為咗要避開香港日本兩地o既週五交通繁忙時間，大肥爸爸同哥哥特別揀選乘搭國泰航空早上8:45起飛o既CX 548班機，前往人流較少，而且離Hyatt Regency較近o既東京羽田機場。
 

國泰航空o既地勤好友善，除咗幫我地辦理登機手續同安排媽媽一早預訂o既輪椅之外，佢地都好樂意為我地同行o既兩位團友加多兩張輪椅。雖然結果要等成半個鐘，不過負責推輪椅o既嬸嬸態度極佳，而且往閘口路程實在遙遠，大家覺得都好值得。

因為實在太早起身出發，所以飛機未起飛小肥已經訓著咗，到起身時亦過咗派飛機餐o既時間，小肥唯有食空中小姐叮翻熱o既雞粥黎充飢。雞粥屬和暖，不過就有陣燶味，估計因翻叮所引致；雞肉全為白肉，質感嚡嚡地。雖然小弟喺機上清醒時間不多，不過都覺得空中小姐們比較懶惰，唔按鈕係絕對見唔到佢地o既蹤影囉！

除咗清晨五點鐘食過早餐之外，我地一行六人整個上午都只喺食過國泰嗰份唔多夠飽o既飛機餐，所以我地喺酒店一搞掂好check-in手續就立刻坐酒店巴士去附近o既新宿小田急百貨覓食。因為實在太肚餓，而且天氣頗涷，團友們好想食碗熱烏冬，我地就上百貨公司樓上餐廳層，求其揀咗一間叫「大志滿」o既日本料理醫肚。

「大志滿」o既室內裝修，餐具碗碟以及服務生o既一身和服打扮都好有傳統日本feel。餐廳地方頗為闊落，座位與座位間以屏風分隔，人多都完全唔會好嘈吵，大家都覺得好舒適；如果客人有要求，餐廳亦有四人、八人、廿四人房，不過就有額外收費。

打開餐牌先發現原來「大志滿」主打懷石料理，不過好在餐廳亦有提供其他粥、麵、炸物等，唔係恐怕大家可能要食魚精之類o既傳統懷石料理食品。穿著和服o既姐姐仔不太明白英語，幸好小肥略懂日文，所以對答都由小肥負責；雖然細佬啲日文真係有限公司，不過都勉強溝通得到，亦足以令同行o既契姨媽大吃一驚呀，嘻嘻，當然係「驚喜」個「驚」啦！和服姐姐非常有禮，雖則我地只係叫咗一份懷石套餐，及幾客粥同烏冬黎分，姐姐並未因此而改變或作出藐視等態度，真係好專業！

我地一落完單，和服姐姐隨即為各人送上一細杯桃酒（因為聽見「momo」，所以知道係桃酒，而並非梅酒），大家都幾意外。冰涷o既桃酒甜甜地，媽咪尤其欣賞杯中o既梅肉，話好開胃醒神！我地叫o既雞雑炊（即雞粥）同熱烏冬都好快上枱，兩味都好夠熱，味道好夠清，隨粥附送o既蘿蔔又好爽甜，暖胃得大家都好滿足！埋單每人約1,500日圓，喺日本食野，價錢唔算貴架啦！

「大志滿」環境舒適衛生，服務及食材同樣高質，價錢合理，團友們都好滿意！

我地四年前黎東京時已經住過「東京凱悅酒店」（Hyatt Regency Tokyo），當時對酒店o既房間、設施、配備、服務、膳食等各方面都好滿意，加上大家對酒店附近o既地區都頗為熟識，所以今次重臨東京，我地再一次入住凱悅酒店。

凱悅酒店其中一個賣點就係其免費來回新宿站o既巴士服務，客人可方便地前往新宿站附近o既商店、百貨公司，如小田急及高島屋，更可容易地轉搭地鐡去其他地區。巴士準時，車長有禮，落雪都冇問題，真係安排得好好！

