12/07/2013  上午仍要返工, 忙到連早餐都唔得閒食;  1:00PM, 與同事食咗個Quick Lunch,  就馬上趕去港澳碼頭會合一眾團友, 然後就搭3:00PM嘅金光飛航到氹仔(澳門船飛係响金光飛航加價前買定嘅, HK$140/張, 有效期至2013年8月31日)。               

4:15PM 到達澳門, 選擇搭銀河Shuttle Bus先到銀河food court 食個下午茶 (今晚會約10:30至到清邁), 因銀河15分鐘就有Shuttle Bus 去機場, 時間較易控制;  其實喺銀河food court慢慢食吓, 去吓手洗間, 都已經差唔多6:00PM, 行去車站搭shuttle bus, 啱啱走咗6:00嘅車, 好心嘅車站員叫我哋十分後至行出嚟, 因等車位置係西斜位;  果然就响6:15PM有架較細嘅旅遊巴駛過嚟,  計埋我哋, 約有15位乘客去機場, 相比去拱北, 真係小毛見大毛吧!

由於塞車, 6:30PM至到機場, 澳門機場真係比香港舊啟德機場細, 但查行李就非常嚴謹, 每件寄倉行李過完X-ray後, 仍要再打開比安檢人員check 多次, 攪到好多乘客都好狼狽,  當然包括我哋啦!不過我哋班FD2953去清邁嘅客機準時在7:55PM起飛, 機上有7成乘客係強國人, 兩成人係港客, 約1成係外國人, 所以整架機都充滿著普通話及開關頭頂行李箱的聲音。

 

Early Bird 呢間民宿真係超溫馨, 超細心, 超體貼。

清邁有好多平靚正嘅民宿，本身已鎖定三間，分別係Baanpordee Guesthouse、Gord Chiang Mai、 Early Bird B&B 及後備就揀咗Lanna House，全部都位於舊城區及有Free WiFi（舊城區無論飲食、購物及交通都較方便，而且亦有好多歷史景點，用雙腳亦可周圍逛）。其實一直想住 Baanpordee ，四間中網上評分最高，位置好，整體係一間溫馨嘅民宿, 有9.3分以上，而佢哋只得5間房，每房有露台，本身有一個花園，冇早餐供應，約200港幣一晚，但可惜佢哋不能加床，所以被刪除了；而Gord 本身條件亦唔錯，網評有8.4分以上，有免費單車提供比住客使用，房間設計時尚及寬敞，床夠大，同Early Bird 一樣價，亦是約250港幣一晚，但佢輸蝕地點比其他三間偏，冇咁方便；Lanna 就四間中最平，約160港幣，早餐是食素，有朋友住過，對其評價唔錯，仲非常推薦，位置近Thapae Gate，出入方便，房間泰式設計，室內設計較深色，不過佢哋亦不能加床，所以有緣冇份喇。所以最後在12月預定咗Early Bird 四晚共3間房再加床一張，訂完後，民宿已full booking。

Early Bird 真係好受歡迎，佢哋嘅網評有8.8分。 其實以上所提的兩間民宿都經常爆滿，如睇中要訂，最少都要半年前，因供應量有限呀！

Early Bird 共有三層，一共有9間房，地下有兩間房，一樓共有四間房，其中一間係雜物房，所以只得三間房提供，二樓就有四間房，而我哋訂了兩間大床房及一間雙床房，其中一大床房喺地下，雖然攞行李較方便，但較嘈，特別係在早上，另外兩間就在一樓，所以相對較寧靜，而且拎行李亦只須行一層，完全冇難度; 講番張床，又大又舒服，床有6尺闊，枕頭高度軟硬適中，好正。房間面積亦夠大，床放中央位置，房間空間感仍非常足夠；浴室面積亦夠大，唯獨燈光實在不夠，有沐浴露及洗頭水，但牙膏牙刷就要自備了。整體房間設備及舒適度係非常滿意，係超值之選。

另有要提醒係一樓5號房的大床有一道一尺闊的圍邊，一不留神會撞到雙腳上5吋下5時的部位，都好痛架。 
 

講完BED, 要講BREAKFAST喇!   真係要比5個LIKE呀! 因為實在太「華麗」喇！

我哋好榮幸住咗四晚，所以有四次早餐享用。 Early Bird 共提供6款不同類嘅早餐，每晚，民宿職員Green同New都會溫馨提示每位客人明早食哪一種早餐，佢哋兩位體貼到暈，細心講解各早餐的材料。

Early Bird 嘅早餐不作外銷, 只供應比每位住客; 而份量方面係好足, 男人都話好夠飽, 而且款款味道都好, 尤其是蘑菇奄列, 個奄列又大又足料, 除蘑菇外, 仲有洋蔥同蕃茄粒, 好味又夠飽呢!

