就去對面嘅皇廷海景酒店check in

係HotelClub網站訂咗3間房, 朋友一家四口一間, 我哋一家四口就兩間, 因老人家話要獨立一張床, 所以不能屈蛇, 雖則訂兩間房要HK$1100, 包稅包早餐, 不過見到張床真係好窄, 朋友一家四口要兩人瞓一張3呎單人床, 張床又不能併埋, 佢哋話瞓得都幾辛苦

另外附有早餐, 屬於自助早餐, 個早餐種類不多, 有熱水浸住嘅火腿, 免治豬肉餅, 方包, 白粥/皮蛋廋肉粥, 煎餃子等, 咖啡及茶無限添飲, 我只係食咗一碗皮蛋廋肉粥+一杯紅茶, 其他實在不想試.......

喺Hard Rock Hotel 問人點去松山東望洋塔, 佢叫我去近外港碼頭附近嘅水立方搭32號車去二龍喉公園就可坐纜車上東望洋塔, 最衰響外港碼頭見到個巴士站有32號搭, 就"拿拿淋"上咗車, 咁就響架巴士度坐咗成個鐘, 兜咗個大彎先可到達公園, 真係好抵搭喇;

其實真係要響水立方後面, 由漁人碼頭過行人天橋, 再過馬六甲街果邊搭會快好多同唔駛兜大圈

去到二龍喉公園, 門口就見到個纜車站, mop3包來回纜車, 超抵; 雖然路程唔係咁長, 不過都好有feel; 由於我哋差唔多4:30先到公園同搭纜車, 所以時間好趕, 我哋要喺6:00pm前搭番纜車落山......

經過5分鐘左右嘅纜車車程, 就上咗松山, 唔知道山上的景點全部有時間限制, 去到個防空洞, 5:00pm就收咗, 最唔抵係東望洋燈塔, 行到去門口, 剛5:30pm, 啱啱閂閘, 真唔抵, 上唔到上面睇澳門全景添, 不過周圍環境唔錯, 希望下次有機會再上嚟啦!!

係二龍喉公園出嚟, 已經係6:00, 要搵食喇! 其實二龍喉公園斜對面, 有間叫咖哩文嘅食店, 搭車時有D澳門居民都叫我吔去呢間食吓, 口啤唔錯, 但由於嗰度地方有限, 我哋一行十五人會較逼, 而且班細路唔願食咖哩, 所以一致決定去六記......

沿途問咗好多人, 都話冇車由公園去六記, 想截的士, 沿路又冇車, 一路行一路問, 終於走了約半個多鐘, 打埋電話去六記問, 最後搵到巴士去喇! 其實六記就響十六浦酒店再落兩三個街口, 以前賊船咐近, 細細個阿爸好似帶過我嚟, 周圍嘅環境似曾相識.......

去到約7:15, 已經坐冇虛席, 老闆話應該7:30先至有位, 果然真係.....

六記已是兩間舖連埋, 可惜冇打通, 雖然坐得好逼; 但食物補番數

有相餐牌除咗炒麪同炒蜆冇order外, 全部都有落單; 只有咖喱魚蛋豬皮個碟較差外, 其餘都好有水準, 推介以上相中菜色, 最後埋單連4罐可樂, mop475

去完六記, 捧住個飽肚去對面搭巴士去碼頭轉免費巴士返酒店, 經過So Good蘇絲黃介紹過嘅一排檔口仔, 有糖水, 炸雞比, 粥, 炒粉麪, 如果唔係食到咁盡, 都會每樣買d番去宵夜, 但又絕不能空手而回, 唯有只幫襯糖水檔.......

要咗兩個白果腐竹雞蛋糖水同一個芝麻糊 "行街", 兩白一黑, MOP17/個, 都幾貴, 同係舖頭食差唔多價, 如係度食, 細碗就收MOP10, 大就MOP16, 外賣要加MOP1......

個白嘅非常住家feel, 非常得; 但個黑就唔係咁掂喇, 有溝粉, 好杰, 食到最尾, 剩番一舊舊, 唔得, 兩個糖水真係好極端.....

星期一朝早食完"難頂"早餐, 就check out 皇廷海景, 坐酒店shuttle bus去官也街陪朋友兜轉圈喇, 順便去埋晃記同鉅記買手信, 推介晃記嘅檸薑, 超好食!!

行到差唔多, 就去搵地方食lunch, 途經波爾圖餐廳, 有一個大牌寫住有午餐3款, 有湯, 有包, 有沙律, 咖啡或茶, 仲有雪糕甜品, 都係mop30, 唔怪得12:00pm 已人頭湧湧; 我哋都要等咗成半小時先至有位

裡頭d枱擺得比較迫, 而且間舖都比較細, 我哋拎住行李嘅就較麻煩

我哋一共order咗餐牌上嗰3款午餐, 最正係咖哩牛腩飯, 個午餐真係非常抵食, 推介!!

其他嘅葡餐都唔錯, 唯一係最有期望嘅豬仔包葡國雞算較差, 個包原本好脆, 但比d葡汁浸到軟晒, 好難食, 而且d雞唔係咁靚, 大部份都係骨, 唔推介!!

8個人全部只係食咗mop286, 好抵食呀!!

食完葡式午餐, 班細路已嘈住話要即刻去巨蛋體育館打保齡.......

截的士由官也街去, 約MOP25, 個體育館建築得幾靚, 入面設備都唔錯, 可惜周圍都幾荒涼, 被地盤包圍住,  現在只得兩條巴士線經巨蛋, 而且都幾疏落, 相信要過幾年交通才會較方便

如果唔怕太陽曬, 可以由新濠天地行過去, 都係一個巴士站路程

巨蛋個保齡球場環境唔錯, 非常舒適, 而且打波價錢好抵, 上午9:00 - 下午7:00 MOP20/局; 晚上7:00 - 10:00 MOP30/局, 而租鞋就MOP5/對; 澳門細細, 都有個由政府營運嘅保齡球場, 真好! 香港咁都做唔到, 真差!

平日就下午2:00先有得打保齡, 星期六, 日及公眾假期就上午9:00 - 下午11:00

班細路各玩咗3局, 約3:30 pm, 就call 的士到體育館接我哋去碼頭, 搭5:00 pm 船返香港, 咁就結束呢次澳門3日遊, 旅途真愉快!

今次4人澳門3天共約用咗HK$4,000, 包括交通, 食住, 手信及玩等, 即每人約HK$1,000, 去澳門真係一個高消費短線遊啊!!