23/07/2014, 我哋所乘嘅亞航AK139準時在香港11:45起飛, 到達吉隆坡係下午3:35。

KLIA 係新建嘅吉隆坡國際機場2號客運大樓,  2014年5月開幕, 入面商舖食店都好多, 又新又靚, 指示牌清晰, 喺度行街食嘢都可以用到兩三個鐘, 係非常好嘅消閒一站通。

現時在KLIA 2嘅主要航空公司係亞洲航空, 仲有幾間廉航公司喺度停泊航機, 在客運大樓旁, 亦新開咗一間Tune Hotel, 完全係亞航做東道主。

至於由KLIA 出吉隆坡Sentral車站, 非常方便, 除咗有多間巴士公司來回外(票價一律RM10), 仲有機場鐵路, 巴士來回約一個鐘左右(唔塞車) 。

由KLIA好順利搭到5:00鐘班巴士出吉隆坡, 諗住可以喺6:30前可以到達Alor 酒店, 點知大塞車, 在去吉隆坡嘅公路塞咗個幾鐘, 攪到差唔多8:00至到Alor酒店。

在Sentral 車站再行10分鐘 (主要由NU Sentral Mall 穿出去), 搭Monorail輕軌到 Bukit Bintang, 在左邊出站, 沿Jalan Sultan Ismail轉入Jalan Bukit Bintang, 沿路直行, 見有大街口及紅燈籠, 就係Alor街了。

見到Alor Boutique Hotel門面, 有D比佢嚇親, 門口好多媽媽級嘅流鶯在鈎搭單身男士, 心諗唔係咁麻, Book咗「架部」呀

我哋係訂咗兩間三人房, 朋友一家再加床墊, 房嘅面積唔大, 如加床真係好逼, 所以三日後返嚟, 朋友話要轉兩間雙人房。

講返間房, 酒店樓高三層, 冇電梯, 亦冇Bell Boy幫忙拎行李, 二, 三及四樓為客房, 一層約有九間房。

三人房有一張5呎床及一張三呎單人床, 眼見房內同網上相片係一樣, 床軟硬適中但枕頭就低咗D, 但可接受, 而浴室算乾淨, 水壓尚可, 好彩係熱天, 熱水唔係好熱, RM150, 好抵住。

雙床房及大床房亦係同網站一樣, 每房RM130, 房內唔錯, 景觀係望亞羅夜市, 喺網上好多人話呢間酒店半夜嘈到不得了, 所以我原本住三晚改為住兩晚,。真係如網上所說, 真係嘈到不得了, 但如住5號至9號房, 望向亞羅夜市竟然唔係太嘈, 不過住1號至4號房, 窗望樓下便利店方向, 斜對面係靈糧堂教會的話, 第二朝就要飲杯咖啡幫忙提神了, 樓下便利店旁會有檔烤肉小檔, 開咗幾張枱做生意, 好多外籍人士, 特別係非洲裔及南亞裔, 啤酒, 流鶯及佢哋自製嘅K場, 音樂聱嘈到拆天, 所以奉勸打算住嘅人士, 千奇唔好住1至4號房, 及要住三及四樓, 較乾淨。

Check 完 In, 都差唔多9:00, 大家都好肚餓, 快D出外搵食喇.....

由於吉隆坡現正起緊地鐵, 市中心好多旺區都成為地盤, 行街都要兜路, 我哋行咗去Bukit Bintang 最旺嘅Lot10 商場, 見到蔡瀾推介 - 十號胡同,  朋友話太肚餓喇, 入面又係Food Court, 鍾意食咩由自己決定吧!

大家各自去咗不同嘅小店揀咗如下醫肚 :

1) 亞參喇沙, 如果食過檳城極樂寺下面嗰間原裝亞參喇沙, 就會覺得呢碗係失敗之作, 湯底只有酸辣味,  完全冇咗鹹香魚餚嘅味道, 攪到整碗麵唔三唔四, 所以呢間名叫 Chua Brother嘅小店現巳結業;

2) 鴨蛋炒棵條, 炒得非常有镬氣, 味道非常好, 可惜係太少, 不足一碗份量囉!

