雖則話早餐食得豐富啲，質素就不過不失啦。「海洋風味餐廳」晌酒店大堂直入位置，地方都幾大，全部都係圓枱，查實佢係間中餐廳，朝早擺自助餐，其餘時間就提供「墾丁風味餐」，10人一圍又得，兩個人嘅「墾丁雙人風味套餐」都得！

自助早餐裡，食物中西式都有，不過係大路嘢，沙律、烘多士、火腿腸仔、生果、白粥、多款醃菜、醬油豆腐、擔仔麵、幾款熱盤、奶茶咖啡凍橙汁，咁就已經寫晒有咩食喇，所以，款式唔太多，但要食得飽飽相信無問題。不過，諗番起平日趕返工食早餐嘅情景，咁依餐都算叫做嘆架啦，哈哈！

由墾丁大街出發，穿過恆春古城，觀光巴士團嘅第一站就係著名嘅大自然奇觀「出火」，所謂出火係由於地底下自岩層裂縫溢出嘅天然氣燃燒嘅景象，全台只有墾丁依度有，睇旅遊書都知夜晚嚟睇嘅視察效果最正，但跟團就無得揀喇。

更無得揀係遇正打風落雨囉，尋日到步墾丁已經未停過雨，所以晌車上阿導遊小姐已經講定今朝都未必睇到個「出火」會出火，果然，唔只死晒火，仲積水多到變咗個小池塘呀！唯一認証依個奇觀，就只有「池塘」中不斷湧出嘅微弱氣泡囉！

所以，我手揸本旅遊書「第一次自遊行Easy Go!墾丁南台灣P.42」（誇版生活出版）對出火寫過段咁嘅介紹：「從地上冒出的火焰就算在雨天時也不會熄滅，當地的朋友說，就連颱風也撲不掉哩！」，基本上都唔太信架喇，而依次嘅親身經歷可以敢講，佢都係吹水囉。

港口吊橋近在茶山，又叫「茶山吊橋」，港口吊橋停車場附近都有啲賣茶葉嘅鋪頭。白色橋墩，紅色鋼索嘅大橋，係日治時代嘅產物，紅白對襯，非常搶眼。橋嘅另一邊係個私人椰子園，行到橋尾都可以望到。而行到橋中，望出去嘅大海就係太平洋，一望無際呀，只可惜今日天氣差，一空都係灰濛濛，大剎風景！

據聞風吹砂係南台灣超出名嘅景點，因為景觀獨特，砂河、砂瀑、砂丘…等珍貴風蝕地形景觀，成因係源於東北季候風將沙粒沿山坡吹向崖頂，沙粒積晌內位形成砂瀑，一片沙漠風情！

聽落好似幾正，親身去到睇一睇，沙漠風情就無喇，荒漠一片就幾貼切，因為一片「沙漠」唔係好大，一啲壯觀感都無，而且雜草叢生，成個灘啡啡綠綠，除咗有啲砂丘，真係好難幻想到佢仲有砂河同砂瀑，更感受唔到佢係一大片沙漠，覺得個景係「吹水」多過吹砂囉！或者，真係需要遇到有番咁上下強嘅東北季候，先至有啲野睇。

因為跟巴士團關係，鵝鑾鼻公園已經係我哋晌台灣最南嘅「最南點」，但實際上墾丁就真係有個叫「最南點」嘅景點，巴士行程無安排去啫，佢就名正言順台灣嘅最南點喇，依家，我哋唯有睇住個A貨先啦。

導遊介紹，問知唔知點解叫「鵝鑾鼻」，佢話曾經有人以為同奧運有關，「鵝鑾鼻」係Olympic嘅譯音，哈哈，美麗嘅誤會。「鵝鑾」係台灣某少數民族話，意思係「帆」，因為附近有塊出名嘅船帆石，故取其名；而依度形態如突鼻，所以就叫做「鵝鑾鼻」。