記得上次黎凱悅酒店時，早餐服務係喺大堂升降機旁o既coffee shop進行。四年後o既今次就唔同咗，酒店喺九樓增設咗個Hyatt Regency Club，客人除咗可以朝早6:30-10:00喺club內享用早餐之外，6:30am-10pm亦可隨時飲用咖啡、汽水、果汁等，Happy Hour 6:00-8:00pm更可嘆番幾杯，仲有多款小食送酒添，其中包括麵包、魚生、生果杯、蛋糕、薯片等，睇相都知豐富呀！哈，唔洗諗，下一次再黎日本都一定會再住凱悅酒店！

我地喺東京第一晚，因為預咗要成八點，團友們先會到齊酒店集合，所以一早就已經諗定喺附近一家牛脷專門店Negishi度食晚餐。Negishi係牛脷快餐連鎖店，淨係喺新宿都有九間分店，凱悅酒店鄰近都有兩間，我地當然係去較近嗰間啦，慢速步行都只係約十分鐘左右。

話明係快餐店，喺Negishi食飯當然係要搭枱啦；雖然有長枱，不過我地一行十一人都要分開坐。服務方面，XO仔覺得以快餐店黎講可算為正常，不過以日本人水準黎講就只屬一般。

Negishi所提供o既牛脷，有厚有薄；雖則話係牛脷專門店，不過如果團友中有人唔食牛脷唔緊要，餐廳亦有咖哩、普通牛肉、豬肉等食品。我地十一個人每人叫咗一份套餐，每份都有飯、有湯、有菜，好完整。如相所示，套餐入面有一碗疑以醬汁o既橙黃色汁液，經哥哥位靚女朋友解釋過後，大家先知原來嗰碗係山藥（yam）攪拌而成o既「山藥醬」。個山藥醬濕濕滑滑，漿漿地，幾得意，雖則個醬已經調咗味，不過好多食客都會再加豉油；眼見靚女姐姐將山藥醬撈入白飯，連同牛脷一齊食，小肥當然係抄足黎食啦！小肥同姨丈每人叫咗嗰份「白たん厚切四枚（八切）しろ4セット」套餐，餐牌上註明每份熱量為780kcal，大家覺得都唔算過份，食得好放心。厚切牛脷每片都咁爽脆，而且又軟又多汁，配上野味o既咸菜，濕滑o既山藥醬，同熱辣辣o既白飯，真係好正；每客1,820日圓，美味、飽肚、又暖胃，個人覺得價錢絕對可以接受！

此外，Negishi亦有做外賣，門口有小冊子介紹訂購方法，包括以電話、傳真、手提電話及互聯網，送禮自用兩相宜。

哥哥個日籍靚女朋友真係非常客氣，除咗免費做我地喺東京o既導遊同「人肉GPS」，帶我地周圍食、周圍買之外，我地一到步，佢喺酒店會合我地時仲送咗一大袋士多啤梨歡迎我地添！知道我地一行十人，雖然當中有幾個團友佢尚未認識，但係人人有份，大家都好驚喜！

靚女姐姐介紹話而家正正係士多啤梨當造o既季節，所以喺日本去到邊都會見到同士多啤梨有關o既產品。佢送比我地o既士多啤梨係溫室培植o既「紅ほっぺ苺」。「紅ほっぺ苺」日文讀音為「Benihoppe Ichigo」，中文譯名為「紅頰士多啤梨」；果如其名，每粒都好似面珠墩般紅潤肥厚，體積亦如面珠墩般大，真係唔講得笑！據說，「紅頰士多啤梨」個名除咗係取自其外表，原來其實仲有另外一個典故。日文中有句常用o既諺語，「ほっぺが落ちるくらい美味しい」，中文譯作「猶如面頰快掉下來般美味」，用作形容食物美味程度；「紅ほっぺ苺」中之「ほっぺ」，即「面頰」，就係引用此諺語黎形容士多啤梨猶如面頰快掉下來般美味！

