我地喺海中心時，離遠哥哥已經望到Gibraltar，叫細佬快啲行出露台影塊大石。哥哥真係估唔到上當年地理肥佬o既細佬居然從未聽過Gibraltar依個地方，莫講話其大石o既外型。

落船後，入到去個Cruise Terminal，見到個易拉架海報先知原來2009年嗰屆世界小姐原來黎自Gibraltar，成團人都冇人知，當然係要影返幅相黎證明啦。踏出門口，原本想影一影自己坐緊嗰架Crystal Serenity，點知見到原來有兩首郵輪同一時間泊岸，另外嗰隻係大好多o既Grand Princess，似乎大石Gibraltar都可算係旅遊熱點bor！

上文提到，我地七個人啱啱好包左架私家觀光的士遊Gibraltar。的士司機充當導遊，先講明人頭費Euro 28，滿意就請各位加多少貼示。賣花當然係要讚花香啦，佢不斷提醒大家的士遊有幾超值，因為如果我地選擇乘坐纜車，每位先要坐的士去纜車站，再每人付Euro 14纜車費，坐到中途要去第二個景點就必需步行數十分鐘，而且去到某幾個景點，如St. Michael’s Cave，所有遊客係要額外再比入場費添！

源於希臘神話，Pillars of Hercules其實係指兩條柱，而其中北邊嗰條就係位於Gibraltar，的士遊第一站就係要睇其山上o既紀念碑。

喺紀念碑附近有個牌，講述每年都會有大批鳥群經Gibraltar上空遷徙往返非洲同歐洲。我地六月去，所以見到o既雀鳥都係本地海鷗而並非遷徙中o既鳥群。

Gibraltar依舊大石有多個洞穴，而且暗藏彩色！我地當日瀏覽o既St. Michael’s Cave入面有多條石柱，雖然石上o既顏色大部份都係燈光效果，不過入到去，見到頭頂上尖銳o既石雕同石柱，真係令人嘩然，繼而驚到心跳加速。

山洞中央有多塊資料板，其中一個就解說洞穴內o既所有石雕同石柱都係天然o既，因為當雨水滲入limestone（石灰石）時，兩者會混合成carbonic acid慢慢溶解大石。當中有一條石柱自然跌落，工作人員就切開條柱，打磨後展覽出其貌似樹木年輪o既橫切面。

其他資料板上亦有講述到St. Michael’s Cave以前好多用途，包括維多利亞時代多數用作演奏廳，婚禮場地，決鬥場等，其後亦曾做過西班牙軍隊藏身之所，及第二次世界大戰之急救站等。此外，喺St. Michael’s Cave內曾發現多項歷史古物，如新石器時代（Neolithic）所用o既碗，石洞壁畫，尼安德塔人（Neanderthal）之頭顱等。

講起真係失禮，土生土長o既XO仔好細膽，因為聽見同事及親友經常提及馬騮山啲馬騮唔怕人，仲成日搶人野食，就連書包都唔放過，所以我從未諗過要踏足香港個馬騮山。今次黎到Gibraltar，見馬騮山係當地o既一個主要景點，就連精品店都係以賣馬騮手信為主，而且山上已經企滿遊客，小弟就變身成為清兵，心口掛住個「勇」字，攞埋個相機落車影相。

嘩，啲馬騮仔真係好頑皮，我地一打開車門，有一隻好快就走左上車攞左導遊先生袋野！其實之前喺其他景點度已經見到好多馬騮出沒，知道佢地同香港馬騮一樣唔怕人，不過真係冇諗過佢地會跳上車頂，沖入車輛搶野咁誇張囉！除左調皮o既馬騮仔，山上仲有啲懶洋洋o既肥馬騮喺度曬太陽，亦有幾隻好友善地同遊客玩，真係搞鬼。

據導遊先生所講，依班居住喺Gibraltar o既馬騮差啲死哂，當年都係多得英國軍隊，佢地先可以生存之今，得以繁殖及增長數目。英國人認為大石上一日有馬騮o既存在，Gibraltar一日都會屬於英國統治，所以英國有成隊人負責照顧依群馬騮。除左定時定候餵佢地食野，馬騮山上有個迷你遊樂場，馬騮病左仲可以入住海軍醫院添！

十八世紀打仗時，英國軍隊為抵禦法國及西班牙o既襲擊而建成。隧道入面放有大炮，有保護作用o既mantlet，同埋好多解說隧道歷史，其建造過程o既圖片，文章，資料及模型。

