記得哥哥曾經講過，普通買雙程機票點都係抵過買單程機票，所以今次回程我地都係搭返港龍航空。飛機座位兩程都同樣舒適，服務生都好友善，飛機餐雖然冇第一程o既早餐咁恐怖，不過真係好希望港龍可以提升一吓膳食質素囉！

KA 215 航班正常應傍晚六時左右開離布吉島，但當日不知為何飛機遲咗成個鐘頭先出發，結果要成九點先有晚飯食。

餐前小肥同哥哥每人先飲咗杯港龍獨家調製o既「Dragon Sunrise」。雞尾酒主材為新鮮石榴汁及檸檬汁，清新、清涼、又易入口，一個人飲三、四杯絕非難事。

晚餐由頭盤「煙鴨胸伴蜜瓜沙律」食起，煙鴨胸偏凍同硬，蜜瓜淡而無味，極唔啱細佬口味！主菜方面，哥哥叫咗個「泰式紅咖哩豬配白飯」，XO仔怕會好辣，所以就叫咗個「茄醬燴海鮮配意式扁麵、牛油菠菜及甘筍」。茄醬燴海鮮調味酸多過甜，海鮮中o既魷魚又硬又韌，蝦隻唔得爽脆，加上意粉過乾，如果唔係為咗醫肚，恐怕小肥真係有機會要浪費食物。甜品以名牌Häagen-Dazs 雪糕作結尾，都算航空公司有返啲良心。