飲品有熱花茶、咖啡、奶茶及椰青，食完仲有每人一大片西瓜，超豐富到午餐都可以延遲食。

15/07/2013  Early Bird 向右行出過對面馬路就係Wat Chedi Luang, 中文名叫柴迪隆寺。  

War Chedi Luang 其實都非常值得參觀，除有歷史價值外，裡面亦加建咗幾棟金碧輝煌嘅寺院，香火鼎盛，就算晚上，仍有好多人入內參拜，燈火通明啊!

 

去完柴迪隆寺, 就行去Super Rich唱錢喇!

由Early Bird行出𨍭左再走出大路，轉右行至燈口位，再𨍭右直行就見到Superrich。

當日價位係3.99，個價都相當靚，而曼谷Big C隔離嘅Superrich 再高一點，係對4，當然唔等到去曼谷啦，就喺處各唱HK$8000。

後記：唱錢時要睇passport, 店員檢查完我嘅passport冇比番我，我亦掛住數錢而忘記咗我嘅護照，直至到第四日玩完Eagle Track 至發現，馬上請Early Bird 嘅New幫忙問Superrich，終於尋回重要物件，真的非常感謝New的幫忙。 

完唱錢返民宿接番D港童，仲見爽條女司機坐响度，阿GREEN話我知原來佢係等我哋，嘩，女司機真有耐性同閒情，香港司機一定會用呢D時間走多兩轉啦!

嚟Warorot Market 主要係買手信，順便感受一下網評所講平靚正嘅地道街巿。

的確冇講錯，呢度賣嘢價錢平，唔太貴，見有遊客都冇開天殺價。開價還價都唔太過份，其實有D貨都標明，實價發售，都冇得購價。

今次買咗較多腰果及夏威夷果仁，大包小包，腰果共4大5小包，果仁就1大4小，共1800B，當然夏威夷果仁較貴價，其實小包都唔細架，送禮都好得體。老闆娘見我買咁多，都主動送多兩包細嘅比我哋，但佢就話講價免問喇! 不過佢賣嘅nuts真係公道嘅，所以老闆娘企硬唔減囉!

朋友亦買咗其他食嘅手信，最抵嘅就係肉鬆米通，20B一大包，內有十至十二塊左右，比泰國其他地方平好多，朋友同我都大出血呢！


買完食嘅，就行去Warorot Market 斜對面嘅箹房買葯膏。朋友受托，幫人買40支痱疺膏同30樽蚊膏，我亦順便買冷及暖按摩膏，掃完貨，睇睇錶，差唔多1：30 喇，大家嘅肚仔自然打鼓啦!

行完Warorot Market, 又買完手信兼成藥, 已差唔多兩點喇, 肚仔餓了!

原本想由Warorot Market行過去，亦問過3位當地人士，佢哋都話約行15至20分鐘，過咗河就得，點知比其中兩個當地人士點錯路，行咗相反方向，唯有揚手搭爽條啦！都係20B一位。

爽條好快就載到我哋去到Duke's，餐廳是走美國路缐， 好美國feel，室內燈光昏暗，初時被安排坐較入位置，仲昏黑，連餐牌都睇唔到，要開手機電筒照明點菜，後來見近門口位置埋單，馬上搬位，有室外光缐照入，先至能睇清楚D菜式。真建議揀近門口位坐，埋邊位得一點燭光，真係好唔慣囉！

講番菜式，我哋樣樣都試吓，但樣樣都好味:

海鮮芝士大薄餅， 超大嘅鉄盤配超大嘅薄餅，我哋揀咗係薄底 ，件件卜卜脆，海鮮芝士非常豐富， 唔漏又唔濟，我哋掃清。

燒豬排骨配薯條，香口肉味濃，薯條薯仔味也濃。

燒牛肉沙律，薄切燒牛肉加新鮮羅馬生菜， 清新之選。

意大利肉丸， 雖然得三粒，但粒粒大大粒，肉質鮮美，配蕃茄汁，絕配。

漢堡包，薯條羅馬生菜作伴碟 ， 漢堡牛肉好juicy,牛肉味重，加上包內的生洋蔥，味道更鮮，可惜包唔夠大，我哋七個人，用刀切只能每人一小口，如一人享用漢堡包，會另有體驗呢!

