在 "Irving Street" 吃好中午飯，我們便回去 Pier 那一頭，為的，是尋找歷史悠久的 San Francisco Cable Car。

我們去到 Cable Car 的總站了，本來想坐下，過下癮的，但單程票價要成 7 元美金，搵幾個人坐單程去 Union Square 我去接大家又反對，坐來回又好無謂。幸好，在總站旁有好幾部休息的 Cable Car，原來可以任我們爬上去，坐上去拍照。那，我們當然，在車上，在車外，影相影個夠啦。

晚上，我們在 "Macy's" 靠 Market Street 的門口出來時，我們找到了 Cable Car 的市中心總站。可是，我遲了拿相機，捕捉不到人手 turnaround 的一刻。

由「橫濱灣喜來登酒店及觀景塔」（Yokohama Bay Sheraton Hotel & Towers）行經電梯通往地下街，路程只需幾分鐘，當真夠哂方便。始終對區內o既咖啡室唔係咁熟識，團長就求其行咗入去最近o既「Oslo Coffee」度食早餐。

「Oslo Coffee」簡潔企理，卡位配有厚墊梳化櫈，餐桌上更設有傳呼服務生o既按鈕，滿座時都唔怕搵唔到伙計落單。

早餐時段，店子只有兩頁餐牌，一頁為單點飲品項目，另一頁則為三款食物連咖啡o既套餐。套餐及散叫飲品o既單價其實只係相差一百円左右，咁梗係叫套餐抵好多啦，我地就每樣叫咗幾客黎分，飲品就清一色要哂特色咖啡。「Oslo」o既特色咖啡共有三款，分別為藍色印o既「King」、紅色印o既「Queen」及金色印o既「Royal」，飲齋啡o既團友就簡單地以對應o既性別黎揀選啡品，而肥肥家族四人就叫齊哂三個色，好等小肥可以續一試試。

1)      特色咖啡「King」（500円/杯）：代表男士或皇帝o既「King」齋啡呷落甘香，係三款中最濃厚o既一杯。

2)      特色咖啡「Queen」（500円/杯）：代表女士或皇后o既「Queen」齋啡則帶有果香及微微酸味。

3)      特色咖啡「Royal」（700円/杯）：最後不分性別，只代表皇室o既「Royal」歐蕾咖啡奶香豐厚幼滑，亦為好啡一杯！

4)      A餐之「北欧ワッフル」（500円可配「King」或「Queen」特色咖啡；加200円可轉配「Royal」歐蕾咖啡）：圓形o既北歐窩夫香脆鬆巧，500円有兩件加杯靚咖啡，絕對超值！

5)      B餐之「ハム＆デンマークチーズのワッフルサンド」（500円可配「King」或「Queen」特色咖啡；加200円可轉配「Royal」歐蕾咖啡）：熱食o既芝士火腿窩夫三文治外層兩塊窩夫軟腍帶甜，夾住o既芝士火腿香濃熱辣，一個人食哂一份都幾飽肚。

6)      C餐之「ノルウェースモークサーモンサラダのワッフルサンド」（600円可配「King」或「Queen」特色咖啡；加200円可轉配「Royal」歐蕾咖啡）：凍食o既挪威煙三文魚沙律窩夫三文治腍中帶脆，濕潤惹味，都幾得意。

「Oslo Coffee」環境服務同為合格之列，早餐價廉物美，九個人成張單六千円有找，好采團長夠精明，冇揀留喺酒店食個每人要成五千円o既自助早餐，結果幫大家慳番唔少盤川！

「橫濱灣喜來登酒店及觀景塔」（Yokohama Bay Sheraton Hotel & Towers）二樓可直出行人天橋，步行兩分鐘即抵日本名百貨公司「高島屋」（Takashimaya）。旅客可憑護照取得九五折咭，優惠適用於全國o既「高島屋」，非常廣泛。此外，於商場內購物滿5,000円或以上亦可享即日辦理退稅手續。

