上文提到，當日Lucille安排左我地先去一間較細o既酒莊，Château Laniote，參觀。何謂細呢？比起其他有最少20hectares葡萄園o既酒莊，Château Laniote只有約5 hectares o既vineyard（葡萄園），每年釀製約1,700樽紅酒。

到達Château Laniote酒莊，第一個驚喜，就係發現負責接待我地o既係該酒莊之莊主Arnoud de la Filiole先生，大家頓時變成貴賓，真係有少少受寵若驚。再者，靚佬Arnoud毫無架子，幽默友善，仲善於玩魔術，逗得同場o既女親友們不知幾高興。佢氹女咁有計，小肥都學倒唔少技倆，當然係喜多過驚啦！

除左帶我地走遍酒莊不同角落，Arnoud仲預備左一段影片，一邊播放，一邊講解佢地酒莊製酒過程，如幾時播種同收成，處理葡萄o既不同步驟及儀器等，真係好詳盡。據說，酒莊係佢地家族生意，只不過係因為以女系相傳，所以佢地個名同酒莊個名唔一樣。Arnoud仲不停大讚自己個太太，因為佢太太係一位oenologist，即「酒學家」，好有來頭架。

想客人買自己出產o既紅酒，最好o既方法就係比大家試味架啦！Arnoud真係好有誠意架，因為佢開左枝2009年（爸爸話係好年份黎架！）o既酒比我地試，仲教我地點睇紅酒，聞酒香，睇「掛杯」等等，平時唔係好飲紅酒o既XO仔真係學左好多野。Arnoud係一位老實商人，佢解釋，2009年係好年，不過Ｄ酒未"ready"，即未係時候飲，不過大家都可以收藏定。另外，出面D酒舖應該冇哂佢地2005年（亦屬好年份）製釀o既酒，不過如果我地有興趣，可以買酒o既時候，叫售貨員打個電話比佢，佢會留定幾箱比我地，認真唔話得！

因為好多酒莊都唔比旅行團帶隊參觀，而且有好多週末又唔開放，再加上我地只係有時間一日之內睇兩三間酒莊，我地當日只可以喺車上遠觀其他酒莊，再等Lucille指出邊幾間係名氣大少少，我地又聽過o既，然後拍照留念。佢都算好人啦，專登喺路中心旁（好在路面冇幾他車輛），即酒莊指示牌附近，停多一陣，等我地影完先再去第二個景點。

話名係酒鎮，Saint-Émilion鎮內當然有好多酒舖啦！間間賣o既野都唔同，有賣酒，開酒器，酒瓶，酒具，有關酒o既書等，門面同櫥窗都好有特色架，所以每間都吸引倒唔少客人。

Lucille唔講，真係冇人聽過，原來而家好盛行o既甜品macaron原來黎自此鎮！始祖店名叫"Moulierac Fabrique De Macarons"。肥肥一族又點會放過食甜品o既機會呢？我地並冇買市面上周圍都見得倒o既五彩繽紛macarons，不過就試左佢地用最原始嗰個秘方所製成o既淺啡色macarons。個人覺得"原始macarons"外表雖然冇咁花巧，不過因為新鮮製成，食落好夠清甜鬆脆香口，別有一番風味。

Saint-Émilion鎮雖然唔大，不過都有名勝古蹟架！最出名o既就係以一塊limestone（石灰岩）建造而成o既教堂Eglise Monolithe（Monolithic Church）。

入去教堂參觀，導遊必需先取鎖匙，門口更掛有UNESCO世界遺產認證，好堅架！原來依間教堂入面有好多catacombs（陵墓），唔怪得知咁陰涼啦。

小肥只係影左幾幅相，因為入到去先見倒警告話嚴禁攝影，仲話無論有冇閃光燈，拍攝過程都會影響到建築物。

上車冇耐，Lucille已經問定我地對午餐有乜要求；因為我地架郵輪好多客人落船觀光，要喺Saint-Émilion鎮內食飯可能會好難搵位。佢話如果我地冇乜野唔食，就建議坐車去遠少少o既餐廳食地道少少o既法國菜。人生路不熟，我地八個人又咁隨和，當然係叫佢渣主意啦！

去到門口，入埋餐廳，其實都唔知餐廳個名係乜，要後來上網查，先知原來叫"Le Comptoir de Genès"（講明先：餐廳網頁全部係法文，間餐廳可能唔係依個名架)。印象最深刻就係門口隻大假牛同店內放有全套法文版o既「神之水滴」漫畫。

餐廳入面有個英文非常流利o既阿嬸，不過佢對自己o既哥仔同事態度就唔係幾好啦，淨係聽倒佢不斷呼呼喝喝，真係好吵耳。唔知法國人係咪全部都係咁o既呢，定亦或係佢地唔係好鍾意中國人，除左年紀輕過我o既哥仔外，店內所有人都係黑面神，真係覺得自己唔係好受歡迎囉。

食物方面，因餐牌只有法文版，為免驚動狂燥阿嬸，我地唯有等Lucille續一解釋先作選擇。平心而論，餐廳食物真係好唔錯，味道佳，食材又高質，好難挑剔。小弟所叫o既春卷頭盤，燒鴨串主菜，特濃咖啡，同免費送贈o既canale小蛋糕都好正！

食完一頓美味o既午餐，Lucille就帶左我地去睇第二間酒莊，Château de Pressac。佢地擁有42 hectares o既葡萄園，係Château Laniote八倍有多，真係唔講得笑。

負責接待我地o既係一位小妹妹，而並非莊主本人。聽佢講解得咁流暢，應該都帶過唔少團。喺佢身上學倒一樣好特別o既野，就係每行葡萄樹前都會種左一束花，原來係用黎確認泥土o既健康度；換句話黎講，如果Ｄ花有問題，即代表嗰行葡萄唔健康。

妹妹仔講完佢地酒莊o既歷史，葡萄園擴充o既經歷，其土壤，種植及製酒過程後，亦帶我地周圍睇，當然唔少得試酒時間啦！（唔識飲紅酒o既ＸＯ仔個人比較喜歡Arnoud比我地試嗰隻酒多Ｄ。）

講真嗰句，黎到法國，見倒兩間酒莊都打理得咁乾淨企理，小弟都好放心屋企人飲紅酒。

喺Crystal Main Dining Room進膳，享受禮賓式o既待遇，加上晚晚個餐單又夠多元化同精彩，真係百食不厭，XO仔每日都好期待架！

嗰晚都唔例外，小弟所揀選o既食物全部都好有水準：
1) Crabmeat Tower with Melon Carpaccio & Lemon Aioli：蟹用鮮甜，薄薄o既生果又夠脆，配搭得好好。

2) Reginette Pasta "Prince of Naples", with Porcine Mushrooms, Bolognes & Tomato Sauces：意粉不但al dente，肉醬好似加左忌廉咁，食落好香滑，加上Porcine菇，整體好完美。
 
3) Pan-Seared Veal Scallopine, with a Ragout of Artichokes, Tomatoes, Capers & Fresh Herbs, Served on Capellini Pasta：牛仔肉薄片一Ｄ都唔韌，而且夠香口，XO一邊嘆酒，一邊進膳，真係好享受。

4) Double Fudge Chocolate Bread & Butter Pudding with Vanilla Sauce & Rocky Road Ice-Cream：朱古力甜品，鬆軟香甜，一流呀！ 

我地八個人都食到好飽，所以飯後一齊去左七樓出面，繞船步行，行左大約半個鐘頭先各自返房／活動。