Handsome XO
我是Handsome XO。 我最喜愛到日本旅遊 , 最鍾意遊覽主要地標, 住宿通常會揀4星酒店。
留言  留言給此旅遊家
  遊記數目 101
  上載相片 3422
  上載影片 3
最近分享過的旅程
2018台灣四天美食之旅
國家/地點: 台灣
旅程日期: 2018-11-23 至 2018-11-26
2018美加探親兩週遊
國家/地點: 加拿大, 美國
旅程日期: 2018-03-27 至 2018-04-07
2017京阪神六天遊
國家/地點: 日本
旅程日期: 2017-11-08 至 2017-11-13
2017台灣婚禮三天遊
國家/地點: 台灣
旅程日期: 2017-04-20 至 2017-04-23
2017溫馨家庭大阪四天遊
國家/地點: 日本
旅程日期: 2017-02-23 至 2017-02-26
東京豪食三日兩夜自由行
國家/地點: 日本
旅程日期: 2016-09-09 至 2016-09-11
2016鑽石公主郵輪東瀛遊
國家/地點: 日本, 俄羅斯
旅程日期: 2016-08-30 至 2016-09-09
2015台北怒食三天遊
國家/地點: 台灣
旅程日期: 2015-11-18 至 2015-11-21
2015北海道火車地鐡自遊五天行
國家/地點: 日本
旅程日期: 2015-10-21 至 2015-10-25
布吉島婚宴三天遊
國家/地點: 泰國
旅程日期: 2015-02-11 至 2015-02-13
東京狂食狂購三日遊 (日本)
(旅程日期: 2014-03-07 至 2014-03-09 ,  旅程性質: 飲食購物)
 整個旅程  (共3篇遊記)
 分享至Facebook 
發表日期: 2014-05-30

29日(小雪)

由於早一日落大雪,為怕交通會造成影響及安全理由下,我地結果留咗喺新宿活動,並將原本o既行程計劃順延至翌日,即離開東京前o既一天。嗰日係我地喺東京o既第三日,間中仍然有漂雪,街上積雪頗厚,但已開始溶解,所以地面都幾濕滑,溫度亦較冷;好在團友們都著齊禦寒裝備,靚女姐姐又每人派咗對日本人超人氣o既發熱鞋墊,大家都適應得到

我地當日各自食過早餐後,就乘搭酒店穿梭巴士去小田急百貨公司,會合哥哥位靚女朋友,再由佢帶我地坐地鐡,向銀座一家我地四年前都已經光顧過o既美登利(Midori)壽司專門店出發。食過一頓大家一致裁定為「東京境內最平、最靚、又最o既魚生」,我地就坐的士去女士們指定o既地點濕平(哈哈,小肥都係最近學識「濕平」等同shopping)。

「濕」咗兩個鐘頭左右,手持多袋戰利品o既女士們終於同意係時候食下午茶啦,我地就朝六本木方向進發,去返我地上一次都有幫襯過o既甜品屋Toshi Yoroizuka飲茶食西餅。雖然當日有名廚老闆Yoroizuka先生親自炮製多款甜品,但可能因為食唔到上次食過超正o既蛋蛋梳乎厘啦,肥肥家族都大為失望!各人食下午茶o既時間因店內座位不多及排隊先後次序而有所偏差,故大家就約好食完後,就分別行去鄰近oTokyo Midtown商場一邊行一邊等,之後再集合行去附近o既一間居酒屋度食晚餐。

食飯時講起先知,原來團友們雖然之前都黎過日本玩,不過當晚都係大家第一次行入一家居酒屋進膳!我地十個人當中,有男有女,有老有嫩,食後感想卻一致,覺得「朝日食堂」(居酒屋之名稱)雖則唔係好好坐,但勝在氣氛好,食物質素高,大家都好慶幸小肥有此居酒屋安排,以作我地「東京狂食狂購三日遊」o既終結;見團友們食得咁高興,細佬都覺得好安慰!