3) 海南雞飯, 不過不失, 冇驚喜囉! 雞味唔濃;

4) 福建麵及咖喱麵, 湯底還可以, 都係用蝦餚嘅, 但麵亦唔多, 都係在檳城小檔食嘅較好。

綜合以上, 價錢比街舗冇冷氣嘅小店貴差不多一倍, 但食物質素同份量就強差人意, 有時唔係有名人推介就等於有好嘢呢!

 

24/07/2014  一早3:30起床梳洗準備出發去Subang Airport 搭Firefly Airline 7:20 am FY2100航班去丁加奴(即登嘉樓 Kuala Terengganu), 真係超貴嘅車費去機場呀!

當買完Air Asia 直航到吉隆坡， 已密切留意由KL 到登嘉樓的內陸航班，AirAsia及Firefly兩間航空公司一直有留意，最後選了Firefly, 由KL去登嘉樓來回程各49元連稅, 共約244港元, 好抵, 而當時Airasia一程機都要三百幾, 所以二話不說就買咗Firefly, 後來就知後悔了。

Firefly係用吉隆坡較市區點的Subang (梳邦)機場, 跟Airaisa用的KLIA2 完全係兩回事。

Subang係以前吉隆坡的國際機場, 現在已改為只飛內陸航班嘅機場, 所以就冇KLCC及新的KLIA2機場交通咁方便, 咁多交通工具選擇, 在網上找資料, 就只有如下的公共交通工具選擇:

1)  可乘LRT先到Pasar Seni搭Rapid KL BUS No. U81或No. 9, 見到Sky Park Terminal就要下車, 巴士會停在有Firefly廣告的天橋下, 每程2元馬幣, 6:00am - 12:00 am;

2) 在Pekeliling Terminal 乘KL City Airport 專用巴士到Subang機場, 途中會經過Plaza Damas站, e Curve Mutiara站, LRT Kelana Jaya站, 最後便到Subang 機場, 一個鐘一班車; 

3) 在KL Sentral 乘KTM火車到 Subang Jaya KTM station (Keretapi Tanah Melayu Commuter), 但此不是直接到達Subang 機場, 再在此站轉乘的士才可到。

以上三種方法到Subang機場是較便宜的方法, 但我完全用不到呢! 因要搭7:20 am FY2100班機, (此時間可趕及10:00 am Resort 的快艇時間), 以上三種方法的第一班車開出時間都是早上6時正, 而且又要先乘一程的士才到乘車站, 又驚時間太急趕, 所以最後決定選搭的士去......

要提醒是12:00 am - 6:00 am 前在吉隆坡要加收多50%額外車資, 正常價由市區乘的士到Subang機場價約80~100元馬幣, check in 時我請Alor酒店櫃枱幫我找的士, 佢開償比我要300元馬幣(7人計), 朋友馬上答應了, 後來食完晚飯, 另一櫃枱職員跟我講再為我搵的士, 開價200元馬幣(7人計), 約500元港幣, 我個心仍然有D痛, 但冇法, 為有Say OK啦!

當日朝早的士準時在5點半到達, 我哋約在6:10 am到達Subang, 約乘40分鐘, 的士司機仲開價150元回程時接我哋, 朋友又馬上答應司機回程接機, 我都截唔切佢, 後來當然知道係貴咗啦!  算啦! 起碼一程車攪掂, 唔駛轉來轉去搵路行。

個人覺得KILA2 及KLCC 較方便, 交通選擇多, 如乘早機, 亦可住在那邊的酒店, 如Tune Hotel等, Subang那邊酒店不多, 又不太近機場, 始終都係要再乘車至能到, 雖然Firefly 嘅航機較好, 又有小食及果汁招待, 但再揀的話, 我都會揀番Airasia, 較方便麻, 可以慳番時間同搭的士錢囉！

Subang機場雖然現時是內陸機場, 但內裡裝修及外觀都不錯, 餐廳都算多選擇, 比泰國曼谷廊曼機場好好多。

在2014年2月已與Resort確實Booking, 安排了由登嘉樓機場出發至Resort一切嘅交通安排及3日兩夜嘅食宿, 每人439元馬幣, 約港幣1100, 當中包括如下:

