美食兵團
我是美食兵團。 我最喜愛到台灣,泰國,馬來西亞,最重要是去安全同政治穩定的地方旅遊 , 最鍾意遊覽自然景觀,民俗風情,公園/遊樂場/渡假區,戶外活動, 住宿通常會揀3星酒店,渡假村,合理價錢。
留言  留言給此旅遊家
  遊記數目 41
  上載相片 2732
  上載影片 0
最近分享過的旅程
美食兵團去首爾
國家/地點: 韓國
旅程日期: 2015-06-26 至 2015-07-01
吉隆坡+熱浪島優閒渡假之旅
國家/地點: 馬來西亞
旅程日期: 2014-07-23 至 2014-07-29
美食兵團去廈門
國家/地點: 中國
旅程日期: 2014-12-25 至 2014-12-28
昆明、麗江、香格里拉六天自由行(18/04/2014 - 23/04/2014)
國家/地點: 中國
旅程日期: 2014-04-18 至 2014-04-23
美食兵團去清邁+芭堤雅+曼谷10天遊
國家/地點: 泰國
旅程日期: 2013-07-12 至 2013-07-21
又再去台北
國家/地點: 台灣
旅程日期: 2013-07-02 至 2013-07-05
台灣環島15天遊
國家/地點: 台灣
旅程日期: 2012-07-20 至 2012-08-03
曼谷Shop, Spa, Eat
國家/地點: 泰國
旅程日期: 2012-06-27 至 2012-07-03
澳門3天尋玩尋食之旅
國家/地點: 中國
旅程日期: 2011-08-20 至 2011-08-22
海南三亞豪嘆hea
國家/地點: 中國
旅程日期: 2011-08-13 至 2011-08-16
美食兵團去首爾 (韓國)
(旅程日期: 2015-06-26 至 2015-07-01 ,  旅程性質: 飲食購物, 消閒度假)
發表日期: 2017-06-21
原本開心預備重遊首爾, 誰知出發前一個月, 韓國爆發 "中東呼吸綜合症" , 令到人心惶惶, 家人非常反對出發, 而我所選的航空公司 - 香港快運, 真係比佢 "激"到呢 ........   最後我咃一家三口瞞住家人及朋友, 如期出發, 竟然有意外的收穫喎!

講回這次旅程在安排上最令我困擾的, 就係香港快運嘅 " 好心做壞事"。在處理突發嘅  "中東呼吸綜合症" 手法上, 在網上已令大眾髮指, 就以我作例, 約出發前一個月, 佢宣佈因疫症而允許改機票而不用收附加費, 但要補回所選的目的地機票差價, 這亦屬合理, 佢好似為大眾著想, 但原來係越攪越亂同令客人勞氣。 既然宣佈可改機票, 係咪應該要配合大量客人嘅查詢及更改事宜來電, 但原來該公司係未準備好就宣佈, 在宣佈後我已第一時間致電查詢, 當然要先聽3小時以上嘅音樂至搭通熱線啦! 而熱線以官腔的口吻答覆係話唔係由呢條主要熱線處理這次所有韓國機票更改, 現在只會為客人留下訊息, 要等公司再宣佈用什麼方法才可進行更改, 總之其有關同事會直接揾已留訊息的客人云云;  終於三日後, 出了另條一熱線處理, 當然馬上致電做更改, 但聽了3個多小時的音樂, 終於接了我的來電, 但回覆係未能馬上更改到機票, 會跟留下的客人訊息排隊處理, 還叫我放心, 公司一定會致電留了訊息的客人.......

不過當時改機票的差價已跟幾日的價位有好大分別, 如轉去台中, 在宣佈可改機票的第一天, 由原本補差價嘅港幣2000元有找(三張機票), 至我三日後打通熱線問而升至差唔多6000元, 再加埋我本身買了的機票價6900元, 去台中淨機票要成12,000元成本了, 我比得呢個價, 我不如坐國泰去啦, 如轉去日本仲離譜, 由最初的補差價3XXX元(以名古屋線計), 升至要補15,XXXX元, 真係有搵笨及"肉除針板上"嘅感覺囉。

過了幾日, 香港快運嘅客戶服務依然冇打比我!  咁係咪講一套做一套, 真係令客人好困擾同浪費時間, 最後我亦已被高昂的差價嚇親了, 所以選擇唔改啦! 諗住照原定日期出發, 誰知到出發前一星期, 香港快運就發了一個電郵嚟話我當日出發的航班已取消, 當時佢哋由每日兩班機改為每星期只得三班機, 今次可全套機票取消而不收取費用, 但另一半及港童仍然非常想去首爾, 所以選擇先全套機票取消, 然後再重新買機票出發, 這令我哋慳番$2083, 就咁令我哋在首爾享受到一個輕鬆美食之旅。
天羅地網 哭臉2017-06-21
弘大機鐵/地鐵站, 兩旁有自動電梯及升降機, 上落地面亦有自動電梯
弘大機鐵/地鐵站, 兩旁有自動電梯及升降機, 上落地面亦有自動電梯
安國站, 可能地鐵站較舊, 多個出口上落地面都冇自動電梯
安國站, 可能地鐵站較舊, 多個出口上落地面都冇自動電梯


仁川機場一出海關, 馬上去閘口旁的便利店買張T-money, KRW10000一張, 包含咭費KRW3000及KRW7000餘額。

T-money相等於香港的八達通咭, 方便搭地鐵, 巴士及購物, 用它乘地鐵及巴士仲有些少優惠添!

在仁川機場出首爾, 可乘機場巴士或機場鐵路, 巴士可在出境大堂外的巴士站乘搭, 不過先選定下車地點的巴士路線才好, 而機場巴士又分優等和一般兩種,優等機場巴士座椅較一般寬敞。但要注意市中心地點,有多台車同時行經之可能,這時可以自由選擇要搭乘優等或者一般巴士。 而費用大致如下:

優等: 仁川->金浦機場6,500韓元 ; 蘆原,倉洞13,000韓元,其餘首爾各地皆為14,000韓元。
一般: 仁川->金浦機場5,000韓元 ; 首爾各地8,000~9,000韓元。 

雖然搭巴士較方便, 點對點落車不須拎住行李走上走落, 不過我就較推薦乘仁川至首爾的機鐵,  好處係唔怕塞車同慳時間, 而且價錢比乘巴士平差唔多一半, 唯一唔好係要拖行李上落站, 但大致上機鐵站都有自動電梯及升降機設備(注意其他較舊的地鐵站就冇自動電梯或升降機), 當然要不用再轉乘其他地鐵為首選,  及要衡量所住酒店位置如何而決家搭機鐵或巴士呢!

