今天第一天到新加坡，第一站就去機場terminal 3 的亞坤咖央食多士。

今日主要行小印度同回教寺。第一站係食早餐，我地去左好出名o既zam zam restaurant。聽講餐廳有中場休息時間，所以我地趕住去，怕到時打烊食唔到。(點知原來過左中午12點都唔休息。)我地叫左最出名o既雞肉印度餅，中文唔知叫咩名，英文名叫egg prata with chicken。另外，我地叫左個牛肉飯。兩樣都係咖喱，而牛肉飯比較辣。兩樣都好好食，最後仲叫左一杯拉茶。拉茶比香港o既奶茶甜，但係真係好滑！

食飽飽，我地行去回教寺，同埋附近o既哈芝巷、武吉士街。行到攰，就搭車去小印度，諗住去食巫都餐廳咖喱魚頭，但係我地仲未落格，所以放棄左。

跟住，我地行行下，就行左去公屋地下一間好出名o既叻沙店，叫結霜橋叻沙。呢個名好特別，新加坡根本唔會結霜，偏偏店名叫結霜橋！


叻沙真係好好食，師蚶好新鮮，已退休的創辦人黃有寶親手煮米粉俾我食，我真幸運！ 

晚上，我約左朋友去金沙睇show，晚餐喺food court搞掂，然後返酒店休息！ 

今日主要喺牛車水同city hall遊覽。我地首先去左酒店附近孫中山南洋紀念館參觀，然後去牛車水附近亞坤總店食早餐，再去牛車水原貌館，跟住去集郵館，晚餐喺松發肉骨茶解決！

孫中山南洋紀念館內展覽一批文物，記載孫中山先生喺新加坡搞中國革命，推翻滿清政府o既經過，都好值得去。

參觀後，我地就搭地鐵去牛車水。我地喺直落亞逸站落車，點知有意外收穫，因為我地一出站就見到一間廟，名叫福德祠。原來呢度以前係沿海，起間廟為左集中照應遠渡南洋搵食o既華人，宜家間廟仲喺度，後半部份成為酒店，政府喺保育方面幾花心思！

參觀完福德祠，隔離街已經係亞坤總店。今次叫左多士、凍咖啡同埋水蛋！

食完亞坤充滿電，仲買埋手信：亞坤曲奇！跟住就出發去牛車水原貌館。牛車水原貌館入場費差不多要10蚊坡紙，都幾貴，不過老婆話物超所值。原貌館樓高3層，展出左大部份以前新加坡華人o既生活。裏面有板間房， 每間房都有特色，好似尾房就係醫生診症，跟住有d係織布，有d係倒夜香。地下展出廚房同廁所，竟然係相鄰，衛生情況可想而知，我地宜家實在幸福好多。總括今次參觀，收穫豐富！

參觀完牛車水原貌館，就去左牛車水大廈食雪花飛紅豆粟米。呢間店又係本土味其中一個推介，節目果然無介紹錯。紅豆好淋、粟米好甜，正！

食飽之後，我地就搭地鐵去city hall，諗住去集郵館參觀，點知落車行錯方向，行左成個鐘，勁攰！終於到左集郵館，裏面有好多關於郵票展品，最吸引我o既係由香港贈送o既女皇標誌郵筒，極具歷史價值！此外，亦有互動展覽，適合一家大小黎睇！最後，我仲買左個紀念幣，帶返香港送俾屋企人！

晚上，我地行返去克拉碼頭附近o既松發肉骨茶食晚飯，好彩時間尚早(大約6點半)，唔洗排隊！

食完晚飯，去超市買埋手信，就返酒店啦！ 

今日，我同朋友一齊去新加坡動物園。聽講入面有好多動物，除左有獅子老虎外，仲有袋鼠、北極熊等。我滿心期待，點知裏面大部份動物都係被困在籠裏，而且好有距離感，很難影到佢地。可能天氣又熱，動物都唔想點郁，實在令我有點失望。

行動物園行左大半日，跟住我地搭車出返黎烏節路，朋友終於試到佢一直好想食o既麵包夾雪糕，佢仲一連食左兩件！行完烏節路，我地就搭車去魚尾獅像。

晚上，我地喺克拉碼頭河岸食海鮮。由於我同朋友對去邊度食蟹達唔到共識，因此，我地喺河岸求其揀左一間海鮮店，結果都令我喜出望外！

老實講，自從中學畢業之後，我地都好少坐低傾偈傾左咁耐，由黃昏河景傾到夜景，又欣賞埋金沙燈光show (局部)。今次能夠同朋友一齊去玩，實在好難得！食完晚飯，我地分別返去自己o既酒店，去到地鐵站要分別時，實在好唔捨得！

今晚返到酒店後，就執好行李，因為明天要晨咁早去到機場搭飛機。 

今日係食得最少美食o既一日，因為我地要搭早上7點航班離開新加坡。我地4點喺酒店搭德士去機場，寄左行李後，我地遊覽最後一個景點--機場。

機場內有一棵social tree，任何人可以去玩自拍，然後可以選擇將相片放上樹頂，俾公眾欣賞，亦可以send返去自己個電郵作為留念。我兩樣都做齊！此外，機場亦展示左好多鬱金香同其他植物。好彩我地預留時間喺機場咋，否則一定會後悔。

最後，我地喺terminal 2攞埋一早預訂o既斑蘭蛋糕就上機啦！

再見，新加坡！