1) 來回登嘉樓機場至碼頭車費; 

2) 來回碼頭至Resort(樂浪島)船費;

3) 兩晚海景房;

4) 3次出島浮潛船費, 不包括浮潛用具及救生衣;

5) 兩早, 兩午餐及兩晚餐(其中有BBQ晚餐;

6) 島上免費卡拉OK, 麻雀耍樂, 自由在Resort海灘暢泳

Resort派人接機, 當日有十多人,  共兩架Van 由登嘉樓機場出發至碼頭, 約20多分鐘抵達, 碼頭有counter收每人5元馬幣上島費, 快艇約20分鐘左右就到Redang Kalong Resort。

Redang Kalong Resort 不豪華, 但實際, 上岸右邊係Canteen, 左邊就係房間, 整個Resort 自成一角, 好寧靜, 海灘水清沙幼, (但都幾多小石), 當日Resort冇國內同胞, 只有我哋兩家香港人, 當地華人及歐洲數個家庭, 完全冇Laguna 那邊人多熱鬧。

我哋今次選了海景房, 全個Resort都係以馬拉的長屋型式木造建成,   長屋比沙灘地勢高, 面對著大海景, 每間房外有一露台,  房間內都有一張1.5米大床及一張3呎單人床, 獨立浴室廁所, 佈置簡潔, 雖然唔華麗但乾淨企理, 床及枕都OK, 而且價錢比非海景房只貴了每人約廿多元馬幣左右, 見價錢唔貴, 當然要享受吓啦! 而海景房嘅後面及旁邊是無景房或山景房, 房內設與海景房一樣, 只係景觀不同。

喺呢三日兩夜中, 完全感覺良好, 冇wifi, 冇whatapp及上網騷擾, 真係可以令整個人放鬆, 唔須要思想任何嘢, 任由個腦休息, 令我真係感覺到寫意呢! 

** 全個resort係冇免費wifi, 要另付費20元馬幣/位, 但接收不強, 最好係要在canteen上網, 據知resort位置較偏, 島上嘅發射裝置比較照顧Laguna那邊, 所以Resort都唔想咁多人分享其wifi。

Redang Kalong 跟以往在馬拉住過嘅B&B 或大眾化Resort 一樣, Package形式包三餐, 價錢唔貴麻, 所以要求會不高, 以食得飽就算的精神, 可能會有驚喜囉.......

早餐 : 基本一定有咖啡奶茶麵包提供(基本全日供應), 另有炒米粉, 白飯, 白粥, 配白粥的配料如花生, 菜圃等, 炒清菜, 煎蛋, 仲有些少馬拉餸菜, 我覺得算豐富。

午餐 : 白飯, 炸雞, 兩款炒清菜, 再加三個炒餸,  汽水橙汁任飲, 食飽就算啦! 

下午茶 : 片裝蛋糕, 優閒坐在餐廳裡跟朋友吹吹水, 以及被風扇及海風吹著吹著, 舒服到想睡一睡呀!

普通晚餐 : 跟午餐差不多, 但有甜品及生果供應, OK啦!

BBQ :  牛羊雞BBQ, 炸魷魚, 肉醬意粉, 白飯, 燒雞翼, 炒菜, 沙律, 生果及甜品, 最豐富及最有睇頭的一餐, 肉類醃味當然不及香港啦! 但OK囉, 肉醬意粉幾好味, 我哋滿意喇!

Resort會安排3次出海浮潛, 其中一處浮潛點就係Redang Marine Park, 在此享受了兩個多小時嘅陽光與海灘, 很爽呀!

Redang Marine Park係馬來西亞有名的海洋公園, 海水顏色特別碧綠,  在灘邊附近浮潛暢泳都是一件樂事, 淺灘已有大量大小魚群, 較深水仲有機會與海龜同遊添, 碼頭底, 亦見大中海鰻, 好刺激呢!

