Panoramic Nagasaki Tour首站為「長崎原爆資料館」（The Nagasaki Atomic Bomb Museum），即團友們最想到之景點。喺旅遊巴上，導遊小姐已經開始講解有關原子彈爆發o既歷史及戰後一啲感人故事，亦提醒大家於館內可能會睇到一啲令人情緒不安o既照片，好讓大家步入館前先收拾心情。

進入館內必先經過一條螺旋形o既樓梯，其白色o既牆身以千鶴摺紙「連鶴」（A String of Thousand Cranes）圍繞住，係由一位荷蘭摺紙藝術家Manno Ori先生以一張長達150米o既紙所手摺而成。相信好多人都有摺過紙鶴，但係此「連鶴」後面其實係有一個非常感人o既故仔，主角係一位名叫佐佐木禎子（Sadako Sasaki）o既小女孩。據導遊小姐所講，木禎子係原子彈爆炸事件中其中一位受害者，遇襲時僅僅兩歲，爆炸威力強大至令小女孩從家中飛出窗外，卻又出奇地仍然生還，而且表面無任何傷痕，看似健康地成長。奈何木禎子於十二歲時，身體突然產生外皮紅腫、出現紫色斑點等異狀，經診斷後証實因受到當年原子彈輻射感染而患上血癌。木禎子並無因此而放棄，因為佢深信日本相傳多年o既一個「千鶴傳說」會實現人間，只要佢誠心摺上一千隻紙鶴，神靈就會為佢實現康復o既願望。因為嗰個時代摺紙為奢侈品，木禎子只好用剩餘o既藥紙及其他廢紙摺紙鶴，亦感染到周邊其他病患者一齊摺，可惜當佢摺完第一千隻紙鶴後，奇蹟並未有發生，並不久離開人世，但其堅毅之心卻得以流傳，感動世人。

原子彈博物館內除咗圖文並茂地講述原子彈爆發前後o既歷史、長崎市重建o既過程、原子武器o既研製及其帶黎o既悲慘禍害之外，當中亦展覽出多件被破壞o既建築物遺迹，如停頓於案發時間十一點零二分o既牆鐘、瓦片、骸骨、原子彈模型等。看畢，大家都抱著沉重o既心情沉默離去。

離開原子彈博物館，導遊小姐就帶領團隊行去鄰近o既「平和祈念像」。平和祈念像（Peace Statue）十米高，其祥和之臉孔象徵著慈悲，緊閉o既雙眼意味著為死難者祈禱冥福。看似簡單o既雕像其實仲隱藏著多層意義：高舉o既右手正指向原子武器o既威脅，平舉o既左手代表永世和平，打坐o既右腳反映沈思冥想，伸展o既左腳則表現出其請救世人之主動性。

平和祈念像旁有個祈福塔「折鶴之塔」，其金鶴頂部同佐佐木禎子o既「千鶴故事」相連，因為當年木禎子臥病在床時，其好友正正就係摺咗一隻金紙鶴送贈祝福佢，並給其敘述「千鶴傳說」。塔內多隻七彩紙鶴全為供奉死難者之祭品。

平和祈念像位於「平和公園」內之「願望區域」（願いのゾーンZone of Hopes），顧名思義係象徵住和平與希望。從祈念像沿住公園一直行，會經過多國送贈之和平紀念碑，故此廣場又名「平和祈念像地区」（Peace Symbols Zone）。

廣場內有幾多個紀念碑就唔係好清楚，以上相片亦只係一小部份。當中喺「長崎の鐘」及「原爆殉難者之碑」旁，有位大叔不斷用日文講話，更聲稱自己為原子彈爆炸後其中一位生還者，記得當年只係搵乾淨水飲已經夠艱辛，能夠活到現在實屬僥倖，亦不介意與旅客們擁抱握手，希望為大家帶來幸運。

和平紀念碑廣場尾端有一個噴水池，係得到國內及國外多方o既贊助建造而成，名為「平和の泉」（讀音：Heiwaa no Izumi；Fountain of Peace）。受到原子彈突擊後，受難者好多都因缺水而渴死，噴水池內o既水正好用作獻祭給其之用，滋潤在天之靈。此外，泉水噴射出黎o既形態猶如和平白鴿拍翼飛翔，亦與長崎港口之鶴鳥外形相稱（長崎港又名「鶴之港」），具雙重意義。

和平之泉正前方有一塊石碑，上面刻有由九歲女受害者山口幸子所寫o既日記中o既一節：

「のどが乾いてたまりませんでした。水にはあぶらのようなものが一面に浮いていました。どうしても水が欲しくて、とうとう油の浮いたまま飲みました。」

"I was thirsty beyond endurance. There was something oily on the surface of the water, but I wanted water so badly that I drank it just as it was."

