姨丈個妹妹出咗名緊貼潮流，得知我地組咗小團短遊台北，佢就好有心地立即傳來「吳寶春麥方店」o既咭片同靚相，告知店內o既巨型包點屬得奬食品，務必一試。

離台當日，為怕午後光顧時排隊會耽誤去機場o既時間，我地就盡早十一點鬆啲到達麵包店。離遠已聞到新鮮出爐o既麵包香，跟住啲香氣行走，終於被細佬發現廚房o既所在地。眼見忙得團團轉o既工作人員個個帶哂口罩同帽咁講求衛生，小肥立即向姨媽們匯報，令大家放心最後衝刺，狂購麵包做手信。

真係估唔到週六早上收銀處已見人龍，店內o既人客數量仲不斷上升。店子除咗有吳寶春先生獨創o既得奬包點之外，其實亦有售多種口味o既法包、可頌、吐司、薄餅、布丁等，極之多元化。如果嫌攞熱辣辣o既麵包做手信麻煩，遊客仲可以選購架上以禮盒包裝o既鳳梨酥、史多倫、手作果醬等。喜愛閱讀o既朋友不妨試睇吳寶春先生o既自傳、「麵包秘笈」、「麥方寶典」等書籍。

麵包全部新鮮熱辣烘出，服務生更會不時攞出樣品供客人試食。XO仔嗰朝早所試o既「饢餅（原味）」（NT 85/件）鬆軟中帶點煙韌，食落好似印度囊餅咁，不過明顯更有奶香，質感亦更為柔潤，實屬超值之選。嘻嘻，深知稍後o既飛機餐唔會好食得去邊，細佬當然係好醒目地買定兩件上機食啦！小肥嗜甜，成塊面咁大o既「奶油埃及」（NT 40/件）真係啱哂口味。大包同饢餅一樣鬆柔，包心滲滿著奶油香，外層以砂糖點綴，效果猶如神來之筆，甜味喺口腔內好似星星咁閃爍，精彩尤甚！

排隊等俾錢時，姨媽們已經開始研究啲巨包攞到返香港應該點樣處理。唔知收銀姐姐係咪聽得明我地o既對話呢，佢好自然地咁就連同一張麵包保存方法及回烤或蒸煮說明包起哂啲戰利品，服務貼身得很。

榮獲「2008年世界麵包大賽亞軍」o既「酒釀桂圓」（NT 350/個）主要用上龍眼乾同紅酒烘焙，清甜中帶著醇香，配搭新穎獨特，口感剛柔並重，好有驚喜。上網查證過，得知吳寶春先生於2008年o既亞軍得奬作採用咗紅酒同龍眼，八年後o既2016年則以混合醃漬梅子與阿里山茶o既「梅引茶香」（NT 288/個）再度參賽。麵包同一時間有齊酒香、梅酸、茶甘，暗地裡又帶點咸咸甜甜，盡顯台灣人o既飲食風味，唔怪得知能夠再下一成，贏取「2016年世界盃麵包大賽亞軍」，確真可喜可賀！

介紹完兩款亞軍麵包，壓軸當然係「2010 世界麵包大師賽冠軍」代表「荔枝玫瑰」（NT 350/個）上場啦！「荔枝玫瑰」o既概念同「酒釀桂圓」差不多，都係融合咗水果同美酒，不過前者o既冠軍組合就加插咗幽香o既玫瑰花。巨包內含甘醇甜美o既荔枝乾，果酒跟玫瑰花香o既結合，令鼻腔同味蕾洋溢著芬芳與清新，贏得冠軍奬項可謂實至名歸！

離台當日，小肥再次跟隨超閃旅遊書覓食，訂定位去一家被形容為「低調小籠包名店」o既「邊田庄」度午膳。書上o既電話雖然正確，但原來餐店已搬往新址，幸好我地嗰日叫咗架車，司機哥哥又熟地頭，結果都安全及準時到步。

接待處用上雲石作桌，氣派十足。門旁擺放出紅地毯及印滿店名o既佈景版，喬遷開幕儀式應將於日內進行。步進樓底高高o既大堂，即可望見樑上o既水晶吊燈及四周美輪美奐o既鮮花，配合埋木製o既傢俱椅桌同牆上o既字畫，感覺極之大方典雅。女洗手間因可充當為新娘子專用房間，房內配套齊備，一樣咁華貴。

餐桌用上絨造枱布，飯前亦有熱毛巾抹手，服務生溫婉有禮，各方面都流露出細心與體貼。打開餐牌，首頁已道出店主為頌親恩，餐廳名字特意用上其父親之大名訂設，有意思得很！既然餐店蘊藏著濃情厚意，六人就應友善o既靚女姐姐推介，點咗多款鎮店菜式。

1)      豆酥鮮蚵豆腐（NT 280）：第一道豆腐以熱鍋燒住上，好夠新鮮熱辣。面層只見橙黃色o既豆酥，下面其實暗藏白雪雪o既豆腐同鮮蚵。豆酥香口得黎質感粗嚡，連同豆腐同鮮蚵一齊食則更能特顯豆腐如何幼滑如絲，蚵仔如何肥美鮮甜。

2)      芝麻牛蒡（NT 280）：修長o既芝麻牛蒡輕巧香脆，淨聽餸名好似一款平平無奇o既餐前小食咁，但當用上精美o既餐碟及靚花伴上，即令食客眼前一亮，就連身價都提升不少。

3)      酥炸蒜香肥腸（NT 380）：炸豬大腸喺香港可以話係屬大排檔食品，「邊田庄」o既師傅選用精巧o既花瓶黎承載，粗作頓成幼細o既藝術品，唔打得都睇得先呀！蒜香肥腸炸得好夠乾身爽脆，惹味得黎一啲押味都冇，妙極！

4)      經典原味小籠湯包（NT 180/八隻）及絲瓜蝦仁湯包（NT 200/八隻）：小籠湯包及絲瓜蝦仁湯包勻以木盒蒸煮，呈上枱時仍有煙霧散出。湯包皮層軟薄輕盈，小籠湯包鮮香嫩滑，個人只係略嫌絲瓜蝦仁餡心個味道清淡咗少少，唔夠濃郁。

5)      油淋去骨雞（NT 380）：XO仔最怕食骨，嘻嘻，依味油淋去骨雞就啱哂細佬口味。已去骨o既雞肉放置喺藤篩上，側旁插咗一小盆靚花，視覺上田園風味甚為濃厚。用油淋過o既雞肉香嫩柔滑，食落其實一啲都唔油膩，睇清楚啲先發覺原來此乃因為多餘o既油份就滴流喺藤篩下o既碟子上，結構編排得好有創意同效能。