靚女姐姐話「紅頰士多啤梨」係新鮮採摘，最好係當日食用，以確保美味爽甜。細佬平時唔多鍾意食士多啤梨，因為怕酸，就算食都一定要落好多糖同忌廉黎蓋過任何酸味！嘩，今次依啲「紅頰士多啤梨」真係令XO仔對士多啤梨改觀，原來士多啤梨唔需要多餘o既糖或醬都可以咁香咁甜架，大家去日本真係要買返幾隻黎試吓！

我地喺東京凱悅酒店訂嗰幾間房，全部都可享用設於酒店九樓o既Hyatt Regency Club所提供o既餐飲同wifi配套；如果住客想邀請朋友一同於club內用膳或飲野，必先同服務生登記及付款。Hyatt Regency Club地方寬敞舒適，分開四方形木枱區域以方便攜帶電腦o既住客，及氣氛較輕鬆、設有數張長梳化櫈o既偏聽區域，望出窗可清楚睇見路面交通情況。當日落緊初雪，街道舖上一層薄薄o既白雪，同時又可以睇到雪花喺空中漂浮，團友們都讚嘆不已！

每朝六點半至十點，住客可於club內進食自助式早餐，自助餐包括多款麵包、水果、果汁、粥、乳酪等選擇，熱食有兩種，當中必定有一款係蛋造o既，款式每天不同，食物味道及質素都唔錯。Club內有部自助咖啡機，操作方便簡易，咖啡味道亦不俗。服務生會不時添置食物，但可能客人人數多，佢地就未能盡快清理枱上不潔o既餐具，新o既客人黎到，大多數都要等一陣先有個乾淨位坐。

小肥因為好耐冇睇過雪，食早餐時居然掛住影雪而忘記咗拍攝食物，真係對唔住各位讀者！

因東京朝早已經落緊雪，團友們都擔心如果越區遊玩，回程時可能會偶到交通問題，所以想盡量留喺新宿，哥哥位日藉靚女朋友介紹我地喺新宿高島屋百貨公司最頂嗰三層o既“Restaurant Park”覓食。Restaurant Park內有成三十五間餐廳，有不同國家o既料理，有平有貴，其網頁內更附有中、英、韓文簡介（http://www.restaurants-park.jp/language/#page=1）；我地黎日本玩，當然係挑選和食啦，結果就揀咗間日式炸豬扒かつくら（Katsukura）。

據悉，Katsukura係一家炸豬扒專門店，源自日本京都，但就只限於依間新宿分店內提供「桃園豬扒」。平時午飯時間，Katsukura門口必定排哂長龍，故餐廳門口設有長櫈，以供食客等位時坐；咁啱我地去嗰日落雪，高島屋內人流少咗好多，炸豬扒店一啲都唔滿，我地一行十人唔洗等位，仲可以坐喺開放式廚房旁o既吧枱度。我地所坐o既吧枱櫈唔算太高，長輩們上落都冇乜問題，女士們尤其欣賞櫈底有嗰籃比佢地擺放手袋同大衣。吧枱簡潔衛生，桌上有多款醬油、餡菜及餐紙；姐姐仔雖然不太懂中文或英語，但眼見我地班大鄉里唔多識講日文，又唔係好識用桌上o既配料，就主動呈上多份中文餐牌及醬油說明以供參考，大家都大為感動！

既然知道Katsukura只係喺此間分店內提供「炸桃園豬扒」，我地每兩個人都叫咗一份「桃園豬炸外脊肉套餐」（1,980日元120g；2,700日元170g；3,180日元200g）及「桃園豬炸里脊肉套餐」（2,180日元120g；2,880日元170g；3,300日元200g）黎分，每款套餐都包咗前菜、醬汁、白飯、湯。前菜可選豆腐或蘿蔔，個人唔係好鍾意食豆腐，所以揀咗蘿蔔；日本料理中o既蘿蔔好有保證，Katsukura嗰個亦不例外，非常爽脆開胃。主角炸豬扒果然名不虛傳，外層o既炸皮香脆鬆化；兩款豬扒當中，個人喜歡肥膏多啲嗰款，因鎖住肉汁o既豬扒更為鬆軟，可惜小弟唔記得邊款桃園豬扒肥啲，不過服務生絕對可以為食客指出。

