位於「Queen’s Quay Terminal」嘅「明珠酒樓」樓底唔係好高，但勝在環境優雅，服務佳，最殺食就係窗邊嘅散座可欣賞到「Ontario Lake」（安大略湖）嘅湖景，視覺絕對係一種享受。

中菜廳嘅點心菜式喺美加黎講算係唔錯，但午餐最有水準必選「榨菜肉鬆煎米餅」：

1)      香茜牛肉腸 （中點）：半透光嘅腸粉質感柔軟，香茜牛肉餡心亦嫩滑清香。

2)      干扁四季豆（特點）：四季豆微辣香脆，不過以特點黎睇份量就好似細碟咗啲。

3)      鮮蝦燒賣（中點）：如相所示，燒賣當真用上原隻鮮蝦所製，咬落爽脆香潤，比起香港好多中餐廳都做得更美味。

4)      潮州粉果（中點）：粉果因內含花生，細佬冇食到，不過大肥就嫌個皮粉咗啲。

5)      雪花蝦餃（大點）：蝦餃尚算清香爽甜，無奈餃皮唔夠輕盈，就係差咁嗰少少。

6)      鼎湖上素餃（中點）：上素餃係咁多款點心中最厚皮嘅，而且味道亦最為淡口，不吃也吧。

7)      干蒸牛肉（中點）：又大又圓嘅干蒸牛肉鬆厚香嫩。

契舅父與契舅母自結婚已移居加拿大，極少返港，XO仔都係今次探視先初次認識契舅母，並發現原來佢喺美加飲食界及各大社交網站相當活躍！有食家帶領，方才有幸於古堡「Casa Loma」（卡薩羅馬城堡）內用餐。

旅遊景點有代客泊車服務，收費比停車場貴少少。入夜後嘅堡壘外圍綻放出神秘嘅光芒，一級一級步進高高嘅城門，感覺有氣派極！枱頭一望，即留意到接待處用上雲石作牆，以白色射燈照出扒房「Blueblood Steakhouse」個標誌，型格時尚得很。宏偉嘅城堡樓底極高，吊燈嘅花款有古式嘅亦有新潮嘅，最潮當然係餐廳入面嗰啲啦！

據悉，店子每天爆滿，訂座不易，可能正因如此，服務生總是忙個不停，連耐性都好似差咁啲啲。西餐廳嘅食物餐牌合共有三頁紙，反而多頁電子酒牌就造到成個木盒咁，明顯邊樣最賺錢！堡壘餐廳以牛扒聞名，不過大小雙肥都覺得菜式中最正就係兩味牛肉他他連牛骨髓及生和牛薄片頭盤，而最有睇頭就係鬍鬚叔叔即場煮製嘅甜品：

1)      French Onion Soup – Housemade Croutons, Gruyere (CAD 16)：法式洋蔥湯以鐵碗承載，故熱力十足。洋蔥湯味道鮮濃，最正就係面層入哂味塊芝士，香軟無比，不過一個人飲哂成碗洋蔥湯絕對會好滯，建議可以三、四個人分一碗，咁就可以試多幾款美食。

2)      Wagyu Beef Carpaccio – Truffle Crumb, Pickled Mustard Seeds, Garlic Chips (CAD 32)：生和牛薄片色澤粉嫩，溶於口中，簡單捲入頂面嘅松露碎碎及蒜片足以為靚靚和牛添上香濃惹味，堅掂！

3)      Prime Steak Tartare in Bone Marrow Canoe – Cured Duck Egg, Housemade Pickles, Toasted Sourdough (CAD 26)：混入咗牛骨髓嘅牛肉他他鮮紅潤澤，肉香軟嫩，塗上烘熱嘅包品上黎食可一解膩感。

4)      Jumbo Lump Crab Cake - Dill Aioli (CAD 24)：蟹餅雖炸至金黃，其皮層亦為鬆化，無奈當中嘅蟹肉餡心帶點嚡口，質感唔得幼嫩，加上調味過酸，請恕細佬未能推介。

5)      Crispy Kale - w/ Lemon Aioli (CAD 16)：潮流興食羽衣甘藍，但係小肥都只係食過沙律原味版，總覺得味道有啲苦。。。意外地，黎到新潮堡壘餐廳竟然可以食到香脆輕盈嘅羽衣甘藍薄片，以檸檬蛋黃醬點綴實在清新美味！