6)      青蟹炒年糕（NT 1,280）：小肥因敏感問題唔食得蟹，不過靚餸已教細佬一飽眼福。單睇青蟹炒年糕o既心形大碟已夠震撼，仔細再睇兩隻青蟹不同部位o既舖排，又會覺得其擺位型似心臟，兩隻蟹蓋緊貼一起更營造出心心相印o既效果，廚師o既設計認真唔簡單。姨媽大讚青蟹鮮甜幼嫩，索盡精華o既年糕煙韌香濃，外觀味道同樣攞足一百分！

咖啡屋「StayReal Café by Gabee」o既裝潢以木為主，感覺涼爽企理，簡單以可愛o既卡通畫品裝飾，氣氛極為輕鬆。店子合共兩層高，地面嗰層一早已滿座，通往下層必須行落樓梯。因收銀部只有一個，下層o既食客就要先喺地下落單及付款，然後再等服務生送上咖啡及食物，餐具同食用水則全為自助式。

精品咖啡店所選用o既咖啡杯全為StayReal品牌，每款咖啡特飲o既拉花設計亦各有不同，外觀已教小肥興奮。當日巧遇店慶日，所有飲品買一送一，優惠不但適用於堂食，原來仲可以選擇「外帶」添。

小肥最近成為咗士多啤梨迷，不用費神已諗好咖啡同甜品都要哂草莓味：

1)      草莓棉花糖摩卡咖啡（NT 200）：堂食嗰杯咖啡同相片一樣，浮面o既棉花糖半露出泡面，贈送嗰杯「外帶」版一樣都係，而且包裝精美穩陣，防漏措施足，絕對唔驚搭車時會倒瀉。摩卡咖啡本身香濃幼滑，半溶o既棉花糖鬆軟得好似白雲咁，入口即化，草莓醬為咖啡添上色彩o既同時，亦帶黎清新與香甜，直令口腔譜出派對音樂，爽呀！

2)      新鮮草莓園鬆餅（NT 240）：士多啤梨味甜品配上紅色靚碟，夠哂搶眼。鬆餅可分成呈水滴形o既八小格，遠睇有啲似遊樂場入面o既「氹氹轉」。厚厚o既鬆餅外脆內鬆，每格都已沾上忌廉、鮮草莓、糖粉、草莓醬、朱古力醬及雪糕，一口吃下清涼香甜o既草莓園鬆餅，口感集齊鬆脆爽滑於一身，派對音樂即擴展至全身，感覺極度狂野。

派對動物

主唱：五月天

作詞/作曲：阿信

Let's go party party all night oh oh oh oh

Hey lonely lonely goodbye oh oh oh oh

我們都有覺悟 要瘋狂到日出

我們 天生 就是

我很嚴肅

這不能耽誤 這不能讓步

那現實中 已經有太多讓步

Hey 派對動物 別找退路

不會跳舞 就不要跳舞

搖擺也幸福

就閉著眼 以空氣吉他飆速

Hey 派對動物 不要認輸

你不孤獨 朋友滿屋

瘋狂胡鬧 瘋狂慶祝

Let's go party party all night oh oh oh oh

Hey lonely lonely goodbye oh oh oh oh

不願被當寵物 寧願變成怪物

噢噢 Oh oh oh oh

入不敷出

水電和房租 成績和任務

這泡沫般人生 是那麼辛苦

Hey 派對動物 是否麻木

你忘了笑 還忘了能哭

本性被馴服

花兩億年 進化卻沒有進步

Hey 派對動物

無論你是貓咪老虎 麻雀蝙蝠

都要驕傲 都要大步

Let's go party party all night oh oh oh oh

Hey lonely lonely goodbye oh oh oh oh

不願被當寵物 寧願變成怪物

噢噢 Oh oh oh oh

Let's go party party all night oh oh oh oh

Hey lonely lonely goodbye oh oh oh oh

我們都有覺悟 要瘋狂到日出

我們 天生 就是 派對動物

Let's go party party all night oh oh oh oh

Hey lonely lonely goodbye oh oh oh oh

人生難得糊塗 偶爾脫軌演出

噢噢 Oh oh oh oh

Let's go party party all night oh oh oh oh

Hey lonely lonely goodbye oh oh oh oh

我們都有覺悟 要瘋狂到日出

我們 天生 就是 派對動物

記得抵達「桃園國際機場」時都唔覺得個機場有咩特別，反而離開台灣o既時候就發現整個機場都被一股粉紅勢力圍繞，主人翁冇錯就係風靡全亞洲o既Hello Kitty。

乘搭「長榮航空」o既旅客可於Hello Kitty自助check-in counter辦理登機手續。過咗安檢，通往閘口o既走廊同樣可見粉紅色o既裝潢，旁邊o既電話亭同世界各地o既報時儀都一樣有Hello Kitty個嘜頭。候機室當然唔少得有吉蒂陪伴，有多餘o既時間不妨行吓側旁o既Hello Kitty精品店，XO仔都係八卦先睇到店內有售裝備齊全o既Hello Kitty麻雀，唔買齋睇都幾過癮架。

雖然表妹同姨媽負責訂飛機票同酒店，不過大家都係喺櫃檯辦理登機手續時，由航空公司地勤告知，方才知悉當日所搭o既「長榮航空BR 857」班機正正就係世界各地眾多Hello Kitty迷專登要坐嗰架Hello Kitty客機。

此特別航班所用o既飛機外殼油上Hello Kitty個靚樣相信好多人都知，不過細佬真係冇諗過連登機證都印有吉蒂o既彩圖，步入機艙前更可先提取別緻o既Hello Kitty啤牌。每個座位都有塊Hello Kitty紙布墊頭，就連安全指引、購物指南、仲有個清潔袋都用上粉紅色o既Hello Kitty設計，咁都未算誇張，因為洗手間內所用o既紙杯同廁紙都有吉蒂o既圖案架！

媽咪四姊妹最鍾意食海鮮，當中尤其愛食蟹。佢地家中有位小表妹因工作關係經常往返台北，雖然今次未能夾啱時間相約一聚，不過深知表姐們o既飲食喜好，故亦特意推薦一試以其「處女蟳」（螃蟹o既一種）聞名o既「台南三哥海鮮」。