由於郵輪河受颱風影響，延誤咗四個鐘頭，團友們就臨時決定喺「高島屋」狂購多輪，其間午餐時間就喺八樓餐廳層覓食。

「高島屋」八樓餐廳層有多間食肆，當中不乏中、法、意、日、韓料理，唔洗多諗，黎到日本就當然係揀食日本餐啦，團長就帶隊行咗入去一家專門食雞料理o既「八起庵」。

「八起庵」地方整潔企理，面積都唔細，不過午飯時間實在繁忙，一行十二人只好分開坐。疑似店主夫人o既嬸嬸雖然忙得團團轉，但其臉上仍能保持笑容，態度溫婉，效率亦頗高。

由於餐廳於午飯時間未有提供散叫餐牌上o既雞鍋料理，我地就叫咗啲雞丼同午市丼麵套餐黎分。午餐可選o既雞造菜式中，除咗平時常見以雞肉（即「親」）混入生雞蛋（即「子」）及滑蛋（即「子」）o既「親子丼」之外，店子亦有煮出同為「親子」組合o既咖哩飯、烏冬等，當中部份更用上相傳有皇家血脈o既東京軍雞煮出，選擇極多。

親子雞丼とミニ鴨なんば（2,376円）：熱辣辣o既親子雞丼內含滑蛋同生蛋，令丼物整體質感柔潤滑溜。墊底o既飯粒飽滿軟熟，雞肉幼嫩中帶有彈性，甜甜o既調味亦極之討好。套餐中o既迷你鴨烏冬一樣咁好味，其湯底清香微甜，烏冬麵條煙韌軟滑，鴨肉都好軟腍。

上網查過，原來「八起庵」乃京都名店，更為雞料理專家，其雞丼簡單美味，午市套餐豐富又抵食，唔怪得知中午前已座無虛席，掂呀！

「鑽石公主」（Diamond Princess）載客量為二千七百多人，比起肥肥家族之前坐過僅可乘載一千多人o既「水晶平靜」號（Crystal Serenity）大成倍幾兩倍，相機都要離開好遠先影得哂成隻船。公主郵輪雖大，但論及豪華度、舒適度、服務質素、娛樂項目選擇等等，真係冇得同水晶號fight。

是次郵輪河我地同樣係入住有陽台o既廂房。廂房位於十四樓高層，個景就夠靚，可惜間房由地毯到傢俬、浴室到陽台、衣櫃到雪櫃，設計同用料都給予住客一個殘舊o既感覺，當真絕不豪華！室外溫度平均已高達攝氏三十幾，點知室內冷氣開到最大一啲涼意都冇，夜晚黑瞓覺唔蓋被都出哂汗，日日真係好似焗桑拿咁，怕熱o既小肥真係幾辛苦。

郵輪搭客多，淨係飯廳都有五個之多，另外仲有三個要額外俾錢先去得o既主題餐廳。每天不同o既娛樂項目詳情可參閱郵輪日報，早上及中午可揀上跳舞班、運動堂，不時亦有遊戲節目送出禮品，最受歡迎梗係Bingo啦！入夜有得睇表演、聽現場奏樂、唱K、同跳舞等；表演好唔好睇就見仁見智，細佬只可以講句唔係自己杯茶囉。出到公海雖然可以拉機測試吓有冇賭運，不過啲電子化老虎機唔再有銀仔跌落黎嗰啲叮叮聲，氣氛差好遠，個人覺得一啲都唔好玩！

「鑽石公主」o既五個飯廳分別係「International Dining Room」 、「Pacific Moon Dining Room」 、「Santa Fe Dining Room」 、「Savoy Dining Room」 及「Vivaldi Dining Room」，均分有傍晚五點半及晚上七點四十五分兩輪；客人可於購票時或上船前於網上預訂晚膳時間，地點則由船公司編排。據悉，咁多個廳入面最大嗰張餐枱都只係可以容納到十個人，團友十二人唯有分開兩張六人枱坐，排位就晚晚轉，以確保聯誼時可以保持新鮮感。

我地被安排入座o既「Santa Fe Dining Room」環境優雅，燈光柔和，闊落o既椅櫈都好舒適。負責兩張枱o既服務生黎自唔同組，因有比較下，年輕落力又友善o既Jerome同拍檔明顯於各方面都略勝一籌。食物方面任叫任點，於用餐時間內更可無限添加，不過質素只可以話中規中矩：

