連轉機, 我們足足坐了10多個小時的飛機. 原本 on plan 既行程係去到酒店放低行李後, 直接去Pearl Harbor. 因為看過旅遊書, 說要上Airzona, 一定要早去, 越早越好, 事因有入場人數限制. 不過壤消息....原來Airzona內部裝修, 成個1月暫停開放....酒店職員勸我們不要浪費時間去....

之後, Plan B, 去 Honolulu Zoo...在排隊買飛時, 我看到......獅子館不開放, 長頸鹿館暫停, 河馬館暫停............兩次去旅行, 兩次想入Zoo....都係因為咁而...費事入.

之後, Plan C, 就地遊Waikiki呢一個超級遊客區了. Waikiki, 出名有個長沙灘, 不過我們只是在沙灘小休. 二人志不在"撻"沙灘, 點都要行下街, 看看Waikiki區既環境才開心.

氣溫不高, 但陽光猛烈, 行行下沙灘, 都係"攓攓"沙, 行返入內街. 圖中有一銅像, 是紀念夏威夷最出名的滑浪者.....名字不記得了. 之後, 行行非常Commercial既名店商場, 同一個冇乜野啱買既Internation Market Place.....呢個Market Place....同女人街賣既野差唔多. 而且, 夏威夷係超多日本遊客的.....我地成日俾人當做"倭人"....囧...

捉太太一早起身, 我準備的是日行程第一站, 就是要行行火奴魯魯既主要地標, 夏威夷的Diamond Head.

一早問酒店拿了一張bus map, 看見有個 4 days pass, 商量過後, 先去ABC Store, 買下bus pass, 好讓我們喪搭巴士.

在酒店門口, 乘搭22號巴士, 就在山腳, 夏威夷大學旁下車. 而對面, 就是是日我們準備行上去既, 鑽石山....此鑽石山, 並非有鑽石, 亦不同香港鑽石山既解法 "鑽"石....相傳是英國一位航海家, 因為火成岩的結晶, 反射陽光而令到該船長以為呢度有鑽石, 故起名Diamond Head.

從google map, 看此山, 是一座很完整的環形山, 若不是在旅遊書及維基看過資料, 真的以為是一個隕石坑. 經過研究同考證, 才知道這個環形山是一座死火山.

下了巴士, 在環形山外圍行上山腰, 再穿過一條什有James Bond feel 既隧道, 到達了原火山口既中心區. 入場費 (步行入園者) $1, 開始我們的登峰造極. 外國就是喜歡保留大自然, 若是在中國, 早已好似華山咁, 搞到面目全非, 全是人工近景. 這裡, 無論近景, 遠眺, 都是一個大自然的世界.

一路沿著石仔路, 九曲十三彎的行上去, 又要穿過隧道, 又有恐怖的長命樓梯. 行了一個多小時, 才到達山頂的要塞. 俾少少錢, 買了一張登山證書, 上到去, 一邊是一望無際的太平洋, 一邊是歐胡島的大自然景色, 另一邊就是火奴魯魯市的鳥瞰全景. 咁辛苦行上來, 感覺是值得的.

另外再說, 這個Diamond Head, 原來是二戰時的軍事重地之一, 因為夠高, 可以遠眺有沒有敵軍殺到, 同埋, 另一用途, 是監察市內有沒有火警.

我們9點上山, 逗留至11點. 下山, 回去酒店小休. 再出發...行街街.

前文說過, 夏威夷未被美國入侵時, 是一個主權獨立而臣服於美國的一個小小王國. 有國王, 女王, 當然有皇宮啦. 而 Iolani Palace, 就是島上唯一, 甚至美國境內, 唯一的皇宮.

皇宮前, 為了紀念女王 Queen Liliʻuokalani而豎立了一個銅像, 讓世人知道, 夏威夷女王的威水史.

小小皇宮, 不算華麗, 但設計是深受歐洲既建築風格影響. 我們因時間關係, 同要收錢既關係, 沒有入內了, 我們係外面拍幾張照片之後, 再向下一個景點進發.

係Chintown行到開始疲倦了, 而且兩個人都凍凍地, 感覺上係時候補充energy了, 我們就在唐人街, 就找家小店, 簡簡單單地, 食個late lunch.

唐人街小店, 粥店, 麵店, 點心店, 非常之多. 係外國唐人街, 想食一口中餐, 不是一定要上大茶樓, 外國不少唐人街, 尤其是比較大型的, 梗有專為華人而設, 非常home feel 既小食店麵檔. 而我們看了一看外面menu, 有腸粉, 有湯麵, 就地決定入黎林記. 讓雙腿休休息.

