早上十一點半前，酒店為我地預訂o既巴士已經喺門口等緊我地。帶上白色手套o既司機叔叔非常有禮地向我地十個人鞠躬問好，並為我地續一安放好共二十多件行李上車。見司機叔叔以英語同我地對答頗有困難，XO仔就自薦同佢以簡單o既日語溝通，仲乘機坐上車頭；得悉唔洗講太多英文，叔叔當堂輕鬆哂，其感激之情亦全寫於面上，更一邊開車，一邊向我地介紹沿途o既不同地標。我地當日架巴士由酒店出發，到橫濱「大さん」橋郵輪碼頭，只係遇上輕微o既擠塞，全程都係個幾鐘頭，收費為35,000日元+ 900日元稅，一切順順利利，團友們都覺得價錢合理！

我地架巴士一到達橫濱「大さん橋」郵輪碼頭o既落客區，已經有幾位臉帶笑容o既哥哥姐姐帶埋推車黎迎接我地，並幫忙搬運又大又細o既行李，其中有兩位更可用流利o既國語溝通，團友們都覺得深受歡迎！不收小費o既服務生不但帶領客人辦理手續，而且仲一直陪同客人，直到Crystal收妥所有行李為止，服務細心周到。

「大さん橋」碼頭圍繞住大堂有幾間商店，中央設有服務中心，旅客可免費索取不同資料，如不同巴士路線之詳情，購物指南，地圖，postcards，旅遊wifi咭等，所有工作人員除咗友善，亦好樂於助人。碼頭上層為觀光層，遊客可24小時觀看橫濱海岸景色；嘻嘻，小肥同哥哥都有走上去玩，仲拍下多張相片，細佬覺得最靚都係郵輪Crystal Serenity張夜照。

橫濱市政府非常好客，特別喺「大さん橋」碼頭提供免費穿梭巴士服務，由早上八點半到傍晚六點半，接送郵輪搭客來回橫濱市中心；車程約二十分鐘，每半個鐘頭一班。最感動就係橫濱市政府更派人駐守橫濱市中心及「大さん橋」碼頭兩個站作嚮導。

闊別兩年，Crystal Dining Room依然高雅潔亮，豪華舒適，而且仍不失嗰種好似置身於屋企o既溫暖感。肥肥家族對Crystal郵輪其中一個最深刻o既印象就係其超級和藹可親、幽默灰諧o既船員，尤其係餐廳入面o既各級人員，即我地所感受到o既溫暖感之泉源。今次我地十個人被分成兩長枱，每張枱都有兩位服務生，即係話我地共有四位；佢地分別係名網球星祖高域o既同鄉Zoran，英國代表Lloyd，來自Croatia的Angela 及Zdravko。因為幾位姨媽姨丈們將於數月後前往Croatia觀光旅遊，得悉Angela，Zdravko及Zoran母語同為Serbo-Croatian時，XO仔就好學地叫佢地每日教一兩句常用o既字句，好等姨媽姨丈們去到Croatia都可以對答兩嘴（真係用心良苦！）；三位老師二話不說就開始授徒，第一課為 “Dobar Dan”，即「午安」！

Crystal Serenity上o既膳食出名質高又美味，兩年前喺歐洲同兩年後喺日本，水準仍能保持高超，真係難得：

廚師推介之“Ebi Mayo” – Japanese Style Fried Shrimp Tossed in a Creamy Honey Sauce： 炸蝦細細隻，一口一隻易入口，外層o既炸皮香脆，內層o既蝦肉爽口彈牙，配上甜甜o既忌廉蜜糖醬更覺香甜野味！

廚師推介之Cream of Zucchini with Parsley-Lemon Pesto & Whole Wheat Croutons：忌廉湯一啲都唔溜，味道又唔會話好齋，當中o既香草檸檬味輕輕刺激味蕾，飲落幾醒神！

Spaghetti Pasta – Bolognese Sauce & Parmesan：記得Crystal每日都會烹調出不同款色o既意大利粉，當日o既肉醬意粉其實係小肥由細到大都好鍾意食o既其中一款，當然係唔會錯過啦！意粉彈牙，肉醬味香甜又夠肉，食得細佬好滿足。

Ice-Cream Sundae "Mint Julip" - Mint Chocolate Chip Ice-cream：自從驗出有脂肪肝，XO仔已經停咗冇食雪糕，不過既然自己放緊假，理應放開懷抱，盡情享受，所以就決定比自己任性一次，喺Crystal郵輪上大喝大吃！小肥最愛吃薄荷朱古力脆脆雪糕，仲要加忌廉，清新香甜滑溜，正呀！

今次Crystal Serenity東瀛遊每間附陽台廂房原價每位為USD 15,490，因為我地於推廣期內購票，除咗可即享買一送一之外，更可額外慳USD 1,000！此外，所有舊搭客亦可享有Crystal家族折扣，如於出發前指定日期內全數付清又再加奬賞，結果我地每人大約比咗USD 6,000，船上o既所有食物，酒水，服務費等全包，同我地去歐洲時差不多，不過旅程最抵就係唔洗買機票返香港，因為郵輪o既終站就係香港！

仔亦深感安慰！

因為我地會喺横濱停留兩日，上船當日食完午餐又只剩餘兩個多小時活動時間，所以團友們都同意先坐橫濱市政府所提供免費穿梭巴士服務，到横濱市中心o既Sogo行街，第二日先到其他景點暢遊。

同兩年前遊歐洲時一樣，上船第一個晚餐名為“Bon Voyage Dinner”，用o既同樣都係嗰套橙色o既Bon Voyage餐具，感覺一啲都唔陌生，環境格調仍依舊高雅舒適。唯一不同之處就係親切o既服務生同時化身成為語文老師，每次見面都會有新課題，每餐最少會教XO仔一個新語句，當晚就學咗句“Dobar Vecher”，即“Good Evening”。

如上文提到，我地喺Crystal Serenity郵輪上o既所有膳食餐飲都已經係比哂錢，就連小費都包埋，所以小肥點食物時都唔會話特別留力，不過第一晚可以話係整個旅程中最保守o既一日啦，因為頭盤、主菜、甜品都只係各選一：

Today’s Drink Special - “Rising Sun”（Gordon’s Gin, Orange Curacao, Angostura Bitters, Fresh Orange Juice, Fresh Lemon Sour & Soda Water）：以橙汁為主材o既雞尾酒外表猶如太陽升起時那麼橙黃艷麗，而味道亦如陽光般清新醒神，個名真係改得非常貼切！

廚師推介之Crab Chowder – Sweet Corn, Butternut Squash & Peas：蟹肉同粟米乃crab chowder之精髓，兩者香甜濃郁，無得彈！

Pork “Tonkatsu” – Panko Crusted, Crisp Fried Pork Cutlet, Traditional Garnish, Japanese Rice & Tonkatsu Sauce：小肥喺Crystal Dining Room食過咁多餐真係從未投訴過食物唔好食，不過今次真係對個炸豬扒有少少失望！雖然豬扒夠薄，但係就一啲肥都冇，故此肉質偏乾偏嚡，整體唔夠鬆化。

廚師推介之Nougatine – Nougat Mousse w/ Simple Vanilla Yogurt：Nougatine外層為薄薄o既朱古力脆，內層為香滑o既nougat mousse，配上簡單o既雲尼拿乳酪，可令本身頗甜o既nougat mousse更加易入口，感覺冇咁溜。

年輕旅人的住宿天堂