坐左十幾個鐘飛有點肚餓了，轉機有成幾個鐘時間，搵食先。本來一心衝去食韓式熱狗架，點知已經執左笠，唯有求期食個包啦。上年食依個 burger，今年逃唔出您既魔掌，又係您 ﹗百幾蚊港紙既雙層芝士漢堡連可樂，睇下您有幾好食，不過我一早心裡有數啦。廿幾蚊港紙支可樂，我真係覺得一頸血囉 ﹗



雙層芝士雙層牛肉漢堡包，即叫即做新鮮漢堡扒真係幾有 heart 架，好過麥當勞萬倍，讚 ﹗巨人級份量漢堡，外加大大兜鮮炸薯角，我見到都有點壓力呢。賣相引人，色澤鮮明，漢堡跟薯角都非常香噴噴架喎。


我自問並不是櫻桃小咀，但我擘到盡都係未能一口咬得落呢，超厚呀 ﹗再禁偏少少，狠狠地咬落去，牛肉氣味香濃，但食落牛味又好淡噃，感覺 dry 得要緊呢 ﹗唔容易嘴嚼，好采有沙律醬濕濕地好一點。除左大之外無咩可取，漢堡包食到一半我已經開始頂唔順喇，鞋硬得黎又滯呢，要格硬吞埋去。漢堡實在太過乾爭爭，要唧大量茄汁救救命呢，但最後都係食剩少少。薯角炸到外脆內軟好好味，但完全食唔落喇，so sorry。

每年都會黎美美飯店用餐多次，已跟老闆及員工們打成一遍，飲酒談天，非常熟落，有朋至遠方來，充滿人情味 ﹗咸蛋芥菜瘦肉湯，係我地既例湯，簡單、健康又好飲。仲可以舒緩一下思鄉之情。堅好飲，機乎必飲。芥菜鮮嫩爽甜，比香港食到既更甜更好味。熱燙燙湯底濃郁，充滿肉味咸蛋味芥菜味，個個都連飲兩三碗呢。

 

 

生炒骨，點解每次都用肉排代替呢？骨比排貴？還是師傅們住係美國太耐，已分不清排骨跟肉排呢？生炒骨變左京都肉排，味道滿意，甜酸度適中兼開胃，撈汁都送成碗飯啦。肉排有咬口未算乾硬，香口有肉汁。三杯雞，今年轉用雞柳粒既？以前用雞球架呢。可能鬼佬真係好怕骨，做生意唯有變通啦。炸得金黃香口，肉彈味濃，好辣但惹味不過咸，送飯好鬼正呢。

 

 

茄子煲，普通地一般，我又會錯意喇，諗住會係魚香茄子囉，似家好似油浸茄子。大量厚厚生油，好油啊！茄子皮比香港厚而粗糙，味道還可以，但油到唔敢食，只試左幾件。芋頭煲，大部份同事都好喜歡，但我就麻麻地，而且我唔多食芋頭。香氣樸面，香噴噴搞到流晒口水，不過個汁勁水汪汪，不夠濃不夠杰，味道有點淡。芋頭厚而粉，肉片滿意，撈下飯都唔錯，幾年前好味好多。

 

 

蒜蓉油麥菜、清炒芥蘭，好好味 ﹗爽甜新鮮有鑊氣，絕無投訴。蕃茄炒蛋，炒蛋有點偏咸，鮮茄微酸帶甜，酸酸甜甜大量汁液撈飯夠開胃，滿意的一般。

如果留係 Cosco 堂食熱狗的話，只需要 USD1.5 就有隻巨形熱狗，仲要汽水任飲添呀 ﹗班美國佬、美國婆唔肥死就奇啦 ﹗


什錦至尊薄批，即係咩料都有少少，辣肉腸、青紅椒、洋蔥、水欖、牛肉、等等。味道一般，但食完勁頸渴囉。


熱狗，被我形容為美國最好食、最抵食既非 junk food ﹗因為熱狗腸大大條，麵包軟塾熱辣辣，自助加醬，要多要少自己話事。熱狗，鬼佬熱狗腸唔係得個大字，咬落脆皮，眼看得到的濕潤 juicy，什肉味香濃 ﹗加上大量茄汁、芥辣、酸青瓜醬非常開胃醒神，我連食兩個都面不改容，正呀 ﹗一咬爆汁飛射，成手都係，勁豪邁奔放 ﹗但今次似乎落得青瓜醬，好頸渴呢 ﹗下次都係走左去喇。


 