而機鐵亦分兩種, 第一種名為是直達列車, 由仁川直達首爾站, 當中完全冇途經站停, 車廂較豪華及有free wifi, 票價為8000韓元/位; 第二種係一般列車, 由仁川機場出發, 經9個站, 第10個就係終站首爾站, 車程約1小時多些, 與首爾一般地鐵車廂冇異, 但票價就係4150韓元, 如為遷就乘搭機鐵, 就要在機鐵站附近搵住宿, 較多選擇為弘大站, 西江大站 (近新村站) 及首爾站。

首爾地鐵站的路線繁多, 就以明洞為例, 可在綠色線的乙支路站或藍線的明洞站下車, 一個地方有兩條線嘅站, 有D 站仲會重疊在同一地區, 所以要注意出入口地點是否係自己要去嘅地方, 因為有D出口行錯或出錯閘, 係返唔到轉頭的, 我哋亦在弘大站及鍾路站啪錯咭出錯閘而要兜大圈走或再啪多次咭(即比多次錢)而出到所須上落地面出口, 雖然話可以找地鐵職員開閘給乘客, 但很難找地鐵職員, 要按對講機對話, 真係雞同鴨講, 唔想煩咪再 "嘟" 咭囉。

首爾地鐵月台或售票處嘅冷氣只在標準溫度或以上, 特別在月台處, 完全感覺唔到冷氣, 車廂就OK, 好過日本大阪的地鐵同電鐵的弱冷氣, 所以夏天乘地鐵都唔係好似香港咁涼爽。
推介項目: 機場鐵路
參觀時段: 全日
評分: 值得去4  
三人房內的其中兩張單人床
三人房內的其中兩張單人床
另一單人床
另一單人床
寬大的浴室
寬大的浴室
三人房內有一露台, 可作曬衣
三人房內有一露台, 可作曬衣
地下的用餐區, 以綠色小貸車作點綴
地下的用餐區, 以綠色小貸車作點綴
小貨車旁是廚房
小貨車旁是廚房
由弘大地鐵站3號出口一直走, 轉入Yeonnam-dong, 見此街口轉入, 向右望見第一個小巷子, 就係This is Guesthouse
由弘大地鐵站3號出口一直走, 轉入Yeonnam-dong, 見此街口轉入, 向右望見第一個小巷子, 就係This is Guesthouse


由於我哋係搭機鐵到首爾, 所以揀住宿, 都係以機鐵沿線站點為首選, 以首爾站, 西江大站及弘大站為主打搜尋, 最後選定了弘大站一帶, 在出發前一個月就算定了呢間 This is Guesthouse。

This is Guesthouse  距離地鐵3號出口約10分鐘步行路程, 位處住宅小區內, 亦算寧靜, 只是民宿冇招牌, 所以到前要查定Google Map,  搵定條路點樣走。在3號出口走出, 一路直走, 沿途會見到有一路軌小公園及一片小草地,  兩旁是行車小路, 行至第4個車行街口及見到一間叫Yoger Presso 的餐廳, 就轉左走至交通燈位過對面馬路, 然後繼續向前走(不要向左或右走), 會經過一個叫東橋兒童公園及對面有一警局, 那就走對了, 由此再走3個街口, 就係延南路3街(Yeonnam-ro3-gil)街口了(見照片) 轉入及見到右面第一個小巷口的盡頭就係This is Guesthouse了, 如在街口有招牌指示就易見好多。如怕找不到, 可先約民宿主人Mr. Lee在地鐵站3號出口等都可以。

由於中東呼吸綜合症, 當日入住只有我哋一家三口同一對新加坡女孩子, 所以更覺寧靜, 但對主人Mr. Lee 就係好大嘅損失, 不過佢都算樂觀面對整個退房潮, 佢仲奇怪問我為何仲嚟首爾, 我梗係答佢支持首爾旅遊業啦!  

Mr. Lee 是一位約三十多歲的肥先生, 能操流利英語, 好幫忙, 整間三層民宿都係由佢親自參與裝修, 當時佢間民宿有D地方仲未完成修理, 佢一個人自己做, 好投入囉! 而執房佢就聘請咗位泰藉姐姐幫手, 泰藉姐姐年約三十歲, 樣貌不錯, 佢同我講都係嚟咗首爾一個月, 要適應一下, 特別係同韓國人溝通。

整間民宿是3層高的小房子, Mr. Lee 會比密碼兩個給客人, 一個是由外面入屋, 另一個是由屋內大廳上樓, 入房就用拍咭入。房子係冇升降機的, 所以要拿行李自行上房。我哋住2樓的三人房, 所以唔覺上落樓梯太辛苦。

房間以藍色為主調, 房內有三張單人床, 有小雪櫃, 鞋架及一個三層架, 冇椅及枱放嘢, 亦冇電視嘈吓, 所以整間房好簡單, 房內浴室算寬敞, 只係冇提供沐浴露及洗頭護髲設備, 所以去了弘大的Diaso買, 都係6000韓元三支(每支有100ML) , 而椅子就喺隔離的五人房攞嚟用住先,  床, 枕及被都唔錯, 乾淨企理價錢抵, 每晚的三人房都只是港幣461連稅, Agoda訂, 好抵住。

晚上此處靜中帶旺, 有不少餐廳在此, 所以完全不愁食方面, 中西韓日菜式都有, 樣樣都想試, 但都唔夠時間, 附近亦有便利店及一間Homeplus 小超市, 好方便。 

好可惜, 呢間民宿在2016年結業了。
每晚價錢: 461港元 (三人房)
評分: 設備4   服務4   環境4   衛生4   抵住4
套餐含的凍湯, 湯底已結冰, 唔辣, 味不濃
套餐含的凍湯, 湯底已結冰, 唔辣, 味不濃
鹵豬手, 唔辣, 超好味
鹵豬手, 唔辣, 超好味
呢個沙律真令人一試難忘
呢個沙律真令人一試難忘
呢個套餐含鹵豬手, 沙律, 涷湯及配菜, 足夠我哋一家三口享用
呢個套餐含鹵豬手, 沙律, 涷湯及配菜, 足夠我哋一家三口享用


check in 完民宿, 馬上出外發掘弘大區的美食, 當時係傍晚5點左右, 在弘大當旺的和諧廣場走走, 和諧廣場大多是食肆店舖居多, 已是放工時間, 所以食肆開始人多等位, 走了一個圈, 見咁多放工一族特別係OL在等位, 我哋都等埋一份啦.......

Myth Jakbol 原來在首爾是人氣食店, 後來在TVB"街坊廚神" 韓國篇都有介紹。此店主食推介係鹵豬手, 非常啱華人口味, 特別係鹵豬手的汁料, 同我哋華人做嘅味道十分相似。

我哋叫了一個適合3人享用嘅原味豬蹄套餐, 包含有凍湯一鍋, 原味豬蹄, 醋汁沙律及3款醃菜, 29000韓圓。

先講原味豬手, 原隻薄切片上碟, 唔辣, 汁料不但似華人的鹵水汁, 而且味道做得好好, 肥瘦均勻, 整片豬蹄入口即感受到肥肉爽瘦肉入味, 一點肥膩感都冇, 真係正到爆;

雜菜沙律, 用一個長碟端出, 好有份量, 內裡另有生洋蔥及小蕃茄, 最驚喜係佢嘅醋汁, 簡直係整個沙律嘅靈魂, 我到現在仍然回味無窮;

凍湯, 起初不知中間啡色一團是什麼, 以為是材料之一, 點知用湯匙一撥,  才發現呢團嘢是結了冰的湯底, 其實湯的味道清淡, 全冇肉味, 材料有青瓜, 大豆芽, 白蘿蔔等蔬菜, 不過最好係完全唔辣, 這可沖淡豬蹄的濃味及消暑之用, 據知冬天就會改為熱湯+白麵條上。