位於中山區o既「台南三哥海鮮」為地舖，面積唔算好大，一眼望哂。廳內o既散座全為大小圓枱，街坊格局，家庭式作業，氣氛融洽，輕鬆自然。店子最入位置有個半開放式廚房，食客可以睇住師傅炒煮菜式，透明度極高。由於餐店並無印製餐牌，言語唔多通的話，點餸就要靠用手指指出玻璃雪櫃及廚房陳列出o既海鮮食材，幸好姨姨哥哥們都極之友善客套，大家溝通上都冇乜大問題。

點好菜，六人就決定啤一啤佢，姨姨見狀，更隨即呈上三款小食俾我地送酒添。XO仔因敏感問題冇食到花生；麻醬青瓜香脆爽甜；不過最正都係碟自家醃製蜆仔，濃味得黎又不失鮮甜，冇得頂呀！

1)      炒蛤仔（NT 350/中）：小肥啲普通話實在太過普通，要菜式上枱時先知「蛤仔」其實即係蜆。第一道炒蛤仔少辣惹味，嫩滑無比，團友們無一不讚，實屬必吃推介也！

2)      五味軟絲（NT 450/中）：細佬見識少，當真從未聽過「軟絲」依味海產。軟絲形似魷魚，上網查証過先知兩者只可算為遠親關係。凍食o既軟絲爽厚脆滑，口感跟魷魚極其相似，個人覺得不需點上醬汁已夠鮮味。

3)      白鯧米粉（NT 1000/大）：湯米粉原煲連火爐上，夠哂滾熱辣。米粉軟腍入味，魚湯內含芋頭及炸過o既白鯧魚件，濃甜暖胃，不過除非唔點其他小菜，唔係要六個人食哂一大鍋則確有難度。

4)      鹹菜魚肚（NT 350/中）：魚肚肥滑爽脆，無奈XO仔怕咸又怕酸，以鹹菜炒製只可以話唔係自己杯茶囉。

5)      清炒八蓮菜（NT 200/中）：女士們要食青菜，肥哥哥就介紹我地食時令o既八蓮菜。幼幼o既八蓮菜不但外表翠綠，簡單清炒已夠清脆清甜。

6)      蒜泥蚵仔（NT 400/中）：單憑靚相可見菜式光滑亮澤，咬落更覺蚵仔鮮甜肥美，蒜香濃而不俗，效果猶如畫龍點睛，實在非筆墨能形容般美味可口，大家千祈咪走寶！

7)      處女蟳（NT 900/隻）：壓軸上枱o既主角處女蟳外觀震撼非常！蟹隻橙黃色o既外殼已夠吸睛，殼下鮮黃色o既蟹膏豐厚濃潤，蟹肉幼嫩香甜，果然有姿勢、有實際！

多得表姨咁識食，六人今次短遊台北都有緣遇上「台南三哥海鮮」，品嚐到一頓地道o既海鮮大餐。小店選材鮮美，師傅廚藝了得，價廉物美，有心食肆絕對值得支持！

家中親友眾多，每年都總會有親人去台灣玩，經常都會聽到邊度有好野食、潮流興送咩手信。經過多輪商討後，姨媽們最終決定除咗鳳梨酥之外，今次就試吓健康啲，買台灣盛產o既「釋迦」返香港。「釋迦」其實即係「番鬼荔枝」，果肉白雪雪、軟綿綿，因其形似佛祖釋迦牟尼佛o既頭部而起名。

買完頭輪手信，小肥就根據旅遊書指引，帶隊一遊台北購物熱點「忠孝敦化站」，亦即五月天阿信所創立o既「StayReal」旗艦店之所在地。忠孝敦化一帶o既大街橫巷商店臨立，衫褲鞋襪、飾物、禮品乜都有，當中亦不乏咖啡屋及小食店，不過令人最印象深刻應該要數超萌o既米奇狗狗大使，面對途人手持相機、電話狂影都一様氣定神閒，型爆！

由於「StayReal Café」輪候時間長達成個鐘，結果我地就求其行咗入去街道上一間有位坐o既「Visiro Café & Smile Beauty」飲下午茶。

門外黑版所示，店子有售香港雞蛋仔，似乎台灣人都有留意香港飲食文化。室內o既方形散座全以雲石餐桌配黑色椅櫈，顏色對比同兩幅一黑一白o既牆身、及枱上以黑杯承載白紙巾一樣咁明確突出，感覺摩登涼爽。收銀處o既透明玻璃雪櫃陳列出手工蛋糕，不過都未能令小肥動容。

餐牌合共有兩頁，其中一頁全為飲品，第二頁則為甜品及熱盤。甜品其中一項朱古力布朗尼被封為「黑色幽默」，莫非周董就係老闆？！定係想幽佢一默呢？！

我地每人先點咗杯飲品，六杯無一相同，就連拉花圖案都各有獨特之處：

1)      紅茶歐蕾（NT 150）：表妹所揀o既熱茶以黑色o既無邊托盤襯上透明玻璃茶壺，另跟熱奶及蜜糖，美觀齊備。

2)      凍貝禮詩拿鐵（NT 180）：小肥杯拿鐵白色o既泡沫上以朱古力醬拉出雪花花紋，美過容o既飲品外表果然出眾。凍奶好夠香滑，可惜細佬完全飲唔出任何Baileys味，真係丁點酒香都冇，所以都幾失望。

3)      法式香蕉巧克力鬆餅（NT 240）：鬆餅同配料份量都好足，雖則全部都放埋喺同一隻碟上，不過就冇預先撈勻哂，望落好整齊。鬆餅脆口乾身，小弟只係略嫌餅身唔夠鬆化，反而配角焦糖香蕉片清甜香脆，更為可口。

記得堂細佬遷往台北工作後，首次回港時即與家人分享其新增o既台灣飲食日誌相薄，當時XO仔已深深被「寬巷子」如藝術品般美艷o既菜式有所迷倒，故今次訪台之行一早已鎖定餐廳為必到之點。

喺香港出發前訂座，已知悉火鍋店週五晚市分兩輪，為怕遲食會試唔到每天限量特製之食品，團長就決定傍晚六點半食頭輪。步入「寬巷子」即由吉祥物金鍋子代表歡迎，可愛趣緻又貼題。店子o既牆身及地面都以木板及磚塊所砌成，配上雕塑品作裝飾，感覺極之清爽典雅。散座全以屏風分隔，而且唔會排得密麻麻，每條巷子寬廣得黎好夠私人空間，氣派十足。前往洗手間必先行經秘道及廚房，透過長形窗口可清晰望到年輕o既師傅仔忙碌地準備食物，見到佢地個個帶哂手套同帽咁衛生，未食已先打下強心針。