芥菜咸蛋肉片湯，芥菜爽甜味美，雖然係簡單滾湯，但味道特濃，咸香誘人，好好味 ﹗轉左用臉盤咁大隻不鏽鋼碗裝，好壯觀呢 ﹗姐姐話因為太忙，今年無時間煲住家湯比我地飲喇，失望啊 ﹗一般香港人都十分注重健康，黎到沙漠地區非常乾燥，美國食物又重口味，大家都自然食多幾碗湯水啦。

 

 

蜜汁叉燒，每次都非常搶手 ﹗山長水遠從地球另一邊飛到黎美國，叉燒可以一解思鄉之情。而且師傅東哥同康哥廚藝出眾，連燒味都搞得掂。叉燒夠腍夠香，不乾不硬，係沙漠美食呀 ﹗蕃茄炒蛋，個人就無話鍾意或唔鍾意，可有可無，不過半數同事都十分喜歡。可能係兒時情意結掛，而且酸酸甜甜，係咁悶熱既天氣真係開胃不少。大量汁液送飯都易入口好多啦，炒蛋都夠鮮嫩，我係不太喜歡咸左少少啫。

 

 

 

蒸三色蛋，係香港又好、係美國也好，我對三色蛋都係麻麻地，如果有得揀，我必定食瑤柱蒸水蛋。口感濕潤滑溜勁多汁，豬肉味濃又有瑤柱味，送三大碗白飯都得呀。得三色蛋既質地就較結實，蛋香比較遜息，好采皮蛋、咸蛋、雞蛋撈埋飯都好好味既，食得過。回鍋肉，我形容為美式回鍋肉，除賣相外，味道跟香港食到既好大分別。非常香辣，我鍾意 ﹗香港既都係偏甜，甚至無辣味。但依個堅辣，大量香花腩片連棷菜連白飯塞入口勁滿足，好好味呢 ﹗

 

 

鐵板蔥爆牛肉，無咩特別，濃厚薑蔥豉油味，熱辣辣吱吱喳喳上枱。都係撈飯不錯選擇，牛肉勁腍又多汁，好味。涼瓜炒牛肉，又係牛肉。涼瓜已吸收左豉汁跟牛肉既味道，甘苦中帶點豉香帶黑牛香，外脆肉嫩，好美味 ﹗牛肉就跟剛才蔥爆牛肉一樣多汁及帶濃厚甜味，送飯同樣一流。以前我完全食唔到苦瓜，太甘苦了 ﹗只能飲到咸菜苦瓜湯或是豬肉釀苦瓜淨係食豬肉，自從幾年前係大埔伍仔記食過冰鎮涼瓜後，被他甘甜爽口多汁所吸引，一試愛上 ﹗食左幾年，依家連苦瓜汁都飲得到呢。蒜蓉炒菜芯，無得輸 ﹗美美飯店既每款炒菜都非常爽甜，非常美味 ﹗

 

 

芋頭煲，上年已經餐餐都 order，好有陰影。今年一開波又黎過，兩餐黎美美食，連續兩餐都叫，命中率為 100%，好驚呀 ﹗水汪汪既芋頭煲已不及最初既香濃濃稠芋頭汁喇，何解呢？芋頭粉但不夠黏不夠泥，我本身已經對芋頭麻麻地，細個直頭完全唔食，依家都係掂一兩啖架乍。當初最五花腩配芋頭，依家轉左普通肉片，已經唔係以前既芋頭煲囉，不香不甜。水水地既南乳芋頭肉片汁撈飯，免免強強啦，食左兩啖放棄。

 

 

咕嚕肉排，我都唔知叫生炒骨好還是咕嚕肉排好呢，明明 menu 係寫生炒骨，真頭痛。酸甜味夠晒濃，汁多開胃。炸得外層微脆，肉質有咬口，未算乾硬，所以都係受歡迎既菜色之一，滿意。洗塵飯，但仲有同事還要過幾日先到步呢。11 餸 1 湯！咸蛋芥菜肉片湯、鐵板蔥爆牛肉、涼瓜炒牛肉、蕃茄炒蛋、蒸三色蛋、咕嚕肉排、蒜蓉炒芥蘭、蒜蓉炒菜芯、蒜蓉西芹炒椰菜花、回鍋肉、芋頭煲、蜜汁叉燒！

第 7 次美國之旅第 2 個早餐，只可以留係酒店食，因為趕時間去做野，而且係美國 Tucson 朝早都無咩餐廳會開門，只有麥當奴或快餐店。

 