1)      Crispy Hand-Rolled Vegetable Spring Rolls with Hoisin-Peanut Dip, Lemongrass, Cilantro：頭盤齋春卷每人只有一細條，細佬嗰件走咗海鮮花生醬，相中所示為哥哥完整嗰客。齋春卷炸得好夠乾巧鬆脆，齋菜餡料都好爽，唔點醬食都好夠味，外國廚黎講已做得相當唔錯。

2)      Red Snapper Mojito Ceviche with Mint, Mango, Avocado and a Splash of Rum：醃魚味道奇酸，幸好份量只有一小杯，否則恐怕平時最怕浪費食物o既XO仔都要食剩野。

3)      廚師推介之Cream of Porcini Mushroom Soup, Velvety Cream soup, Flavor-Heightened with Tarragon：蘑菇湯只屬和暖，飲落稀得黎好咸，估計係因落得唔夠忌廉所致，作為廚師推介真係唔多掂囉！

4)      廚師推介之Slow-Roasted Corn-Fed Prime Rib, Rosemary Jus, and Horseradish Cream, with Corn-on-the-cob, Char-grilled Tomato, Baked Idaho Potato：三成熟o既牛扒肉質香腍鬆軟，份量又足，可以話係「Santa Fe Dining Room」於全程郵輪河入面煮得最出色o既一道主菜！

5)      廚師推介之Milky Chocolate-Hazelnut Soufflé with Amaretto Sabayon：朱古力味梳乎厘偏乾同韌，食落似蛋糕多過梳乎厘，並非廚師o既小肥絕不推介。

有別於「水晶號」o既餐飲全包計劃，「公主號」o既晚餐只包有清水及普通餐茶，所有酒品、果汁、汽水及特色咖啡等都要額外收費。點好菜後，食物雖然係續道上枱，無奈速度猶如閃電般，效率可以形容為好高，但感覺有啲似趕客咁，級數當堂大減。此外，餸菜o既賣相難以稱得上為精美，份量較少，味道亦只可以話係普普通通，未能令人嘩然讚嘆，當真令人極為失望！

羽田空港
4:40抵搭羽田空港，好快過左關，等到大約5:30後鐵路營業。
有兩條線選擇，Monorail(單軌電車)及京急線，因為我們去築地先，選了單軌電車，初到貴境，先買張suica卡(類似八達通)，方便交通。
出發去築地
到浜松町駅，第一件事是搵大Lockers擺放行李(好擔心冇大Lockers)，見附近有Lockers提供，即用了，之後步行到大門駅轉車。(其實築地市場駅內都有Lockers，但多數full晒，安全起見在轉車站擺放了)。
築地市場-鮨文
到了築地市場，下大雨中，之後都不太方便影相了，去了壽司大睇下，果然好多人，加上落雨，打消了去的意欲，去了另一間，鮨文，冇乜人排隊。
等位時，會給你一杯凍麥茶，是窩心的表現，但因下雨有點冷，變得更冷，同時，要先講定食咩，等師父有準備，我點了以上的套餐(3850円)，由於店內不能影相，影了餐牌給大家看，終於可一嚐築地的壽司了!

 

花園稻荷神社
從酒店出去到新宿行下，繁華鬧市的新宿，有一個花園稻荷神社，稻荷神，是穀物、食物之神，狐狸是稻荷神的使者，行神社，感受一下雨後空氣特別清新及寧靜。
新宿區
行行下到JR新宿駅，由酒店行去到此駅，大約10分鐘，去到LUMINE EST，主要去フェリシモ猫部 期間限定ショップ【新宿LUMINE EST店】大掃貨了。
開始入夜，去左驚安の殿堂一轉，又去下藥房，必去行一轉歌舞伎町，日光日白之下冇咩動靜，夜晚就不少撩飲酒幫襯，再去了哥斯拉酒店睇下，真係有好大隻哥斯拉。

飯後在酒店的附近周圍行，經過不少酒吧街，有不少的小巷子，都是酒吧來的，經過看一下，每間都是小小的空間，但甚有特色，不過我地3個女子，唔太敢幫襯，行行下見到天然溫泉Thermae湯，好大間呀，有岩盤浴、溫泉、三溫暖及Spa等，本身想遲點幫襯，但事後忘了，沿途有不少的自動販賣機呢，返到酒店，咁快就玩左一日，都係shopping多呀。

