為歡迎「鑽石公主」o既旅客，釧路市特意安排免費穿梭巴士往返市中心，每二十分鐘一班，都幾密吓。週五早上，城內車輛不多，十五分鐘唔洗就到站，街道上o既途人全部都係郵輪上o既旅客，感覺都幾荒涼。

「和商市場」離釧路駅只需步行三分鐘，位置十分方便。入口處o既壁報板上貼有商店分佈地圖及彩色o既廣告海報，當中最搶眼嗰三個字就係「勝手丼」，亦即我地個早餐。如果唔想自己動身動手去揀魚材自製魚生飯，館內後方其實有幾近餐館仔一早都已經開咗門，唔食魚生都可以食碗湯麵或冷麵。

市場中央位置擺放有多張餐桌及椅櫈，座位先到先得。場內商店除咗有多款魚鮮海產可選之外，亦有多間售賣海鮮內臟、生果、手信、精品、雜貨等，當中仲有間和服店添，極受外國遊客歡迎。

做好哂資料搜集o既XO仔早一晚已預告親友喺釧路將會先前往「和商市場」，食新鮮魚生飯「勝手丼」做早餐，大家都十分期待。

「勝手丼」（Katte-don）字面上「丼」即「飯」，而「勝手」則可解作為「是但」或「隨便」。據超閃旅遊書記載，話說十多年前喺北海道釧路，有幾個餓著肚子o既窮書生好想食魚生飯，卻因餐廳o既價格過高而轉場去直接同啲魚檔老闆提出要求，希望可以低價購下賣剩o既魚生，然後再去買碗白飯自砌魚生飯。久而久之，魚市場內就越黎越多舖頭散賣白飯同廉價魚生，任客人「勝手」地（即隨意地）揀選魚生放喺白飯上製出「勝手丼」。

場內人群除咗有「鑽石公主」o既搭客之外，本地人都一樣咁多，為免混亂，團長就分配年長o既團友留喺市場中央度霸位，而後生嗰幾個就負責四周購買魚生。

喺「和商市場」內，「勝手丼」個新鮮熱辣o既白飯底好多店舖都有賣，主要分大（300円）、中（200円）、小（150円）三個容量，不過最細嗰碗份量都好多吓，我地十二個人分咗六碗細都覺得叫多咗。眾多魚生店o既店員其實都非常落力地拉客，小肥就遇上其中一家「佐藤商店」入面嗰位超級友善o既肥哥哥，眼見細佬要招呼多位長輩，佢一手就送上大托盤，幫忙擺放已點選咗o既刺身，見到有啲刺身唔多新鮮仲主動抽出換過，真係好老實！得知家人想食靚蟹，佢仲帶埋XO仔過去隔離舖度選購，服務態度誠懇，實在難能可貴。

冇樣睇得黎但就好好味。

買完魚生，小肥就跟住嗰位老實又友善o既肥哥哥行咗去隔離舖搵佢個靚女朋友買蟹。哈，點知睇返啲相，先發現原來蟹店同魚生店同屬「佐藤商店」旗下，唔怪得知大家friend過打band啦！

靚女姐姐極之客套細心，知悉XO仔只懂少少日文，佢就用好簡單o既語句推薦當做o既三款靚蟹，分別為鱈場蟹、松葉蟹及毛蟹。續一報上價後，仲話廚房有專人烹煮及處理鮮蟹o既服務，食用簡易，叫我地唔洗擔心要拆蟹。細佬因敏感問題好少食蟹，但由於同遊o既團友全為蟹痴，埋位報告完畢後就應佢地所求，買咗兩隻松葉蟹同兩隻毛蟹大家分。平均每隻4000円左右o既靚蟹肉質幼嫩清甜，蟹膏鮮美厚潤，食到成班蟹迷lam lam脷，聽到個單價後更大讚超抵正爆添！

環保餐具，相當客氣。

正當一眾蟹迷忙於細嚐靚蟹時，小肥就走咗去買生果俾大家飯後食。多間水果店o既產品其實都離不開提子、柿、梨、蘋果、蜜瓜、桃、西瓜、菠蘿，而且每間o既售價都好畫一，細佬唯有以貎取果，選擇咗喺間門面最光鮮o既「（有）むさしや」（Musashiya）度狂購。

單憑果實之美態及色澤，XO仔買咗兩款同為1000円有四隻o既白桃及黃金桃，前者尚算香腍，不過後者就酸到大肥爸爸不斷高呼「盲眼佬都開眼」，似乎唔單只係人，連果都不可以貎相！

要喺市場入面食西瓜同蜜瓜依啲咁大o既水果真係好有難度，幸好「（有）むさしや」有售已預先切好o既哈蜜瓜件，哈蜜瓜又甜又滑又多汁，食得輕鬆又乾淨，每份380円真係一啲都唔貴。