季節週末套餐之餐牌
季節週末套餐之餐牌
美登利壽司店綠茶
美登利壽司店綠茶
Mini Kani Miso Salad迷你蟹肉味噌沙律
Mini Kani Miso Salad迷你蟹肉味噌沙律
間八刺身(Kanpachi)
間八刺身(Kanpachi)
旬特選Nigiri(季節週末套餐,2,625日元)
旬特選Nigiri(季節週末套餐,2,625日元)
活車海老壽司,海膽壽司,象拔蚌壽司
活車海老壽司,海膽壽司,象拔蚌壽司
精選金槍魚片拼盤(2,940日元)
精選金槍魚片拼盤(2,940日元)
燒鱈場蟹
燒鱈場蟹

唔知係落雪o既關係,亦或係週末o既關係呢,嗰朝早無論喺街道上,亦或喺地鐡上,人流都少之又少,就連平時門口排長龍o既美登利壽司店都冇人企喺門口,真係有種杳無人煙o既感覺。

雖然街上冇乜人,但係原來壽司店內已經差不多爆滿,嘻嘻,好在咁啱有三張吉枱,剛剛好比我地十一個人坐哂。闊別四年,美登利壽司店外貌同以前一樣,無論係室內裝修枱櫈、餐具等,毫無陳舊feel,衛生依然,而且人氣似乎亦冇減弱,因為我地坐低冇耐,門口已經排滿哂人,走時仲打哂蛇餅添

店舖冇乜改變,不過識講國語o既妹妹仔就唔見咗,溝通變咗主要用日文。食物方面,因季節同上一次唔同,壽司店所推介o既食品及其提供o既精選套餐亦有所不同:

旬特選Nigiri(季節週末套餐,2,625日元):哥哥位靚女朋友極力推介,所以我地三個人叫咗一份黎分。套餐除咗有多款壽司外,每客亦包有一碗美登利獨有o既名菜「迷你蟹肉味噌沙律」(Mini Kani Miso Salad)、一碗迷你燉蛋、豆腐、及醃蘿蔔;當中「迷你蟹肉味噌沙律」真係名不虛傳,蟹肉鮮甜,配上味噌醬同時又覺野味,沙律頓時變得既清新又香濃!美登利絕不吝嗇,套餐o既壽司種類並非平野,更有大拖羅、中拖羅、海膽等貴價貨,只售2,625日元真係抵到爛呀

間八刺身(Kanpachi:靚女姐姐話間八正正係當做期,依段時間食可稱得上最為肥美。間八刺身貌似油甘魚,味道亦頗為相近;個人覺得間八冇咁溜,口感較為爽口彈牙,清麗脫俗,果然冇介紹錯!

精選金槍魚片拼盤(2,940日元):餐牌例明,此拼盤選用「極上」金槍魚,即吞拿魚,握製兩款壽司及一款吞拿魚碎卷,連湯同燉蛋。如相所示,葱花吞拿魚碎卷色澤鮮亮,味道更加係鮮甜香脆;兩款壽司亦不弱,又長又美味,而且魚油充足,超正

燒鱈場蟹:我地一坐埋位,服務生就立刻推介,話今朝早新鮮來貨,但只剩兩客,團友中多位係「蟹痴」,當然係要哂啦!蟹痴們評語為:「蟹肉鮮甜幼嫩,比起香港所食到o既美味得多,最重要係價錢平成三分之二,三個字講哂:平、靚、正!」

肥肥家族已經係第二次黎美登利壽司專門店用膳,雖然兩次所食o既魚生款色不同,不過美登利所選用o既魚材新鮮,提供o既食物全為高質,每次都食得咁開心、咁滿足!就連第一次黎o既兩位靚女auntie都話想臨走前再返黎食多餐呀

推介菜式: 旬特選Nigiri,間八刺身,蟹肉味噌沙律,精選金槍魚片拼盤,燒鱈場蟹,活車海老壽司,海膽壽司,象拔蚌壽司
每人消費: 約3000日圓
評分: 味道5   服務5   環境5   衛生5   抵食5
Mieko Uesako Shop Hiroo(広尾店)
Mieko Uesako Shop Hiroo(広尾店)
Mieko Uesako與其靈感愛犬
Mieko Uesako與其靈感愛犬
Mieko Uesako與其靈感愛犬
Mieko Uesako與其靈感愛犬
沿途之可愛雪人
沿途之可愛雪人