既幾位男士們就覺得早一晚

喺新宿高島屋o既美食廣場“Restaurant Park”度食完晏，團友們都非常雀躍地要行街購物。雖然我地有成十個人，各人o既喜好亦有所不同，不過高島屋入面有好多舖頭都適合哂我地咁多個人，例如運動層、Uniqlo、Tokyu Hands等。團員中以大肥爸爸及Auntie M買野買得最開心；爸爸一再叮囑細佬要喺openrice個平台上推介店內所賣o既加加加大碼睡衣，因為睡衣全為外國牌子，但就製於日本，而且絕不出口，即係話只可以喺日本買得到，最重要係棉質超靚勁噤，著完包保唔會再著第二個牌子咁話，大家要留意一點，就係千奇唔好買束手束腳嗰啲款，因為大肥話就算係加加加大碼，嗰束位都會唔舒服wor！

喺日本買野，每次超過10,001日元就可以申請退稅，食物、化妝品、藥物等除外。喺高島屋購物完，辦理退稅非常簡易快捷，只要購物當日晚上八點前，去其設於二樓o既退稅櫃檯，出示護照及所有單據，服務員就會幫你結算，立即退錢；雖然高島屋係會收取手續費，但係都會有份禮物送返比顧客。請留意，喺商店如Uniqlo度買係唔會享有退稅，而商店如Tokyu Hands則有自己o既退稅櫃檯。

正當XO仔去辦理退稅時，團友們就落咗去底層o既超市度買魚生返酒店做下午茶。啲魚生價廉物美，新鮮肥美，食完大家都後悔買得太少！

晚餐原本訂咗位出去食天婦羅，無奈因大雪影響到交通，我地就算可以離開酒店，食完飯都未必搵到車返酒店，所以最終去咗酒店個coffee shop度進膳。

其實上一次入住東京凱悅酒店時都已經黎過個酒店間coffee shop，不過嗰陣時只係食房間包咗o既自助式早餐。事隔四年，咖啡室冇乜大改變，地方依舊寬闊整潔，皮櫈又大又舒適，唯一唔同o既就係啲燈光好似暗咗少少。

喺酒店工作，識講英文唔出奇，不過負責招呼我地嗰位高高瘦瘦o既美少女，居然可以用流利o既普通話同我地溝通，大家都嚇咗一跳囉！佢雖然口講普通話，但絕對不失傳統日本人o既氣質及禮貌。

因為我地喺九樓個Hyatt Regency Club度已經享用咗多款小食及酒品，所以都唔係話十分肚餓。喺coffee shop度，團友們有幾位只食沙律，有位淨飲湯，有兩位就分咗份主菜，而小肥就叫咗個Hamburger Steak w/ Mozzarella & Demi-glace Sauce（2,500日元）。此味漢堡扒係日式西餐中較普遍o既一款，另上o既醬汁味道帶甜，肉質鬆軟，做得好合格，價錢亦屬正常酒店價。

唔知係落雪o既關係，亦或係週末o既關係呢，嗰朝早無論喺街道上，亦或喺地鐡上，人流都少之又少，就連平時門口排長龍o既美登利壽司店都冇人企喺門口，真係有種杳無人煙o既感覺。

雖然街上冇乜人，但係原來壽司店內已經差不多爆滿，嘻嘻，好在咁啱有三張吉枱，剛剛好比我地十一個人坐哂。闊別四年，美登利壽司店外貌同以前一樣，無論係室內裝修、枱櫈、餐具等，毫無陳舊feel，衛生依然，而且人氣似乎亦冇減弱，因為我地坐低冇耐，門口已經排滿哂人，走時仲打哂蛇餅添。