可能我地生面口，普通話發音又唔係咁準，友善有禮o既服務生自動上前解釋收費制度：基本湯底大人NT 190/位、小童單價以高度決定、酌水NT 190/位、另加一清潔費、開瓶費NT 600/樽；此外，最低消費NT 2000/枱，用餐限時兩個鐘。六口子應推介點咗多道特式人氣菜餚。餸菜上枱時，哥哥姐姐仔都會詳盡講解滾煮須注意事項，建議烹煮時間及方法，其中幾味仲有專人代煮，眾人都覺得服務稱心滿意。

1)      白鳳千叟鍋（湯底NT 190/大人）：奶白色o既湯底以烏雞、人參所燉製，毫不油膩，香甜濃郁，內含紅棗同幼滑o既鴨紅，滋補養顏，姨媽們無一不讚。

2)      玫瑰松板（NT 1,280）：雖則從餐牌上已得知松板豬頸肉會拼出玫瑰花形，不過當實物出場，碟上活現著一盆完整o既粉紅色松板玫瑰，視覺上o既震撼感可以話係有增無減，幸好大家嘩聲四起之際，亦不忘要讓相機食先。花盆由一個承載著蛋白漿o既洋蔥殼所組成，經哥哥仔示範方才明白艷麗o既玫瑰松板應先淋上蛋白漿，再成朵放入鍋中慢慢滾熟，等待花瓣散開變白，即可食用。松板豬頸肉不但儀態萬千，質感更加係軟中帶爽，香滑非常！

3)      菠菠糖（NT 380）：菠菠糖以修長o既樹枝插住，旁邊有靚花相伴，樸素o既外型頓變成一幅立體畫o既骨幹，實在巧妙！菠菠糖其實係以薄嫩o既菠菜包捲豆皮及芝麻，連樹枝放入鍋中可方便煮熟後攞出。菠菜芝麻卷鮮香脆嫩，食完條脷都唔會嚡口，好有驚喜。

4)      墨條牛軋糖（NT 390）：黑身白點o既墨魚條夾入咗雞軟骨碎粒，咬落煙韌中帶著卜卜脆，可謂軟硬兼備，平凡o既軀殼下暗藏著玄機。

5)      美國特級牛小排（NT 980）：牛肉薄片猶如餐牌上o既彩圖般鮮艷，其雲石雪花紋理已盡顯特級靚牛如何肥瘦均勻，溶於口中更覺牛肉香軟無比，被封為「人間極品」確無誇張。

6)      金線松茸（NT 190）：師傅選用上等o既鱈魚同金線魚縫製出松茸件，並叮囑服務生轉告煲煮時間不能超過漏斗計時器o既三分鐘。松茸清香鬆爽，鮮味慢慢滲出，果真清麗脫俗。

7)      鮮肉抄手（NT 180）：鮮肉抄手皮薄軟滑，鮮肉餡心亦幼嫩可口。

8)      花園錦簇（NT 780）：同成班美女廚神用膳絕對唔少得蔬菜依一環，打邊爐時o既份量唔知點解仲要比平時多，故點菜時亦揀選咗最豐盛o既花園錦簇。採用插花技藝造出o既蔬菜拼盤色澤翠綠鮮美，真係唔忍心食佢落肚。正當大家都未諗到方法去拆解園田花品時，哥哥仔就好似變魔術咁，將花瓶內o既蔬菜轉移至火鍋中，並砌出另一幅蔬菜圖，精彩得令人拍案叫絕！美輪美奐o既菜品新鮮爽甜，外、內在美齊備，實在天衣無縫。

「寬巷子」雖貴為火鍋專門店，但環境格調高雅衛生，真係可以同酒店或星級食肆媲美。餐店將高級o既魚鮮食材與美學藝術融合，獨創出一系列o既立體美食藝術品，展品不但美觀美味，食用途中更可欣賞到精妙o既烹飪表演，平均每人新台幣千五蚊左右，食到肚滿腸肥o既同時亦教人嘆為觀止，絕對超值！埋單時，靚女姐姐更送上六小杯冰震招牌果醋，以謝各人首度光臨；果醋酸甜清涼，消滯又解熱，成功為火鍋盛宴劃上完美o既句號。

「探索廚房」正門牆身一半為雲石造，另一半有條頗兇猛o既魚隻裝飾o既則為木造，襯托埋吊喺天花上o既抽象藝術品，感覺都幾新潮。用餐大堂樓底都幾高吓，間隔開揚通爽，厚墊o既座椅都好舒適。

埋位後，服務生隨即上前問及各食客選飲咖啡或茶品，並給予小牌作標記。XO仔習慣咗每日最少飲三杯咖啡，越濃越愛，酒店杯咖啡香濃得黎一啲酸味都冇，好啱細佬口味！

多種理由下，肥肥家族出門都絕少食生果，最多都係食早餐時飲番幾杯鮮榨果汁就算。雪櫃內o既果汁選擇除咗有大路啲o既橙汁、菠蘿汁同西瓜汁之外，其中最特別應該係綠色o既「芭樂綜合汁」，微酸帶甜，清新清爽，極之討好。

食物方面，就同其他自助餐冇乜大分別，都係分穀物片區、煎蛋奄列區、沙律區、麵包區等，當中亦有煙三文魚、壽司、凍肉、三文治等供應。個人因有食物敏感問題，所以就主攻鬆軟甜美o既「巧克力可頌」。

XO仔始終係喺香港土生土長，飲食習慣都偏愛食中菜，早餐都唔例外，每日點都要有啲粥米飯麵落肚，腸胃先會滿足。餐廳o既粥唔係差，亦有多款配料，但只屬中規中矩，未能令人嘩然。粥品白飯全為自助式，湯麵則即叫即滾，配菜全為自選。湯米粉清就夠清，可惜清到連味道都唔係幾夠，細佬結果就以濃味o既滷肉碎黎自加調味。

XO仔讀書唔叻，唯有將勤補拙，記得大學時代為咗要學講普通話，經常都會厚著臉皮四周結識黎自台灣及大陸o既外地生，好等自己可以有更多練習o既機會，細佬就係咁遇上咗台灣女朋友。畢業多年後，小肥終於有機會去台北玩，所以第一時間就相約台灣女友午聚，地點就揀喺一家多位親友都推薦o既「三井」日本料理。

