當日天清氣朗，XO同哥哥一起身就走左去個露台度曬左陣太陽，D海風吹埋黎感覺真係好寫意！

有關Crystal Serenity郵輪，上回講到我地入住o既9樓廂房有幾舒適，配備有幾齊全；今回小弟想講下郵輪上o既其他地方同Crystal公司安排比乘客o既不同活動。

Crystal每日都會為乘客印製一份"Reflection"日報，詳盡地講解跟住嗰日o既行程，目的地o既各種資訊，上岸可參與o既不同旅行團，船上提供o既各款活動及特備表演節目（請看相片）。我地有每日一報喺手，都要一早規劃幾點鐘做乜野架，因為每個時間都會有幾款活動比搭客選擇。好似我地一家四口咁，當日喺公海，爸爸媽媽朝早先去十三樓比人按摩。然後，爸爸就走左去學打橋牌，而小肥同哥哥就同媽咪一齊去學品酒，同聽人講解調酒心得及技巧。 

如果唔鍾意睇演講或上堂，船上亦設有健身室，圖書館，麻雀／遊樂室，賭場，電腦室，游泳池，露天茶座，酒吧，等，包保任何時後都唔會悶親客人！ 二十四小時o既room service 更能確保唔會餓親肥肥一族！

Lido Deck間隔好鬆動，全部都係圓枱同獨立梳化櫈，好舒服。所有座位任坐唔嬲，客人除左唔會爭位坐，大家都非常友善禮讓。

自助午餐每日有兩款熱湯，一濃一清；多種西式冷盤，沙律蔬菜，及麵包；熱食最少有一道魚，而幾款肉類，即雞鴨牛豬羊等，則每日不同。記得打後其中一日有個以"亞洲美食"作主題o既自助餐，嗰日有燒鴨，鍋貼，魚生，點心，真係非常豐富！甜品亦包羅萬有，生果，蛋糕，雪糕，餅乾，樣樣都咁好食！咁多選擇，食物質素又高，真係想唔肥都幾難！

雖然話係自助餐，不過好多食物都係即叫即做，包括煎蛋，奄列，炒麵，等。周圍更有多名態度和藹，服務超卓o既哥哥仔幫客人排隊等食物，兼送埋上枱添，簡直係冇得頂！
 

聽聞船上o既免費社交舞堂有好多單身女子去上，而且唔係好夠男仔，所以XO就約埋老豆去學跳舞。下午一點半開始o既Salsa堂，無錯真係好多單身女子，不過佢地大部份都可以做得我阿婆；好彩船上有四位花甲"Ambassador Hosts"陪多位靚女學，唔係肯定個個都會爭住同XO跳。世界冠軍級老師 Aleksandr & Elena夫婦好識搞氣氛，教得好有心機同唔會太急，所以一D都唔悶場，仲幾好玩添。

由於節目時間有沖突，跳舞班未完，XO就走左去賭場同媽咪會合，參加免費入場o既拉機比賽。 船上o既賭場唔係好大，不過就靚過澳門多多聲，因夠簡潔光猛，當然唔少得兔女郎免費送上飲品啦，真係同美國拉斯維加斯有得比！小肥雖然冇隔離房住客咁犀利，贏取冠軍（即現金劵USD 25 + T裇 + 帽），我總算有少少運，贏左件安慰奬大T裇，哈哈！

除左五樓Crystal Dining Room之外，Crystal Serenity郵輪上仲有兩間主題餐廳；一間係意大利餐廳 Prego，另一間係日式Fusion餐廳 Silk Road。兩間主題餐廳都只供應晚餐，而且座位有限，建議大家上船之前就好訂定位。餐牌上o既食物唔會變，我地人數算多，所以去左兩晚已經可以試哂所有菜式。

Silk Road餐廳室內間隔裝修同Main Dining Room一樣寬敞，格調高雅，舒適得很。穿著整齊o既哥仔們同船上所有服務生態度無異，每個都友善非常，落力又唔怕煩，比酒店級服務簡直係有過之而無不及呀！

聽哥哥仔講，好多時上船頭兩日都會有特別菜式，如生龍蝦刺身，喺Silk Road旁，亦即只有十個位o既Sushi Bar 供應。為食o既爸爸第二日就即刻搵埋哥哥一齊去食，六點鐘開波，兩個人仲飲左成枝Sake，醉醺醺地返房休息左個幾鐘再去Dining Room報告比我地聽有幾精彩。可惜我地隔多日後再去時，佢地已經冇哂龍蝦刺身lu，正式係「蘇州過後冇艇搭」。

講返Silk Road，依間餐廳係由名廚Nobu Matsuhisa先生主理。食物以日式為主，有壽司，刺身，天婦羅等傳統菜式，亦有好多Fusion餸菜採用Nobu先生自創o既配方烹調。我地一共八個人，哥仔提議以family style上餸，每樣都有Ｄ，唔洗我地諗，仲幫我地分埋，好食可以再encore，真係周到。

唔知係咪同喺船上有關，真係食得出食材好新鮮，傳統壽司刺身尤其鮮甜肥美，睇相都應該感受倒。Nobu式醃製刺身，如油甘魚，吞拿魚及牛肉薄片，肉質相當幼嫩，味道香濃少辣，可算新穎o既食法。除左魚生，我地食左多款主菜，包括天婦羅，銀雪魚，燒帶子，其中以Spicy Cream Crab，龍蝦兩味更為特出，真係食過返尋味！甜品亦絕不遜色，以Trio of Crème Brûlée（Sweet Ginger，Pink Guava，Passionfruit）及Suntory Whiskey Cappuccino最俱特色，兩款真係各有千秋！後者好有分子料理feel，由Cappuccino溝Buttermilk雪糕，面層再加上Whiskey Foam製成，小肥自己飲左兩杯。

後記：咁啱Nobu先生同佢一班親友，包括佢個女，女婿，孫女等，都上左郵輪，嗰晚仲坐喺我地隔離枱。我地八人中有幾個長輩係佢粉絲，Nobu先生都毫無架子同佢地合照，真係大方得體。