Mieko Uesako係日本名設計師,所設計o既衣物配備大多適合高爾夫球員,其中最為有名o既系列全以狗狗做主題。多年前,媽咪同幾位姨媽們去澳門遊玩,行街時見到此系列o既狗仔T-shirt,覺得其設計可愛,衣物質料高級軟熟,就立即愛上依個品牌。

今次我地出發黎日本前三個月,靚靚媽咪同幾位姨媽已經落定order,要小肥搵出品牌o既銷售處,仲話無論如何都要去Mieko Uesako啱啱新開不到半年o既旗艦店度添!所謂旗艦店原來地方都唔算係好大,不過班女士們都可以逗留成兩個鐘,真係幾誇張;哈,又好在佢地揀咗咁耐,因為到佢地差不多準備比錢o既時候,設計師老闆娘突然帶埋仔仔及其靈感愛犬出現。Uesako女士一啲架子都冇,仲好客氣地同大家影相傾計(由佢仔仔代為翻譯),可以話係我地臨走前o既意外收穫

推介項目: 狗狗系列衣物
參觀時段: 下午
評分: 值得去4  
Toshi Yoroizuka六本木店
Toshi Yoroizuka六本木店
名廚老闆親自下廚
名廚老闆親自下廚
Amuse Bouche
Amuse Bouche
Dessert Ecuardo Chocolat(1,400日元)
Dessert Ecuardo Chocolat(1,400日元)
Tarte Tatin(1,200日元)
Tarte Tatin(1,200日元)
甜品餐牌
甜品餐牌

四年前黎日本睇櫻花時,除咗食過令人回味無窮o既美登利壽司之外,大家亦對Toshi Yoroizuka甜品店oEgg Soufflé念念不忘,故今次重臨東京,各人都想再次品嚐。

甜品屋內外都冇乜改變,地方依然光鮮企理,門口條龍一樣咁長,我地十一個人大約三點半開始排隊,結果要等成大半個鐘先有得續一入座,最後入去o既小肥同姨丈就等足一個鐘添。座位圍繞住o既開放式廚房入面除咗幾位年輕師傅仔外,最令團友們驚喜o既就係見到名廚老闆Toshi Yoroizuka先生企喺中央烹調甜品!比起剛剛巧遇嗰位名設計師老闆娘Uesako女士,Yoroizuka先生態度就較為囂張啦,對於不懂日語溝通o既團友們更加係不偢不睬,不甚友善!

打開餐牌,發現Egg Soufflé唔見咗,當堂唔知食乜好,唯有叫咗一客朱古力口味o既糕點及一客法國名甜品Tarte Tatin同姨丈分:

Amuse Bouche:每位客人上座,姐姐仔隨即送上一杯開心果甜湯作餐前小點。開心果甜湯味道偏苦,食完小肥唔多覺開胃囉!

Dessert Ecuardo Chocolat1,400日元):此乃餐牌中唯一一款朱古力甜品,亦係Yoroizuka先生負責所炮製,味道有少少過甜,但總算香滑。似乎名廚都有失手o既一刻,因為其中二姨丈嗰客朱古力甜品未上枱前,嗰件應該樹立o既香蕉突然倒下,橫訓喺碟上,師傅仔只好硬著頭皮拎返比大廚執手尾;大廚玩咗一輪後,雖然件細咗o既香蕉企返起身,不過大家o既食慾亦相對地減咗一截

Tarte Tatin1,200日元):由蘋果批演變出黎o既法國名甜品Tarte Tatin味道冇朱古力嗰款咁甜咁過火,面層塊蘋果幾清香,不過XO仔就嫌其底層嗰批偏腍,唔夠香脆。

離開甜品屋後,我地團友十一人再會合時,大家都不約而同地批評,雖然有名廚老闆Toshi Yoroizuka先生助陣,代客之道卻不大如前,佢o既新作亦不及四年前oEgg Soufflé美味,下次再黎日本應該無緣再臨
每人消費: 約2000日圓 (下午茶)
評分: 味道2   服務1   環境4   衛生4   抵食1
七彩朱古力夾心Chocorons
七彩朱古力夾心Chocorons
散買西餅及甜點
散買西餅及甜點