餐廳黑漆o既大門及深色o既落地玻璃側門極富神秘感，不過當真並不起眼，一啲都唔易搵。大廳樓底極高，開揚通爽，室內光線雖偏暗，不過紅色o既天花配上摩登o既吊燈，潮氣洋溢。餐桌上o既小蠟燭擺設，襯托埋布造餐墊、鶴形筷子座及小鐵酒杯，新潮得黎仍不失高雅。

可能一行十人中只有幾個可以用國語溝通，又有大有細，嚇親樓面位姐姐仔，令佢驚慌失措到要搵同事幫忙落單；為免增添混亂，我地最終都係決定各自挑選一客午市套餐。大家主攻嗰三款套餐分別為「歇雲套餐」（NT 1,200）、「淺雨套餐」（NT 1,500）及「薄月套餐」（NT 2,800）；嘻嘻，小肥身為全枱人最擦得嗰個，當然係試勻哂啦！由於餐牌上冇列明各套餐所包o既菜式詳情，我地都係要等食物上枱時先知有咩食。原來三款價錢不同o既午餐除咗菜式數目有所不同之外，就連內容都好大分別，不過當中亦有一模一樣o既飯後生果及餐茶或咖啡。

如相所示，三個套餐都有刺身拼盤一客，價錢越貴，款式及件數越多。每盤最基本有兩件清香甜美o既金目鯛。而所選取o既吞拿魚部位及生蝦o既級數則同套餐o既價格成正比；「淺雨套餐」o既中拖羅及「薄月套餐」o既大拖羅肥美香嫩，入口即溶，確實齒頰留香；「薄月套餐」o既牡丹蝦爽滑甜美，亦是一絕。此外，「淺雨套餐」碟刺身拼盤上多咗一隻飽魚，「薄月套餐」則多咗鮮嫩o既帶子同軟潤o既鮟鱇魚肝，另外仲有兩隻分開上o既飽魚，派頭十足。

除咗魚生，每份餐都包有沙律或前菜、蝦或蟹、燒魚菜式、湯品及甜品。「歇雲套餐」可算為最清o既一款；前菜「秋葵三文魚籽」清新濕潤、炸物「油切車蝦」乾身爽脆、煮物「銀鱈大根カマ」口感豐富，香脆惹味、形似魚蛋o既「毛蟹の真薯椀」則軟腍中帶點煙韌，清湯微甜討好。

「淺雨套餐」整體味道更為濃郁；前菜「馬糞海膽葵泥」香濃潤澤、大大隻「0.20kg 活車海老塩燒」爽厚彈牙、「旗魚腹串燒」香口而不油膩、「北寄貝吸」亦軟脆清甜。除咗四款升級海鮮菜式，套餐仲包有如薯片般脆薄o既「餅揚出げし」、「馬鈴薯牛肉釡燒」及甘醇o既「綠茶朱古力餅」。

「薄月套餐」o既項目數量雖然同「淺雨套餐」差唔多，但係其實份量同食材明顯更為豐盛；刺身拼盤多咗魚生同鮑魚、沙律入面加咗幾片大鮑、蝦o既菜式變成幼嫩無比o既「活鱈場蟹烤」、燒魚亦升呢為鮮嫩香滑o既「0.32kg油串（吞拿魚）下巴燒き」、湯品更換上包有原隻蟹鉗o既「味噌醇蟹」。套餐額外仲有兩串皮脆心嫩o既「生蠔カリカリ揚げ」（炸蠔）、鬆軟而肉汁豐厚o既「沙朗牛ステーキ」（西冷牛扒）及望落都矜貴過人o既「金箔綠茶朱古力餅」。

XO仔係五月天o既小粉絲，得知所入住o既「台北寒舍艾美酒店」旁o既「新光三越A11館」內就有樂隊主音阿信所開設o既「StayReal」商店，當然係要逛個夠本啦！

信義區內可以話係商場臨位，離「新光三越A11館」唔遠o既「ATT 4 FUN」合共有十層高，要買到野真係話都冇咁易！「ATT 4 FUN」一樣有即場退稅服務，櫃台位於四樓 o既「甜品王國」旁，要穿越過愛麗絲夢遊仙境方才到達，感覺極之夢幻。

全場最具代表性都應該非七月新開幕o既龍貓世界「どんぐり共和国」莫屬。精品店內除咗有售大小主角o既公仔、精美文具及飾物之外，整間店舖仲裝修成卡通片內o既樹林佈景咁，當中更不乏巨大o既龍貓及其好友龍貓巴士；行近啲望入玻璃窗就會發現原來龍貓喺大樹中心度瞓緊覺，非常搞鬼。

步出「StayReal」時已接近黃昏，由於手持多袋戰利品，為一解咖啡癮，小肥就同靚靚媽咪同姨媽索性喺商店隔壁，連旅遊書都有介紹o既「米朗琪咖啡」度歇一歇腳，飲個下午茶。

咖啡屋門面光鮮潔亮，間隔亦開揚通爽，衛生企理，中央簡單以蒸餾咖啡器裝飾，貼切又到題。

入座後，溫婉有禮o既姐姐仔先放低清水同餐牌，等大家慢慢參閱。靚靚媽咪同姨媽可謂姊妹情深，異口同聲地每人點咗杯「拿鐵咖啡」（Café Latte，NT 130/杯）。小肥就為食啲，要咗杯「義式濃縮咖啡」（NT 110/double），另加「法式捲餅」一客。

法式捲餅（NT 90）：甜品實物跟餐牌上o既彩圖冇十成都有九成九相似。奶黃色o既捲餅皮層軟薄，內裡o既吉士餡心則柔滑香濃，點上忌廉同煉奶後，再連同橙黃色o既水蜜桃食，更覺清新甜潤，美味可口，實屬超值之選。

「亞都麗緻大飯店」每個角落都有鮮美o既靚花，華麗悅目。酒店中菜廳「天香樓」正門有小橋流水，襯托埋四周木造o既橫樑，裝潢雅致得黎極富傳統中國色彩，氣派十足。

舅公認真客氣，除咗點選咗晚宴套餐之外，仲額外叫多咗幾味前菜、鮑魚、蟹粉同東坡肉，更一人附送一本中、英文版任揀o既「杭州菜的故事」添。

1)      蕃茄前菜（價錢不詳）：此味蕃茄前菜喺餐牌上搵唔到，亦要由舅父仔同舅公示範，先知原來係要用匙羮連汁「筆」黎食。蕃茄粒好爽滑，姨媽同舅公就覺得醒胃，不過小肥就覺得好似聽到嫲嫲叫咁，好「孫」（酸）！

