哥哥個日籍靚女朋友真係非常客氣，除咗免費做我地喺東京o既導遊同「人肉GPS」，帶我地周圍食、周圍買之外，我地一到步，佢喺酒店會合我地時仲送咗一大袋士多啤梨歡迎我地添！知道我地一行十人，雖然當中有幾個團友佢尚未認識，但係人人有份，大家都好驚喜！

靚女姐姐介紹話而家正正係士多啤梨當造o既季節，所以喺日本去到邊都會見到同士多啤梨有關o既產品。佢送比我地o既士多啤梨係溫室培植o既「紅ほっぺ苺」。「紅ほっぺ苺」日文讀音為「Benihoppe Ichigo」，中文譯名為「紅頰士多啤梨」；果如其名，每粒都好似面珠墩般紅潤肥厚，體積亦如面珠墩般大，真係唔講得笑！據說，「紅頰士多啤梨」個名除咗係取自其外表，原來其實仲有另外一個典故。日文中有句常用o既諺語，「ほっぺが落ちるくらい美味しい」，中文譯作「猶如面頰快掉下來般美味」，用作形容食物美味程度；「紅ほっぺ苺」中之「ほっぺ」，即「面頰」，就係引用此諺語黎形容士多啤梨猶如面頰快掉下來般美味！

靚女姐姐話「紅頰士多啤梨」係新鮮採摘，最好係當日食用，以確保美味爽甜。細佬平時唔多鍾意食士多啤梨，因為怕酸，就算食都一定要落好多糖同忌廉黎蓋過任何酸味！嘩，今次依啲「紅頰士多啤梨」真係令XO仔對士多啤梨改觀，原來士多啤梨唔需要多餘o既糖或醬都可以咁香咁甜架，大家去日本真係要買返幾隻黎試吓！