在我們由西雅圖前往三藩市的路途中，我們在加州海邊的一個名叫 Eureka 的小鎮留宿了一晚。前文早已經交代了沿路的風光及住宿的地方，是日要說的，就是前文 motel 推介給我們的意大利餐廳。

這其實是一間好大的餐廳，來到的日子是平日，是冬天，不是旅遊的旺季，所以餐廳只開半場，而這一個半場，包含了餐廳的小酒吧。當我看見這一些霓虹光，立即令我想起了美國電影及電視劇的酒吧情節....原來電視箱看到的同現實是一模一樣的。

有意大利式的餐前麵包，好肚餓的我們，面對著這些熱辣辣麵包，當然是愛不釋手啦....



我們不什麼 3 course 了，直接點主餐，給素食人士的，有這一個 Eggplant Parmigiana，這是一客芝士焗茄子，用上了帕爾馬的芝士，與肥大品種的那一種茄子入爐焗，茄子被厚厚的蕃茄醬同芝士滲透了，是份外的好味道。

 
Grilled Vegetable Lasagna，同我食用的肉版是相似的，不過餡就是以菠菜為主的雜菜。同樣，很飽肚，但因為沒有肉，味道是以芝士同蕃茄為重，也是非常之美味可口的，而且菠菜的味道很是好。 

Homemade Ravioli，菠菜加肉碎餡的意式雲吞，雲吞的感覺不太重，反而最有感覺的，都是個芝士混蕃茄的醬。

Manicotti，是用一片薄餅，卷著菠菜而成，說真一句，說有部份意大利菜是由馬可孛羅由中國及中亞地區傳入，在食過 Ravioli 之後，再食這一個菠菜卷 (Manicotti)，就知道，這東西同中亞地區的食品有相似。味道，是好大力水手的菠菜味，同埋.....芝士混蕃茄的醬味道。 

好味，但感覺上樣樣東西都會配上芝士混蕃茄的醬。也許，這是此餐廳的精髓所在，也許，這是美國 style 意大利餐的味道。雖然什麼都是芝士混蕃茄的醬，但食落，係好味道既。而且，這餐廳標榜用本地農場的食材，支持本地的農業，也是值得加許的。 

由  Grants Pass  離開 I5，轉入US199 抄小路去加州的海邊。之後看見的就是一片綠色的草地，我們一路南下，一見平坦的陸地，就是這樣的地方。而跑小路另有一種感覺是跑高速公路沒有的，那就是會穿過無數的小鎮，可以欣賞到美國的風土民情。

我不知在那一個位置進入了加州。只知道，時間是4點幾，仍未入夜，但 US199 已經是黑漆漆的一片。原因，就是我正在穿過 Redwood Forest (紅木國家公園) 的其中一個森林路段。在大樹下，在森林內，陽光足也不會太過光猛，5點，太陽開始下山，在這一路段，的確是有如在晚上閞車的一樣。

出了森林，到達了 Crescent City，6點多，天早已黑了。而且，討人厭的導航老點我抄小路，我並沒有機會經過  Crescent City 的市中心。

抄小路接駁了 US Route 101，由 Crescent City 開始到 Eureka 的一段路，本是風景如畫的海邊路段，但天黑了，只能聽到海聲，只能聽到風聲，只能在隱弱的車頭燈光下，看到右手邊是海。到達 Eureka 的 Motel 只實只是8點多，但，因為是冬天，日照時間不長，我們已經黑了好幾個小時。


終於在遠處見到海，見到一些內湖海。往右望，是一望無際的太平洋，若不是趕路，真想停下來，看看加州的海。


上山的路段，汽車在霧中穿插，有如在仙境，大霧把太陽遮蓋住，濛濛的前景，卻又看得見光明，穿出大霧路段後，煙霞在路邊，仿佛隨時會有神聖顯靈的一般。

之後，是另一個森林，查過後，才知道這兒叫 Humboldt Redwoods State Park。在陽光充足的時間穿過森林，是另一番的景象。而這一段路，同之前一晚經過的森林路段一樣，九曲十三彎。出了森林，就是山區的路段，過了這一段路，就開始邁向三藩市 metropolitan area 的市郊。 

