早一日已經喺「Ishiya Café」食過人氣早餐超厚班戟，再一次黎目標亦定好為名甜品「白い恋人蛋卷」，由於對餐店環境都好熟識，所以一到步即上前落單並揀好個靚位坐。

「白い恋人蛋卷」單售594円，如果連飲品叫個「白いロールケーキドリンクセット」（譯：Shiroi Roll Cake Drink Set）套餐則為800円，因曾經聽講過咖啡有助消脂，小肥當然係揀有咖啡飲o既套餐啦！

由於抵達日本當日由新千歲機場乘搭JR列車到札幌時，無論係購買指定席車票或找尋月台都一樣咁簡易方便，所以離開札幌嗰日，小肥就大安旨意諗住朝早買飛都唔遲，點知原來大錯特錯！去到售票處排隊時，抬頭一望已發覺即日前往新千歲機場o既所有列車o既指定席都已爆滿，八人最終唯有坐自由席車廂去機場。

如相所示，其實JR列車o既自由席同港鐵車卡差不多，除咗有座位，亦有企位。企喺度o既搭客要企穩之餘，仲要確保行李唔好轆黎轆去，以免影響到其他人，真係可以幾狼狽架。

港人愛遊北海道其中一個原因就係為咗要怒食海鮮，除咗魚生之外，要數人氣王當然係唔少得蟹啦！同其他海產一樣，蟹都分季節食，十月期間就以食鱈場蟹同毛蟹為主。屋企人中真係冇乜邊個唔食蟹，所以出發前長輩們已打算以蟹做手信。嘻嘻，多得細佬有本旅遊天書在手，八人抵達機場後即鎖定書中所介紹o既海產專門店「北海道きたれん」（譯音：Hokkaido Kitaren）為目標，為求要買到靚蟹返港。

商店「北海道きたれん」位於機場國內線大樓二樓，因手持門面相片，問路都容易好多。行到埋去店舖，店長一眼就認得出小肥手上o既超閃旅遊書，眼睛發亮o既同時，臉上亦充滿笑容，並熱情地推介店內不同產品。得知我地有意購買蟹隻回港，佢仲好詳盡地講解魚缸內o既活蟹必需要到港後兩小時內烹煮，二十四小時內食先可確保新鮮；而藏於冰雪內o既原隻熟蟹其實係捕獲後立即烚熟，返港後只要保持雪藏，四十八小時內食其味道都會一樣咁鮮。店長唔係好識講英文，不過店內有位精通普通話o既姐姐仔即場翻譯，大家溝通上絕冇問題。主婦們經過一輪商討後，最終決定聽取建議，購買已預先烚熟o既毛蟹同鱈場蟹各兩隻，並交由店長先生代為揀選及包裝。

正當小肥陪伴幾位主婦去買蟹時，姨丈就獨自走咗去巡視其他店舖，當發現大樓內居然有條人龍買芝士撻，有少少肚餓o既佢就排埋一份。哈，咁啱企喺佢前面位嬸嬸原來又係準備返香港喎，二人同聲同氣，好自然地就傾起偈上黎。與嬸嬸閒聊間，姨丈知悉「Kinotoya」原來喺香港銅鑼灣Sogo都設有分店，嬸嬸都有排過隊去買，記得當時仲等咗成個鐘先有得食，故當見到新千歲機場條隊唔係太長時，諗都唔洗諗就要一試日本鮮焗o既版本。

辦妥好登機手續，將行李寄哂艙後，大隊都急不及待要搵野食。行返去國內線大樓三樓兜咗個圈，眼見大家都有不同喜好o既食品，團長就決定行入去舖位超大，陳列架上擺放出最多日菜模型o既「きたみなと」（譯音：Kitaminato）。

