因為搭乘下午5點班機, 到清邁時已是當地晚上近8點, 加上過關排長龍, 又在機場買了上網電話卡(連安裝, 299銖/7日, 就在行李輸送帶旁), 結果上的士時已九點多, 好彩清邁機場離市區超近, 15分鐘左右就到酒店check-in了.

酒店員工亦很有效率, 一下的士就來幫忙搬行李, check-in亦只需5分鐘(連deposit都不用!), 好快就可以上房放低行李, 再出去晚餐了

Check-in完就出去搵食嘞~ 一月的清邁, 夜晚相當清涼, 當日香港出發17度, 嚟到呢度夜晚得16度...可能因為天氣涼又夜, 條街冇乜人

由酒店行咗3分鐘就嚟到呢間食泰菜 (好易搵, 因為離遠就見到間紅檔檔的就是了)

因為都夜了, 所以人客唔多, 點菜及上菜亦都好快手

兩個人點咗一個沙律, 一個炒金邊粉, 一個湯, 一個荷葉包雞....全部都係辣的, 只係有冇咁辣&好辣之分...最鍾意個牛肉沙律, 酸酸甜甜(&微辣), 啲沙田柚好甜; PAD THAI炒得乾身唔錯; 個湯以為唔辣點知都係辣的; 荷葉包雞幾好味, 個雞炸過但唔油~

埋單嗰陣見到有介紹NIMMAN HILL(即MAYA天台)的酒吧, 所以食飽飽又搭dukduk去飲嘢~
 

天氣涼加上TUKTUK開得快又冇遮冇掩, 差啲吹到頭都甩....

嚟到百貨公司已經關門了, 要去天台, 就要經地庫入口, 穿過停車場再搭電梯先到 (不用擔心搵唔到, 去到跟人行就好易搵到入口)

嚟到先知, 點解條行冇乜人....因為嚟晒呢度! 呢個天台真係好熱鬧, 有好幾間酒吧食肆, 又有強勁音樂, 仲可以一覽清邁夜景(雖然周圍都好黑), 我哋求其咗間小酒吧坐, 點咗杯啤酒(一大杯才90銖!!!) &果汁(yes, 我係嚟酒吧飲果汁), 坐低飲吓嘢傾下偈, 又坐的士(雙條)回酒店休息嘞. 

因為呢間coffee shop就响正酒店樓下, 又見到都幾多遊客幫襯, 就嚟食個早餐

大部份遊客都坐戶外的座位, 坐裡面的反而較少, 我哋坐咗一陣就知原因: 因為裡面較為焗束, 而且有好多蚊...

Anyway, 既然坐低咗就點嘢食啦~ 主要都係英式的早餐, 有好幾種breadfast tea & coffee, 我點咗最常吃的egg benedict和cappuccino, 有一定水準, 不過價錢同香港一樣, 相對呢度嚟講就偏貴... 

食飽早餐就到店外除手搵一架雙條, print埋相諗住去Kun Chang Kian睇櫻花再去蒲屏行宮&素帖寺, 但司機話唔啱時候仲未有花睇, 所以建議淨係去蒲屏行宮&素帖寺, 包車8xx銖, 雖然比較貴, 不過唔駛轉車, 坐得舒服又快啲 (我見其他雙條上山行得好慢而且坐得好迫), 路程又遠 (去程都搭咗差唔多一個鐘), 所以都值ge.

嚟到行宮先買入場tickets, 遊客貴啲啲, 但都好平啦只係50銖~

入到去感覺好清爽涼快, 果然係避暑行宮, 裡面仲有好多玫瑰, 遊人唔多, 景又靚, 慢慢行都遊咗個幾鐘

入面有小食檔, 行到攰可以買啲小食; 另外呢度有衣著規定, 短裙/褲&背心都唔得, 不過如有需要都有得租衫的~

沿住山路回頭, 坐咗一陣車就嚟到雙龍寺嘞~

呢度好明顯係一個人氣景點, 相比起之前的行宮, 呢度真係熱鬧十幾倍

嚟到有啲啲肚餓, 行上百級(?)樓梯之前, 先在附近的小食檔買咗件香蕉hotdog (其實似香港的夾餅)醫肚附近仲有啲特色小手作店可以逛逛.

行上樓梯前本來相自拍下, 不過實在好多人, 又因為都幾多級樓梯, 人潮行動都較慢, 好不容易到到梯頂, 外國人要先買票入場, 雖然唔覺有人check票, 不過都係30銖啫~

如果要入廟參觀就要除鞋嘞, 所以廟前有一堆鞋陣

除咗參觀/拜入廟之外, 呢度仲有另一特色: 清邁的遼望台~ 行到廟後, 就可以望到清邁的全景, 所以遠少少都值得嚟行下.

 

遊完雙龍寺, 就回程番MAYA商場食午餐~

呢個商場雖然唔係好大, 但响清邁嚟講都算係較新&大的商場了, 因為趕住下晝去現Segway, 所以都冇認真行過成個商場~

唔知食咩好, 見有呢間連鎖的日式食店就嚟試試

午市時份但客人唔多, 所以落單到上菜都好快手

我點咗個壽司set, 唔太差啦, 都有好幾款, 但個湯唔夠熱, 壽司飯就略為實咗啲, 不過只係2百幾銖, 可以接受啦; 個烏冬就好細個囉, 而且冇餐, 唔太抵~ 點咗兩杯泰式奶茶 (細杯係跟壽司set的餐飲), 雖然略甜, 但都唔錯.