 

Four Point 酒店房租已經包左自助早餐，行個圈望一望先。地道美國佬菜色，煎煙肉、煎美國腸、焗新薯角、半蒸炒蛋，賣相已經好可怕。只可以選擇食或係捱餓唔食囉 ﹗另外仲有粟米片、窩夫、麵包、多士、蛋糕、冰凍烚蛋、等等。

 

 

奇脆特咸乾硬煙肉，就算我加大量茄汁浸住黎食，都係頂佢唔順，放棄。高濃度煎美國咸腸，咸之餘仲勁多肥膏，一咬射油，我仲以為食緊腍劈劈臘腸呢 ﹗焗新薯角，好濕潤喎，都底您係焗定係蒸架？無調味，薯仔味濃，但點解係爽口既？

 

 

鬼佬炒蛋渣，頭都痛埋，啖而無味，無蛋香無鑊氣，居然要撈茄汁食，但都係兩啖放棄。冰凍烚全熟蛋，終於有樣入得口，但堅冰凍喎 ﹗剛雪櫃拿出黎？咪即係隔夜蛋？非常失望 ﹗食晒蛋白算數。

 

 

好采我有帶急救合味道啫，thank you God ﹗熱騰騰香噴噴既香港杯麵，係依度既人間極品呀 ﹗食飽早餐又要到石礦場開工喇 ﹗沙漠晨早已經烈日當空，行兩行、郁兩郁，剛才少少早餐轉個頭蒸發左啦 ﹗

今年美國 trip 第 1 餐麥當勞，有年酒店無早餐食，侷住每朝食麥多勞，食足廿十日呀 ﹗由細到大都唔喜歡麥記垃圾食物，寧願去茶餐廳、快餐店，係香港有選擇的話係唔會幫襯麥記架囉 ﹗茶餐廳新鮮真牛肉漢堡好食過佢萬倍啦 ﹗

 

 

魚柳包，美國麥當勞既包類無香港咁多姿多采喇，基本煎豬柳、牛肉漢堡、炸辣雞胸、炸魚柳，就係得咁多，某幾間會有墨西哥卷食囉，唔係間間有。最穩陣就係魚柳包，味道跟香港幾乎一樣好味，其他乾爭爭，食完仲勁頸渴呢 ﹗花十多分鐘食完個 lunch 又砌過，巨大既太陽想曬死我咩？熱情的沙漠 ﹗

已經食左幾晚美美有點悶啊 ﹗想試新菜色呢，失敗左 ﹗有幾道菜都太會咸呢，老闆仲要係道諸多說話，咁您自己 order 囉，美美又唔係選擇多，唔好叫我發板喇 ﹗次次都係菜菜同埋菜，再唔係就芋頭、合桃，我地擔擔台台要好多體力，要食好多肉架 ﹗

 

 

芥菜咸蛋肉片湯，great！非常簡單大路又極好味既湯水，咸香肉甜佳出眾，芥菜非常清甜，湯底濃郁，無機會投訴啦 ﹗蒜香骨，NO ﹗炸排骨再落蒜兜勻啫，點解咸得咁利害呀？又炸得過火有點燶。投訴我叫黎食，我鬼知咩 ﹗上年都做得正正常常好味道，可能已成年無煮過囉。

 

 

左宗雞，NO ﹗完全記錯左，見個名咁中國色彩應該係我想食既薑蔥雞啦，點知會係香橙雞塊。炸到雞胸勁脆勁乾，撈上勁甜橙汁芡就食得。又再次比人地投訴，唔鍾意食咪食第二碟囉，叫晒碟碟您鍾意既好無？其他同事唔洗食呀？好采都仲有同事欣常依道菜啫，即刻無聲出。

 

 

豉汁蒸排骨，so so 過得去，味道唔錯，撈飯幾好味。最衰骨多肉少，而且落味有點濁，未覺清香。又投訴排骨係豬、叉燒又係豬；蝦仁炒蛋係蛋、蒸三色蛋又係蛋，點解 order 重覆既餸 ﹗我心諗每個人都鍾意食唔同既野，點滿足晒所有人呀？叫十個餸要全部食材唔一樣？有幾個肉呀？來來去去咪雞牛豬羊 ﹗都發神經架 ﹗

 

 