午餐時間，店舖已坐滿食客，和藹可親o既嬸嬸就安排八人入座一間大榻榻米房內，每邊有張四人枱，私隱度高，地方又闊落，仲冇最低消費添，雖然要除鞋，不過都冇人投訴。

餐牌圖文並茂，日英對照，簡單易明，同服務生講唔掂都可以用手指指出。可能成朝都忙於搬運行李，突然飯癮起，所以一口氣就叫咗幾個招牌海鮮丼黎分：

1)      生海膽丼（2,860円）：如相所示，飯面佈滿金黃色o既海膽，美艷吸睛，入口更覺鮮味溢滿口腔，香軟濃郁，超正！

2)      蟹丼（2,040円）：蟹丼亦為一絕，蟹肉份量同海膽丼一樣咁足，雪白幼嫩，高質清香，新鮮甜美，冇得頂呀！喺機場食二千円一碗，價錢真係算合理架啦。

3)      燒豬扒丼（1,210円）：熱食o既燒豬扒丼新鮮熱辣，香口脆薄，惹味可口，同樣咁掂當！

4)      炸雞翼（670円）：炸雞翼其實似燒雞翼多啲，皮層香脆，肉質嫩滑，送酒一流。

5)      炸蝦（640円）：反而炸蝦就唔係咁得啦，雖然蝦隻炸得好夠乾身，但其炸漿過厚，蝦隻又唔得爽脆，屬失色之作也。

酒店正常退房時間為中午時份，不過肥肥家族有位心急大少，去親旅行都會食完早餐就去機場，每次都必定有足夠時間加料買手信零食、慢用午餐、及四周探索。雖則今次有旅遊書在手，一早更預咗要暢遊新千歲機場內幾個觀光景點，但因未能掌握出境所需時間，故亦只能快速喺門外拍照留念，未能久留玩樂。

大家要先留意一點，喺日本北海道新千歲機場內，各大航空公司要根據航班出發時間輪流用大堂內少量o既櫃台為搭客辦理登機手續，亦即係話如果太早去到絕對有機會要等好耐；加上下午離境區人龍頗長，輪候時間冇一個鐘都起碼大半個鐘，故小弟建議大家盡量揀坐夜機，朝早同下午可以盡情喺機場食個夠同玩到顛先佗佗佻佻地走。

由於自己未有足夠時間喺各景點逗留，實難作出詳述評論，喺度只好簡單列出兩個主景點及其吸引之處作吧：

1)      Royce’ Chocolate World（www.royce.com/contents/world） - 此乃名朱古力品牌Royce所建立o既博物館、朱古力工場、及大型朱古力店，各區同為免費入場；有得睇、有得玩、仲有得食，店內更有多款限定紀念品及糖果款式，絕不能錯過，最少要喺度逗留一個鐘頭。

2)      哆啦A夢空中樂園SKY PARK（http://www.new-chitose-airport.jp/tw/doraemon/） - 相信哆啦A夢由「叮噹」時代開始已經陪伴住不少香港人長大，XO仔都係其中一個，所以當喺新千歲機場發現到處都有「圓圈加一點，圓圈加一點，下面畫枝波板糖再畫個呼拉圈。。。」o既影子時，感覺分外親切。機場內o既哆啦A夢主題公園除咗有小型遊樂場同精品店之外，園內亦設有益智o既圖書館、哆啦A夢紀念手藝品DIY工作坊、多部貼紙相機、夾公仔機等。如果大家唔夠時間入去主題咖啡室度坐，記緊行過門前都要一試粉藍色o既波子汽水味軟雪糕呀！

八人乘搭香港航空HX693返港，窗外雖然落住小雪，幸好航班都只係稍微有延誤，安排十分妥當。

航機下午四點多起飛，晚上九點左右抵港，飛行時間約六個鐘頭，包有晚餐服務。客機商務機艙同黎o既時候一模一樣，都係咁闊落舒適，空中小姐同樣客套有禮，唯一最大分別就係食物質素遠遠不及第一程咁好：

