因為航程係喺英國Dover上船，我地由香港飛去英國時先留喺倫敦三日，希望搞好時差，再由倫敦坐車去Dover個郵輪碼頭上船。

XO真係大鄉里，諗住坐船同坐飛機都係差唔多啦，點知原來坐船比坐飛機簡單好多。一到碼頭就有專人檢收我地一早標籤好o既行李，安排送上廂房。我地只要提取所需o既手提行李同證件，辦理兩分鐘都唔洗o既簡單快捷出境手續，影返幅靚相（Crystal攝影隊負責，即如果要一張留念，就要比錢），咁就可以上船。

可能我地真係好早啦，哥哥又喺網上做好"Priority Check-in"，所以覺得登船手續唔係好繁複。排隊時間大概五分鐘，Crystal o既工作人員們先收起我地o既旅遊證件，因為佢地會負責哂搭客喺每個口岸o既出入境手續，然後再幫我地即場用電腦製作身份證，以便上落船點名及確認身份。始終我地都係第一次搭船，難免有好多問題，不過佢地真係好有耐性地續一解答，感激萬分！

我地預鬆左時間，大概一點已經辦理好登船手續。因為廂房要三點先準備好，我地就走左入去Crystal Dining Room，一邊食午餐，一邊等上房。

我地一埋位，肥哥仔首先每人派杯涼透心o既香檳，歡迎我地！雖然係我地船上o既第一餐，小肥已經留意到Crystal為每餐都會印製出特別餐單，標明日期，地點，廚師，每日餐酒，及每道餸菜之詳情。餐桌上所擺放o既枱布及潔亮無瑕o既餐具亦令小弟印象深刻。雖然嗰餐只係簡單o既午餐，但係Crystal Dining Room入面所有服務生，不論年幼或年長，高級或低級，全體人員都非常落力，而且態度友善，比起五星級酒店更加專業！

食物方面，廚房用料新鮮，連一個看似簡單普通o既肉醬意粉同芝士漢堡都做得好細緻，質高，味道佳，最重要係小肥食完一Ｄ敏感反應都冇，証明絕無味精！XO對個甜品Ice-Cream Sundae "Viennese Ice-Cream" (Vanilla & Coffee Ice-Cream, Cold Strong Coffee & Whipped Cream) 簡直係愛不釋手；兩款不同味道o既雪糕加上濃烈o既咖啡，依個組合相當香滑美味，讚！

由於我地訂房訂得太遲，所以價格比較平，亦即較低層o既房都已經滿哂，我地唯有入住9樓附有露台o既廂房。

睇相都可以見倒，廂房非常寬敞舒適；露台，客廳，超大o既雙人洗手間，電視，雪櫃，飲品，應有盡有。每間廂房都會有位妹妹仔負責打掃，添加日用品，換水，開床等服務。雖則話服務費已經包左，不過大家都可以加料以示鼓勵。

Crystal郵輪此程正價約為USD 12,000一位，但因有買一送一優惠，我地最終以優惠價每位約USD 6,000入住；食物，酒水，服務費等全包；用A/E找數仲有額外奬賞。聽落好似好貴，不過諗深一層，我地每日五餐（早，午，茶，晚，宵）任食任飲，起身食飽就可以上岸玩，黃昏前上船可以先黎一個下午茶或Happy Hour飲返兩杯，跟住睇表演，食晚飯，郵輪夜晚起航後可以到船上o既Casino玩返兩手，又或者去唱K，聽歌，跳舞，第二朝起身又到新景點；以咁短時間去遊咁多個國家，又唔需要上落飛機，出入機場，辦理任何出入境手續，搵酒店，訂酒店，執行李，擔心搭車，膳食等，慳左咁多時間同精神，其實真係抵返哂！（平均USD500一晚連膳食，已經平過英國或其他歐洲酒店淨住一晚！）

雖然Crystal Serenity船上有其他餐廳，不過我地差不多每晚都會去Crystal Dining Room 食。Crystal Dining Room晚餐有兩輪，為方便日頭上岸遊玩，近黃昏上返船之後有時間去睇每晚不同o既精彩表演，我地選擇食八點半開波o既第二輪，唔洗咁趕。

第一晚o既Bon Voyage Dinner有Crystal特別訂製o既餐碟，好別緻。我地喺dining room接住落黎o既服務生都會係Domagoj同Martin，而sommelier就係貌似英國威廉皇子o既Pierre。由於大肥爸爸食麵包非常揀擇，第一晚已經講明只係會食法包， 而且食親都最少三塊，嗰晚之後，哥仔都好醒目地每晚預備定一籃法包比佢，認真唔話得！

每日o既晚餐餐牌好特別，左手邊係一份廚師推介，而右手邊就係廚房所預備左o既不同菜式。如果大家唔喜歡餐牌上o既食物，師傅係會為客人烹調一D比較傳統o既牛扒或者魚。食完主菜，就會送上甜品牌，每晚不同，款式新穎，包保有驚喜！好多時重會有人喺餐廳內即場煮製甜品添！

由於食物飲品全包，小肥極不客氣地先黎一杯香檳，跟住再叫左兩款頭盤，一份意粉，牛仔肉主菜同大廚推介之精選甜品。因為實在係太美味啦，我一定要續一同大家講解一下，自己順便回味一番：
頭盤一之Forest Mushroom Tart with Herb Salad & Pesto Aioli：薄薄o既蘑菇tart非常香脆，味道清而不淡，食落好健康！

頭盤二之Sauteed Jumbo Shrimp with Slow Roasted Vegetable Salad：珍寶蝦鮮甜爽脆，冇得彈！

意粉之Penne Lisce Alla Primavera (Italian Pasta with Assorted Spring Vegetables, Mushrooms, Cream Sauce & Italian Parsley)：作為非主菜，所以份量比較少，雖然係用忌廉做，不過食完一Ｄ都唔覺溜。意粉煙韌，配料全部都係蔬菜類，又一健康之選！

主菜之Roasted Wisconsin Veal Chop with Rosemary Gravy, Wild Mushroom Risotto & Broccoli：Medium Rare o既牛仔肉好夠粉紅，肉質鬆軟，肉汁足，個醬汁亦校得好香甜美味。Risotto做得好light，一流！

大廚推介之甜品"Mohr Im Hemd" (Chocolate Hazelnut Pudding with Chocolate Sauce, Whipped Cream & Vanilla Ice-Cream)：睇完個甜品解說都已經覺得好溜，食落個pudding味道真係比較甜同厚，不過勝在有忌廉同雲尼拿雪糕中和返，而且每份唔會太大，所以小肥都可以食得哂。 

Crystal Dining Room 地方闊落舒適，環境衛生比得起五星酒店有餘，服務佳，食物質高，師傅廚藝了得，完全冇任何地方可以扣倒半分，肥肥一族一致比100分滿分以示滿意！