整體係我在首爾所食的韓菜中最難忘的一餐, 無論味道, 價錢及份量都係100分 。推薦呀!
推介菜式: Myth原味猪蹄套餐
每人消費: 約9667韓圓 (晚餐)
評分: 味道5   服務4   環境5   衛生5   抵食2
芒果雪糕沙冰大大碗, 完全足夠二至三人分享, 13000韓元
芒果雪糕沙冰大大碗, 完全足夠二至三人分享, 13000韓元


食完豬手, 沿住弘大東橋洞慢走, 在Diaso 買完個人護理用品後, 見對面有一間叫Mango Six的Cafe', 樓下Banner上的甜品相都係以芒果為主, 愛芒的另一半同港童見到就已馬上跑上Cafe' 即試。

可能已是9點半後, Cafe'人流不多, 在室外的坐位較多人坐, 可能可吸煙掛, 另一半同港童馬上出去收銀處點了一客芒果雪糕沙冰, 承惠13000韓圓; 嘩!  折實成"舊水"港幣食一個甜品, 咁貴嘅, 點知送到過嚟, 成個湯碗都裝滿, 雖然唔係大湯碗, 但用香港酒樓食飯碗盛起, 都可分到4碗, 份量都算係值番; 至於味道方面, 芒果雖然算多, 可惜係一個酸芒果, 唔夠甜, 好彩係個雲喱那雪糕縱和番個酸芒果, 加上沙冰內加了奶昔, 都算唔錯, 其實酸芒果都可幫助消化呢!
 
每人消費: 約13000韓圓
評分: 味道5   服務4   環境4   衛生4   抵食3
瘋狂購物 笑臉2017-06-21
明洞主街很多小販攤檔
明洞主街很多小販攤檔
有衣屐鞋襪包包外, 仲有小食攤檔
有衣屐鞋襪包包外, 仲有小食攤檔
好多韓國連鎖店都可以找到
好多韓國連鎖店都可以找到
6月尾通常都係減價至7折左右
6月尾通常都係減價至7折左右


6月27日第一個行程, 就係嚟明洞shopping, 最開心嘅係港童, 樣樣都啱買, 最後連上首爾塔同4D藝術館都reject 埋添, 可想而知明洞幾咁吸引年青人啦!

明洞係集中了韓國各大品牌化妝品店, 潮流服飾, 百貸店及免稅店集中地, 高中低檔次貨品都有交易, 而連鎖食店及特式食店都有分店, 而且小販攤檔亦集中在步行街的中央位置, 有食有賣, 有平有貴, 鍾意shopping 同掃街嘅當然在此忙個不停啦!

PS : 由於6及7月不是韓國士多啤梨嘅季節, 去了多個熱門連鎖食店都吃不到, 但在明洞小販檔竟然比我搵到士多啤梨糯米糍, 雖然貴了點, 要成3000韓圓一粒, 但實在可一解想食士多啤梨的渴望, 而且味道相當不錯, 好甜呢!
參觀時段: 下午
評分: 值得去5  
充滿芝味 笑臉2017-06-21
芝士溶緊嘅時候, 係令人非常期待呢!
芝士溶緊嘅時候, 係令人非常期待呢!
食完燒排骨, 最好留番些少芝士嚟做炒飯
食完燒排骨, 最好留番些少芝士嚟做炒飯
捲了芝士的燒排骨好正啊!
捲了芝士的燒排骨好正啊!
明洞店比較難找係在樓上舖, 好彩有招牌
明洞店比較難找係在樓上舖, 好彩有招牌
餐牌
餐牌


上午11點半嚟到明洞, 連早餐都未食, 在中央街行咗個圈, 見到詹姆士芝士排骨個招牌, 馬上走上去食晏喇!

我哋叫了一份輕量芝士排骨(14000 韓圓) 同一份中量芝士排骨 (16000韓圓),  再加一份炒飯 (1000韓圓), 同三罐桃汁(2500韓圓/罐), 合共承惠38500 韓圓。

一鍋滿佈芝士上鋪了約6件排骨, 唔算好大份, 初時想起其他韓國食肆份量, 詹姆士就算小份量了, 叫咗兩份就只得6件排骨, 望落好似唔係好夠食, 後來加了炒飯, 就差唔多了, 可能芝士較飽肚吧!(如喜歡食肉, 真係要叫每人一份嘅量了) 燒排骨 + 芝士捲埋一齊, 果然配搭我好好, 芝士係整鍋嘅主角, 令燒排骨更好味同更膩, 所以不能經常食呢! 完全有犯罪感呀!

炒飯有兩種選擇 :  魚子炒飯 或 白飯加紫菜, 我哋選了後者, 留番些少芝士, 加隻蛋就可炒出完美的炒飯, 個肚好滿足了。

PS : 詹姆士芝士脊骨 其實有好多分店, 在弘大已有兩間, 新村, 東大門, 梨大及惠化都有分店, 去開邊處, 咪喺嗰處食囉!
每人消費: 約12833韓圓 (午餐)
評分: 味道5   服務4   環境4   衛生4   抵食3
美味烤肉 笑臉2017-06-21
王妃家明洞3號店
王妃家明洞3號店
專人用炭烤給客人享用
專人用炭烤給客人享用
牛脊里150g, 34000韓元
牛脊里150g, 34000韓元
醬牛排150g, 33000韓元
醬牛排150g, 33000韓元
牛肉拼盤 150g, 32000韓元
牛肉拼盤 150g, 32000韓元
正在燒牛背肉
正在燒牛背肉
2015年的餐牌
2015年的餐牌
好好味的紫米飯
好好味的紫米飯


行咗成日, 買到冇哂現金, 順便去埋中國大使館旁的大使館找換店唱埋錢, 就沿住大使館條路行落去, 去到今晚食晚飯的餐廳 - 王妃家。

王妃家主要是食韓式定食, 有韓牛, 豚肉及醬蟹等, 今晚我哋主要食韓牛。

王妃家在明洞有三家分店, 街頭街尾街中間都有, 佢都係以做遊客生意多, 雖然疫症令首爾遊客大減9成, 佢亦深受影响, 當晚佢哋都有幾枱客人, 但就冇本哋客喎, 唔知係咪因為遊客價呢?

我哋今晚就食咗整個首爾旅程最貴嘅一餐, 有專人燒埋 :

1) 牛脊肉 150g 34000韓圓, 此韓牛肥紋分佈均勻, 上桌時侍應話此牛肉不會預先醃製, 佢烤好後, 可以海鹽或醬汁點食, 牛味會更突出, 果然冇錯, 不肥不膩, 烤得好均勻, 好食!

2) 醬牛排 150g 33000韓圓, 呢款係侍應推介給我哋嘅, 佢話呢款較多港人點選, 好啱我哋口味, 烤後牛味都唔錯, 醬料果然係容易接受嘅味道, 雖然此牛係預先醃製, 但侍應話絕對係新鮮韓牛, 食後真係喎, 好得!

3) 牛肉併盤 150g 32000韓, 係韓牛大雜會, 侍應講咗包含咗牛嘅幾個部位, 但已忘記了, 總之一句講哂, 好味!