老細見我們是遠方而來的香港遊客, 服務多了一點親切, 齋妹叫下一碟豬腸粉. 而我, 本來是想要一碗雲吞麵的, 然而老闆同坐在我們旁邊的一檯華僑哥仔講牛腩剛炆好. 咁我就即時轉呔, 改食一個牛腩麵.

腸粉, 雖食得出不是即拉的, 但一定不是中國或香港運來的雪藏貨. 加上花生醬, 甜醬, 甜豉油. 食一下, 就是香港的味道. 而且夠熱, 好食. 有時總覺得, 係外國食到家鄉既野食, 除非好差好差, 點都會份外的, 覺得好味道.

牛腩麵, 美國華僑搞既唐人街食肆, 同英國華僑搞既唐人街食肆一樣, 份量碟頭都非常之大. 是否同樣迎合大胃的老外呢? 沒研究. 我的大大碗牛腩麵, 就是香港的兩倍份量. $5美金一客, 係size方面, 值回既. 味道, 只是五香粉不夠, 牛腩是腩根邊. 其他麵條, 菜心等, 都不錯.

溫飽了身子, 我們又繼續我們的喪逛行程.

Alan Wong, 只看名字, 好多人只會應為呢間只是一家中國人開既中國餐館. 其實呢間, 是一間非常特別的一家餐廳. 老闆叫Alan Wong, 當然有中國菜食. 之前說過夏威夷有不少日本僑民, Mr. Alan Wong, 有日本人血統, 亦帶有夏威夷人血統. 所以他的菜式, 是混合了中、日、美、夏, 四個地方的精粹, 來創出此餐廳的獨特口味. 看過不少夏威夷的旅遊書, 有不少都極力推介, 尤其是英文書添.

此餐廳非常之旺場, 本來想book 7點的我們, 接電話的小姐已經一開口就說, 9點才有位. 我們特地而來, 9點就9點, 事前已經知道難book, 難得有位, 幾點都制.

9點上到來, book了位, 一樣要等等. 是否預先知道我們是honeymoon, 店方安排了一個位於角落, 在窗邊, 比較寧靜的一個位. 而且, 帶位阿姐亦特別向我們介紹, 是晚為我們服務的Brendan哥哥. Menu沒有什麼純素食的, 問了帶位姐姐, 同服務哥哥, 他們非常之細心地同廚房講, 有位客人是 vegetarian, allergic with onion and garlic.

問了廚房, 姐仔介紹, 我們可以從menu中的Sautéed Shrimp and Clams, Linguine Pasta, 改為 Fry vegetable Tofu Linguine Pasta. 而我就點下一個fusion的, Twice Cooked Short Rib, Soy Braised and Grilled "Kalbi" Style (Gingered Shrimp, Ko Choo Jang Sauce). 說真, 兩個菜都非常之, Fusion.

我們中國人, 比起外國人細食, 所以不叫頭盤甜品. 按外國慣例先點下飲品, 齋妹例牌地要可樂一杯, 而我就試試什麼叫 Alan Wong's Favourite Beer. 這個啤酒, 原來是日本啤酒, Brendan介紹說, 除了用麥釀製之外, 亦加有用米釀製的成份. 的確啊, 支啤酒, 真的有米香.

說食物了, Fry vegetable Tofu Linguine Pasta, 味道同做法, 看得出是中式, 但出來的意粉, 一點也不中式. 味道有少少豉油香, 豆腐都算嫩滑, 不過, 因為係炒既關係, 油左少少.

Twice Cooked Short Rib, Soy Braised and Grilled "Kalbi" Style, 煮兩次的豬排肉, 問了Brendan, 原來是經高湯烚過, 再用豉油汁去煎多一次的. 塊扒, 切開時, 一絲絲的, 而且非常之入味, 外層的豉油汁, 煎得非常的香脆, 而且是甜豉油的味道. 造種做法, 真的是第一次食. 雖然要等到肚餓等到9點幾先食野, 但在味道上, 服務上, 環境上, 已經覺得不枉此行. 再加上是晚"突"別的驚喜, 更加覺得物有所值.

"突"別驚喜是什麼? 當店內一位客人進場時, 即時引起全場的注目, 那位客人是誰....? 當然是明星啦, 沒想到, 我們竟然在夏威夷, 見到Elton John, The Osborne..... 同另有一檯客人, Elton John不時走過去聊天的...我們當時想不起是誰, 事因呢位明星走樣得太利害了, 再度發福的 John Travolta, 不容易應出來.

開心浪漫的晚餐仲有明星睇......非常之難忘.

是生床訓唔慣定係我們心情太興奮. 之前一日雖然是非常的疲倦, 但我們仍然可以一早6am起床. 兩個人你眼望我眼, 訓唔番. 咁就一於提早行動. 去 Shopping.