女團友們都愛買精品衣物,中肥哥哥卻愛行書店,但小肥就鍾情睇食物;得知XO仔對甜品超感興趣,靚女姐姐就介紹細佬入Midtown商場B1層一間甜點專門店pâtisserie Sadaharu AOKI paris。據說,Aoki(青木)先生係Toshi Yoroizuka先生其中一位徒弟,主要賣法式甜品及西餅,係日本OL近期超人氣商店之一,以店內獨有oChocoron最為聞名!

Pâtisserie Sadaharu AOKI paris店舖光鮮潔亮,陳列企理吸引,服務生亦會主動推介及講解食品,友善好客,行入去o既第一刻已經覺得自己係一位尊貴o既客戶。為咗要了解及認清靚女們o既口味,XO仔當然係好潮地買咗兩盒七彩Chocorons同團友們分啦!店舖擠滿哂人,好在收銀小姐同負責包裝嗰位姐姐仔夠默契,效率高,顧客唔洗等好耐就攪掂。細佬所買oChocoron禮盒為六件裝,每盒3,565日元,保存期例明為21天:

Chocoron Citron:六個唔同口味中以黃色oChocoron Citron最酸,因檸檬味濃,但好在又不失朱古力o既甜味,絕對值得一試

Chocoron Macha:綠色oChocoron Macha抹茶味清香,食落好有法日fushion feel

Chocoron Chocolat:深啡色oChocoron Chocolat朱古力香甜濃郁,但個人覺得酸味嗰幾款更為有特色。

Chocoron Framboise:鮮紅色oChocoron Framboise果味酸甜得黎幾清新,食完有種特如其來o既心花怒放感,係三款酸味chocorons當中最易入口o既一味!

Chocoron Café:淺啡色oChocoron Café甜中帶苦,好似食緊一杯mocha咖啡落肚咁。

Chocoron Cassis:紫紅色oChocoron Cassis酸得黎有種好純好高貴o既感覺,好難用字句黎描繪。

六款中,小肥like哂三種以酸味調製o既黃色Chocoron Citron,鮮紅色Chocoron Framboise及紫紅色Chocoron Cassis,亦在此誠意推介!每盒3,565日元,即約600日元一粒,一啲都唔平,不過香港食唔到,口味獨特,試完一粒後覺得啱feel的話,不妨買黎做手信,一定唔會失禮

推介菜式: Chocorons
評分: 味道5   服務5   環境5   衛生5   抵食5
朝日食堂
朝日食堂
朝日食堂
朝日食堂
朝日食堂日文餐牌
朝日食堂日文餐牌
朝日食堂英語餐牌
朝日食堂英語餐牌
是日推介之火焰Mesaba刺身(480日元)
是日推介之火焰Mesaba刺身(480日元)
是日推介之八爪魚刺身(480日元)
是日推介之八爪魚刺身(480日元)
芝士豆腐(480日元)
芝士豆腐(480日元)
地鶏焼き(1,480日元)
地鶏焼き(1,480日元)

記得讀書時代成日睇日劇,男主角收工後總愛流連居酒屋一邊飲酒煲煙,一邊吹水聯誼。因為團友們黎過日本咁多次都未有一個入過一間居酒屋,小肥亦一即渴望感受一吓居酒屋o既氣氛,所以就特地叫班日藉朋友們推薦一間,等大家可以體驗一翻!