其實每份牛都只是150g, 雖然有青菜包裹韓牛食, 但都係唔夠飽麻, 所以就叫了三碗紫米飯(佢哋就冇白飯供應),  食完都未有7成飽, 咁都好嘅, 咁就可以比籍口食多一餐。







推介菜式: 牛脊肉
每人消費: 約29700韓圓 (晚餐)
評分: 味道5   服務5   環境5   衛生5   抵食3
好藝術呀! 笑臉2017-06-21
Cafe' 外型好搶眼
Cafe' 外型好搶眼
售及取食物處
售及取食物處
蛋糕選擇
蛋糕選擇
黑板餐牌
黑板餐牌
蕃茄芝士蛋糕 6800 韓圓及西柚芝士蛋糕 5800韓圓
蕃茄芝士蛋糕 6800 韓圓及西柚芝士蛋糕 5800韓圓
Tiramisu 6500韓圓, 味道麻麻
Tiramisu 6500韓圓, 味道麻麻
餐廳坐位低密度, 方便客人傾計, 而且樓底高, 唔太嘈
餐廳坐位低密度, 方便客人傾計, 而且樓底高, 唔太嘈
Cafe'內有好多書給客人閱讀
Cafe'內有好多書給客人閱讀


食完韓牛, 便乘地鐵回弘大返民宿, 在3號出口走出回民宿途中, 有好多食肆, Cafe', 西餐廳及韓式餐廳, 好多都好吸引, 由於食韓牛唔係太飽, 港童已嚷著要食宵夜, 後來經過呢間Cafe' Bonjur, 就入去睇吓有咩蛋糕麵包, 可能真係比較晏, 好多麵包都賣哂, 好彩仲有幾款Cake, 我哋就買了以下3款蛋糕做甜品:

1) 西柚芝士蛋糕 5800韓圓, 係三個蛋糕中最好味嘅, 估唔到西柚同芝士Cake 都可以咁夾, 比食檸檬芝士Cake更好, 唔太酸, 中和咗芝士嘅膩, 而西柚又係我至愛嘅生果, 好like呀!

2) 蕃茄芝士蛋糕 6800韓圓, 係三個蛋糕中最貴嘅, 又估唔到蕃茄可以用嚟造芝士Cake, 蛋糕內亦有蕃茄味道, 其實呢個蛋糕味道唔錯, 但我就較鍾情西柚芝士Cake;

3)  Tiramisu 6500韓圓, 係三個蛋糕中最差嘅, 可能放在雪櫃太耐, 唔係太新鮮, 只食到酒味, 整個Cake嘅外形塌咗, 好唔得!

由於已過9點, 所以未有試咖啡, Cafe' Bonjur 室內佈置簡潔舒適, 仲有圖書角給客人挑選圖書閱讀, 而室外亦甚有藝術氣色, 一座兩層的房子改成Cafe', 無論地下, 1樓及天台都有精緻嘅藝術品裝飾整個Cafe', 店主實很有心思又落本, 在此優雅嘅Cafe'品嚐食物, 簡直係一種享受呢!
推介菜式: 西柚芝士蛋糕
每人消費: 約6500韓圓 (宵夜)
評分: 味道4   服務4   環境5   衛生4   抵食3
身心舒暢 笑臉2017-06-21
延南洞文青公園
延南洞文青公園
有噴水池, 又有小草地
有噴水池, 又有小草地
公園兩旁都有好多Cafe'及餐廳, 特別呢間Cafe' Bonjur
公園兩旁都有好多Cafe'及餐廳, 特別呢間Cafe' Bonjur
公園另一邊的Cafe'
公園另一邊的Cafe'


28-06-2015 中午出發, 當日陽光普照, 走出延南路, 慢慢欣賞延南洞文青公園。

由民宿行去公園, 首先會見到中央位置是一組噴水池, 連綿兩條街, 水池邊是小石路和青蔥的樹苗, 可讓行人悠閒散步, 再向地鐵方向走去, 一列小草地有假路軌作點綴(我覺得以前係真路軌), 好有書卷氣息, 果然朝早有年青人坐在公園兩旁的Cafe' 又或在樹下看書, 而每晚亦見好多年青人坐在草地上拿著啤酒邊飲邊傾計,  可能正值夏天, 晚上亦有涼風陣陣, 佢哋都甚為享受在公園的休哉悠哉, 嚟到弘大此區, 都覺回復以前的 "青蔥歲月"
 
參觀時段: 早上
評分: 值得去5  
發現新大陸 笑臉2017-06-21
Lemonade 及橙汁 4000韓圓
Lemonade 及橙汁 4000韓圓
Seafood Cream Spaghetti 13000韓圓
Seafood Cream Spaghetti 13000韓圓
Handmade Hamburger Pan Steak  13000韓圓
Handmade Hamburger Pan Steak 13000韓圓
餐廳水吧位置, 老闆+侍應+大廚共三人
餐廳水吧位置, 老闆+侍應+大廚共三人
餐廳不大, 約10張2人枱
餐廳不大, 約10張2人枱
餐廳在2樓, 樓下係酒吧, 但當日中午有得食Sunday Brunch Buffet 7900韓圓
餐廳在2樓, 樓下係酒吧, 但當日中午有得食Sunday Brunch Buffet 7900韓圓
此小巷一直走出去就係地鐵3號出口
此小巷一直走出去就係地鐵3號出口
星期日冇得食Set Lunch, 只可食Special Plate
星期日冇得食Set Lunch, 只可食Special Plate


慢遊完延南洞文青公園,已經是12點幾,係時候搵食喇!

今次就去公園另一邊嘅小巷探吓路,見了有幾間西餐廳在此,點指兵兵,就揀咗小屋第二層嗰間,枱不多,2人枱約10張左右,老闆係識講英文,真好!可以溝通吓。 

老板約50多歲的紳士, 好nice, 佢經常去中國, 特別係上海同廈門係常去嘅城市, 仲講好鍾意食中國餐, 佢介紹我咃食如下 :

1) Seafood Cream Spaghetti, 13000韓圓, 非常值, 佢哋嘅海鮮唔係急凍海鮮如魷魚, 青口或小蝦等已失去鮮味嘅所謂海鮮, 而係新鮮蟹肉同蝦, 好豪華呀!個忌廉汁煮得好好味, 而且份量都好多, 仲有多兩片法包添!

2) Handmade Hamburger Pan Steak 13000韓圓, 漢堡牛肉係用韓牛造的, 煎後牛肉好香, 調味相當好, 我哋選唔辣, 加埋沙律菜同白飯, 好大碟呢!

3) 飲品係檸檬汁及橙汁, 各4000韓圓, 兩者都好似果汁先生那種, 雖然唔係好抵, 但我哋只叫了兩個主菜三人享用, 唔叫飲品好似唔係咁好, 不過好大杯, 我哋都飲唔哂!