入去隧道前，導遊叔叔叫我地先欣賞隧道外o既風景，並指出西班牙及非洲o既位置。佢叫大家一定要留意西班牙同Gibraltar間o既幾條行車線。行車線連接兩地，而且橫跨Gibraltar International Airport o既機場跑道！行車線大部份時間行車，只係每當有飛機要起飛或降落時先會暫時封閉。

嗰日真係好彩，入隧道前明明行車線都仲係行緊車，而正當我地喺隧道入面睇緊野o既時候，哥哥望出窗外，發覺所有車輛突然被截停，就叫我快啲黎睇飛機降落，小弟先可以成功拍攝到清晰o既相片！

我地個Gibraltar的士一日遊之旅大概下午兩點完結。大家都非常之肚餓，不過Main Dining Room同buffet lunch都完左，所以我地就上左12樓o既Trident Bar度食即叫即燒製o既漢堡包，熱狗，pizza等等。

喺早幾編食評度曾經提到，Crystal Serenity郵輪上有兩間要一早預訂o既主題餐廳。好彩我地個團長有經驗，喺我地未出發前已經一早訂左兩晚，為求每位團友可以食盡餐廳內所有菜式，肥肥家族當然心覺非常感激！

Prego地方冇Main Dining Room咁大，不過可能人少左，氣氛增添左一份優雅感。Prego只接受訂座，門口絕對唔會排隊，客人亦唔需要等位，高級程度可比喻酒店餐廳。

入到去餐廳，發覺有好幾位侍應都好熟口面，經團長解釋先知郵輪上o既工作人員係會周圍調動；我認得嗰兩個原來曾經喺12樓個Lido buffet度見過。雖然佢地要喺不同崗位工作，但完全不失專業！佢地對餐牌上o既食物包括材料，醬汁，肥膩度，都了如指掌，更會提供配酒推介。

Crystal郵輪上o既一切，只會教人驚喜，果真唔會令人失望，當晚o既意大利菜當然亦不例外：

1)      Fitto Misto di Pesce, Crispy Fried Calamari, Shrimp, Bay Scallops, & Oysters with Aioli – 意式炸物拼盤有多款海鮮，如魷魚，蝦，帶子，每樣都細細件，容易食，而且炸得香脆無比，毫不油膩！

2)      Carpaccio of Black Angus Beef with Mustard Sauce & Caravaglio Capers – XO仔係「牛魔王」，最愛就係生食牛肉，日式，韓式，意式都一定會放過！食依道餸為我地帶黎最多驚喜及歡樂，因為我地有位超有創意o既男服務生。我地共有三位食意式生牛肉薄片，哥哥仔先送上一碟砌成花形o既生牛肉，然後就續一問我地需要多少醬油，繼而喺我地面前以不同份量o既橄欖油，醋等喺生牛肉片上劃出別出心裁o既圖案；小弟覺得女士們嗰兩份最可愛。當大家對佢加以讚賞時，佢仲話比我地聽佢其實有個稱號添，名為「Prego Picasso」，其風趣幽默逗得我地團親友哈哈笑。

3)      King Crabmeat Salad, Avacado & Sicilian Orange – 小肥唔鍾意食菜，對沙律都冇乜好感，不過因為依道沙律以蟹肉，牛油果同橙為主，菜o既比例唔多，亦唔會好大塊，食落新鮮清爽，好啱我口味！

4)      Vitello Tonatto "Prego Style", Ahi Tuna Tartar & Pink Roasted Veal Loin, Micro Greens – Prego自創o既吞拿魚伴半生熟之牛仔肉片配搭新穎，卷埋兩種食材同碟上o既醬汁黎食，入口真係可以食出牛肉同魚肉o既鮮味，各有千秋，但同時間又唔會覺得佢地一個搶贏另外嗰個。

5)      Ravioli Ripieni con Pollo, Ravioli Filled w/ Chicken & Kernel Corn on Wild Mushroom Puree & Truffle Spume – 意大利雲吞一客兩件，未食仲以為會好溜，點知出奇地食完仲可以加多兩份甜品！意式雲吞皮較厚，不過好在餡夠料甜且唔溜，所以食後唔會滯，like！

6)      Lemon Sugar Coated Egg White Soufflé with Strawberry Sauce – 此道蛋白梳乎厘乃姐姐仔極力推介之甜品。正當大家都以為姐姐仔準備擺放杯梳乎厘上枱時，佢居然喺食客旁將梳乎厘反轉，倒落隻碟上面，再加上士多啤梨汁，令到口水流哂o既小肥更加期待。蛋白梳乎厘好有特色，亦好香滑，小弟只係略嫌個檸檬糖面過甜。

雖然好似食左好多野，不過食後都覺得個晚餐好light好舒服！