1)      餐包：鬆軟暖手o既餐包可以話係整餐之最。

2)      頭盤之「火腿片配粟米告士羅沙律」：軟薄o既火腿片尚算香濃，不過帶點酸味o既粟米沙律就唔係咁啱細佬口味啦！

3)      主菜之「扒雞配蕃茄汁配薯仔及西式時菜」：主菜雞扒不但偏嚡同乾，個蕃茄汁仲要又咸又酸；雖然隔幾日就到鬼節，不過都唔洗咁恐怖掛。。。

4)      甜品之「日式和菓子」：和菓子o既綠茶味外層頗為清香，不過入面o既紅豆蓉就好似過甜咗少少，唔係小肥杯茶囉。

昨天試過窩可（Volkhov）嘅午餐和晚餐，如今試早餐，窩可（Volkhov）嘅自助早餐好green，沙律和漬物較多，除咗漢堡牛肝扒係煎嘅外（都係凍嘅），幾乎全部都係烚嘅同cold cut，今朝冇煎蛋食，有點茫然若有所失嘅感覺。

抗敵紀念碑係紀念列寧格勒保衛戰，向成功抵抗納粹入侵得到最後勝利的蘇聯軍民致敬。紀念碑位於聖彼得堡南面勝利廣場中央，廣場呈圓形設計，弧形牆壁嵌上黑色金屬板，並刻有金色文字、浮雕和火炬，令人有一種莊嚴震懾的感覺。勝利廣場內還建有一所紀念館，由於團隊沒有安排門票，只有在外圍參觀。

當我開始懷疑俄羅斯係咪真係有羅宋湯嘅時候，今日終於品嚐到俄羅斯的羅宋湯，湯味濃郁，勁多雜菜，好足料，味道和香港做的也很相近，不同嘅係湯底竟然係用豬肉而唔係牛肉；薯仔沙律加咗Packel，酸酸地，幾特別；主菜係俄國餃子，賣相跟北京水餃沒兩樣，外皮較滑同煙韌，唔黐牙，質感似意大利寬條麵，至於餡料帶點騷騷地，但騷得嚟又幾好味；甜品係雙球雲厘拿雪糕，配蔓越莓醬，呢餐真係好滿足；坐喺隔離檯嘅吳明，佢碟水餃貌似小籠包，耀仔話呢隻係高加索水餃，可惜冇影到相，因我唔好意思過去騷擾。

去到嘉芙蓮夏宮門前，擠滿了排隊等入宮嘅旅行團，心中感到不妙，這個時候，偉大的吳明又要施展他偉大的本領 ~ 走後門；

嘉芙蓮夏宮建於19 世紀,是俄國史上功績最顯赫的女沙嘉芙蓮大帝之夏宮，以當時俄國最盛行之巴洛克風格為主體建築，內有各式不同風格的大廳，有巴洛克風格的 ball room（Большой зал），有令人歎為觀止的琥珀廳（Янтарная комната），而整個琥珀廳係選用不同色澤的琥珀，精心鏤刻後嵌鑲而成，亦是唯一不准拍照的大廳；還有收藏油畫嘅大廳（Картинный зал），其收藏方式好特別，係用大小不同嘅油畫如牆紙般嵌砌在整個大廳的牆壁上，可謂一眼睇晒，簡直係「豪」；因今晚要回莫斯科，還需預留時間参觀嘉芙蓮夏宮花園，因此在皇宮逗留的時較短，有點意猶未盡的感覺。

宮殿外之御花園極為優美，有青蔥翠綠迷宮般的灌木林、涼亭、雕塑、橋樑等點綴其中；還有很多休閒享樂設施如土耳其浴室（Турецкая баня）、鏡池岸邊的上浴室（Верхняя ванн）、卡梅倫畫廊（Камеронова галерея）、空中花園 （Висячий сад）此外，還有位於南側的大湖，周圍森林環繞，環境幽靜，嘉芙蓮夏宮御花園的面積非常大，好多地方都冇機會進去，例如建於大池塘岸邊的海軍部（Адмиралтейство），只能在對岸拍張照片。