總括而言, 海鮮忌廉意粉好有驚喜, 除好多蟹肉外, 忌廉汁調得好, 整個餐廳氣氛舒適和諧, 老板同侍應待人親切有禮, 如再去首爾, 一定會再到。

 
每人消費: 約12000韓圓 (午餐)
評分: 味道5   服務5   環境5   衛生4   抵食4
由安國站2號出口影出嚟的大街
由安國站2號出口影出嚟的大街
安國站2號出口沿路直上的大街, 有零星的禮品店
安國站2號出口沿路直上的大街, 有零星的禮品店
慢行了10分鍾, 終於到了北村韓屋起點, 韓屋外的一排牆畫
慢行了10分鍾, 終於到了北村韓屋起點, 韓屋外的一排牆畫
韓屋外的小花園
韓屋外的小花園
韓屋仍有人住
韓屋仍有人住
沿路都有一些DIY飾品店, 呢間就賣舊玩具
沿路都有一些DIY飾品店, 呢間就賣舊玩具
禮品店
禮品店
DIY 手作店
DIY 手作店


選了先由安國站2號出口向前直上, 打算行一個半圓, 然後在附近吃午飯後, 再行入三清洞走埋另一邊的韓屋區, 就走番安國站行去仁寺洞。

由安國站2號出口直上, 沿路經過市政府的裁判所, 零星的工藝品店, 較多的是租借韓服店, 港童已嚷著要試, 後來食完晏, 挑了一間韓服店比佢一嘗心願, 就係咁冇時間行埋三清洞那邊的韓屋。

由於韓國一向深受中國文化影響,  佢哋好多傳統嘅文化亦同中國相同, 如中國節日, 飲食習慣, 醫學, 建築等等都同中國文化有著關係, 而韓屋的建築風格跟我哋中國的簡直如出一轍。

在韓屋區不單只看韓屋建築群, 亦有較多飾品店, DIY手作店, 如皮革店, 自製併布等特色小店, 當然亦有好多小型Cafe'及果汁店等, 所以唔係只斋睇歷史建築, 仲可以走入租韓服店租番套韓服, 以韓屋作背景自拍靚相留念, 以我所租那間嘅租金, 租出外約兩小時, 約30000韓圓, 只租在店裡影樓拍照就約20000韓圓, 以上是不包梳頭及化妝, 要另加錢的。


 
參觀時段: 下午
評分: 值得去5  
人參雞湯 笑臉2017-06-21
一進餐廳, 門口就貼滿名人明星的光臨相片及簽名
一進餐廳, 門口就貼滿名人明星的光臨相片及簽名
餐牌
餐牌
有手信賣呢!
有手信賣呢!
人參雞湯其實都幾大碗的
人參雞湯其實都幾大碗的
黑蒜人參雞, 15000韓圜, 湯底較濃及深色, 黑蒜只得3顆
黑蒜人參雞, 15000韓圜, 湯底較濃及深色, 黑蒜只得3顆
普通人參雞湯, 13000韓圜, 湯底較清
普通人參雞湯, 13000韓圜, 湯底較清
室外用餐區, 好雅緻的環境
室外用餐區, 好雅緻的環境
北村百年土種雞湯門面, "突眼雞"卡通造形有突出呀!
北村百年土種雞湯門面, "突眼雞"卡通造形有突出呀!


由Bukchon-ro 的北村韓屋慢走至三清洞入口, 不經不覺已是三點, 另一半話好肚餓, 冇力行了, 就在附近見到北村百年人蔘雞的logo - 突眼雞, 我哋決定就在此午餐。

原本計劃在遊覽北村後品嚐人蔘雞, 已鎖定兩間 : 1) 北村百年人蔘雞湯 2) 土俗村人蔘雞湯, 由於後者未有到達, 而前者就在景福宮附近, 同我哋有一段距離, 所以取了近者。

北村百年位於安國站2號出口附近, 擁有清幽的室內外環境用餐區,  室外被一片青蔥植物包圍, 環境很好, 可惜夏天有蚊, 而且6月尾的首爾下午亦有30度氣溫, 所以梗係留在室內用餐啦!

我叫了一個普通人參雞湯及黑蒜人參雞湯, 當然有2份泡菜及蘿蔔, 普通人參雞湯味道清甜, 小雞內依舊有糯米紅棗, 而人參雖然不是名貴種, 但亦甘甜非常,雞雖不肥膩, 但雞味欠奉; 黑蒜人參雞湯內有4粒黑蒜, 湯味則比普通的較濃, 黑蒜連雞湯一起烹調的, 所以湯有黑蒜的甜味, 人參味就被削弱了, 不過論人參味就以普通的較好, 黑蒜湯底反而一般而已。

其實韓國食肆好守原則, 每人最好叫一份餐, 但由於我哋一路行就一路食, 個肚實在都經常半飽, 所以至叫兩份餐免浪費, 再加每人一杯飲品, 令有原則嘅韓國人都認為每人都有幫襯麻。
 
推介菜式: 黑蒜人蔘雞湯
每人消費: 約9000韓圓 (午餐)
評分: 味道4   服務4   環境4   衛生4   抵食4
工藝品小區 笑臉2017-06-21
森吉街(Ssamzigil) - 人人廣場
森吉街(Ssamzigil) - 人人廣場
森吉街內有很多不同的工藝品店及紀念品店
森吉街內有很多不同的工藝品店及紀念品店
森吉街由地下至上共五層, 每層都有特色飾品舖
森吉街由地下至上共五層, 每層都有特色飾品舖
森吉街第四層有文具店及Cafe'
森吉街第四層有文具店及Cafe'
仁寺洞的食店都以韓式為主
仁寺洞的食店都以韓式為主
仁寺路旁
仁寺路旁
出名的韓文招牌星巴克
出名的韓文招牌星巴克
森吉街頂層
森吉街頂層


影完韓服照, 慢慢行落仁寺洞, 走至地標建築 - 森吉街(Ssamzigil), 此處就係仁寺洞的中心點, 整條仁寺洞路都係步行街。

仁寺洞的店舖主要售賣工藝品或記念品為主, 租韓服的小店亦不少, 感覺文化氣息較濃厚, 食店亦以韓式為主打, 如想買紀念品, 可在仁寺洞尋寶, 特別係在森吉街(人人廣場),  裡面的小店售賣很多特色文具, 飾品及工藝品, 價錢有平有貴, 唔幫襯都要上去window shopping一下, 包你大開眼界呢!
參觀時段: 下午
評分: 值得去4  
韓式糕餅店門口
韓式糕餅店門口
韓式糕餅種類很多
韓式糕餅種類很多
有些包裝精美
有些包裝精美
糕餅禮盒裝
糕餅禮盒裝


沿仁寺洞路漫走, 除了有較多工藝品店及精品店外, 當然亦有一系列韓國化妝品牌店駐守, 在這群商店對面, 有一間韓式糕餅店, 名字是韓文的, 相片1有韓文招牌。

糕餅店內的小糕餅賣相十分似日式的草餅, 外形很討好, 其實味道都很似, 餅餡有紅豆, 豆沙及綠豆蓉, 甜度亦可接受, 我哋買了幾款, 有些雪凍了, 味道仲好, 但保鮮期有限, 所以未能買來作手信, 此店除了賣糕餅, 亦有賣甜品, 可以坐低食架。
每人消費: 約1000韓圓 (下午茶)
評分: 味道4   服務5   環境5   衛生5   抵食4
地道辣火鍋 笑臉2017-06-21
火鍋好大盤, 以蔬菜較多
火鍋好大盤, 以蔬菜較多
豚肉魷魚鍋, 好辣呀!
豚肉魷魚鍋, 好辣呀!
叫了個鴛鴦蛋餅, 最好係唔辣呀!
叫了個鴛鴦蛋餅, 最好係唔辣呀!