蜜汁叉燒，質數正過好多香港燒味店喇，雖然未至於頂級。豬肉味香而帶燒烤味道，軟棉中滲出微微肉汁，不乾不硬已非常開心喇 ﹗西芹炒椰菜花，依個配搭真係好食到不得了 ﹗我從未腍過可以炒埋一碟，一定要佢帶返香港， very good ﹗西芹好鬼爽甜，半點渣都無，比香港既更好味。椰菜花同樣可口脆卜卜，推介 ﹗

 

 

蝦仁炒蛋，蝦仁大大隻都幾爽甜，用香口炒蛋包住，有鑊氣幾好食。鮮菇煲，一年比一年差呢，用料少左，個芡又杰又厚，好似漿糊喎，全部都係雜菜又多汁，撈飯都好開胃。炒油麥菜、炒芥蘭都非常好味有鑊氣又爽嫩清甜，美美既炒菜無得頂。蒸三色蛋，結實既蒸蛋，即係用蛋足料，蛋味濃又加埋皮蛋咸蛋撈埋飯好味啊 ﹗蒸三色蛋夠跟芥菜咸蛋湯撞左啦，又唔見您投訴 ﹗

好新奇！無車匙、無波棍、無手製，哈哈！差啲唔識揸。仲要有畫面有虛線轉彎導航、後波導航、泊車導航，睇黎好快連軚盤都無埋喇！轉眼到左越南河粉開飯，快快快。

越南啤酒 33，其實沒什麼特別，只是啤酒味濃，甘味較重。越南春卷，自從有次放入口即刻時反胃後，一直都有陰影唔敢再試。因為我食唔到蔥、芫茜、韮黃、芹菜，總之有草青味的都會反胃囉。可能捲左薄荷葉及九層塔既關係。

火車頭生滾牛肉河加底走蔥，其實就算加底都唔夠我飽，要加底再加底先緊緊夠架乍，經過一整天的辛勞，而且 lunch 又無點食過野囉。

除左瘦猛猛帶鞋既生滾牛肉片外，還有較為美味的牛丸、牛柏葉、牛展、牛筋、爽腩，滿意啊。所有生配菜及香料都唔適合我，淨係大量辣椒及青檸就夠喇。香甜濃郁又真材實料既牛骨湯沾上酸辣就更醒腦醒神，食慾大增。

連湯帶河掃入口，美味絕倫，食到停唔到手 ﹗再沾上士拉差辣椒醬使到酸辣味更突出，整碗湯河完全消滅，一滴不漏。越式炒雜菜，越式調味都偏向甜，醬汁非常之味呢 ﹗配上充滿水份的爽嫩時蔬， 都還算可口。

 

芥菜咸蛋肉片湯，簡單又好味既例湯，個個搶住飲 ﹗美個芥菜特別大棵，葉雖然較粗糙又帶甘苦味道，但莖部多汁無渣泛著菜甜味呢 ﹗湯汁散發著濃濃咸蛋夾雜肉香味道，正啊 ﹗其實我唔想飲紅酒架，只係想快快返酒店瞓覺，由朝企到晚，睏那屎我喇！

 

蕃茄炒蛋，極愛歡迎既一道菜，大量鮮茄汁撈飯一流，係沙漠地區乾爭爭，撈汁食飯較開胃又較易入口。炒蛋只用鹽調味已十分足夠，滑滑的蛋擁著鮮茄汁坐上白飯衝入口，美味啊 ﹗

麻婆豆腐，別具風格的麻辣滑豆腐，好鬼惹味，堅辣 ﹗食得過癮又興奮，用上青辣椒、花椒調味，辣中帶麻好刺激。肉碎彈彈香口，豆腐棉棉滑溜，兩少羮已令整碗飯消失得無影無蹤。

 

美式香橙雞，席中有美國同事食唔慣太中式既餸菜，都要叫兩味鬼佬唐餐先得。勁炸雞塊撈甜酸橙汁，外層炸得勁脆，夠乾夠硬索汁超了得，而裡面雞肉當然乾爭爭啦。美式生炒骨，跟香橙雞有異曲同功之妙，同樣要炸到乾爭爭、脆卜卜再被汁漿得緊緊，美國人才喜歡 ﹗

 

雜錦炒飯，我一般會稱為雜碎炒飯，不適合我港人口味的呢，濕淋淋無蛋香，碎肉碎菜炒埋一碟。合桃蝦，鬼佬唐餐的變奏，厚厚硬硬炸粉包到雪藏蝦實一實，外面撈個杰撻撻蜜餞汁，甜立立 ﹗我每次都要剝去人造蝦殼，只食裡面既無味蝦肉架乍。

 

