拉斯維加斯成日都有新酒店開幕，今次哥哥揀既Aria都係開左冇耐。因為Aria同幾間喺附近既酒店，包括好出名既Bellagio，係同一個老細開既，所以起既時候特別加建左條免費列車，方便客人通往各「姊妹酒店」。

停車處：

Aria既圓形停車處真係夠哂大，有成三四條lane，的士上落客做個不停；好在人手夠多，而且有系統，先唔會個個塞住哂。要讚既係Ｄ哥哥仔真係好抬得架，而且好有禮貌，有車黎就會自動自覺幫客人手，唔會懶洋洋等運到！

接待處：

酒店接待處都唔弱，counter都有成十個八個，效率絕對高過喺多倫多機場租車嗰Ｄ手指甲都有成三吋長既姐姐仔。我地總共九個人，五間房，經理都好友善地走過黎話可以搵幾個人黎幫我地搞，盡量做到我地唔洗等太耐，咁既服務態度真係好難得。

房間：

睇相都知間房樓面高，又夠闊落，香港有層咁大既樓我都已經心滿意足囉！淨係洗手間都分幾part，認真豪華！連兩張牀都大過人，哥哥話係Queen Size wor！衣櫃，夾萬，雪櫃，電視，應有盡有，而且又大又靚又現代化。喺張牀到都可以調教冷氣，燈光既光暗度，窗簾隙縫既大小等，依Ｄ高科技既操控亦非常簡易。望出窗個夜景都好剎食架，所以留喺間房都係一種享受。如果真係要雞蛋裡挑骨頭呢，只可以話個洗手間欠缺強勁既抽氣。

賭場：

對上一次黎賭城都已經係七年前既事啦。今次真係好似大鄉里出城咁，坐埋去個老虎機到先知道而家原來冇得入銀仔架啦，只可以用紙幣同電腦飛！以前簡單既777機都變哂種，架架機都有Bonus feature，玩完再玩先有機會中大奬。假如中左所謂既小jackpot，玩十次就冇哂架啦。講真嗰句，Ｄ機都好多元化，所以自己每晚玩到三四點都唔想返上房訓。

如果大家都好似我咁，食完飯，行完街，就拉幾個鐘頭機呢，小弟就建議大家入佢個Players Club攞分。因為每攞倒某個分數，你就會有回贈；好似我咁攞倒三千分重有免費buffet食添。

同我一樣係拉斯維加斯fans既婆婆，生前最愛Picasso餐廳，每次去親賭城都必定要去幫襯！為左令嘴刁既細佬有個難忘既生日，哥哥一早安排左喺依間全城最啱XO仔口味既法國餐廳到慶祝。XO可以一邊飲香檳，一邊欣賞Bellagio酒店既「水舞池」表演，一邊影相寫食評，真係high爆！所以借此機會想再一次多謝哂咁錫我既屋企人！

環境：

樓面夠高，所以餐廳面積雖然唔係好大，但係感覺好寬敞。柔和既燈光，牆上既油畫，加上周圍擺放既新鮮花朵，好有氣氛。坐近窗邊既朋友更可欣賞酒店馳名既「水舞池」噴水表演。

服務：

負責我地張枱既係一位比較年長既叔叔。佢非常之有耐性地等我地慢慢諗食乜，完全冇催促過；叫酒既時候亦好專業地提供客觀既意見。見我不停地影餐桌上不同既擺設同餐具時，友善既叔叔更解釋話佢地Ｄ碟共有四個唔同設計，重好客氣地幫我收集哂過黎，然後足一擺放喺我面前比我拍攝添，真係感激！

味道：

當晚既餐牌係好簡單既Prix Fixe，最適合我地依Ｄ大party；每人四個course，價錢都係USD 113，如果比佢配埋酒既就加USD 53。

Poached Oysters, Garnished with Osetra Caviar, Sauce Vermouth：確認左係XO仔愛好之既Kumamoto，所以冇辦法唔叫。非常甜美既Kumamoto，配上魚子醬，同廚師既秘汁，意外地一Ｄ都唔咸，味道好香醇濃郁，非筆墨能形容既完美傑作！食得唔好嘥，環保既XO用麵包點埋剩低既秘汁，mmm…一流！講真四隻真係唔係幾夠口，不過少吃多滋味，多吃可能會好滯。秘汁推介一！

Foie Gras au Torchon, Pineapple and Port Reduction：因為淨食鵝肝會好溜，所以法國餐多數都會用生果伴碟。今次既驚喜不在鵝肝，而係主配菜既菠蘿！媽咪話因為經糖烹調過，過程好似叫Caramelization，所以三角形既菠蘿可以咁甜脆無比，拼埋鵝肝依個組合，既新穎又精彩，大家一定要試！精彩推介二！

Roasted Milk-Fed Veal Chop, Rosemary Potatoes and Au Jus：煮既時間掌握得好好，完全冇過熟，切開真係粉紅色，所以肉質冇老或變嚡，咬落重有肉汁滲出，一Ｄ都唔會乾，掂呀！主菜推介三！

Warm Chocolate Fondant：原本係配Raspberry Ice-cream既，不過佢好好人，聽倒我話怕酸就幫我換左個Vanilla Ice-cream。嘩，連個甜品既外觀都咁有藝術味道，唔怪得知餐廳要用名畫家個名啦，有意思！心太軟果真係流心既，而且夠暖，味道唔會過甜，份量適中，parfait！甜品推介四！

生日版Les Petits Fours：得知小弟生日，餐廳特別安排左份生日版既甜脆美點，真係非常感動！

每位女士走既時候都有份紀念品：原來係餐廳自製既蝴蝶餅。我攞左媽咪嗰盒一邊拉機一邊食；雖然厚左少少，不過都好脆，而且唔會太甜。

今年既生日願望係希望出年生日再返黎慶祝！