因為要坐長途巴士去羅平縣，所以沒有刻意安排景點，一來唔想同行隊友太辛苦，二來無旅遊網可以訂羅平縣嘅酒店，甚至ctrip都無，之前晌其他網站搵到啲羅平縣酒店資料，點知全部都流嘅，一係打唔通，一係就話自己唔係酒店，唉！所以，依日行程有啲見步行步，去到當地先算！

今朝，先晌酒店斜對面嘅小店食菜肉煎包同蒸包做早餐，跟住輕鬆收拾行裝去東部汽車客運站，由昆明坐大巴要3.5hr先到羅平縣，RMB65位，全程高速公路，幾穩定。當進入羅平縣範圍，初初開始見到零星嘅油菜花田，跟住再見到一大幅一大幅油菜花田，高速咁駛過，已經覺得幾靚！

2:30pm到咗羅平縣縣城，羅雄鎮，第一件事搵酒店落腳先啦，搵咗幾間，卒之搵咗間距離羅平汽車站唔遠嘅羅平大酒店，佢自己標三星，我哋就覺得二星差唔多，三人房RMB268一晚，唔包早，上房睇過叫做住得吓，反正預咗晌羅平都係住得麻麻，而且都係兩晚，所以就扑鎚成交！

一搞掂好啲行李，準備出發去玩，經酒店介紹咗個包車師傅，毛師傅，大家咁上下年紀，啱傾，又幾好人。因為都已經成3:30pm，唔可以去得太遠，所以只去另一邊嘅牛街螺絲田睇油菜花，車程半個鐘。

離開縣中心，向著田間出發，已見到周山周田都係油菜花，多都你唔信，晌北海道富良野睇著名七色花海，都只係用一大遍嚟形容，而依度嘅油菜花田，真係漫山遍野，睇唔到盡頭，啲油菜花又越過高山又越過谷，毛師傅話今年油菜花開得好，二月尾開始開花（花期約42日），全縣開咗成四十萬畂，四十萬畂有幾多？我都真係唔知！總之去到邊，就見到邊！

晌高位睇完牛街螺絲田睇油菜花，就落咗去下面螺絲田睇，再入去田裡面睇，總之你想點睇，毛師傅都唔介意車我哋落去睇。所以，都搞到成五點幾先返番去縣城！

第一次嚟羅平，都唔知有咩好嘢食，旅遊書都無乜好介紹，所以搵咗毛師傅介紹，佢知我哋廣東人，偏清淡，唔嗜辣，所以介紹咗一間食竹笙雞鍋嘅小店俾我哋，果然好食啱口味！食完，再夜遊縣城，其實縣城主城區本身唔係好大，最旺嘅都係得條振興街，長度大概係太子行去旺角咁大把。所以，所謂夜遊縣城，其實係去當地超市逛吓，了解當地物價，買吓生果食，順路行返酒店啫！