意思大概係：「口渴至再也無法忍受了。水面上浮有一層看似油的物質。奈何太渴求水了，即使有油浮於水面也得喝下去。」

平和公園四周都可見到一啲建築物o既遺跡，行近睇先知原來原子彈爆炸當時，該地為長崎監獄o既支所「長崎刑務所浦上刑務支所」，因被炸到粉碎，獄內所有職員、監犯、疑犯無一幸免，遺下o既只有地基、矮牆及鋼筋等。牆身現作圍牆之用，頂部就種上花草作為裝飾。

平和公園附近就只有一間售賣手信o既「被爆者の店」，位於長崎監獄圍牆側邊，入面不但有各式各樣o既手信、精品、書籍等，更有即飲酒品、即食熱點及蛋糕，歡迎試食，服務生亦落力友善，團友們都買得勁開心！

我地當日所參加o既Panoramic Nagasaki Tour其實仲有一個景點Glover Garden，但係由於長輩們實在無力再行斜坡，行到半路大隊就決定隨便搵間快餐店食碗拉麵或者飯物，稍作休息及充飢，而最愛旅遊o既哥哥則獨自一人繼續觀光。

大家都係第一次黎長崎，只好單憑商店門外之食物圖片而選擇用餐地點，結果就行咗入去一家叫「長崎マリア館」（Nagasaki Maria Kan）o既餐館入面。共兩層o既Maria Kan，地舖係一間大形手信店，地牢則改建成飯堂式o既中華料理餐廳，面積同樣咁大，地方亦覺簡潔衛生，但貼滿長崎照片及雪糕口味之牆身及紅色吊燈就較為俗套。當日除咗我地七個人之外，就只有一班日藉後生仔女，侍應姐姐雖然不懂以英語同我地溝通，但仍落力地為我地服務，給予熱茶熱水及附有圖片o既餐牌。

小肥叫咗一碗傳統日式中華料理丼物「親子丼」，即滑蛋雞肉飯，順道就考考團友們知唔知個餸名o既來由。哈，有「人肉百科全書」之稱o既大肥爸爸最愛搶答，其他人都未聽清楚個問題已經答出「蛋為雞之子也，雞為蛋之父或母親也」，真係恭喜佢答中冇奬。

親子丼套餐包有麵豉湯一碗及黃色醃蘿蔔一小碟，冇影到餐牌，不過記得一千日元有找，好似900日元咁上吓，屬正常日本價。外出天氣寒冷，第一口滑蛋熱飯暖至入心，就算雞肉有少少乾都只係懂得欣賞啲飯粒有幾香同幾軟熟，大肥更於五分鍾內食哂成大碗飯，真係誇張。

由巴士停車場步行往Glover Garden景點嗰條斜坡名為Glover-Dori，兩邊全為售賣長崎土產及精品之商戶，係區內著名o既手信街。團友八人並未有買下生果，大多集中購買Hello Kitty X長崎之精品及糕點小食。

其中一間店舖名為「カステラ神社」，「カステラ」讀音為「ka-su-te-ra」，係長崎特產蜂蜜蛋糕之名稱，「カステラ神社」等同「蜂蜜蛋糕神社」，個名改得夠搞鬼，夠突出！

不過喺咁寒冷o既天氣下，最懂得做生意o既一家就係「杉養蜂園」（http://www.0038.co.jp/ec/）；店內兩位姐姐不斷向途人免費派發熱飲，並推介飲品乃其自家釀製之果汁蜜簡單地以開水沖製而成。除咗冬天可熱飲、夏天可涷飲之外，果汁蜜可用作煮食用之調味品，例如調製果涷、雞尾酒、淋上刨冰、班戟等、甚至煮製排骨都一樣得！見佢地咁落力推銷，出名耳仔軟o既小肥一口氣更買下八款口味中之三款，每款各三枝，（嘻嘻，寓意「三三不盡，六六無窮，長長久久」），個人覺得，當中以「柚子味蜂蜜」（Yuzu Citron Honey）及「櫻桃味蜂蜜」（Acerola & Honey）汁製熱飲最為美味，絕對值得一試！

上文提到「カステラ」（讀音為「ka-su-te-ra」）為長崎特產之蜂蜜蛋糕，由於售賣此款蛋糕之商店實在太多，故小肥喺離港前已經做足資料收集功夫，知道港人大多愛吃「文明堂」品牌，更鎖定此家為目標店，購買手信。