領隊一嚟到聖彼得堡就宣佈咗全程嘅中餐，都係幫襯唐人酒樓名區分店，領隊聲稱呢間中菜館係內地女士開的，但不接待國內團，只接待本地客及香港團，俄羅斯中菜館唔多，之前嘅團隊試過好多間，都被投訴難食，綜合各方意見，呢間算係叫做OK喎，咁即係叫我哋將就下，唔好嫌三嫌四囉。

喺外國嘅中菜款式乏善可陳，都係青瓜肉片、蛋花湯、炒蛋、魚或酸甜怎麼的，其中令我印象難忘係清蒸三文魚柳，做法有好廣東feel，薑蔥加蒸魚豉油，蒸熟咗嘅三文魚柳，又乾又柴皮，仲有尐腥，不過蒸魚豉油就好好味。呢幾餐中菜都冇影相，因為唔好意思每上一度菜都要團友停一停，等我影一影。，

呢餐飯食得好急，因為必需在六點前趕到機場，以便避開下班時間擠塞的交通。哈﹗早尐出發交通果然係好暢順，好快到咗機場，入咗閘，見時間尚早，還可以到處逛逛。唔知機師係咪趕收工，揼行Tubro，竟然比預定時間早咗廿分鐘到埗，導遊嘉芙蓮已經喺機場等緊我哋，返到莫斯科，繼續入住Radisson。 

黎到日本主要都係食、買、瞓，所以訂酒店都專登唔要早餐，一早已計劃好其中一朝要去同「白い恋人」有關o既「Ishiya Café」度食人氣早餐之超厚班戟。

「Ishiya Café」位於大通地鐵閘口旁，對上班一族尤其方便，難怪面積咁廣，店內更設有間可容納十二人o既吸煙房。至於非吸煙區就有拍窗一列獨立高櫈位、大廳內合併式o既方形散枱、及門外地下街旁o既圓枱散座，氣氛輕鬆自在。

咖啡室屬半自助式經營，食物可從雪櫃中提取或點選，如有需要可向服務生索取英語餐牌，食客落好單就會取得號碼牌，揀好位坐，等食物準備好就會有位靚女姐姐續一呈上。餐具及清水可於收銀處個雪櫃隔離攞，食後亦請各位客人自行退回器皿及棄掉垃圾。

北海道名朱古力夾心餅乾「白い恋人」真係食唔少，黎到原產地當然係要一遊其主題公園「白い恋人パーク」（譯音：Shiroi Koibito Park）啦！

公園離地鐵站只需步行八分鐘左右就到，街道上四周都可見指示牌，不過由於當日雨勢漸大，大肥手持o既GPS又帶錯路，結果八人就跳咗上兩架的士，三分鐘即到，就連最懶o既大肥爸爸都覺得有點兒過份。可能的士司機已接載過不少迷路o既遊客，故態度仍能保持客套有禮。

「白い恋人パーク」外型好似個城堡咁，外牆有靚花鐵欄及紅葉大樹圍繞，壯觀宏偉。鐵欄後面又有溫室又有花園，處處可以聞到花香，睇到嬌艷o既花卉。

如要參觀工廠及「白い恋人」生產過程就必需繳付成人六百円一位o既入場費。除咗有得睇，當然係有得食啦！園內有個朱古力吧「チョコレートラウンジ」（譯音：Chocolate Lounge），提供精美蛋糕、芭菲甜品、朱古力特飲等，食早餐同下午茶去就最啱。如果時間有限，又想一試園內製甜點飲品，其實仲可以去外賣店「テイクアウトコーナー」（譯音：Takeout Counter）及雪糕屋「ソフトクリームハウス」 （譯音：Soft Cream House）買軟雪糕或朱古力特飲，一邊行一邊食。