食完個咁豐盛o既早餐後，大隊就慢慢行返巴士站嗰邊。途中見到巴士站隔離有個蛋形o既玻璃屋，所以就行埋去睇，原來建築物名為長春園「Ever Green Garden」，英文縮寫咁啱就係「EGG」，即「蛋」，真係有趣。

日本旅遊業興旺，每個城市都不乏購買手信o既廣場，而釧路o既手信中心就設喺市中心o既漁人碼頭「釧路フィッシャーマンズワーフMOO」度。同之前個長春園「EGG」（Ever Green Garden）一樣，「MOO」其實係「Marine Our Oasis」（『海は私達の憩いの場』）o既英文縮寫，因同日文o既「霧」同音，剛好就標記著有「霧城」之稱o既釧路。

由於中午前「MOO漁人碼頭」o既啤酒園未開，等待巴士及團友購物o既時候，大家就決定坐低飲杯咖啡。原本諗住唔好行咁遠，就咁幫襯地下其中一家小餐店，無奈吉位唔多，有啲又唔開，正當連團長都覺得有點不知所措時，幸好遇上館內一位懂得講普通話o既靚女大使，多得佢帶路，先識上去樓上一間有景睇o既咖啡屋「ベイカフェ風車」（Bay Café Misuzu）度坐。

分開咗兩邊o既咖啡廳一邊為正常高度o既餐桌散座，另一邊則為高人一等o既吧位。既然十二人都無意點野食，我地就揀坐窗邊兩排面向海o既高櫈，中間嗰行位沿著樓梯升上去，設計令每個位置都可以觀賞到海景，好有諗頭。

返回碼頭時，即見幾位釧路嬸嬸代表拉著橫額歡送「鑽石公主」號o既搭客。郵輪準下午一點半離開釧路港口，從房間o既露台睇完開船後，我地班為食貓就走咗出去同層o既「Trident Grill」度食快餐醫肚。

位於游泳池旁o既「Trident Grill」由相中o既肥叔叔一人主理，只提供熱狗、漢堡包及薯條可選，全為即叫即煮。見咁遲先食晏，小肥一口氣就點哂三味，只係唔要熱狗舊包，點知大廚好客氣地又加返條腸補數。

前幾篇遊記提及過「鑽石公主」郵輪上有幾間要額外俾錢先去得o既主題餐廳，其中一間就係專門食意大利菜o既「Sabatini’s」。

「Sabatini’s」門面光鮮開揚，室內裝修用上羅馬圓柱、水池、石獅子等歐味濃烈o既設計，感覺華麗典雅。大廳左邊有個開放式廚房，埋位一刻已見幾位師傅仔忙碌地搓麵粉，估計將用作焗製麵包或意大利粉。廳內o既散座分佈得都幾開，十二人被安排入座中央兩張大圓枱，每六個人一張都好鬆動。

值得一讚再讚o既就係樓面服務生o既態度。佢地身穿白色制服，儀容端莊，唔同級及唔同性別o既咁多位都一樣好有禮貌同極為好客。Auntie Y唔小心倒瀉紅酒喺身，女經理不但第一時間上前親自幫忙清理，更自動提出會為貴客免費乾洗襯衫，係咪好專業呢？！

「Sabatini’s」入場費每位29美金，另加15%服務費，可任點兩頁主餐牌及兩頁甜品餐牌上o既項目，酒品特飲同橄欖油則另計。幾款麵包均為大廚敬送之小點。細問下得知頭盤份量都幾大，我地就叫咗幾客黎分，主菜同甜品則各自點選。

1)      Herbed & Spicy Focaccia Grissini – 修長o既麵包條香脆少辣，好醒胃。

2)      Rosemary Flatbread with Air-Cured Parma Prosciutto & Marinated Green and Black Olives – 火腿薄餅輕巧香濃，每人一細件，份量啱啱好。

3)      Calamari Fritti, Crisp Fried Baby Squid in a Cone, Lemon Garlic Dip – 以筒杯上o既炸BB魷魚脆巧乾身，點埋另上o既白色檸檬蒜香忌廉醬，效果惹味又清新，個人like爆！

4)      Penne con Brasato di Manzo, Braised Short Rib over Penne, Grana Padano – 意大利餐廳o既意粉果然冇甩拖，長通粉煙韌帶脆，混入肉香潤甜o既牛肉絲，足以發揮簡單美。

5)      Tris d'Aragosta, Lobster Three Ways - Lobster Tail, Lobster Orzotto and Lobster Bisque Sauce – 主菜龍蝦三重奏因視覺效果問題，上枱時必須要連殼上，然後再續一由侍應熟手地即場喺客人面前拆除，其刀法凌厲，直令細佬諗起星爺部「功夫」。白雪雪o既龍蝦肉本身爽脆彈牙，配上燈黃色o既龍蝦汁更能特顯兩者o既鮮濃甜美，互相輝映，美觀又美味！

6)      Espresso Gelato – 甜品特濃咖啡意大利雪糕香濃微甜，食完兩球都唔覺溜。