店舖冇乜改變，不過識講國語o既妹妹仔就唔見咗，溝通變咗主要用日文。食物方面，因季節同上一次唔同，壽司店所推介o既食品及其提供o既精選套餐亦有所不同：

旬特選Nigiri（季節週末套餐，2,625日元）：哥哥位靚女朋友極力推介，所以我地三個人叫咗一份黎分。套餐除咗有多款壽司外，每客亦包有一碗美登利獨有o既名菜「迷你蟹肉味噌沙律」（Mini Kani Miso Salad）、一碗迷你燉蛋、豆腐、及醃蘿蔔；當中「迷你蟹肉味噌沙律」真係名不虛傳，蟹肉鮮甜，配上味噌醬同時又覺野味，沙律頓時變得既清新又香濃！美登利絕不吝嗇，套餐o既壽司種類並非平野，更有大拖羅、中拖羅、海膽等貴價貨，只售2,625日元真係抵到爛呀！

間八刺身（Kanpachi）：靚女姐姐話間八正正係當做期，依段時間食可稱得上最為肥美。間八刺身貌似油甘魚，味道亦頗為相近；個人覺得間八冇咁溜，口感較為爽口彈牙，清麗脫俗，果然冇介紹錯！

精選金槍魚片拼盤（2,940日元）：餐牌例明，此拼盤選用「極上」金槍魚，即吞拿魚，握製兩款壽司及一款吞拿魚碎卷，連湯同燉蛋。如相所示，葱花吞拿魚碎卷色澤鮮亮，味道更加係鮮甜香脆；兩款壽司亦不弱，又長又美味，而且魚油充足，超正！

燒鱈場蟹：我地一坐埋位，服務生就立刻推介，話今朝早新鮮來貨，但只剩兩客，團友中多位係「蟹痴」，當然係要哂啦！蟹痴們評語為：「蟹肉鮮甜幼嫩，比起香港所食到o既美味得多，最重要係價錢平成三分之二，三個字講哂：平、靚、正！」

肥肥家族已經係第二次黎美登利壽司專門店用膳，雖然兩次所食o既魚生款色不同，不過美登利所選用o既魚材新鮮，提供o既食物全為高質，每次都食得咁開心、咁滿足！就連第一次黎o既兩位靚女auntie都話想臨走前再返黎食多餐呀！

Mieko Uesako係日本名設計師，所設計o既衣物配備大多適合高爾夫球員，其中最為有名o既系列全以狗狗做主題。多年前，媽咪同幾位姨媽們去澳門遊玩，行街時見到此系列o既狗仔T-shirt，覺得其設計可愛，衣物質料高級軟熟，就立即愛上依個品牌。

今次我地出發黎日本前三個月，靚靚媽咪同幾位姨媽已經落定order，要小肥搵出品牌o既銷售處，仲話無論如何都要去Mieko Uesako啱啱新開不到半年o既旗艦店度添！所謂旗艦店原來地方都唔算係好大，不過班女士們都可以逗留成兩個鐘，真係幾誇張；哈，又好在佢地揀咗咁耐，因為到佢地差不多準備比錢o既時候，設計師老闆娘突然帶埋仔仔及其靈感愛犬出現。Uesako女士一啲架子都冇，仲好客氣地同大家影相傾計（由佢仔仔代為翻譯），可以話係我地臨走前o既意外收穫。

四年前黎日本睇櫻花時，除咗食過令人回味無窮o既美登利壽司之外，大家亦對Toshi Yoroizuka甜品店o既Egg Soufflé念念不忘，故今次重臨東京，各人都想再次品嚐。

甜品屋內外都冇乜改變，地方依然光鮮企理，門口條龍一樣咁長，我地十一個人大約三點半開始排隊，結果要等成大半個鐘先有得續一入座，最後入去o既小肥同姨丈就等足一個鐘添。座位圍繞住o既開放式廚房入面除咗幾位年輕師傅仔外，最令團友們驚喜o既就係見到名廚老闆Toshi Yoroizuka先生企喺中央烹調甜品！比起剛剛巧遇嗰位名設計師老闆娘Uesako女士，Yoroizuka先生態度就較為囂張啦，對於不懂日語溝通o既團友們更加係不偢不睬，不甚友善！