主題公園當然唔少得商店啦！除咗可以買到著名o既「白い恋人」餅乾之外，亦可選購多款糖果、蛋糕、朱古力等，二樓仲有一系列精緻o既文具及紀念品添，不容錯過。

應契妹友人推介，喺札幌特意訂座一試離酒店極近o既食蟹專門店「かに本家」（譯音：Kani Honke）。

「かに本家」獨佔整座大廈，離遠都可以望到大廈頂上o既招牌，不難找到。食店大堂為接待及候座處，腳下綠色o既地毯，配上兩旁o既活蟹水池、木造o既橫樑及傢俬，大自然氣息濃烈，悠閒寫意。店內不設散座，每層只有不同大小o既tatami廂房，故食客乘搭升降機上樓前必先除鞋。

每間房都有專人招待，我地房內位松本嬸嬸英語水評不高，只可跟小肥以簡單o既日語溝通。嬸嬸喺言語間跟細佬o既對答可以話係佢最客氣o既表現，口中不斷用上敬語，因為除咗跟大家打招呼o既第一刻叫做有啲笑容之外，其黑面o既表情及不耐煩之態度實在差劣，就連呈上食物時亦極為急速及嘈吵，砰砰彭彭，當真令全枱人都極度不滿。雖則如此，但因不知嬸嬸家中是否有不愉快事情發生，或之前是否受到其他食客惡意對待，八人最終決定不作出投訴，以免喺如此經濟不境o既狀況下打爛人地個飯碗。

店子乃蟹肉專門店，午市套餐當然全為蟹宴，全體人當日就主攻款色較多o既「大雪會席」（連稅每客5,050円）及「日高會席」（連稅每客4,000円）。由於兩款蟹宴中有四樣食品相同，靚靚媽咪胃口又細，XO仔結果試勻哂所有菜式。綜合各人意見，對男士黎講一個套餐絕對夠飽，不過女士們就覺得可以兩個人分一客。此外，蟹肉菜式雖屬優質，當中以刺身、蟹蓋、及蟹粥最為甜美，但前菜、沙律、同甜品就頗為失色；前菜大多唔夠調味，甜品則如相所示，唔好睇又唔好食。「日高會席」中有一味叫「奶汁烤蟹肉」，其味道香濃得黎過於溜滯，八個人分三客好勉強先食得哂，所以個人會見議大家可以三人分兩客套餐為標準去點選食物。

喺日本真係唔洗驚會餓親，有商店o既地方就好容易搵到有甜品食o既地方，就連地下街亦不例外，「Sapporo Sweets Café」就係其中一間。

咖啡屋以紅、白色裝潢，簡潔明亮，感覺甜得黎坐下一刻已想點食士多啤梨同忌廉。年輕o既店員面帶笑容，且溫文儒雅。

跳舞激的話絕對可算為劇烈運動o既一種，故跳前不適過量進食，小肥因晚上準備參加探戈舞會，所以就選擇咗兩小時前簡單咁喺車站入面一間外賣小食店「danish Barデニッシュバー」度買咗條熱狗做晚餐。

XO仔近年愛上阿根廷探戈，學藝快將有四年，自覺外遊都應該去見識吓唔同國家o既舞會，所以今次去北海道前，已一早打聽過札幌o既舞會詳情。得知市內跳舞人數不多，亦只有週五晚一場舞會，細佬就特意抽空出席。

玩完Segway就回酒店休息一陣, 就落去行夜市嘞~

因為夜市路口附近發現咗間massage店 (地方整潔, 技師手勢唔錯), 見時間仲早, 就先來腳按1小時~

呢個夜市除咗勁大&勁多嘢賣之外, 仲係勁多人, 當差啲迫到傻之際, 發現原路的一個Lanna建築博物館還開放, 裡面仲有年青人在玩音樂, 所以就入咗去參觀兼透透氣

之後繼續逛, 沿路真係幾多嘢睇, 有嘢食有嘢買, 行咗一個鐘有多, 行到古城的另一邊, 就搵雙條去食泰菜