2)      拌萬年青（NT 250）：薄薄o既蓮藕片同幼幼o既荀絲清香脆口，輕盈健康。

3)      龍井白蝦仁（NT 780/例牌）：細閱「杭州菜的故事」後，方才知道龍井被乾隆皇o既皇太后封為「貢品」。故事講述一位杭州廚師從蘇東坡o既一句「休對故人思故國，且將新火試新茶，詩酒趁年華。」領悟出龍井最鮮嫩o既時候正正就係河蝦最肥美o既季節，兩者雙合即創出杭州名菜「龍井蝦仁」。可能十一月並非河蝦o既季節，「天香樓」o既蝦仁質感雖然好爽脆，但就好似差咗陣鮮，加上炒製時落多咗粉，蝦仁就變得過黏，幸好龍井o既茶香清麗脫俗，為菜式挽回不少分數。

4)      宋嫂鮮魚羮（NT 300/位）：顧名思義，「宋嫂魚羮」乃宋（五）嫂所創出。宋嫂其實係一名逃難老婦，與其叔仔喺杭州落腳後就單靠捕魚為生。機緣巧合下，一次為照顧病重o既叔仔時，就善用賣剩咗o既鮮魚，混入令人開胃o既薑、醋、酒、椒等刺激食慾o既調味，煲煮出一碗魚羮；叔仔食後，胃口大開，並迅速痊癒。故仔傳到去南宋淳熙帝耳邊，為求一嚐魚羮即召見宋嫂，親証過「宋嫂魚羮」如何鮮美後當然係重重有賞啦，宋嫂就順應各方要求，開設小店，為名菜發揚光大。「天香樓」o既宋嫂鮮魚羮以瓦煲及名火滾住上，夠哂新鮮滾熱辣，魚羮鮮濃嫩滑，其薑、醋、酒味當真極其醒胃！

5)      牛扒鮑魚（價錢不詳）：正當大家都沉醉於幾款傳統杭州菜o既典故時，面前突然出現一碟中西合璧o既海陸組合，牛扒配鮑魚。中餐食鮑魚已經夠矜貴，但係用牛扒墊底都係第一次見，似乎大廚係要証明俾大家睇佢都有藝術細飽同創作天份。牛扒係XO仔最愛o既三成熟，軟身得黎好夠肉汁，不過個人略嫌唔夠咸；鮑魚亦好腍滑。一口牛扒、一口鮑魚，口中o既肉香剛好吊出鮑魚o既鮮甜，配搭好有特色。席上幾位美女廚神卻因兩種食材有啲微微硬碰硬o既口感評咗兩句，更提出師傅可考慮將鮑魚換上一梳魚翅，相信會為視覺及味覺帶黎更豐沛o既享受。

6)      左宗棠雞球（單點價不詳）：微辣帶甜o既左宗棠雞球偏乾同嚡，可算為整頓晚餐中最為遜色o既一道。

7)      蟹粉豆苗嫩白玉（單點價不詳）：適逢蟹季，舅公亦刻意加插咗一味蟹粉菜。金黃色o既蟹粉鮮甜無比，配角o既兩、三條豆苗亦翠綠嫩口。碗中o既兩球「白玉」其實係豆腐丸，其外表白滑，質感柔潤，塗上蟹粉食則更覺鮮美。

8)      花雕東坡肉（NT 320/位）：唔經唔覺已經食咗五款大菜，女士們都已經開始叫飽，估唔到壓軸每人仲有一小盅東坡肉送白飯！半肥瘦o既東坡肉軟腍滑溜，花雕味醇厚香濃，半溶於口中可以話係食豬肉最高o既境界！四大才子之一蘇東坡不但詩詞書畫樣樣精，電視劇都有提到其廚藝其實一樣咁耍家，其中「東坡肉」明顯亦取自其名。據書中記載，蘇東坡上任後即為西湖修提，為其重展容貌，好官形象深入民心，老百姓為表答謝都紛紛於春節送上其最愛食o既豬肉。由於豬肉實在過多，蘇東坡就命人切成小小方塊，再以其獨門秘方燒煮，並「連酒一起送」，派俾每家每戶o既人民，怎料此句卻被誤聽成「連酒一起燒」，紅燒肉o既調味料中就加入咗酒，效果變得比普通紅燒肉更為甘香醇美；從此以後，此菜就被稱為「東坡肉」。

9)      桔香酒釀甜湯丸（NT 160/位）：酒釀湯丸煙韌輕巧，桂花甘香撲鼻，酒味清秀淳樸，湯中鮮橙色o既柑肉更甜而不溜，飯後一小碗確令腸胃舒暢不少。

酒店餐廳「天香樓」環境雅致衛生，服務稱心又貼身，用餐時更可從小冊子學到多款杭州名菜背後o既一段故及烹調秘訣，極有意思。師傅除咗懂得烹煮傳統杭菜，亦有顯示出自己o既新派作品，菜餚大多美味精彩，但都有需要改進o既地方，XO仔o既總評其實係OK與笑臉之間，希望最終決定給予笑臉可被視為小小鼓勵。

姨媽所揀選o既機票連酒店套餐每位五千多，包咗「長榮航空」來回台灣經濟客位機票，及「台北寒舍艾美酒店」三晚房間。

長榮航空經濟艙位同其他航空公司感覺冇乜大分別，洗手間o既衛生度都係差不多，只可以話係屬正常，空中小姐o既態度則不甚友善，誠懇欠奉。

去台灣旅遊，如果唔食過小籠包個心一定會唔安樂，但係要光顧幾間名店或老字號都必定要排隊，坐得又唔係話特別舒服，所以今次台北一行，決意一試超閃旅遊書推介o既「金品茶語」。

有司機哥哥黎機場接機，我地不需費神，坐車直達，不過食店喺四周均有廣告及指示牌，地方一啲都唔難搵。

兩層高o既「金品茶語」地下為商店，售賣多款茶葉及茶具，送禮自用都適合。一樓o既餐廳全為合併式o既方形散座，簡潔舒適，人多人少喺度嘆茶都一樣咁自在。

橙黃色o既餐牌不但有多款小食菜餚，茶品款式都一樣咁豐富，凍飲、熱飲齊備，紅、綠、奶茶，應有盡有，就連時尚o既茶味雞尾酒都有得飲，果真係令XO仔眼界大開！始終自己及同行o既長輩對茶應知唔深，結果都係等年輕友善o既哥哥仔介紹，先叫咗壺「貴妃美人茶」，一邊呷茶，一邊食點心同湯麵。