打開餐牌，發現Egg Soufflé唔見咗，當堂唔知食乜好，唯有叫咗一客朱古力口味o既糕點及一客法國名甜品Tarte Tatin同姨丈分：

Amuse Bouche：每位客人上座，姐姐仔隨即送上一杯開心果甜湯作餐前小點。開心果甜湯味道偏苦，食完小肥唔多覺開胃囉！

Dessert Ecuardo Chocolat（1,400日元）：此乃餐牌中唯一一款朱古力甜品，亦係Yoroizuka先生負責所炮製，味道有少少過甜，但總算香滑。似乎名廚都有失手o既一刻，因為其中二姨丈嗰客朱古力甜品未上枱前，嗰件應該樹立o既香蕉突然倒下，橫訓喺碟上，師傅仔只好硬著頭皮拎返比大廚執手尾；大廚玩咗一輪後，雖然件細咗o既香蕉企返起身，不過大家o既食慾亦相對地減咗一截。

Tarte Tatin（1,200日元）：由蘋果批演變出黎o既法國名甜品Tarte Tatin味道冇朱古力嗰款咁甜咁過火，面層塊蘋果幾清香，不過XO仔就嫌其底層嗰批偏腍，唔夠香脆。

先生助陣，代客之道卻不大如前，佢

美味，下次再黎日本應該無緣再臨。

女團友們都愛買精品衣物，中肥哥哥卻愛行書店，但小肥就鍾情睇食物；得知XO仔對甜品超感興趣，靚女姐姐就介紹細佬入Midtown商場B1層一間甜點專門店pâtisserie Sadaharu AOKI paris。據說，Aoki（青木）先生係Toshi Yoroizuka先生其中一位徒弟，主要賣法式甜品及西餅，係日本OL近期超人氣商店之一，以店內獨有o既Chocoron最為聞名！

Pâtisserie Sadaharu AOKI paris店舖光鮮潔亮，陳列企理吸引，服務生亦會主動推介及講解食品，友善好客，行入去o既第一刻已經覺得自己係一位尊貴o既客戶。為咗要了解及認清靚女們o既口味，XO仔當然係好潮地買咗兩盒七彩Chocorons同團友們分啦！店舖擠滿哂人，好在收銀小姐同負責包裝嗰位姐姐仔夠默契，效率高，顧客唔洗等好耐就攪掂。細佬所買o既Chocoron禮盒為六件裝，每盒3,565日元，保存期例明為21天：

Chocoron Citron：六個唔同口味中以黃色o既Chocoron Citron最酸，因檸檬味濃，但好在又不失朱古力o既甜味，絕對值得一試。

Chocoron Macha：綠色o既Chocoron Macha抹茶味清香，食落好有法日fushion feel。

Chocoron Chocolat：深啡色o既Chocoron Chocolat朱古力香甜濃郁，但個人覺得酸味嗰幾款更為有特色。

Chocoron Framboise：鮮紅色o既Chocoron Framboise果味酸甜得黎幾清新，食完有種特如其來o既心花怒放感，係三款酸味chocorons當中最易入口o既一味！

Chocoron Café：淺啡色o既Chocoron Café甜中帶苦，好似食緊一杯mocha咖啡落肚咁。

Chocoron Cassis：紫紅色o既Chocoron Cassis酸得黎有種好純好高貴o既感覺，好難用字句黎描繪。

六款中，小肥like哂三種以酸味調製o既黃色Chocoron Citron，鮮紅色Chocoron Framboise及紫紅色Chocoron Cassis，亦在此誠意推介！每盒3,565日元，即約600日元一粒，一啲都唔平，不過香港食唔到，口味獨特，試完一粒後覺得啱feel的話，不妨買黎做手信，一定唔會失禮！

記得讀書時代成日睇日劇，男主角收工後總愛流連居酒屋一邊飲酒煲煙，一邊吹水聯誼。因為團友們黎過日本咁多次都未有一個入過一間居酒屋，小肥亦一即渴望感受一吓居酒屋o既氣氛，所以就特地叫班日藉朋友們推薦一間，等大家可以體驗一翻！