因為鵝鑾鼻公園唔算好大，當中又分咗幾條步道，長短隨意，就好似嚟個小遠足咁！一入園，好多草地，又種咗好多熱帶植物，好有東南亞風情。沿主步道走上啲，好快見到燈塔，一抹全白，晌今日灰濛濛嘅天色，燈塔就更突出。站在高地，又可以見到太平洋嘅景色，好靚廣闊嘅海景，係可惜在無蔚藍嘅天空幫吓手襯托。燈塔內又有個小型博物館，介紹吓鵝鑾鼻燈塔嘅歷史，以及曾以此為主題所發行過嘅郵票，及一啲燈塔模型。假如想「拎走」個燈塔，旁邊嘅特產店就有好多燈塔嘅手信，例如用砂石貝殼砌嘅燈塔、名信片、木刻書簽……等。真係值得花一、兩小時嚟行吓！仲有，好鍾意鵝鑾鼻介紹牌對下嘅幾句小語：「除了足跡，什麼都不留；除了攝影，什麼都不取。」到大自然地方旅遊應有嘅心態！

砂島沙灘係墾丁國家公園中面積最細嘅生態保護區，亦係台灣僅有嘅一處沙灘，仲係未經墾丁國家公園管理處許可不得進入嘅地方。貝殼砂係墾丁國家公園內各沙灘中嘅主要組成物質，貝殼、珊瑚等長期受海浪沖刷、研磨所造成嘅細砂堆積晌灣內，依啲細砂就叫做貝殼砂，如果透過放大鏡下觀察，粒粒晶瑩剔透、色澤亮麗。而砂島沙灘含貝殼砂量高達98%，而帆船石附近嘅沙灘都有近70%，風吹砂就47%左右……

咁點算？好彩晌砂島沙灘旁有個「貝類砂展示館」，對外開放介紹砂島生態，主要介紹吓砂島地形、貝殼砂成因及展示吓各灘含貝殼砂量、利用顯微鏡、放大鏡對貝殼砂更細微嘅觀察，仲有一個小型貝殼砂池，等遊客可以摸一摸，睇一睇。由於展示館地方唔大，唔晒花太多時間就遊完，資訊都幾全面，都值得一遊！

雖然唔可以落灘，但展示館對海一邊，設有一個觀景平台，等大家都可以觀賞到全長約220M砂島沙灘全貌及海天一色嘅景緻，感覺幾令人舒暢！

船帆石，顧名思義，都唔使點解釋，船帆石高18M，不過，小弟近望定遠眺，都唔係話好似即將開動嘅帆船咁，俾2星佢，都係因為晌船帆石附近有一列民宿，外觀設計幾特別，各間都別出心裁。順帶一提，離船帆石唔遠嘅船帆石沙灘，有好多水上活動玩！

之前晌台南嘅周氐蝦捲試過虱目魚丸湯，今次，啱啱落雨落到澎澎聲，與其齋等雨停，不如邊食邊等，所以就入咗對面嘅「台南無刺虱目魚專賣店」。因為依餐當食晏，所以點多少少嘢，一共叫咗4樣嘢，盛惠TWD135，真抵食！

其實間嘢都算幾多選擇，有虱目魚、蚵仔、焢肉、肉燥，又有唔同煮法，就算虱目魚，亦有唔同部位，如虱目魚肚、虱目魚皮、虱目魚丸、虱目魚頭……等，加埋少少小食類，都OK喎。

大焢肉飯TWD40
第一次見焢肉，所以點個試試，焢肉其實係滷五花腩，就好似扣肉嘅厚切版。五花腩肉質夠晒腍，肥少少就一定，但好入味，配幾株滷筍干，白飯溝埋滷水汁，好味喎。

白滷菜TWD20
紹菜煮到爛咁滯，厚獻汁，味道係唔錯，不過質感麻麻！

滷蛋TWD10隻
睇色水就知滷得入味，直頭滷到入蛋黃，雖然咬落比較硬身啲，但係味道才是賣點。

虱目魚條粥TWD55
一如以往，虱目魚本身無乜味，靠湯頭，依度都叫OK啦，而所謂粥，其實係類似潮州粥或湯飯一類。

古城自清光緒年間建成，都成百多年歷史，係國家二級古蹟，依家保留得比較完整嘅都係四個城門，同埋二大截城牆（中正路去到北門，再去到東門，至恆春國中完）。雖然天氣唔多好，細雨濛濛下，但我又幾鍾意恆春古城l喎，城門悠悠，環境寧靜，民風古樸，幾有種小鎮風情。雖然曾因電影「海角七號」掀起過一陣熱潮，但依刻又未有破壞小鎮安寧。

恆春古城確實幾好行，一東一西，一南一北，處處都有4個城門路標指示，無地圖都唔慌走失。除咗城門景點，其次，主通道嘅中正路，及隔離有恆春老街之稱嘅中山路，組成咗恆春古城魅力商圈，已包晒恆春大部份嘅特色餐飲、各種小食、伴手禮店鋪，非常方便！