沙灘嘅沙幼白細滑, 躺臥在沙上曬太陽亦感非常輕鬆舒暢, 感覺比沙巴的馬寶島更勝一籌, 美好嘅時光就係過得特別快啊!

由Redang Kalong有小路行去Redang Laguna Resort, 約慢行10分左右, 沿途要經一片小榭林及石灘, 呢處係島上最多廢物的地方, 所以非常多蚊, 大家都被釘了幾口, 點解當地政府就向每個遊客收海島保育費, 但又唔整理下島上嘅廢物處理問題, 令我覺得當地政府講一套, 做一套囉! 破壞哂樂浪島嘅形象.......

話咁快就行到Redang Laguna Resort, 此Resort外觀及位置較有優勢, 唔怪得整個Resort都係充滿住普通話的聲音, 當日睇有7成住客都係國內同胞, 其餘係當地華人, 星加坡人, 台灣及香港人.......

起初, 除了Redang Kalong Resort外, 亦有留意Laguna Resort, 見網評話好多強國人入住, 又評佢好嘈唔寧靜, 房間裝修陳舊及用餐食物麻麻等等.......  而價錢約每人635馬幣 (海景房),  價錢比Redang Kalong貴約二多元馬幣, 如住一般標準房就貴約一百多元馬幣左右, 所以最後選了寧靜嘅Redang Kalong Resort。

雖然此處比較人多, 但的確沙灘係比Kalong Resort靚及舒服, 大家各有所長, 要睇用家嘅要求了。

早上11點巳由Resort出到登嘉樓碼頭，因為咁早，就諗住去登嘉樓唐人街行吓，食吓嘢，所以買咗下午7點嘅回程機返吉隆坡，用一個下午嚟行吓呢個小市鎮，但原來只係用咗3個半鐘就行完食完個小鎮，知得買5點半班机啦！

講返登嘉樓唐人街，街仔短短，唔駛5分鐘就行完，登嘉樓主要係馬來人聚居及信奉伊斯䔵為主，如當地華人要買豬肉，就只可在唐人街唯一兩檔豬肉檔購買。另外唐人街多數都係食店及雜貨店為主，所以整條唐人街係冇乜嘢行，所以再向外圍行一個圈，都係零星小舖及有間酒店，要行街食嘢去到5點, 就真係好困難囉 ⋯⋯

在登嘉樓唐人街(向海方向)走入一條橫巷, 原來係當地有名嘅海龜巷, 巷仔小小窄窄, 但充滿住藝術同介紹保育海龜嘅好地方。

小巷打造為宣傳保育海龜的焦點, 用了好多馬賽克及瓷磚畫粉飾了小巷破舊嘅牆壁及地下, 主要介紹海龜係登嘉樓的重點保護海洋生物, 同時亦提倡及教育各位要好好保護海龜, 不要捕殺牠們。

雖然小巷只有55公呎, 但值得入內走走, 除了可欣賞漂亮嘅馬賽克砌成的海龜外, 亦對認識保育海龜有著重大的意義。
 

登嘉樓唐人街街仔細細, 但有6成都係食肆, 行咗一個圈後, 大家決定去呢間登嘉樓家鄉小食館食午餐, 見佢客人絡繹不絕, 又以大排檔形式經營, 內裡有6間食檔, 有多樣選擇麻。

搵咗位坐低, 大家就分散各自買自己嘅心水美食, 我哋揀咗以下品嘗:

1) 燒雞飯, 4元馬幣, 超級平, 靚 , 正, 燒雞香滑有雞味, 令我哋再加多半隻燒雞+燒肉雙併;

2) 半隻燒雞+燒肉雙併, 40元馬幣, 燒肉同香港的製法不同, 但亦夠香脆, 屬半肥瘦, 係燒腩仔也, 唔怪得一個上午就賣哂;

3) 家鄉魚蛋河, 內有4款魚蛋, 有炸嘅, 有魚片嘅, 有白色魚蛋及另一豆角魚蛋, 全部彈牙魚味足, 當然河粉又夠滑, 5元馬幣;

4) 鮮紅火龍果汁, 5.5元馬幣, 雖然比河粉及雞飯貴, 但佢係紅火龍果+水鮮榨少甜, 又大杯, 入面仲有幾粒荔枝, 唔錯喎!