由於在鍾路地鐵站內行錯方向, 攪到差唔多9點至返到弘大, 在弘大站3號出口直行至大路口, 見到間宵夜火鍋店充滿人氣, 年青人又多, 招牌是寫韓文, 應是食韓式地道火鍋。

餐牌有中文, 亦有相片, 讓外國人容易點餐,  我哋點了一客豚肉+鮮魷魚火鍋及一客鴛鴦蛋餅, 由於唔記我得叫走 "辣" , 整鍋都是 "紅"色湯底, 馬上問可否換少辣, 侍應亦知我哋係遊客, 有禮告之已順應情況幫我哋少"辣" 了, 可惜另一半依然頂唔順而辣到"飛"起, 狂飲三大支茶, 我同港童尚算頂得住; 事實上, 個辣鍋材料相當豐富份量又多, 除了豚肉和魷魚外, 蔬菜如椰菜, 紹菜及洋蔥特別多, 而由於店員見我哋"辣到飛起", 免費給我哋三碟芽菜解辣, 真周到呢!

至於鴛鴦蛋餅, 雖然很普通, 但蛋味豐富, 又可給我哋解辣, 當然欣賞呢!
 
每人消費: 約13000韓圓 (晚餐)
評分: 味道4   服務4   環境4   衛生4   抵食4
餐廳內
餐廳內
餐牌 1
餐牌 1
餐牌2
餐牌2
飲品餐牌
飲品餐牌
Recotta Cheese Salad - Ciabatta Bread  11500韓圓
Recotta Cheese Salad - Ciabatta Bread 11500韓圓
朱古力Latte  4500韓圓
朱古力Latte 4500韓圓
Strawberry Yogurt  5500韓圓
Strawberry Yogurt 5500韓圓
Rye Bread Bulgogi Sandwich + Saland 9000韓圓
Rye Bread Bulgogi Sandwich + Saland 9000韓圓


29-06-2015, 今日算早出門口, 11:30AM, 由民宿出去轉右方向走, 周圍遊蕩, 經過此間Cafe', 見裡面都坐了四五枱客人, 於是就選此間作早午餐解決之所。

朱古力Latte 4500韓圜, 起初飲時味道剛好, 但飲到尾段就好甜了;

士多啤梨乳酪 5500韓圜, 終於叫到有士多啤梨的飲品, 酸"May May"的, 好好味;

Recotta Cheese Salad + Ciabatta Bread, 11500韓圓, 主角當然是Ciabatta Bread (一種意大利麵包的名稱)及Recotta Cheese, 芝士包住沙律菜及已加沙律醬的薯仔, 加埋提子乾, 麵包鬆軟煙靭, 唔錯;

Rye Bread Bulgogi Sandwich + Salad 9000韓圓, 韓式烤肉唔辣加埋沙律菜同薯仔, 連同麥包一齊食, 都算飽肚;

總括來說,  I'am a Bruch Cafe' 感覺良好, 環境既warm, 飲品同三文治沙律又做得唔錯, 值得推薦。

每人消費: 約9500韓圓 (早餐)
評分: 味道5   服務5   環境5   衛生5   抵食3
兩位女士正在造糯米糕, 好似中式茶果和糯米糍
兩位女士正在造糯米糕, 好似中式茶果和糯米糍
市場有不少賣醃蟹
市場有不少賣醃蟹
韓式囍慶食品
韓式囍慶食品
乾糧雜貨
乾糧雜貨
好多種類的生果
好多種類的生果
熟食攤檔
熟食攤檔
熟食區,  由於當時正是中午時分, 烈日當空, 很熱, 簡直冇胃口掃街
熟食區, 由於當時正是中午時分, 烈日當空, 很熱, 簡直冇胃口掃街
呢檔嘅魚條非常好食, 彈牙非常
呢檔嘅魚條非常好食, 彈牙非常


食完個完美嘅Brunch, 就行出去弘大的Yangtwa-ro大街乘巴士603號去廣藏市場, 巴士上有韓, 英及中文廣播提醒乘客下車, 所以下車不成問題。

廣藏市場咁出名, 真係要拜韓國節目 - Running Man所賜, 而市場售賣貨品種類繁多, 有床上用品, 衣服, 生熟食品, 乾濕貨品等, 就連工藝品都有售, 真係一處包羅萬有嘅大市場。 

由於正值1點多鐘, 烈日當空, 氣溫十分高, 整個廣藏市場又冇冷氣的,  走過熟食區, 見到炸及烤的熟食, 完全冇胃口, 但在熟食與醃蟹區之間有一檔賣魚旦魚條批發小舖, 門口有售關東煮的魚條, 大大條, 1000韓圜, 非常好食又彈牙, 我哋只幫襯此間, 跟住就向賣生果區出發........

老實說, 韓國的生果售價都幾貴, 同日本價錢差唔多, 初頭以為廣藏市場咁出名而提高市場價錢, 但現場見都幾多韓國本地人幫襯, 之前亦在超市睇過吓生果價錢, 見都算比超市平D, 就買了小梨子, 提子, 紅蘋果和西瓜, 約港幣300元, 另一半話同在香港的價錢差唔多, 不過嚟到都要親身試吓嘅......

生果食後感 :  

小梨子酸甜參半, 個人覺得台中的較好同鮮甜;

提子樣子似巨峰, 味道亦相近 - 好酸呢;

紅蘋果, 清甜爽脆, 同中國出品差唔多, 只冇日本黃林蘋果咁香;

西瓜, size比馬來西亞西瓜大, 不過我哋選了個細碼點, 非常多汁甜美, 係四種生果中最好食嘅。
 
推介項目: 食魚蛋
參觀時段: 下午
評分: 值得去4  
舒暢的一刻 笑臉2017-06-21
在東大門
在東大門


去完廣藏市場, 都只係兩點幾, 天氣都幾熱, 而且行咗四日, 成身都散哂, 真係覺得好勞累, 另一半提議話去汗蒸幕體驗吓, 馬上whatapp問香港嘅朋友, 佢就叫我去呢間易去價錢平嘅Sparex。

Sparex就在東大門Good Morning City地庫B3, 乘地鐵就在東大門歷史文化公園14號出口一出就係, 價錢非常抵, 5400韓圜, 呢個係非繁忙時間價錢, 門口幾位女職員係"阿珠媽" 年紀, 比咗套制服給客人, 我咃就分男女進入更衣室, 入更衣室前, 要把鞋子放進鞋locker, 更衣室另有locker放衣服, 由於入了更衣室後, 就不能拿出電話, 裡面亦禁拍, 我哋一路都冇攞手機出嚟影相,  所以此段相片欠奉。
 
Sparex 唔係豪華型嘅韓蒸幕, 係大眾化類型, 所以受好多韓國上了年紀的人士歡迎, 環境算乾淨, 只係拿室好舊, 感覺唔太乾淨外, 其他都OK; 沖涼係冇浴簾或間隔門的, 完全係大解放, 有花灑及坐式沖身, 旁邊有小膠盤供應, 在花灑沖涼位中央位置有三個浴池, 兩個熱嘅, 約40度, 另一個就水喉水溫度兼有按摩的浴池, 而另落一層就係大蒸房及休息室所在地, 蒸房共4個, 各個都係不同的高溫房, 冷凍室共一個, 裡面是零度, 而休息地亦以韓式古代裝修為主, 有餐廳, 價錢唔貴, 我咃買了雪糕, 都係超市價。

如果諗住小休吓, 平平地初試韓蒸幕,  可以到Sparex, 如平時享受慣豪華慣嘅, 就唔好揀呢間了!
推介項目: 睡一覺
參觀時段: 下午
入場價錢: 每人8000韓圓
評分: 值得去4  
文物同新建築融會一齊
文物同新建築融會一齊


去完汗蒸幕, 行過對面就係首爾地標 - 東大門設計廣場, 外型設計非常前衛時尚, 但當中又有歷史意義文物出土, 為咗文物及現代建築, 當然要過去謀殺吓我部相機啦!