1)      皮蛋豆腐（NT60）：白雪雪o既豆腐嫩滑非常，半流心o既皮蛋亦好夠溏心，一淡一濃可真為絕配。

2)      小籠包（NT 120/六隻）：熱辣辣o既小籠包皮薄餡軟嫩，睇相可能會覺得唔係好夠湯，不過食落就知湯足且清甜，毫不溜滯，食落好健康，每人一粒真係唔多夠喉。

3)      蟹黃湯包（NT 175/六隻）：淨睇相真係未必分得出，不過蟹黃湯包其實即係多咗蟹黃味o既小籠包，同樣係皮薄餡靚，一行六人都覺得蟹黃湯包更為鮮美香濃，故亦選此為追加點心。

4)      紅燒牛肉麵（NT 180）：碗中o既牛肉全部都係牛展，每片都好軟腍，麵條則軟滑易入口，加上湯底少辣惹味，極之討好。

5)      菜肉雲吞麵（NT 160）：相比起下，碗菜肉雲吞麵味道就較為清淡，幸好菜肉雲吞皮光肉滑，唔夠味可以簡單撈入紅燒牛肉麵o既湯自行加以調味。

姨媽所揀o既「台北寒舍艾美酒店」屬五星級酒店，六人抵達酒店門前，於大大o既停車場落車，步入樓底極高o既大堂，已感氣派十足。

大堂o既地磚及牆身大多都用上雲石鋪設，中間夾雜咗鏡子令視覺上更為光猛寬敞，四周可見趣緻o既藝術品及彩色吊燈裝飾，華麗中不失時代感。

出咗名愛飲好食o既堂細佬近年因工作關係已遷往台北居住，去到新環境，其飲食習慣都係差唔多，一樣愛到處覓食，其中「STAY by Yannick Alléno」就係一家令佢常掛喺口邊o既西餐廳。

「STAY」o既裝修極富時代感，大堂小廳內o既散座都用上厚墊梳化櫈，故仍不失高雅舒適。現今食肆都潮興有個開放式廚房，「STAY」都唔例外，不過就只係搬咗個色彩繽紛o既甜品創作空間出黎，成個科學實驗室咁，都幾得意。

步入門前一刻已留意到門外o既廣告牌正推廣緊兩款白松露宴，埋位細看餐牌就明白兩者有何區別。「珍饌盛選」為六道菜，主菜為松露意粉，包有四克白松露，價錢為NT 2,988 + 10%；「極上盛選」則有七道菜，另加多咗一味波菜帶子，主菜為牛膝，包有十克白松露，價錢為NT 9,800 + 10%。XO仔身為松露迷一名，對松露意粉更加係情有獨中，故唔洗多諗即決定要一嚐前者o既六道菜「珍饌盛選」松露宴。

食西餐時家人都總愛飲番兩杯，當晚就開咗枝香檳配佳餚。由於六人所點選o既菜式數目及項目都有所不同，單憑溫婉o既服務生呈上食物o既次序，已睇得出廚房對西餐禮儀都甚為講究，各部門互相都好有默契。

1)      麵包籃：籃中合共有三款麵包，每三人一籃，即每人有三件。為怕引起食物過敏反應，小肥出門時都會盡量揀食自己知道屬安全o既白麵包及牛角包；暖手o既白麵包極之鬆脆，牛角包亦香軟非常。

2)      主廚精選小點：各人o既晚餐同由三款的骰o既小食作序。最左為「巴馬臣芝士蕃茄」，由兩片又薄又脆o既巴馬臣芝士夾住四方形o既蕃茄啫喱，咸咸酸酸都幾醒胃；個人覺得中間件「三文魚班戟」雖則夠軟熟，不過就好似有少少腥；最右嗰件「鵝肝車厘子」以車厘子包實一小件鵝肝，方便客人可一口過食落肚，概念其實好好，不過如果車厘子可以去埋皮，相信效果會更好。

3)      白松露培根水波蛋：離遠已聞到清幽o既松露香，腦海已唱出「魅力是無法擋，紅唇在為你張。。。」，當真令人精神為之一振。如相所示，雞蛋實屬流心，連同蛋底o既煙肉忌廉醬及麵包脆脆一齊食，入口更覺香脆軟滑，可真謂完美！

4)      白松露南瓜濃湯：南瓜濃湯香滑甜美，濃而不溜，輕輕灑上幾塊白松露薄片已夠芬芳，盡顯簡單美。

5)      白松露細扁麵：形似浸緊松露泡泡浴o既意粉麵條煙韌彈牙，第一口細嚐時很是清香輕巧，不過其松露味越食越濃郁，味蕾上o既精靈彷彿慢慢地被喚醒，極為精彩細膩。

6)      法式精緻小點：甜品小點同開胃小食一樣合共有三款，跟餐茶及咖啡上。先上枱有兩款蛋糕仔，即橙黃色o既「熱情果歌劇院蛋糕」（Passionfruit Opera Cake）及深啡色o既「朱古力撻」。「熱情果歌劇院蛋糕」清涼微甜，「朱古力撻」則香脆醇濃，雖說兩者無論喺顏色、口感定味道上都好大o既對比，食落卻又能互相輝映，妙哉！接著妹妹仔就小心翼翼地呈上一條上面插有多枝波板糖o既大擀麵棍。原來波板糖全為棉花糖，分別為黃色o既菠蘿味、橙黃色o既熱情果味及深紅色o既紅梅味；每條同為甜中帶酸，都幾消滯吓。

7)      白松露巧克力焦糖卷：以金箔及松露點綴o既兩條朱古力卷外層脆卜卜，內裡o既朱古力焦糖餡心則柔滑清甜，足以帶出淡薄o既松露香，甜而不膩，剛好為松露宴劃上一個完美o既句號。

貓空地區位於台北市的南端，因為觀光茶園滿山林立，周圍景色翠綠處處，附近又有不少景點及登山步道，是一個很好的休閒據點，就算平日也經吸引不少遊客。

為方便遊客起見，整個片區分了紅、黃、藍3個分區，可以說是代表3條不同的路線，因為我們事前都沒有刻意安排一些必去的「景點」，所以，就樂得隨意，只是造訪了茶推廣中心及壺穴兩處地方。之後，再茗茶，嘆咖啡，看看這翠綠環山，又遠眺101大樓。