5) 鮮芒果汁, 5元馬幣, 同樣大杯, 味道當然穩陣啦!


6) 自家製新鮮小麵包, 一排6小個, 熱辣辣又鬆軟, 有牛油同咖央醬, 令麵包更香更好味, 就係因為掛住食包, 冇同個美味嘅包包影相留念添!

以上都係食咗70元馬幣, 喺馬國食嘢認真平靚正。
 

食完午飯, 再沿唐人街外圍行了兩個大圈, 已冇地方可走了, 索性返唐人街搵個地方坐底飲杯嘢, 等到兩點車來接我哋.......

在唐人街搵到一間由華人經營的甜品店, 諗住係自家製, 會有好出品, 點知原來質素一般, 所點品食評價如下:

1) 冰淇淋窩夫, 6.9元, 見張相幾靚, 但當日冇芒果, 用香蕉代替, 都唔係問題, 最大問題係個窩夫酸嘅, 應該係個窩夫漿底已變質, 我咪馬上同老板講囉, 點知佢一D反應都冇, 聽完就行開, 完全唔解釋, 唔解決, 算吧! 我只食哂隻蕉同D雪糕, 個窩夫咪唔食囉, 我仲要等陣搭飛機返吉隆坡架；

2) 香蕉船, 6.9元, 雪糕普通, 忌廉太多,  一般啫；

3) 布朗妮冰淇淋, 5.9元, 好D, 起碼個布朗妮唔酸, 朱古力味都可以, 有進步嘅空間。

總括係我哋想搵個地方坐下, 上吓網, 等車嚟接, 佢又有免費Wifi同冷氣, 都算坐得舒服, 都係一次啫, 唔會再嚟喇! 

Best Western Premier 係世界級國際性酒店集團, 其酒店評價一向唔錯, 今次book 呢間酒店, 係因為佢雙人房張床夠大, 非常適合家庭, 而且價錢唔算太貴, 自助早餐兩位連稅約每晚740元港幣。

此酒店屬四星, 設備唔錯, 有免費Wifi, 房間寬敞光猛, 雙床房有兩張Queen Size 床, 枕頭床舒服合
適, 浴室乾淨冷熱水OK;  泳池係無邊界設計, 面向中央車站, 感覺relaxed。

雖然有以上嘅 "讚", 但可惜就地點而言係屬 "隔洩"類, 完全冇公共交通可直達, 只有的士同酒店shuttle bus, 有D的士司機都唔係太熟路, 要左兜右搵, 同朋友分別搭的士由Alor Street出發去, 由於朋友那部嘅的士司機唔識路, 所以攪咗成個鐘只到酒店。

其實由酒店到中央車站及中央市場(茨廠銜)係好近,  但因酒店在公路旁邊, 跟本就冇行人路直達, 所以雖然好近, 但唯有每次都搭的士或shuttle bus。

PS 1) 我哋有試過由酒店一直行去茨廠街, 只須約15分鐘, 但由於冇正規嘅行人路, 一路是行沿路嘅石壆, 所以感覺有點危險。

PS 2) 吉隆坡的士司機(多數印度裔) 非常唔老實, 經常開天殺價, 比睇咪錶價貴1至兩陪不等, 認真要留意。

由於第一晚要早睡, 冇行亞羅街, 返回吉隆坡呢晚就在亞羅夜市搵食。

亞羅街係吉隆坡有名的夜市, 店舖主要係大排檔, 食品手信店, 按摩店及零星專做遊客嘅零售店, 另有賣榴槤攤檔, 而整條街都有好多流鶯搵生意, 令到成條銜人車爭路, 用 "混亂" 及 "污穢" 嚟形容呢條街係最貼切.......

個人覺得亞羅街唔係咩特色夜市, 只係條街人多熱鬧, 食嘢買嘢又唔平, 如果冇時間, 可以唔駛嚟囉!