題外話，恆春原名「瑯嶠」，話說清同治年間，日本派大軍侵略，沈葆楨奏請朝廷晌度築牆註兵，佢見依度四季如春，就改名「恆春」。

依間小店，係其他港客介紹，老闆小杜，花兩年研究做包子，中式包做基礎，不過同我哋飲茶食開嘅叉燒包唔同，佢啲包身應近似奶皇包一類，表面比較光滑，包肉唔太厚，同樣成個包鬆軟唔黐牙，而餡料有中又有西，有成10款選擇！同老婆各揀一款，坐晌店門口外嘅小凳，趁熱快嘆。

洋蔥烤肉包TWD40
包內夾有大量洋蔥炒豬肉絲，食落好濃郁胡椒香，而洋蔥鮮甜，確實豬肉絲比正常厚身，叫做有咬口，但感覺比較粗疏。

起司包TWD35
餡料就係得芝士一樣咁簡單，一定要趁熱即食，一咬開包身，連包帶芝士一扯，即時拉起幼幼長長嘅芝士，而芝士味濃香，真係好正。

仲見有一款麻糬泡芙包，個名睇落好神奇，望吓張樣辦相，真係包裡面係個芙包，芙包裡面係麻糬，麻糬帶有濃濃奶香，雖然無試，但幻想吓個包都覺得好搞嘢。

墾丁大街叫得做「恆春的不夜天」，相信絕非浪得虛名，之前一晚因天雨，墾丁大街著實過静，開嘅鋪唔多，遊客都少。今日唔同喇，除咗朝早，中午落過雨，跟住都收晒，所以，一入夜墾丁大街燈火通明，有賣各種手工藝品嘅特色小店，亦有各樣街頭小食，更有鬧哄哄嘈嘈貢嘅Pub，唔少得仲有不同國家菜系嘅餐廳。錯失第一晚，依晚定位清晰，就係「掃街」。

「無字頭」烤魷魚
晌墾丁大街，依類烤魷魚小販隨處見，由街頭行到街尾，印象中都已經見過4檔，TWD100有3支，質素我估相差無幾。依檔睇落啲魷魚比較大隻，所以揀佢，有辣有唔辣，燒得香口又柔軟，可以成支揸住食，又可以叫老細剪件袋住食！

「墾丁阿勝」烤珍珠玉米
燒粟米好似得佢一檔，一條條粟米有保鮮紙包好唔會食晒塵，放晌檔前隨你揀，揀好俾阿勝拆袋放入自動烤爐燒，味道有沙茶或牛奶花生醬，每支只賣TWD40。試咗前者，粟米燒得香，外層卜卜脆，沙茶又係惹味嘢，正！

「扛棒」醬烤雞排
炸雞排係台灣小食界係名物之一，今晚都要試一試。雖然「扛棒」以醬烤為名，但實際佢都係炸一炸，再放上爐烤，搽上醬汁，再灑芝麻即成。味道有5款：扛棒蜜汁醬、美國黑胡椒醬、韓國辣醬、泰式酸辣醬、原味椒鹽粉，一律TWD60件。我哋揀咗人氣王嘅蜜汁醬，大大塊雞排為方便食用，已斬好一件件，雞排做到外脆內嫩，肉汁豐盈，蜜汁醬嗒落唔會過甜，添幾分蜜糖香。

「青家」果汁吧
食咗好幾樣燒烤油炸嘢，要降降溫先，搵嚟「青家」，無他嘅，一來老闆娘人靚聲甜，溫柔聲線唔刺耳，反而晌嘈雜嘅墾丁大街有另一種吸引力，二來佢個檔口光猛之餘，仲「十幾杯」蔬果曬晒冷咁擺晌度，確係有啲睇頭。叫咗兩杯，我要香蕉牛奶TWD50，太太要紫蘇梅茶TWD30，杯杯都係700ml，非常抵飲，而且真材實料，睇住佢整，味道濃郁，飲完一杯，爽晒！

跟住再掃，係度唔多講，實在好多嘢食。比起晌台北或高雄嘅夜市，依度好行啲，雖然小店、貝販係晌街兩旁，第一墾丁大街都幾闊落，其次，入夜行車唔多，所以無咁逼！