大學同學仔所推介o既「朝日食堂」地點好隱蔽,當日我地雖然有日本地膽靚女姐姐帶路,但係都要喺條街度徘徊咗好耐先搵到間餐室居酒屋就有如日劇中所見,正門為趟門,店舖中央有個吧形開放式廚房,食客可圍繞廚房坐吧櫈,亦可以揀坐旁邊o既卡位散座,我地十個人就只可以坐正門旁o既一張大枱;座位全位高櫈,年長o既食客上座極有難度。食客主要係年輕o既一輩,所以行入黎都會不由自主地望一望我地枱中o既六、七旬長輩

入到居酒屋,小肥就馬上同鬍鬚哥哥以日語打招呼,並先指聲明講團友中只有細佬可用有限o既日語同佢溝通,所以好多時會需要佢多作說明,希望佢多多包含及諒解。鬍鬚哥哥非常客氣地話感激我可以唔洗佢用英語,話其實大家用手語及漢字加以配合應該唔會有太大問題,XO仔即時放鬆咗好多

鬍鬚哥哥真係細心,比餐牌我地睇時不忘送上兩份英文版比大家參考,佢話如果大家第一次黎食,最好就係先揀選佢地用橙色螢光筆油咗嗰幾款食品,因全為店內最人氣之菜式,我地當然係聽取提議,先叫各款人氣佳餚啦!

是日推介之八爪魚刺身(480日元):生食八爪魚唔係好多人啱食,不過入口其實同魷魚刺身相近,爽脆滑溜,個人覺得八爪魚刺身比起熟咗o既八爪魚更為美味,每客只售480日元,認真超值

是日推介之油甘魚刺身(480日元):油甘魚鮮甜、肥美、魚油足,每客有四件,480日元,真係抵食到暈呀!

是日推介之「炙りしめ鯖」,即火焰Mesaba刺身(480日元):即叫即切,鬍鬚哥哥負責喺食客面前即燒;睇住佢以熟練o既手藝邊燒邊加檸檬汁,我地食得真係好過隱!半生熟o既鯖魚肉質爽嫩,皮層香脆,魚味鮮甜,輕輕以檸檬汁點綴,效果非常清新!

人氣推介之「チーズ豆腐」,芝士豆腐(480日元):起初大家對此味芝士豆腐不太感興趣,決定不如先叫一客,有人食過好食先加碼啦;哈,點知,食完一碟唔夠,大家最後加咗兩客!芝士豆腐連麵包上,唔講真係唔係好食得出個碗醬係由芝士同豆腐攪拌而成,只係覺得用黎加上麵包面o既醬滑溜香甜,幾得意。

人氣推介之Avocado Fry,炸牛油果580日元):炸牛油果外層香脆,內層嫩滑,加上伴碟o既吞拿魚芥辣忌廉秘醬食落好野味

茄子餃子580日元):所謂茄子餃子(Nasu Gyoza)原來係我地中國人o既「釀茄子」。據鬍鬚哥哥所講,佢地所煮製o既茄子餃子係先燒後炸,所以做出黎先能夠外皮同內餡都同樣香脆。

人氣推介之芝士春卷580日元):春卷香脆,芝士味香滑濃郁,嘩,原來用芝士黎做炸春卷係咁好食架

人氣推介之「地鶏焼き」,即燒地雞(1,480日元):地雞日語拼音為Jidori,朝日食堂所燒出黎o既地雞毫不肥膩,皮脆肉嫩,肉食者一定要試!

我地其實嗰日仲食咗好多其他小碟,如生牛肉枝豆、雞翼、炸豆腐、炒雜菜等,不過因為我地喺香港都食得到,又唔係話超級特別,所以XO仔決定唔喺度續一介紹啦,如果大家有意試「朝日食堂」,個人會推介以上食品,唔夠先叫其他菜式

「朝日食堂」居酒屋座位雖則唔算太過舒適,但氣氛好,服務佳,而且多款小食都好有特色,最緊要係食材新鮮質高,價錢又勁抵,團友們都食得好滿意!肥肥家族都好慶幸能夠以此初臨居酒屋o既新體驗為我地東京狂食之旅劃上完美o既句號,真係好多謝貴子同學咁好介紹
推介菜式: 八爪魚刺身,油甘魚刺身,炙りしめ鯖,チーズ豆腐,Avocado Fry,茄子餃子,芝士春卷,地鶏焼き
每人消費: 約3270日圓
評分: 味道5   服務5   環境3   衛生5   抵食5
  0 個留言    |  加入你的留言
此遊記的留言
加入留言
如要加入留言, 請先登入