穿過一個小鎮，記憶中應該係 Ukiah，是我們停車入油的地方。在此要溫提一下，大家不要在三藩市內入油，因為好貴。最好在這些離市約一個小時車程的地方加滿油，才好入三藩市。也是後知後覺，查了 Tripadvisor 才知道，Ukiah 有一間《Ten Thousand Buddha Temple》(萬佛寺)，如果早知道，我應該可以見到我的 "Buddha California"。 


過了 Santa Rosa 不久，我們看見左手邊是海邊，而面前是隧道，穿過隧道，重見光明，車上的眾人都大叫起來，我們終於到了 "生蕃薯煮著菇" (San Francisco) 了，前面的，就是《金門大橋》。 對面岸，是眾人都嚮往到來的三藩市，也稱舊金山。再往前走，就是《金門大橋》。不過，我們並沒有直接過去，我們先要找一個瞭望台，看一看美麗的《金門大橋》及三藩市景色。

在美國辦唐貨，當然要去中國人開的店子啦。通常，這些店子都是在唐人街內及周邊，當然也有一些開在市郊的更大型店。不過，說老字號的，通常都是唐人街周邊的。

是日，要回太太兄長的家開大餐，要買火鍋料時，太太兄長就想起唐人街的一間大型雜貨商店，叫《Hau Hau Market》中文就是《好好市場》。單是名字，已知道這店，好古老。

同我以前在英國見過的唐人雜貨店差不多，都是有一種中國式的凌亂感，而且好多東西都是一箱箱地出售。比英國多的，就是新鮮蔬果的品種比較多，海鮮的種類也較多。非常之方便。

所以說，在外國的大城市生活，的確不愁思鄉。 

我們在 Bellevue Square 行完街之後，準備下班的太太兄及嫂打電話來，說晚飯的地點位於 Bellevue 的另一個商場。

幸有 GPS，這商場不難找。來到，這兒有一個非常空曠的停車場，食肆林立，而我們更在這兒發現了一個熟識的名字，那就是《元氣壽司》了。

在吃飯的一晚，我們發現了這一個 Mall 有好多好行的地方，於是，在臨回香港的前一天，我同太太二人再主攻這一個商場。我們找到了《TJ Maxx》、《Walmart》，仲有好多好多啱買大大小小東西的店舖。Happy Shopping。 

舊年去札幌時，與家人首次搭過香港航空後便一坐上癮，所以一收到風港航於暑假成功增設往返東京之航線，商務位仲要平過另外一間航空公司o既特選經濟客艙，大肥爸爸諗都唔洗諗即決定選搭香港航空。

多得哥哥再三提點，知悉香港航空o既搭客可以喺中環機場快線站辦理手續，將行李寄艙後，就可輕便地乘坐機鐵直達香港國際機場，同行六十五歲以上o既團友們更可尊享半價優惠，又抵又方便！由於手續簡易，地勤人員效率高，我地又預鬆咗時間，所以全體人員就應邀前往航空公司o既貴賓室「紫荊堂」，享用午膳並稍作休息。

離開出境檢查大堂不遠，藏於地下室o既「紫荊堂」光猛寬敞，接待處o既玻璃趟門印著香港靚景，感覺高雅大方，當真令身為港人o既XO仔十分驕傲。貴賓室面積廣，其中分開有梳化區、向窗獨立座、電腦區、用餐區等，各有各舒適。

我地咁多個人步入「紫荊堂」正門即由多位友善好客o既靚姐姐接待。佢地不但協助各人入座，更會主動講解廳內所提供之設備及餐飲，招呼十分周到！設施中最搞鬼o既必選大廳中央嗰座「住好啲」懷舊磅重機，原來真係郁得架，我地一人玩咗次，玩完仲有張紀念咭仔證明旅行前有幾fat添！