大學同學仔所推介o既「朝日食堂」地點好隱蔽，當日我地雖然有日本地膽靚女姐姐帶路，但係都要喺條街度徘徊咗好耐先搵到間餐室。居酒屋就有如日劇中所見，正門為趟門，店舖中央有個吧形開放式廚房，食客可圍繞廚房坐吧櫈，亦可以揀坐旁邊o既卡位散座，我地十個人就只可以坐正門旁o既一張大枱；座位全位高櫈，年長o既食客上座極有難度。食客主要係年輕o既一輩，所以行入黎都會不由自主地望一望我地枱中o既六、七旬長輩。

入到居酒屋，小肥就馬上同鬍鬚哥哥以日語打招呼，並先指聲明講團友中只有細佬可用有限o既日語同佢溝通，所以好多時會需要佢多作說明，希望佢多多包含及諒解。鬍鬚哥哥非常客氣地話感激我可以唔洗佢用英語，仲話其實大家用手語及漢字加以配合應該唔會有太大問題，XO仔即時放鬆咗好多！

鬍鬚哥哥真係細心，比餐牌我地睇時不忘送上兩份英文版比大家參考，佢話如果大家第一次黎食，最好就係先揀選佢地用橙色螢光筆油咗嗰幾款食品，因全為店內最人氣之菜式，我地當然係聽取提議，先叫各款人氣佳餚啦！

是日推介之八爪魚刺身（480日元）：生食八爪魚唔係好多人啱食，不過入口其實同魷魚刺身相近，爽脆滑溜，個人覺得八爪魚刺身比起熟咗o既八爪魚更為美味，每客只售480日元，認真超值！

是日推介之油甘魚刺身（480日元）：油甘魚鮮甜、肥美、魚油足，每客有四件，480日元，真係抵食到暈呀！

是日推介之「炙りしめ鯖」，即火焰Mesaba刺身（480日元）：即叫即切，鬍鬚哥哥負責喺食客面前即燒；睇住佢以熟練o既手藝邊燒邊加檸檬汁，我地食得真係好過隱！半生熟o既鯖魚肉質爽嫩，皮層香脆，魚味鮮甜，輕輕以檸檬汁點綴，效果非常清新！

人氣推介之「チーズ豆腐」，芝士豆腐（480日元）：起初大家對此味芝士豆腐不太感興趣，決定不如先叫一客，有人食過好食先加碼啦；哈，點知，食完一碟唔夠喉，大家最後加咗兩客！芝士豆腐連麵包上，唔講真係唔係好食得出個碗醬係由芝士同豆腐攪拌而成，只係覺得用黎加上麵包面o既醬滑溜香甜，幾得意。

人氣推介之Avocado Fry，炸牛油果（580日元）：炸牛油果外層香脆，內層嫩滑，加上伴碟o既吞拿魚芥辣忌廉秘醬食落好野味。

茄子餃子（580日元）：所謂茄子餃子（Nasu Gyoza）原來係我地中國人o既「釀茄子」。據鬍鬚哥哥所講，佢地所煮製o既茄子餃子係先燒後炸，所以做出黎先能夠外皮同內餡都同樣香脆。

人氣推介之芝士春卷（580日元）：春卷香脆，芝士味香滑濃郁，嘩，原來用芝士黎做炸春卷係咁好食架！

人氣推介之「地鶏焼き」，即燒地雞（1,480日元）：地雞日語拼音為Jidori，朝日食堂所燒出黎o既地雞毫不肥膩，皮脆肉嫩，肉食者一定要試！

我地其實嗰日仲食咗好多其他小碟，如生牛肉、枝豆、雞翼、炸豆腐、炒雜菜等，不過因為我地喺香港都食得到，又唔係話超級特別，所以XO仔決定唔喺度續一介紹啦，如果大家有意試「朝日食堂」，個人會推介以上食品，唔夠先叫其他菜式。

既句號，真係好多謝貴子同學咁好介紹！