回鍋肉，上海香辣椰菜炒五花腩，鑊氣迫人 ﹗惹味帶辣五花腩甘香可口夾住爽脆椰菜撈飯，無可抗拒地爬飯啦 ﹗薑蔥炒走地雞，爆得十分之好味，雖然走地雞沒什麼雞味，亦沒甚麼醃過，但勝在炒得薑蔥豉油香噴噴，雞肉結實有咬口，都食得過。蒜蓉炒油麥菜、油鹽水浸菜芯，清甜爽嫩好好味 ﹗

 

粟米忌廉湯，搞搞新意思，罐頭湯無野好講，都係咁啦。椒鹽中蝦，用青尖椒特喇清香而辣，蝦殼炸得透徹脆卜卜，殼都唔洗剝成隻食夠方便，蝦肉夠甜美，調味雖濃，但可以接受。

 

芋頭煲，唯一可取係滾熱辣、吱吱喳喳、鬼殺咁嘈上檯，一開白煙直噴 ﹗汽泡滾到咕嚕咕嚕地叫，勁有氣氛啊 ﹗已不及當年喇，以家次次都水汪汪，又用普通肉片代替以前既肥豬肉，完全唔香口了 ﹗芋頭只烚兩烚，要炆到變成芋蓉再吸收晒肥豬肉既油香先好食架麻。

 

茄子煲，不如改名為油浸茄子吧 ﹗可能先入為主，次次見到 menu 都以為係魚香茄子囉。茄子皮又鞋又韌，茄肉索盡油份，一咬射油，雙脣立立令、反晒光，好可怕呢 ﹗只食到油味，沒有其他味道。

 

紅燒豆腐，有肉又有菜，似炒雜碎多點。白菜肉、油豆腐、肉片、叉燒、中蝦、雞肉炒埋一碟，入得口。白切雞，完全無味，又乾又鞋真係好嚇人，都係食薑蔥走地雞安全好多。

 

脆皮燒肉，個個見到都出晒心心眼又流晒口水，可以一解思鄉之情 ﹗思香港燒味之情也。 皮脆肉嫩，肉質棉滑又肉汁微肉，咸香引人入勝，淨食或配飯都同樣美味。蜜汁叉燒，不乾不鞋，軟軟腍腍既口感，甜甜的都不錯。

印尼牛肉串燒雜錦，其實都幫襯左好幾年，依間印尼炒麵炒飯一向都廣愛大眾歡迎，次次都排龍。其實係因為香口串燒，唔係炒麵炒飯或係雜菜卷囉。

 

印尼牛肉串燒雜錦，雞肉串燒係最受歡迎，又賣晒喇 ﹗要等十幾廿十分鐘？我已排左十五分鐘，是但比牛肉我啦。依個雜錦都幾有趣，炒麵併炒飯併炸雜菜卷併串燒。

 

甜醬油強烈的印尼炒麵，椰菜勁多而麵得幾條，我要滾上大量辣椒醬先覺得滿意呢。炸雜菜卷即齋卷，炸得尚可，香脆外皮包著甜美雜菜，每口都充滿水份，連我依個食肉獸都覺得唔錯喎。但係炒飯濕淋淋，幾乎食唔到有配料或肉碎，味道又寡又單調，放棄。牛肉串燒，肉味濃又惹味香口，味道真係滿意，但又乾又硬又鞋，少點牙力都對付唔到佢呢。

 

希臘菜我真係非常好奇，到底有咩食架呢？什麼味道架呢？睇到西班牙海鮮炒飯好想試呢，但炒定都唔夠新鮮，都係忘記罷啦。好懷念廿幾歲時跟細舅父係英國時食既 kabab，就試您啦 ﹗

 

Beef kabab 土耳其卷，係咁架咩？改良左為美式土耳其卷？牛肉乾爭爭又無味，微暖。雜菜沙律有少少藍芝士醬，凍粟米粉薄餅又硬又乾又韌，救命 ﹗

 

轉左新酒店的第一個日出。間間酒店都係差不多，早早都返工又無假放，無 mood。早餐都係自備合味道最安全，鬼佬無味炒老蛋、勁咸腸仔、勁咸餐肉、勁咸煙肉，夠喇。

 

都係我個搭飛機由香港黎既合味道杯麵最好食，香噴噴 ﹗吸引四周羡慕既眼光啦。韓國雞肉粉絲杯麵，日日合味道都有少少悶，新嘗試。湯底濃濃雞肉味，粉絲勁爽滑，食得下喎。