食完午餐, 就落嚟呢間出名的餅店買法式甜品: 長形Puff & Macaron

因為要趕住回去古城玩Segway, 所以只係快快手買咗幾件放回酒店待今晚宵夜食(肥爆...)
兩個長條PUFF, 白色vanilla味好正, 唔太甜; Macaron味道太多了, 最特別有'芒果糯米飯'味, 每個價錢都係四十幾銖左右, 真係好抵!!! 所以唔嗜甜的老公都揀咗兩個嚟試, 我就揀咗4個

由於太趕所以冇影到店面 呢度除咗外賣仲可以堂食, 另外仲有飲品, 冇坐低慢慢歎真係好可惜呀.

呢間清邁機場都有分店, 臨走都可以最後衝次~
 

趕回酒店放低甜品後, 就到城門另一邊的一間玩Segway的店報到 (之前先於網上預約及付款, 早15分鐘到場就ok嘞)

一團只有我二人和一對外籍夫婦一齊玩, 加埋教練和一個助理(一頭一尾跟住, 助理會幫忙影相, 因為在Segway上唔可以用手機), 小班教學呢

揀好頭盔, 簽好條文, 就開始學嘞~ 原以為好難, 起初超緊張, 但上咗去唔夠三分鐘就學識基本功嘞

一行6日練咗一陣就出發咯~ 原住古城走, 分別停咗三個景點:
Wat Phra Singh
Wat Chedi Luang
Wat Chiang Man

可惜只係放低我哋自由行, 沒有太多介紹景點的歷史資料, 如果有行程會更豐富

最後一站就係TEA嘞~ 杯泰式奶茶好好味又唔太甜, 啲cake有水準喎, 坐低食吓嘢, 同外籍夫婦傾吓愒, 之後就回店還車, 兩小時旅程就完結嘞

雖然景點介紹欠奉, 但segway真係好好玩, 呢次旅程最難忘係呢part~

 

之前在Facebxxk訂好位, 問定好位置就坐雙條來晚飯, 不過餐廳位於巷內, 雙條只在巷口放低我哋, 不過行3分鐘就到 (但條巷好黑又靜囉...)

嚟到只有兩枱客, 我哋第三枱, 所以上菜都好快

點咗:
粉絲雞湯, 裡面有少少雞絲&啲啲菜, 卒之有個唔辣的湯嘞~ 幾好味
炸蝦都幾好味, 只係個炸皮厚咗啲, 個沙律醬好正
pha thai炒得好爽身, 份量亦都幾大下; 個青口我食咗一啖, 辣到噴火
Mango Smoothies其實唔錯, 仲有粒粒芒果肉, 但是晚清邁得十幾度, 飲完真係凍到入心入肺...

食飽飽又搭雙條回酒店休息嘞~ 


 

行程的第一站是個有'溫泉'的揭腳點, 落車去個toliet就繼續驅車前往, 由清邁出發到白龍寺, 車程差唔多要兩個鐘呢~

嚟到導遊先簡單講解遊寺規則: 向前走~
雖然嚟到時間尚早, 但遊人已堆滿成個寺... 我哋跟住人潮, 一個個跟著步向白龍寺, 遠處的保安先生就不斷用擴音器叫著(用普通話的!!!): 向前走, 上天堂....

以前睇相以為呢度好大, 原來比相象中細得多, 白龍寺主廟亦好細, 入到去唔駛一分鐘就參觀完~ 之後就到寺內逛逛

寺裡面的陳設的幾'潮', 發現有很多現代的'卡通'及'電影角色'於不同的角落; 最特別係嗰個金壁輝煌的廁所, 相信某國遊客會很喜歡.
另外有超多的'許願樹&掛牌', 相信係呢間廟的主要收入來源之一呢~

遊咗大概45分鐘左右就出發去另一景點嘞

又坐咗半個鐘左右車, 嚟到一個小碼頭, 坐船到對岸的'遼國'參觀

雖然話係另一國度, 不過唔洗過海關之類, 導遊只係响張紙仔度打個印再派俾我哋叫做'登記'咗 (轉頭我就唔見鬼咗張紙).

五分鐘就坐到對岸, 沿岸見到有好幾座輝煌建築, 都係賭場酒店之類, 不過不在行程之列, 我哋只係到岸的一個小'鎮'參觀而已.

不過呢個小'鎮'只係由一堆攤販組成, 買一啲有少少民族風的紀念品, 最特別係有好多蛇酒, 得幾個外國人勇敢試飲, 大家都係嚟影下相就離開了, 沒甚麼特別好逛, 逗留咗半個鐘就離開去午餐 

午餐來到一個戶外的小店, 唔知道店名, 不過團餐嚟講都算ok啦, 款式一定唔多, 但起碼啲嘢好食

再驅車一小時左右, 就嚟到'黑廟'嘞.

說實在呢度真係不太值得來, 雖說是廟, 但只係因為有白廟才叫呢度做黑廟而已, 其實呢度只係一個藝術家收集藝術品的地方, 佔地都幾大, 當做行公園咁走了一圈就離開了.

行程最後一站, 嚟到長頸族村, 位置不詳, 應該係每個Local tour都會來一趟的, 村口會有人收入場費...

雖然話係村, 但其實似係俾遊客睇的景點, 那裡的長頸婦女似乎並非住在村內, 只係工作(織布, 賣手信等).  不過嚟到算係見過真正的長頸族婦女, 啲圈真係好重的呢.

 

玩咗成日, 番到清邁都7點幾了, 原本打算行去夜市睇下有咩街頭小食醫肚, 在夜市街頭發現咗呢個好正的露天food court.  呢度各地食品都有, 壽司, pizza, 班戟, 串燒......找就揀咗檔食碗牛丸河的.

場中有live band, 都好多當地度飲嘢傾偈, 比起坐响餐廳食更好feel