除咗有得玩，貴賓室當然唔少得自助餐區域。既然假期已經開始咗，大家就先向酒品埋手，襯太陽仍在高掛時先飲兩杯輕鬆吓！自選食物中有個唔係咁受歡迎o既凍肉及沙律吧；熱食中蕃薯uncle同小肥一樣最愛咖哩牛腩，蝦餃就一般啦；女士們每人要咗碗即叫即煮o既車仔麵同雲吞湯米粉，大家都話好夠熱，且唔油，都唔錯。最有驚喜就一定係個鮮製雞蛋仔，熱辣香脆，鬆化輕巧，雖然落單後要等成幾個字先有得食，不過絕對值得等！大家要留意，雞蛋仔煮製時間約十五至二十分鐘，供應時間每日限定中午12點至傍晚6點。

同行眾多長輩都係首次乘搭香港航空，其實訂飛時都唔係咁有信心，擔心平野唔會有好野。哈，點知未上機前，淨係喺港航貴賓室「紫荊堂」短短逗留咗四十五分鐘，享用過特色美食酒品、見證過港航優質o既服務之後，竟然足以令眾人放下心頭大石，期待即將展開o既空中旅程！

今次乘坐香港航空前往東京，經旅行社購買商務位，來回機票優惠價為HKD 5,536，除咗可以享用上述所提及到o既貴賓室「紫荊堂」之外，飛機上亦有晚餐提供，餐飲中不乏酒水，暑假旺季黎講真係好抵。

當日香港航空HX610 班機預定下午三點半起飛，用上商務艙以一、二、一排列o既新飛機型號，獨立座位空間足，乾淨企理，十分舒適，上機時長輩們仲每人影咗幅相留念，明顯好滿意。可惜飛行期間冷氣唔多夠，當XO仔想調節冷氣時先發現原來新機冇咗啲手調冷氣風口，咁唯有向空中小姐提出睇吓可唔可以開大啲個冷氣啦，點知佢好抱歉咁話已經開到最大，見到細佬真係滴哂汗，佢都好客氣咁話不如俾杯冰水我幫助降一降溫，態度極之誠懇體貼。

航班飛行時間約四個半鐘頭，起飛後大約一個鐘頭後就有晚飯食，亦即香港時間四點半（東京時間五點半），真係好早，不過搭客有要求絕對可以遲啲食，只係主菜選擇應該會少咗。點選食物時，由於機內室溫對細佬黎講實在過高，小肥就好唔客氣咁要齊冰水同香檳作餐前飲品，主菜就揀食「日式炸雞配蜜糖芥末薑汁配日本飯及季節時菜」。

晚餐由頭盤「日式冷麵」及「烤雞胸片伴菠蘿芒果沙沙」作序。雞胸片容易偏嚡同乾，飛機餐上o既雞胸薄片亦正是如此，幸好個菠蘿芒果沙沙尚算清新醒胃，日式冷麵又夠清涼甜美，成功挽回不少食物分。主菜「日式炸雞配蜜糖芥末薑汁」只可以話係中規中矩，因炸雞皮層過厚，即使雞肉軟嫩都難以補救。

肥肥家族遊日本，坐飛機首選香港航空商務座，因其獨立座椅闊落舒適，機艙服務員態度友善誠懇，而且價廉抵坐，唯一新機空調不足，有待改善。個人覺得港航晚餐質素當真不及其早餐「法式烤多士配鮮忌廉及藍梅醬」（上次食過）出色，建議其實可將如此美味o既「法式烤多士」長期列入餐牌供搭客選擇，成為港航標記後更可當作免費宣傳，可謂雙贏！

「鑽石公主號」郵輪定於橫濱出發，為安全起見，一行十二人早一晚就經已先抵橫濱，喺市中心一家最多團友可以賺取酒店分數o既「橫濱灣喜來登酒店及觀景塔」（Yokohama Bay Sheraton Hotel & Towers）度過一晚夜。

始終人多容易混亂，故XO仔一早已做足功課，了解過由東京成田機場前往酒店o既不同方法，包括的士、巴士、火車等。多得酒店職員Mikami小姐o既提點，並耐心地跟小肥多月來以電郵通訊，團長最終決定以最簡單及便宜o既途徑先搭九十分鐘巴士前往「橫濱城市航空總站」（Yokohama City Air Terminal - YCAT），然後再轉乘的士去酒店。酒店客戶可以4,000円獨享巴士加的士之套票優惠，六十五歲或以上o既長者則可憑護照以半價2,000円購買巴士車票；由於每張套票包咗一架的士，以長者優惠淨買巴士飛o既團友剛好可搭順風的士一齊去酒店，非常順利。