黃亞華最有名嘅, 就係燒雞翼, 果然係名不虛傳。

黃亞華小食店位於亞羅街差唔多街尾位置, 我哋在7點幾到達時已好多人,  當我哋order完後, 已坐無虛席了。

講番所享用的菜餚, 食後感如下:

1) 燒雞翼, 係成條亞羅街燒得最好味嘅, 雞翼入味又香脆, RM3元一隻, 比鄰近多檔貴RM0.5 ~ RM1, 其他檔口完全冇得同黃亞華比! 我亦在當中試了三檔, 唔得囉, 咪貪平呢;

2) 炸中蝦, 好香口, 可以遮蓋到幾隻不夠新鮮的蝦, 價錢唔平, RM55元;

3) 豆豉炒聖子, 幾好味, 價錢唔太貴, 只係份量略少;

4) 奶油骨. 同香港常食嘅沙拉骨好似;

5) 炒蜆, 麻麻地, 又少又唔夠熱, 最唔好係唔夠鑊氣;

6) 馬拉盞炒通菜及蒜蓉生菜, OK啦!

7) 炒麵, 唔係乾炒, 在馬拉炒粉麵通常都會較濕, 加大了都係好似香港一般份量, 都係唔夠食,

總括而言, 除了燒雞翼較出眾外, 其他都是一般及不過不失吧!


 

成功時代廣場(Berjaya Time Square) 位於 Imbi 站, 非常近Bukit Bintang, 由亞羅街行去都係10分鍾左右。

Berjaya Time Square 係吉隆坡其中一個大型商場, 走中檔路線, 屬大眾化類別, 而且商場頂層係遊玩娛樂場, 非常適合一家大細在此消閒活動; 7樓及6樓是遊樂場, 較矚目嘅就係過山車, 好有規模, 聽到陣陣的哇哇叫聲, 就知刺激度如何了, 不過要付入場費。

由7樓落一層, 有射箭場, 3位港童嚷著要玩, 我哋就揀咗RM34那個package, 包含45支箭再送8支, 工作人員會簡單教拉弓手勢及射箭技巧, 就咁快在此消磨了一個小時,  然後就去下午茶。

在商場地牢走走, 聞到香噴噴的出爐麵包味, 見有一大招牌標示有一個墨西哥包+一杯凍咖啡, 價錢有2個, 有忌廉凍啡就RM11.9, 冇cream 就RM10.9, 就被吸引咗入去坐低食個包; 食麵包最好就係新鮮熱辣辣, 呢個包正合要求, 外皮亦做到鬆脆, 而餡料亦不錯, 甜度適中, 不過就冇流沙感, 但亦屬不錯, 咖啡係走美式路線, 全冇馬來風味, 非常適合年青人口味。

Berjaya 成功時代廣場係非常適合一家大小消遣嘅地方, 唔怪得咁受當地歡迎呢!




 

年少時, 背住背嚢, 曾到過此一遊, 現在內裡改變都唔係太大。

中央市場主要係個小型商場, 主要售賣工兿品, 手工兿品及小飾物為主的小店, 亦是馬拉的一個重要景點之一, 共有兩層, 仲有餐廳小食店, 亦附有吉隆坡市旅遊咨詢處, 鄰近茨廠街及KL City Gallary, 建議可行完茨廠街, 走路嚟中央市場, 再由此後門行去City Gallary, 較順路。

 

去完KL City Gallary, 附近就係好有歷史價值嘅國會大樓樓群, 在此影番幾張到此一遊嘅相, 就搭LRT到KCCL 雙子塔, 睇埋呢個吉隆坡個主要地標, 行埋雙子塔內的大shopping mall, 喺時候搵地方食晚飯吧!

去番茨廠街搵食, 但見成條街都人山人海, 行到街尾, 見在一間空舖有一大枱正在埋單, 馬上叫班細路坐底, 即刻就聞到一陣焦香撲鼻嘅煲仔飯香, 雖然吉隆坡天氣濕熱, 但仍舊吸引很多人幫襯, 梗係有原因啦!

