依個「最南點」位處巴拉灣海灘對出嘅一個迷你小島，由一道吊橋連接，而島上有兩座瞭望台。

唔係小弟拋書包，只係八八卦翻查吓網上資料啫，亞洲嘅最南點應係印尼嘅小巽他群島（Lesser Sunda Islands），但依度所講嘅係亞洲「大陸」最南點，但印象中新加坡好似香港咁，都係個島嶼啫，何以黐埋為「亞洲大陸」呢。上到個小島，有個介紹牌，啊！原來咁都得！

一大段英文解釋，大意就係話依個小島透過一條吊橋連接住聖淘沙，而聖淘沙同新加坡本島又有橋樑相通，跟住新加坡同馬來半島嘅柔佛州又有長堤相連，所以，就叫做連繫住整個亞洲大陸喇！問你服未？唔怪之得馬來西亞人都「拿拿淋」晌柔佛嘅丹絨比艾國家公園立番個正版「亞洲大陸最南點紀念碑」，以示名正，天之涯、海之角。再講多少少，大家從地圖睇睇，就知最南點都唔係依個小島，因為聖淘沙係倒三角形，最南位應該係聖淘沙嘅南端尖角！

雖然佢係A貨亞洲大陸最南點，但企上瞭望台回望聖淘沙景色唔錯，橫掃成個巴拉灣海灘，遠望仲見到魚尾獅塔，又遇著係黃昏時段，景致怡人。相反，南面對住新加坡海峽，本應大海一望無際，可惜外海好多貸輪，大煞風景啫！