位於市中心o既「橫濱灣喜來登酒店及觀景塔」只需步行五至十分鐘就有購物中心及多間食肆，地點真係好方便。酒店房間同洗手間一樣咁大咁潔淨，各部門o既職員落力有禮，又樂於幫助客人，每間雙人房每晚21,500円絕對住得過！

由於喺飛機上，下午五點前已經食完晚餐，一直到午夜十二點到達酒店都未有再進食，喺巴士上大家已決意安頓好行李後就要馬上外出覓食。手持地圖行出街外，十二人就好求其地行咗入去一家營業至深宵o既「NIJYU-MARU」居酒屋，食到凌晨兩點先返回酒店。

居酒屋佔用面積全層，望落開揚寬廣。食客都係後生一族，全店就只有我地一班外國人。講真服務唔算差，叔叔同姐姐仔都冇話黑面，只係明顯冇平時見慣嗰啲服務生咁殷勤友善，幸好小肥可以勉強用簡單o既日文對答，電子落單又夠簡易，起碼溝通上冇乜大問題。

電子及紙造餐牌均附有彩圖，亦有清楚列明價格，長輩們睇完就講出想食o既菜式飲品，包括小食、刺身、飯麵等等，再交由細佬續一入機點菜。咁多款食物中，小食以大路o既蕃茄（299円）同枝豆（299円）最穩陣，帶子刺身（499円）平得黎亦好合格，炒飯（699円）同櫻花蝦拉麵（499円）都唔錯，最美味必選兩款香脆惹味o既炸雞（399円）及炸雞軟骨（499円），送酒一流！當中其實亦有唔係咁得o既牛肉飯（499円）同炸芝士（399円），不過睇在價錢份上，個人覺得冇野可以投訴囉！

位於downtown的Sears Fine Food, 從外觀上就知道佢有d歷史.
附近有唔少酒店, 入到去坐滿遊客已經心知不妙...
天真以為早餐會有幾難食呀, 就叫左個美式早餐, 果然冇令我失望, 好大份. 心諗我一定食唔晒.
我敢講圖中只有隻蛋比較ok, hash brown太油冇薯仔味, corn beef離奇地咸仲要唔好味,
pancakes質感古怪, 好粉好林, 落埋糖漿十足一疊濕紙巾.
咖啡都唔見得好味, 只有溫度冇咖啡香.

 

為左彌補剛才的不快, 食完早餐就黎飲杯咖啡.
室內樓底勁高, 分2層, 空間感十足! 
我地分別叫左cappuccino同macchiato, 2杯都屬於中上.

 

因為某d原因黎到Santa Cruz已經2點, 睇yelp搵到這間風評不錯而未休息就決定試下.
可能過左午餐時間, 餐廳只有幾枱人.
印象中冇乜食過地中海菜, 望住餐牌都好難聯想到係咩味, 所以求其叫左個沙律,lamb kabob同埋flatbread.  個flatbread好食過naan, 食物調味較濃, 感覺似希臘菜.

Dandelion chocolate 有自己朱古力廠, 由可可豆到朱古力人手製造, cafe仲有咖啡, 曲奇及其他朱古力糕點. 如果想了解多d可以參加佢地的朱古力班或者參觀朱古力廠.

三藩市有2間分店的Dandelion, 係Ferry Building個間較為就腳, 但就要行遠d先有得坐,
而且好多烏蠅飛. 雖然係咁都無阻我一次又一次咁食....真係肥都抵.
我最喜歡佢個 double shot cookie, 朱古力味濃沃, 食落唔苦但有d腻, 要分2次食. 

craftsman & wolves的蛋糕做得頗精緻, 一件件就好似放係寶箱咁, 非常賞心悅目. 
店內的糕點有朱古力都講明用 Valrhona, 講到尾食材很重要. 
曲奇偏脆, 甜度適中, 可以一囗氣食完, 我每次仲有衝動食多塊.
咖啡都好香好誘人, 不會比其他咖啡店差.