設計廊內有售賣來自韓國及外地的設計家的物品, 眼見有文具, 玩具, 家庭用品和裝飾擺設等.....亦有定期嘅展覽, 只係要另比錢參觀, 唔買都嚟欣賞吓呢度嘅建築設計啦!
參觀時段: 下午
評分: 值得去5  
啤酒炸雞 笑臉2017-06-21
東大門分店, 現在已關了
東大門分店, 現在已關了
酸蘿蔔非常好吃
酸蘿蔔非常好吃
水果沙律, 生果很新鮮, 只是太多沙律醬
水果沙律, 生果很新鮮, 只是太多沙律醬
辣味和原味炸雞
辣味和原味炸雞
炸雞餐牌
炸雞餐牌
其他主菜餐牌
其他主菜餐牌


好快行完東大門設計廣場, 就行去two two 東大門店食炸雞,此店亦有中國籍店員為各位客人服務, 我哋叫了一客 "鴛鴦炸雞",有外皮金黃酥脆的原味炸雞和招牌為辣味炸雞兩款,店員話係呢處最有人氣嘅招牌炸雞,兩種口味嘅炸雞肉質都幾滑嫩多汁,在原味炸雞淋上Two Two炸雞獨門調配的醬料,醬汁辣中帶甜,融合雞汁與外皮的辣味,又香、又脆、又辣、都幾好吃!

港童就點了一客去骨炸雞, 但就好"鞋"口, 可能大部份都係雞胸肉吧!  另叫了一大杯啤酒, 果然同炸雞非常配合, 另外鮮果沙律裡的水果非常新鮮, 有蘋果, 梨, 提子乾, 小蕃茄及芒果, 只係沙律醬較多, 附上清爽高麗菜絲配沙律汁,爽口解油膩,
口感清爽的醃酸蘿蔔,吃起來清脆開胃,十分消暑,和其他韓國餐廳一樣都是無限供應呀!

 
每人消費: 約12000韓圓 (晚餐)
評分: 味道4   服務3   環境3   衛生4   抵食3
甜美窩夫 笑臉2017-06-21
Cafe' URP 正門
Cafe' URP 正門
Cafe' 室內環境
Cafe' 室內環境
幾位年青人負責調咖啡及整甜品
幾位年青人負責調咖啡及整甜品
美式咖啡及凍檸茶
美式咖啡及凍檸茶
原味窩夫
原味窩夫
芒果雪糕窩夫
芒果雪糕窩夫


在民宿一出門轉右邊行至街尾, 見到呢間cafe', 最吸引我哋係門口張大banner, 有個好靚嘅士多啤梨雪糕窩夫作招牌, 我哋就入去早餐+午餐了。

cafe'裝修好有書卷味, 整間Cafe' 面積細細但有好多書及雜誌襯托著, 感覺優閒舒適; 當日裡面嘅職員只有3名, 3位都似是90後的年青小伙子, 我點餐時他們都不能簡單會答我, 只能yes or no, 唔緊要啦, 最緊要佢哋都非常有禮貌, 由於6,7月已不是士多啤梨產期, 所以自然令我哋有點失望, 佢指住另一幅芒果窩夫的相片, 示意叫我哋order呢款, 好, 反正我家都是芒果迷, 好可惜, 佢哋又同我講唔夠芒果給我做窩夫, 但會用其他嘢補償云云..... 最後原來係.......

我哋叫了如下飲食 :

1) 原味窩夫和芒果窩夫 : 份量好大, 很脆, 芒果因不夠, 店員送了兩個大雪糕球, 變成芒果雪糕窩夫,     芒果較酸, 雪糕配窩夫當然係最夾啦;

2) 美式涷咖啡, 冇特別之處;

3) 涷檸茶, 以解喝之用

窩夫雖然大大件, 雪糕好好味, 不過窩夫仲未達到好脆口嘅水準, 有可改善的空間。

 
推介菜式: 窩夫
每人消費: 約9000韓圓 (早餐)
評分: 味道5   服務5   環境5   衛生5   抵食4
合井 Mecenatpolis Mall 內
合井 Mecenatpolis Mall 內
合井 Mecenatpolis Mall 內佈置
合井 Mecenatpolis Mall 內佈置
合井Homeplus 超市
合井Homeplus 超市
超市內有好多不同種類的沙律菜, 好新鮮
超市內有好多不同種類的沙律菜, 好新鮮
蘋果很新鮮
蘋果很新鮮
今次韓國之旅最好味的生果就係西瓜
今次韓國之旅最好味的生果就係西瓜
合井Homeplus 在Mecenatpoils Mall 地庫
合井Homeplus 在Mecenatpoils Mall 地庫


食完窩夫飽飽哋, 由弘大慢慢散步到合井, 一條直路, 好好行, 約慢行20分鍾就到, 當然就係去合井Homeplus 超市掃貨啦!

Mecenatpolis Mall 除了包含Homeplus 呢個大品牌超市外, 仲有好多時裝連鎖店, 家品店及食店, 另外亦有樂天影院, 室內以店舖為主, 室外型造成一個優閒花園, 小朋友可暢懷遊玩, 旁邊當然以食店咖啡店為主, 很適合家庭消閒。

Homeplus 就在Mecenatpolis Mall 地庫, 面積都幾大, 包含超市同小型food court, 最開心係買到最愛嘅生果及零食, 大家買得好開心。
推介項目: Homeplus 超市購物
參觀時段: 下午
評分: 值得去5  
炸豬排冷麵定食, 6000韓圜
炸豬排冷麵定食, 6000韓圜
海鮮湯麵5000韓圜, 唔貴
海鮮湯麵5000韓圜, 唔貴
Homeplus的food court 唔係好大, 只得6間食店
Homeplus的food court 唔係好大, 只得6間食店


買完手信, Homeplus 超市旁邊係一個小型food court, 只有6間小食店, 以韓日式為主, 我哋見門口的食物模型同價錢好吸引, 就入去試吓。

我哋各自點了自己嘅選擇如下:

1) 炸豬排喬麥冷面定食, 6000韓圜, 唔錯, 喬麥冷麵好多, 炸豬排很脆;

2) 海鮮湯麵 X 2 , 5000韓圜/碗, 有蝦及扇貝, 亦有蔬菜 , 蝦雖然不大隻但很新鮮, 味道OK。

總括來說, 呢處食嘢係今次旅程最平的, 但又唔差, 滿意! 
每人消費: 約5000韓圓 (午餐)
評分: 味道4   服務4   環境4   衛生4   抵食5
整條街的建築都充滿著東洋風味
整條街的建築都充滿著東洋風味
小店門面設計特別
小店門面設計特別
周圍有好多特式小食店
周圍有好多特式小食店
 好得意的壽司店, 連泊在門前的車都有壽司作裝飾
好得意的壽司店, 連泊在門前的車都有壽司作裝飾


在Homeplus 食完嘢, 行出嚟, 天色唔太好, 快步由Mecenatpoils Mall 行去對面上水區方向, 經過了渣打銀行轉入內街, 又係另一美食天地。