食完大餐，順便去埋網上人人讃好嘅Love At First Bite食番個甜品。

Love At First Bite其實好近Duke's, 𣎴用過馬路，由Duke's出門轉右，約走數分鐘，見有一小路，路口處有一小招牌，轉入再走多三分鐘，就到終點。 

入到Love At First Bite， 鳥語花香，一片小草地旁，枱唔係太多又唔密，果然係一處High Tea 好地方，可惜蚊太多，所以坐外面嘅，最好就做好防蚊措施。

講番蛋糕, 由於我哋仲好飽, 所以都係叫咗四件蛋糕一齊食, 總括蛋糕出品都唔錯, 不過比較馬拉嘅Secret Receipt, 我會較喜歡後者, 因Love At First Bite 嘅蛋糕出品較甜。

但我就欣賞Love嘅鮮果沙冰, 好爽好清新, 我哋叫咗芒果, 菠蘿, 熱情果, 好正呢!

 

星期六市場顧名思義就係逢星期六嘅夜市, 小攤檔在長長的Wualai Road上一路伸廷.......

 

小食, 小飾物, 小文具, 衣履鞋襪, 通通都可以喺度搵到, 雖然亦有DIY自家製的小品擋攤, 但就冇星期日市場咁種類繁多, 不過有D攤檔喺星期六市場擺完, 星期日市場都仍然會見到佢哋嘅踪影。

我哋喺星期六市場完全冇斬獲, 只係幫襯咗D食檔, 主要係擺買攤檔嘅貨品唔夠特色, 只係一般類似女人街嘅款式, 而飾物文具亦好普通, 真係吸引唔到我哋喺處駛錢買手信囉!

 

行咗粒幾鐘星期六市場, 都買唔到嘢, 肚仔又開始打鼓喇! 於是班港童又到處覓食.....

沿Wualai Road星期六市場一直行至中後段, 右邊另有一幅小地, 入面有上面小狗表演踏單車, 抄粉麵及泰式小食, 仲有零星攤檔, 再走入去就有檔抄雪糕檔, 非常籍得推薦。

檔仔有一幅大banner manu, 清楚說明雪糕配搭, 以及加料價錢等, 所有配搭都可以由自己選擇, 由自已揀料配製雪糕, 正啊!

靚仔年青人應是少東, 由佢負責抄雪糕, 可惜係佢英文唔好, 解釋唔到雪糕嘅材料同醬料配搭比我哋知, 不過好彩有Banner, 有相片睇, 而佢都非常落力抄雪糕, 仲抄得D雪糕好靚添！

抄雪糕, 首先見靚仔將奶昔混合埋我哋所選嘅味道, 然後倒到平板鍋上, 跟住佢起手就抄, 又拉平, 約兩三分鐘, 佢就把雪糕壓成一塊一塊, 再用鏟張D雪糕片捲成小圓桶, 數量剛好全數放入紙杯裡, 最後由老闆娘(應該係靚仔嘅阿媽)加醬及生果餅乾之類嘅配料, 咁就完成咗喇!

味道方面, 我哋各自選咗自己嘅心水, 我所選嘅士多啤梨+芒果, 只加Yogrut, 冇加其他配料, 只係40B, 味道配合得好好, 最正係唔甜又夠凍, 我哋個個行到成身汗, 食咗呢杯雪糕認真爽呀!

雖然喺星期六市場掃咗一輪街，但都係食咗好少嘢，大家都覺得唔充實， 所以在回程時路過一大排檔，就索性喺度再開餐。

基本上，主要嘅檔口都係賣麵食之類，只有一兩檔有飯食。於是就選咗一間較企理同有位坐嘅小麵檔坐低宵夜。

呢檔粉麵處理食物都算衛生，招呼都唔錯，我哋每人各自叫了一碗一餸麵/粉，湯底好似即食麵嘅味道，而麵同粉都入味，麵嘅梘水味就略濃，但可接受，雲吞饀料較差，魚蛋、叉燒及牛肉都幾好，唯一係唔夠喉，好細碗，得兩啖麵，如女士們最少要食兩碗呢! 不過都好，食宵夜唔好咁飽麻。