創立於1900年o既「文明堂」係百年老字號，其蛋糕以高質及貴價為名，材料亦只用日本雞蛋「南蛮卵」、全國最嚴選o既純天然麥芽糖漿、頂級麵粉及糖粒，全為信心之保證。

據盒面所講，長崎蛋糕「カステラ」其實係十六世紀由一位葡萄牙傳教士引入長崎，「文明堂」門外亦貼有字句，講解蛋糕源於西班牙一個歷史王國Castile（西班牙文為「Castilla」），當時日本人以Castile之葡萄牙文「Castela」取名成「カステラ」（「ka-su-te-ra」）。因為清香甜美o既蛋糕深得長崎居民愛帶，故此亦試作模仿焗製，及後此味異國風味更逐漸演變成長崎特色土產。

雖然カステラ多被稱為「蜂蜜蛋糕」，但其實烤製過程當中並未有加入任何蜂蜜，原材料只有雞蛋、麵粉、砂糖及麥芽糖，味道則極似蜂蜜而已。

Panoramic Nagasaki Tour散隊後，小肥就同哥哥乘坐Crystal所安排o既免費穿梭巴士出長崎市中心逛街濕平。

相比起之前去過o既東京、橫濱同大阪，長崎市中心人流較少，街上所見到o既旅客好似全部都喺同我地同船o既。此外，到處都掛上「長崎燈會」o既紅燈籠，真係差啲以為自己仲係喺新地中華街。市內最受歡迎o既店舖似乎就係一百日元店「Daiso」及日本特有o既博采彈珠機店Pachinko，而外國品牌o既店舖看似為絕跡，感覺唔多潮囉。不過好在市內有不少超級市場，要購買新鮮魚生並不太難，而且價錢比其他城市更為便宜。

所有乘坐郵輪離開日本境o既搭客都必需正面與入境主任面談，辦理申報及離境手續。地點就位於碼頭，步行不需五分鐘，計埋輪候時間，全程約十至十五分鐘，簡易快捷。

郵輪預定傍晚六時駛離長崎鶴之港，下午五時半已有大批小朋友聚集船旁練習排出不同陣形，大約五時五十分更加插練鼓環節，搭客紛紛步出陽台觀看究竟。原來佢地係為歡送郵輪及到訪之旅客跳出鼓舞，準六時正式開始表演。眼見小朋友們雖然要挨涷，仍落力地打鼓跳舞，觀賞o既乘客都不斷拍掌歡呼以作鼓勵！

喺郵輪上，每每歡樂時光一到，團友們好自然就會聚於Crystal Cove，先嘆返一、兩杯雞尾酒，離開長崎當晚亦不例外。

Today’s Drink Special之Japanese Slippers – Sauza Silver Tequila, Midori Liquer, & Fresh Lime Juice：可能綠色o既雞尾酒內有兩種不同o既酒品，酸酸甜甜o既青檸檬味下之酒精第一口已直達鼻樑，精神為之一振！

郵輪駛離日本，Crystal個廚房除咗提供一啲傳統o既西餐菜式，如牛扒，煎魚等之外，亦繼續試玩西日fusion，並烹調出幾道又西又日o既美食。

Chicken Consommé with Wild Rice Fritter (Low Sodium)：Crystal非常注重搭客o既健康，只要食客提出要求，所有食物均可以「low sodium」造出。此味清雞湯毫不油膩，雖然屬少鹽，但清香o既雞味無減，加上日式飯粒點綴，令腸胃更加實在。

Tempura Fried, Rare Ahi Tuna Roll – Mixed Lettuce with Cocktail Tomatoes, Nashi Pear, Cucumber, Carrot, Daikon & Pickled Ginger, Drizzled with Sesame-Lime Aioli： 伴碟o既沙律用料新鮮爽脆，主角天婦羅吞拿魚卷更為一絕！卷物中之吞拿魚餡鮮香軟嫩，其薄薄o既炸皮又夠鬆脆，點上秘製o既芝麻青檸醬汁更覺醒胃美味！

廚師推介之Japanese Bouillabaisse – Lobster, Salmon, Shrimp, Scallops, Clams & Mussels, Red Miso-Shellfish Broth, Vegetables, Shiitake & Soba Noodles：海鮮大雜會味道香濃而不太咸，龍蝦肉一啲都唔嚡唔老、蜆肉鮮甜、蝦身爽脆、三文魚同帶子同樣鮮嫩，底層o既蕎麥麵索滿湯汁，香濃入味，好一味西日混血兒！

Banana Flambé：甜品中之香蕉軟腍易入口，而且酒味香醇甜美，簡單配上朱古力碎及雲尼拿雪糕已教人醉倒！

當晚離開餐廳前，老師們贈咗小肥一句「Vitimo Se Casnie」，意思為「See u later！」