由於走了不到10分鐘已下大雨, 有傘都不能再走了, 唯有就企在街角欣賞上水區內街的特式小食店, 這裡的食店都有自家的門面設計, 令人目不睱及, 真係要多謝天降大雨, 令我這怱忙的都市人有閒情注足細味每間特式小店的設計, 來這裡要慢走同影相呀! 很有味道呢!
參觀時段: 下午
評分: 值得去5  
八種不同味道的五花腩, 一排小碟上, 出場好有氣勢
八種不同味道的五花腩, 一排小碟上, 出場好有氣勢
除八小碟五花腩, 蔬菜出場都好宏偉
除八小碟五花腩, 蔬菜出場都好宏偉
八種味道的五花腩, 各有特式, 好好食
八種味道的五花腩, 各有特式, 好好食
店員會為客人把五花腩剪開, 放在鐵板上, 旁邊放埋芽菜
店員會為客人把五花腩剪開, 放在鐵板上, 旁邊放埋芽菜
店員久唔久走嚟同客人煎吓D五花腩, OK就會再剪細叫客人品嘗
店員久唔久走嚟同客人煎吓D五花腩, OK就會再剪細叫客人品嘗
用粗牙簽插著的白蘿蔔, 唔係比客人燒嚟食, 係用嚟把鐵板擦乾淨
用粗牙簽插著的白蘿蔔, 唔係比客人燒嚟食, 係用嚟把鐵板擦乾淨
呢個湯比在弘大食豚肉的火鍋更辣
呢個湯比在弘大食豚肉的火鍋更辣


店内的招牌是8种不同味道的五花肉(大蒜、葡萄酒、松叶、香草、咖喱、大酱辣椒酱高丽人参)。店員話選用韓国產的新鲜生肉,品質绝對有保证。果然五花肉的肉質超爽, 肉味香, 肉味完全冇比以上八種調味覆蓋, 港童同另一半都食到豎起大姆指呢!

五花腩各種味道都有其特色, 仲好好味外, 我哋好欣賞此店的卓頭, order完畢, 馬上把一排八小碟五花腩擺上, 每隔都有肉的調味資料, 而上蔬菜時亦大堆頭, 一大籃菜是作包裹著燒好的肉食用, 當上大盤湯時, 見湯清澈, 所以未有要求走"辣", 點知就出事了, 呢個湯後來越煮越紅, 更越煮越辣, 湯裡的海鮮有蝦及青口, 但太辣了, 真係吃不消了

我哋所選的是 八色燒肉套餐, 大致供2-3人, 35000韓圜, 份量剛剛好, 蔬菜係冇限添加, 此套餐係冇包含白飯, 如要就要另加錢。
推介菜式: 八式燒肉
每人消費: 約11666韓圓 (晚餐)
評分: 味道5   服務4   環境4   衛生4   抵食4
雪糕並不太甜, 味道清新天然
雪糕並不太甜, 味道清新天然


昭福的冰淇淋是為了追求健康與美味crossover而成,強調没有添加色素、人工调味剂等化学物質。用玄米、白米、豆、南瓜、柿子、糖稀等天然材料,走純自然路線。

昭福的招牌冰淇淋,用玄米、豆、牛奶做出来的雪糕口感很濃郁香甜, 最吸引人的是插在雪糕旁邊的那朵白色的雛菊,點缀在旁的有香軟的豆粉雪球、甜糯的南瓜、香甜可口的蜂巢,仲有香脆的堅果以中和甘甜的味道,口感層次非常豐富,而且還夠兩人享用,非常啱情侶拍拖一齊食。
每人消費: 約5200韓圓
評分: 味道5   服務5   環境5   衛生5   抵食3
餐廳門口
餐廳門口
餐廳外的佈景
餐廳外的佈景
餐廳內
餐廳內
餐廳內的Hello Kitty 場景
餐廳內的Hello Kitty 場景
餐廳內的Hello Kitty 睡房場景
餐廳內的Hello Kitty 睡房場景
Tiramisu 非常唔好食
Tiramisu 非常唔好食
十多啤梨蛋糕仲難食
十多啤梨蛋糕仲難食
調味料擺放處
調味料擺放處


Hello Kitty Cafe' 就在弘大八色燒肉隔離, Cafe' 位於一間大宅內, 有好多大樹圍繞, 如冇招牌就真係好難搵。

在大雨及隱蔽的林蔭下, 無意間見到Hello Kitty 小招牌, Cafe'外的小花園有很多影相位及布景, 而室內的的場景位亦標緻可愛, 有Hello Kitty大廳同睡房

唔幫襯都可以在餐廳影相的, 但一場來到, 當然小試其餅食, 叫了士多啤梨蛋糕(10,000韓圓),  個蛋糕應該雪了太久, 蛋糕嘅質感已變了硬, 那片士多啤梨外層, 太甜了, 非常差嘅出品, 簡直不能下嚥, 至於Tirmisu (10,000韓圓)稍為可以入口, 但都不新鮮, 亦都是雪了太久的主因, 在咁靚嘅主題餐廳吃難食的甜品, 好失望囉!
每人消費: 約5000韓圓 (宵夜)
評分: 味道2   服務4   環境5   衛生5   抵食4
弘大很多小商店, 全部都非常迎合年青人
弘大很多小商店, 全部都非常迎合年青人
弘大是越夜越精彩
弘大是越夜越精彩
弘大的街邊檔, 煎魚條都係廣藏市場好食D
弘大的街邊檔, 煎魚條都係廣藏市場好食D


弘大是一個非常年青嘅社區, 在此地走走, 令人都 "後生"D, 在弘大有很多小店及小餐廳, 大部份都是非常合年青人style, 衣履鞋襪及飾物全部都屬潮流尖端, 餐館都是年青一代的聚腳點, 由於很多年青人都係學生哥, 在此消費都不是太貴, 非常推薦在弘大住宿。
參觀時段: 晚間
評分: 值得去5  
在派出所旁邊, 旁晚才開店
在派出所旁邊, 旁晚才開店
室內以美式為主打裝修, 好多美國歌星黑膠碟
室內以美式為主打裝修, 好多美國歌星黑膠碟
餐廳佈很多懷舊物
餐廳佈很多懷舊物
熱狗+薯條+忌廉湯
熱狗+薯條+忌廉湯
正
正
正
正


行完弘大, 已累到不得了, 港童又嚷著要去近民宿那間熱狗店。

由於仲係好飽, 所以只叫少少試吓味:

1) 雙層芝士熱狗, 4500韓圜, 味道好豐富, 醬汁帶起整個熱狗的味道, size都算大;

2) 芝士薯條, 3500韓圜,不醮茄汁而是沾芝士醬,香脆的薯條+芝士醬,真的好好味;

3) 忌廉湯, 2500韓圜,不太濃,湯有很多麵包粒,好飽肚啊!

完滿地完成整個重遊首爾的旅程,總結後旅費用如下:

1)來回首爾連稅包行李X 3 HK$4578;

2)唱錢HK$2000;

3)This is Guesthouse 5晚3人房 : HK$2305;

4)   食, 買及交通 : HK$8000

合共HK$16883, 平均每人約HK$5628。
每人消費: 約3150韓圓 (宵夜)
評分: 味道5   服務3   環境4   衛生4   抵食3
  2 個留言    |  加入你的留言