一大清早有什麼俾你shop呀. 別忘記美國有間全球最大的零售商, 沃爾瑪. 而美國的Walmart, 大多數都24小時服務. 所以我們一大清早去. 沒有問題.

檀香山的Walmart, 位置方便, 因為就在Ala Moana Center旁邊. 從Waikiki坐巴士來, 一下車, 穿過Ala Moana Center, 再沿馬路行出另一邊既街道. Walmart, 就在眼前.

不過, 始終是市中心的Walmart, 比起建於市郊的Walmart, 一定細好多. 但係佔地一層應該有成萬呎的超市, 真的只有外國同國內才能有咁既空間, 黎做一間巨型超市.

行超市, 其實沒什麼好寫的. 去到外國, 當你要買手信時, 如果係遊客區, 酒店區, 一定要俾番一個"遊客價". 若是找到這些大型超市, 同本地人一齊買野, 可以看到更地道的食品, 品牌之外, 而且, 價錢都比較大眾化.

再者, 我們行行下, 竟然行到10點幾. 哇!!!係Supermarket, 行了4個鐘....Crazy....

一早到達Walmart, 我們二人係Walmart Building 內, 睇哂所有食肆, 決定你有你買, 我有我買時, 我是日的選擇是呢間 Hawaiian BBQ. 一心想試下"地道"食品.

說是地道, 當然有些似係夏威夷特色既食物啦. 不過, 早餐時段既選擇有限. 看了一看早餐Menu, 除了一個叫做Dry Sausage之外, 其他都只是一些烤肉之類的食物. 問問下, Dry Sausage是什麼, 店員說, 就是Chinese Dry Sausage.......臘腸...........!!!!

哈哈, 之前看過午餐肉飯團 (貌似日式), 呢個 Dry Sausage, 就是貌似中式的夏威夷特色菜吧. 可想而知, 夏威夷受中國同日本影響好深.

臘腸飯加蛋, 味道竟然不太中式. 雖是這樣簡單的一個早餐飯, 感覺非常之特別. 也許這就是臘腸既西式食法.....煎蛋加了香草, 飯半熱的, 感覺中式, 但味道西式....也許這就是夏威夷特色吧.....

上日遊唐人街, 發現了商間齋鋪. 於是是日, 直情唔駛諗啦, 環島遊回來, 就直指法華齋廚, 我們今天食素.

7點多來到, 原來齋鋪除Party包場之外, 晚市不做的. 我們多口問了一問當地的老華僑. 原來對面麗晶, 亦是齋鋪既老闆. 要食齋, 可以過去麗晶食. 齋妹開心地, 帶頭行入去麗晶海鮮酒家.

翻查了少少關於法華齋廚的資料, 原來是孝順的麗晶老闆, 特地為了信了佛, 清了口的母親大人, 方便她傳揚佛教同招待朋友而開. 我亦看了門口的介紹, 這裡於午市, 特製了精美的素食點心, 成篇野寫日文的, 相信都深受倭人歡喜.

入到去麗晶, 問侍應小姐有沒有素食Menu, 果然, 隨手找出一本完整, 封面寫著法華齋廚的一個素食菜牌. 齋妹開心地, 自己看. 而我, 因為已經不在素食店用餐. 就叫返肉食. 我們兩個, 都覺得炒粉麵簡單快捷, 不食小菜了, 一人炒一碟, 一人食一碟. 法華齋廚出品, 是素星州炒米, 麗晶海鮮酒家出品, 豉椒牛河. 我們既選擇, 非常非常之港式, 亦非常非常之唐人街, 因為, 呢兩味, 就是留學時, 出唐人街飲茶食飯, 周不時到會點的炒粉麵食.

素星州炒米, 比起我一碟牛河遲了好多才來, 是否因為素食料要解凍, 或是要開鎖過隔離擺貨同要分鑊煮呢, 老闆的老媽是素食人士, 應該會非常之細心. 想不到的, 是素星米的料, 是我們係香港齋鋪食開的齋肉, 齋火腿, 等等齋料. 可想而知, 若我們早知是做lunch only, 可以食到既素, 是非常的鄉式. 而且份量大, 味道, 當然有水準.

而我的炒牛河, 味道也不差, 河粉似是當地華人自設工場自製, 而且是傳統的粗條河粉, 新鮮粉, 有煙韌口感夠彈牙. 豉汁味道, 加上外國唐餐style見慣既槳粉, 味道淡淡地, 夠味. 而且一樣是大大碟. 非常之滿足. 呢一餐, 直情令大家回想起當年的大學生活.

滿足, 思鄉, 懷念....就是唐人街給于當地華僑, 於交流上, 生活上 同 飲食上, 一個仿似家鄉的感覺.

