去到新加坡行程嘅尾聲，雖然整日天氣時陰時晴，但又唔算好熱好熱，保持住27-30C。尋日早瞓，所以今朝就可以輕鬆早起身。

8:30am晌酒店嘅餐廳食番個自助早餐先，嘆飽嘆夠喇，就去行吓沙灘，幫助消化。尋日嘅活動範圍晌晒「中部」嘅巴拉灣海灘，故此，今日個範圍就輪到酒店依邊「靠西」嘅西羅索海灘。晌沙灘都逛咗成個鐘，跟住返酒店泳池游早水，然後先施施然收拾行李，辦退房。

中午時段，就去行程最後一個景點，就晌酒店後山上嘅「蝴蝶公園、昆蟲王國」，聖淘沙西邊本身有好多行山小徑，佢哋叫「Nature Walk」，經依啲小徑好快就可以由酒店兜去蝴蝶公園。完成埋依個行程，返酒店拎行李，再出番怡豐城（Vivo City），晌大食代美食廣場食埋個午餐先直踩前往機場。

都聽聞樟宜機場好大，共3座客運大樓（查實唔止，下文有分解），不過時間上預得有啲緊咗，未有機會去睇睇T1同T3，就只有晌要上機嘅 T2兜個圈，同向日葵打個招呼影影相，旁晚機返香港，未夠10:00pm已經返到屋企，正式結束4日嘅「新加坡優休悠遊」，真係輕輕鬆鬆咯！

嚟到新加坡嘅第三日，由於尋晚去唔成Night Safari，所以早瞓咗，故此，今朝就可以早早起身！朝早收拾好行裝，先退房，再搞行李寄存，就可以安心出去玩。

第一站，係去食早餐。尋日去亞坤咖央吐司咖啡店，衰咗，今朝就計劃好去食黃阿細肉骨茶，好彩無甩拖，係位置偏咗啲，搵咗段時間。食完早去附近嘅小印度行吓，都有少少特色，但就唔算好特別，所以就兜咗大半個鐘左右就走喇。

跟住坐MRT去番東新加坡嗰頭，搵一搵土生華裔祖屋影吓相，然後去五星海南雞飯食晏，兩者都好相近。搭番兩個站MRT，就返到酒店攞番啲行李，再直踩入聖淘沙！

入聖淘沙都好方便，MRT直到Harbour Front站（NE1），再轉Sentosa Express入島，入到去有巴士同沙灘電車，全部唔使再俾錢，方便又慳錢。約莫4:00pm去到酒店，一如過往，行程尾段我哋都會住得好啲、舒服啲、輕鬆啲，所以就揀咗仿如置身晌森林嘅Siloso Beach Resort（新加坡喜樂聖淘沙度假旅館）。

由於我哋2007年去過一趟關西旅行，所以新加坡環球影城唔係我哋嘅目標景點，反而一眾悠閒玩樂才是主菜。

聖淘沙南面海灘區一共有3個海灘，最西係西羅索海灘 (Siloso Beach)，最東就係丹絨海灘 (Tanjong Beach)，而較中間位正正就晌聖淘沙捷運嘅海灘捷運站對出嘅就係巴拉灣海灘 (Palawan Beach)。巴拉灣海灘有幾個「景點位」，所以今日玩「中部」嘅巴拉灣先，首站係巴拉灣嘅動物天地睇動物匯演，之後再去亞洲大陸最南點影影相。6:30pm左右，去節慶酒店嘅Fiesta，因為有個好抵食嘅前菜加甜品自助餐（Appetizer & Dessert Buffet），食到飽飽，再睇住時間落番沙灘區睇8:40pm場次嘅「海之頌」表演。然後，梗係散散步啦，行吓去魚尾獅塔，欣賞吓月色，返到酒店都先係十點鬆啲，早啲沖涼早啲抖，咁先玩得閒適。 

今日新加坡天氣好反常，可以好好天，出猛太陽，又可以傾盆大雨，好似打風咁。

尋晚玩夜咗，所以今朝晏咗啲起身。朝早打算去牛車水，所以就諗住去附近丹戎巴葛區嘅亞坤咖央吐司咖啡店（21 Tanjong Pagar Road）食咖央多、嚐半生熟雞蛋，唔知係書嘅資料出錯，定係人哋搬咗，白行一趟。繼而轉去就近嘅麥士維熟食中心一餐過食早午餐。

餐後，就逛安祥山、牛車水，算係到此一遊，作為華人點都要去當地嘅唐人街兜個轉嘅。牛車水有條史密斯街，其實係條食街，不過，時間尚早，一檔都無開，無緣一試。下午，就去新加坡植物園，為嘅係內裡嘅國家胡姬花園（國家蘭花園），依個係老婆指定想去，因為佢有同事講裡面有好多唔同品種嘅蘭花，而且好靚，睇花影相，我都OK嘅。最終我哋兩個晌裡面逗留咗成3個幾鐘，一來我哋猛咁影相（老婆嗰時學緊影相），二來又要避雨（落咗一場細雨，一場大雨），所以先搞咁耐！

夜晚計劃咗去Night Safari，所以，去完新加坡植物園，就返番去烏節路嗰邊，晌ION Orchard嘅美食廣場食晚飯，然後再地鐵轉巴士入去Night Safari。正諗住晏晝落咗兩場雨，雨過天清，出返晒太陽，點知去Night Safari嘅巴士車途中，突然傾盆大雨得好緊要，去到Night Safari都仲落緊。去買飛入場時，個服務員有個溫馨提示，話啱啱落完大雨，園內嘅動物可能「咪」埋晒，會比正常情況下少好多嘢睇，甚至無乜動物睇到，被佢咁樣兇一兇，又真係被佢兇到，就決定原路走，逛陣商場返酒店休息算數！

成日聽人講去新加坡好悶，都係大城市一個，同香港差唔多啫，留3日都嫌多呀！不過，晌籌備依轉獅城之旅，發覺都有幾多地方想去，因為想玩得輕鬆、休悠，所以原先係計劃咗去5日，機票、酒店都一早搞好晒。不過，由於有個親友突然離世，守夜正正係回程嗰晚，所以行程縮短改早一日返，幸得老婆體諒兼配合。雖然好多安排打亂咗，但都只屬小事！

一早打算獅城係趟休悠之旅，所以行程安排得好寬鬆，去得幾多就睇幾多，一切以休悠為優先，故此個旅程名稱幫佢改咗叫「新加坡優休悠遊」。

由於中午機，9:00am到機場登記、行李寄倉，再晌機場Traveller lounge嘆早餐。12:15pm起飛，首次搭HK Airlines嘅機（Airbus 330），機上餐飲、服務，感覺唔錯，又有獨立視聽系統，睇齣尊尼特普配音嘅卡通馬拉高，好快（3:30pm）就到咗新加坡樟宜機場。

搭MRT（新加坡地鐵）先到酒店Hotel 81 Lucky安頓，小休後就出動喇。第一站係海濱區嘅濱海藝術中心、海濱長廊、新加坡河；再晌濱海藝術中心側嘅Makansutra大排檔食黑胡椒蟹、沙嗲……等。飽餐過後，再過橋遊魚尾獅公園，順新加坡河去埋碼頭區同酒吧街，今晚玩夜咗，差唔多成12:00mn先返到酒店。