CN Tower原名為“Canadian National Tower”，後因股權變動關係而改名為“Canada’s National Tower”，但加拿大人普遍都只用簡稱“CN Tower”。據小册子講：自1976年建成後，CN Tower就成為世界紀錄大全中全球最高既塔。不過，經求知慾極強既XO仔上網查證後，發覺有一點小册子係冇提及到既：就係依項世界紀錄已經喺2010年9月被中國有“「小蠻腰」之稱既廣州塔打破左啦！

唔知係咪驚有恐怖襲擊呢，一入門口就要排隊過一個好大風既檢測機，測試睇下我地身上會唔會有炸藥或武器既殘餘物。排隊時有位工作人員幫大家影合照既，遊客離開時可以憑票買相；諗深一層，就算遊客唔攞走幅相，佢地都可以攞黎做記錄bor！喺檢測機內過程長達分幾鐘，頭髮被吹散哂之餘，有耳鳴既媽咪比佢搞到又暈又耳痛，大叫辛苦。過完機，重有位手持電子棒既保安哥哥抽人掃身檢查！計下條數先發現入去CN Tower觀光總共要過三種保安系統，都幾誇張！

契公契婆當日喺CN Tower為我地訂左既午餐（48加幣）已經包埋上塔內既“Look Out” 同 “Glass Floor” 觀光層，不過條件係每人要叫一個主菜。請注意：如果唔食午餐，依兩層“淨睇”既入場費都要成22.99加幣，所以個人覺得食埋個lunch低好多囉!

顧名思義，“Glass Floor” 既賣點係佢用玻璃造成既「地窗」，比冇懼高既朋友們企喺342米高空上感受下。講真嗰句，小弟未行到埋去已經覺得搖搖欲墜，暈暈地；哥哥就犀利啦，企完喺「地窗」上，重可以出埋去露天處吹風添，當真佩服佩服。

至於“Look Out”層呢，雖然有收費望遠鏡，不過點都唔及旋轉餐廳內睇景咁舒適；唔洗同人爭位影相外，旋轉餐廳既景係360度既，而“Look Out”既景只係180度。
（以上既相片全部都係喺餐廳內拍攝既。）