話說回來，乘坐纜車上貓空是很直接又便捷的方式，全程共有4個站：由地面的動物園站，經過動物園內站及指南宮站，爬到約300公尺的及貓空站，全程大概用了20分鐘，沿途風景很美。

前文提過，貓空之上茶園林立，有不少茶葉專業農戶，更有不少茶坊，故吸引不少好茶之仕前來茗茶、賣茶葉。小弟自問對茶葉是門外漢，上茶樓不是普洱，就是壽眉，如到茶坊品茗，未免有點見笑。難得這裡有個「茶研發推廣中心」，就讓小弟上一課茶葉速成班吧！

茶研發推廣中心規劃了一個完整的茶葉展示區，介紹木柵鐵觀音和南港包種茶的製造過程、茶葉品茗、沖泡及保存方法、飲茶保健功能……等資訊，更有真實的茶葉樣本展示，以及台北特色茶類分佈簡介等。此外，還包含教學區、生態水池、茶園區、氣象觀測坪……等，又會規畫一處茶藝活動，頗有趣味，更進一步讓人們認識茶藝文化的深與美。

最後，不要客氣，取一杯鐵觀音（免費），找個位子靜靜坐下，感受一下山林間的幽靜！

「壺穴」是來到貓空才知道的景點，就在茶研發推廣中心附近拾級而下，往小路走，經過一片又一片樹林到達溪邊就可以找到。

其實甚麼是壺穴呢？壺穴通常發生在河川幼年期，經由雨水沖刷帶動上游石塊往下游移動，河水夾帶的礫石陷入河床的凹部後，不停的旋轉，河床經過長久的鑽蝕，鑽出洞穴來就形成了「壺穴」這種相當特殊的地形。

在網上翻查一些有關壺穴的資料，以基隆河大華和暖暖一帶的壺穴群最為著名，其次還有嘉義豐山石夢谷壺穴、雲林古坑草嶺壺穴。

通常講話「賞心悅目」，就是因為看了美好的景色而令人心情愉快，讓人心感舒服。來「壺穴」，經叢林，風聲颯颯，傍小溪，流水淙淙，真有一份賞心悅目的感覺！

在香港，一說到茶餐廳，大家會自然明白是甚麼來，不過，來到貓空，「茶」餐廳是不一樣的茶餐廳，因為，這裡盛產茶葉，故有不少品茗用餐的店子，好些更只是賣以「茶」做的食物。「貓茶町」就是其中一家，沒有刻意的找，只是路過見店子名字有趣，食物的照片又很吸引，就來試一試。

其實來到貓茶町，發覺果然不負「茶」餐廳之名，除了茶葉之外，還有很多以鐵觀音或包種茶所做出的不同產品，如：舒芙蕾（梳乎厘）、奶酪、泡芙、麻糬、蛋糕、牛軋糖、燒果子、麵包……等等，琳瑯滿目，我們更買了幾包鐵觀音麵（TWD120）回家試試，煮好後一陣陣鐵觀音茶味，真喺幾得意。

店內環境頗大，猶如一般的咖啡店，我們即場試了一客綜合口味冰淇淋（TWD80），碧綠的外觀，一邊深色是包種茶，另一邊淺色的是鐵觀音，看見也覺得吸引，味道帶着超濃郁的茶味，又軟綿，又大杯，好味！

此外，還買了一份鐵觀音舒芙蕾（TWD60）外帶，打算在一陣光顧的露天茶座時才跟咖啡一起慢慢享用，然而，個舒芙蕾中心有茶味忌廉，既香且滑，外層鬆軟，面面更加了一粒松露朱古力，實在超好別啊！

前往茶研發推廣中心時，路經開在山坡旁得「貓空閒」露天茶座，我倆已一眼愛上，因為「貓餐車」設計很有趣，輕易吸引你的目光，它是由一架輕型貨車改裝而成，而露天座椅安置在一旁的石仔路，對開就是一片廣闊180°翠綠山景加遠距離台北市景，好像整個台北就在腳下。

「貓空閒」提供多款飲品，有意式咖啡、特製奶茶、沙冰、天然果汁、花草茶、歐式點心（即是我們慣稱為輕食）、蛋糕及慕絲。

小弟要了一杯焦糖瑪其朵（TWD120），味道醇香，口感細月滑，太太的蔓越莓蘋果花茶（TWD160）也不錯，甜甜酸酸帶點甘，而伯爵冰山角慕絲（TWD70）亦是水準之作，蛋糕下層是鬆軟的朱古力海綿蛋糕，上層則是伯爵慕絲，柔滑而富茶香。

茶座、陽光、靚景、美食，怎教人不多逗留一會呢？看看山、看看樹，感受一下清爽的秋風，是如此悠閒！晚上到來，夜景又不知會如何！

返回旅館取行李，本應就在「忠孝敦化站」下車，不過，今趟就早一個站「忠孝復興站」下車，原因是順便走一回東區地下街。

這個地下商街，全長725公尺，貫通忠孝敦化站至忠孝復興站，出入口共有17處，非常方便。整個商街有超過30多間商鋪，包括、書局、藥房、餐廳、服飾、精品、便利店……等等，民生日用品應有盡有，價格又較便宜。此外，亦設有圖書館、市政府服務站、旅遊服務中心等，可謂市民一站式便利商街。還有一些公共藝術廣場，其中4號出口附近，更設置了一條畫廊道路，令地下街多添幾分文藝的氣息！

除了這一條東區地下街，還有一條中山地下街（台北車站至雙連站），如順路的話，真的不妨早一個站下車來逛逛。

幸好來到機場時有在「勝搏殿」吃了一頓晚餐，否則，要餓着肚皮在機上吃宵夜，因為航班由原先預定的8:25pm延誤至9:50pm才起飛，派餐時間已是十時多。

餐廳位於4F一列美食廣場，故此，服務就需要自助，但這樣就更吃我無拘無束。而店內供應多款套餐，以機場價格而言，算是便宜了，定價都只不過是TWD220-TWD310。

小弟選了腰內里脊套餐（TWD250），套餐已包前菜、味喒汁及白飯，而何謂「腰內」、「里脊」？其實就即是我們慣常所叫的豬柳、豬扒，前者有兩件，後者有一件，都是以吉列處理，配上爽脆的椰菜絲。外層炸得極脆，又不油膩，而豬柳肉質非常軟腍，豬扒入口有嚼頭，真得很美味。