離開大美帝國既最後一餐, 竟然都是Burger King. 我們去程時, 領教過 JAL既難食飛機餐, 所以異口同聲地, 決意要食左個早餐先上飛機. 係food court, 揀下揀下, 始終都是Burger King 好.

早餐, 我係香港一路都想試既牛角包終於有機會試到啦. 是bacon, Cheese, 用牛角包夾, instead of 普通漢堡. 食落感覺幾light, 煙肉又脆脆地, 包仔又熱熱地, 幾好食架.

另外齋妹的Veggie Burger, 不再評了. 不過, Burger King 既 Coffee, 都係淡左D, 意大利飲到的Americano, 就是這一個味道. 而係呢一個trip, 亦明白了, American, 真係喜歡咁既淡淡地coffee.

行到咁上下, 到了晚飯時候了. 係街繼續食小食...不好了, 好讓兩隻腳休息一下, 不如找家餐廳, 坐低食個餐舒服一點.

誤打誤撞, 又看見名字特別, 咁就入左黎呢度, 好求其咁, 食個拉麵烏東. 其實間野有三層, 不過我們被安排了坐在樓下. 店趴知我地係外國人, 首先俾一個英文Menu我地. 不過一看一對, 好似英文Menu內既選擇比起全倭文的Menu少好多.

首先要安頓好齋妹先, 我們事先做定功課, print 了一張要求素食既日語 print out, 我們未落order, 對比侍應小姐, 看看店方有什麼介紹同安排. 店員小姐, 聽到我們說中國話, 之後便用國語回答, 說食素的, 要看看麼廚房怎安排, 因為湯底有魚肉. 我們要了一個炸豆腐烏東, 店員小姐答廚房可以改用清水煮.....咁我們便安心叫下. 而我, 按其日文Menu order, 叫了一個海鮮烏東湯飯.

不過, 出來的, 只是一個鹽水湯烏東, 豆腐呢.....原來改oeder時, 改錯了....沒有, 想加番, 不過齋妹說算數. 就沒有再追加了. 不過, 味道....就是普通啦. 沒有做功課, 求其..就隨時中招.

而我的烏東湯飯, 雖有尚可既烏東麵條. 但湯飯.....搞到好似食潮州粥咁. 覺得係香港, 搵一間烏東店, 都可以好過佢..........不過, 我地唔識叫, 係食唔到好野既一個因素. 而且姓"謝"個位妹妹仔又唔識介紹, 當服務員的經驗可算是甚淺, 唔係幾識安排.

下次去日本, 都係要做下功課先.

果間旅行社仔, 安排的兩個住宿, 要求已經不高的我們都喊面左一間. 抱著驚驚地既感覺, 入到黎新宿呢一間係正歌舞伎町入面既小酒店, 反而覺得不錯.

說房間, Semi-double roome, 係人都知是細細房. 不過, size, 其實同一些我住過既cheap歐洲酒店差不多. 而且日本人講求整潔, 房間雖小, 但感覺骨子企理. 最開心就係....等了咁多日, 終於有一個Bath, 享用一下.

位置方便, 房間不錯, 而且, check out時, 更有廣東人服務. 正價房好似係8,000yen 一晚. 下次來東京, 又想住返新宿呢頭. 再住返呢間都唔錯.

是JL8739, 日航最夜回程香港的班機, 而且起飛的地方非常正, 因為在比較近市區的Haneda, 8點鐘飛機, 5點走都未遅. 從新宿迨, 搭JR到品川再轉車. 所需時間都不過半小時. 啱哂我地呢的短期滯留人士, 讓我們有多點時間感受東京.

不過, 始終羽田機場是以內陸機為主, 國際線也只限那些定期包機. 去到機場, 我們下火車之後, 按所乘航空公司指引去了第一航廈. 上酊去, 問了地勤, JAL的國際班次係由另一個機場航廈起飛的, 要乘坐接駁巴士才能到達. 

經過了第二航廈, 再向下一站國際航廈進發. 明顯地, 這個國際航廈地方非常之細, 而且設備簡陋. Duty Free是有的, 但不大. 次要機場就係咁, 來來去去都只是亞洲客, 而且航點也只有, 香港, 上海, 台北, 北京 及首爾. 不用弄得那麼華麗.

雖是一個簡陋的terminal, 但有多少旅客會真真正正enjoy你個機場, 最重要有飛機起到飛. 而且, 8點起飛的超夜機, 對來日本shopping的香港人, 當然好開心啦.

8點, 登上JL8739, 我們離開倭國國土, 零時12點30分, 準時到達香江, 叫做7天的愉快honeyweek, 就在這裡畫上句號. 之後, 正式開始去行人生的另一個階段.