我吔order咗 如下 :

1) 招牌菜瓦煲雞飯(大) X 3, 一煲飯約有兩碗半飯左右, 我哋共有7人, 所以叫咗三煲; 雞的份量都算OK, 差唔多半隻啦, 但雞味唔夠大陸雞濃, 但都不錯, 好在醃味上下了功夫, 飯裡有幾片臘腸, 為雞飯增添香濃味, 豉油冇香港咁甜, 帶鹹味多點, 但把飯+雞+臘腸+豉油, 再由薑絲吊出整煲飯嘅香濃味道, 我比佢80分;

2) 燒焗蝦, 以中蝦煮, 橙色的辣汁, 好似勁辣, 其實辣度可以接受, 中蝦新鮮美味,  蝦被汁包著不致乾身, 有秋葵及四季豆作拌伴菜; 

3) 燒焗魔鬼魚, 有兩塊魚, 汁和伴菜與燒蝦一樣, 煮法亦一樣, 只是魚同蝦的分別, 不過材料都算新鮮;

4) 馬拉炒通菜, 例牌叫個菜平衡吓食海鮮肉類, 冇咩特別。

 總括嚟講, 價錢稍微平過黃亞華, 唔會因為遊客區而偏高, 食物品質亦唔係將貨就價, 係唔錯嘅選擇, 只係食飯環境麻麻, 在路邊車來車往嘅街邊及冇冷氣。

食完飯, 順路走, 但見一檔口人頭湧湧, 原來係出哂名嘅AIR MATA KUCING．羅漢果龍眼冰糖燉冬瓜。啱哂, 呢幾日食咗日咁多煎炸嘢, 係時侯清吓熱氣喇！

檔口只賣以上兩款, 當晚只得羅漢果龍眼冰, 果然清涼可口, 又唔太甜, 味道剛好, 最好嘅係價錢相宜, RM1.8就大大杯, 呢D古老傳統嘅飲品, 有益健康過超市賣嘅樽裝飲品, 值得繼續流傅和延續呢!
 

飲完羅漢龍眼冰, 經過一小檔, 竟然有可愛得意雪條賣, 仲有墨西哥包賣添, 小檔老板話絕對係自家手工製作及用料上乘, 所以冇得同一般雪條比較, 我哋太飽了食唔落個包, 大家就賣了支得意雪條作為是晚的甜品。

1) 貓山王雪條RM10.9/支, 真係幾貴架, 外型係三層蛋糕狀, 唔大條, 拆開係非常香的榴槤味, 老闆拍哂心口話用正宗的貓山王製作, 所以售價較貴, 味道當然得啦, 但太細條喇, 真唔夠喉囉;

2) 芒果雪條RM6.9/支, 似朱古力方格排裝, 幾香芒果味, 老闆話係用本地芒果, 如果係呂宋芒造更好味呢! 但都唔錯又穩陣;

3) 菠蘿桃雪條RM6.9/支, 外形係最cute的熊仔腳板, 味道剛剛好, 冇搶走大家嘅原有菠蘿同桃味, 比想像中好;

4) 紅色火龍果味, 一樣係RM6.9/支, 外型係一個笑哈哈, 深紫紅色, 味道清甜可口。


 食完呢幾款特式雪條, 就回酒店執拾細軟, 明天回港了。


呢個旅程唔算用好多錢, 最主要係貴咗回港機票, 食買玩都用得不多, 以下是今次旅費(3位計)

 1) Airasia 來回香港及吉隆坡機票連稅 : HK$4,215(去HK$355/位, 回 RM420/位)

 2) Firfly來回丁加奴及吉隆坡內陸機票 : HK$735 (每程RM49/位)

 3) Redang Kalong Resort Package : HK$3,292.5 (RM439/人)

 4) Alor Boutique Hotel 2晚 : HK$850 (RM340)

 5) Best Western Premier Dua Sentral2晚 : HK1,488

 6) 陸上交通 : HK$800 (RM320)

 7) 飲食及買嘢 : HK$2500 (RM1000)

 工人合共 : HK$13,880 

 即每人HK$4,626, 雖然比以往去馬拉貴咗D, 都算抵過跟團, 更可況冇旅行團去樂浪島呢! 哈哈