因為航班delay左，我們到達酒店時已是黄昏六時多，也沒有什麼景點可以再去，於是決定悠閒地早點兒去食個晚餐。出發前問過很多人，個個都話'蟹道樂'只是一般，但第一次來大阪，點都要來這兒朝聖一下既！

 

在道頓堀內蟹道樂已經有本、中、東三間分店，巨型搖腳的松葉蟹模型非常易認，我們沒有訂位但立刻有位，被安排坐在窗口位置，可以望到道頓堀川，景色不錯。

 

打開餐牌，眼花撩亂，每款蟹菜式都想嘗試，於是決定揀這兩款蟹宴，一共十六道菜，雖然有些重覆，但可以試盡所有的螃蟹菜式，令人十分期待。

 

十六道菜式中，我覺得較特別的有蟹腳刺身，非常鮮甜，可惜'撩'好耐都只有幾條幼幼的蟹肉，吃得不夠過癮。

 

蟹羔亦屬必試菜式，啖啖都是螃蟹的精華，香甜豐腴，眨下眼就給我們吃光光。

 

蟹陶板燒，終於見到巨型的蟹腳可以啖啖肉，再淋上特製的醬汁，熱騰騰更是香口惹味。

 

茶碗蒸，蒸蛋十分嫩滑，蟹腳肉亦很鮮甜。

 

蟹天婦羅，炸得非常香脆可口，也不會太油膩，配上香菇汁十分美味。

 

燒蟹腳也是必食類，烤得火候剛剛好，肉質鮮甜帶淡淡的焦香味，別有一番風味。

 

蟹腳釜飯，蟹汁全滲入飯粒裡，再隨意加入湯汁，香蔥，山葵和醃菜，茶泡飯食落十分清新可口，轉眼就可以KO一大碗飯。

 

另外，水煮蟹腳一般，沒什麼鮮味。

 

蟹腳火鍋，沒想像中鮮味，但勝在有大量的菜蔬，可以中和一下全蟹肉宴的飽滯感。

 

最後還有用火鍋精華煮成的蟹粥，這時我倆的戰鬥力已近乎零，但仍拼盡全力消滅了它！實在沒想到我們真的能夠完成這兩份套餐，可能因為慢慢上菜，慢慢品嚐了兩個多小時，所以感覺也不算太飽滯，戰鬥力長食長有。

 

最後再最後，尚有生果做甜品，簡單卻清甜可口。

 

埋單9180+7020=16200Yen，一次過試盡多款蟹菜式，確實是非常抵食，絕對值得一試，只是，類似的菜式在香港都能夠嚐到，質素也差不多，新鮮感欠奉，故不會一試再試了。

我覺得Swissotel最理想便是它的地理位置，在飛機內折騰了大半天，一出地鐵站便是酒店，可以放低行李休息下實在非常感動;另外亦鄰近不少景點如道頓崛，黑門市場等，十分便利。

 

之前都在京都住過地鐵站上蓋，清晨五點便被列車的轟隆隆聲吵醒簡直是超級痛苦;但Swissotel 最低層的客房都在16/F，所以十分寧靜，全無噪音騷擾，景觀亦相當不錯。

 

房間設施非常貼心，不但非常寬敞舒適有足夠空間擺放行李和雜物，最高興便是賴在床上已經能控制到全個房間的燈光，可以懶洋洋足不落床玩電話然後瞓覺，即使落床去完厠所也是自動沖廁的，實在是能夠懶到極點。我最欣賞便是床頭櫃底那一盞小燈，不會直接射眼影響睡眠，但又能令人充滿安全感。Mini tea bank 的Nespresso 也是另一驚喜位，每早出門前，能夠品嚐到一杯香濃咖啡確實十分醒神。

 

但另一方面，Swissotel唯一美中不足之處也是它的地理位置，因為位於南海電鐵站，如果要坐JR或近鐵，就要另外乘南海列車接駁，或是走路5至10分鐘，若要拿着行李時又實在是麻煩了一點。

 

房價大約$1200一晚，屬於中高級，住過後整體上感覺非常滿意，值得推介。

太耐沒去旅行，出發前一晚居然緊張到瞓唔着，於是一早起身執好行李，準備充足兩小時前已經到達機場，哪知道去到發現我們班機無限期延遲，我懷疑是因為賣出太少機位，所以要同之後的一班JAL合併出發。現在即使是乘搭國泰，都未能保證如時起飛，實在令人非常失望。

 

無奈之下也只有超悠閒地再食多個早餐，在機場內周圍逛，連隻罐頭黃鴨都無聊影一餐，又在候機無限補水，現在機場內提供冷/熱/暖飲用水，實在是十分貼心的設施。等了三個半鐘等到發霉終於有得上機，對飛機餐沒什麼期待，整體上煙肉通粉叫做比咖哩海鮮好食少少，反而個日式冷麵令人有些許驚喜。

 

到達大阪時已經是下午四點幾，大阪五月份的天氣非常清爽舒適，薄長袖外加一件薄褸已很足夠。過完海關取回行李，這時便是'乘換案內'大派用場的時候，只要輸入起點和終點，立刻顯示可供選擇的列車班次，還比較好哪一班'早'(最早到達)/'樂'(最少轉車)/'安'(車費最便宜)，有時候車資最貴的班次，都未必代表最快到達目的地，例如今次我們選擇了920¥的空港急行，就快過1430¥的rapi:t，大約四十多分鐘，就到達南海電鐵站，一出閘便是我們的酒店--Swissotel。

親友不時都會去日本玩，不過去親都好少會揀食鐵板燒，對被稱為「鐵板始祖」o既「元祖 鉄板焼ステーキ みその」（Steak Misono）更加係聞所未聞，小肥其實都係做旅遊資料搜集時先認識到老店，眼見其中一家分店就喺酒店對面，步行都只需五分鐘，所以亦急不及待要去試一試。由於長輩都覺得晚餐食鐵板燒難以消化，今次就決定先嚐午市都有供應o既鐵板海陸大餐。

位於大廈高層o既鐵板燒專門店樓底高高，大堂中央有個方形o既開放式鐵板吧，有多個高櫈圍繞著，近窗位置及廂房則擁有無敵靚景，室內o既燒味一啲都唔勁，明顯抽氣系統強，環境可謂高雅大方，衛生潔亮。我地人多，又一早訂好位及套餐，故亦被安排入座一間榻榻米房內，私人空間更足，仲有專人服侍及烹煮料理，團友們都覺得好享受！

Lunch Set B（4,860円）：精選午市海陸套餐「B」每客均包有130g牛扒、海鮮、沙律、燒野菜、白飯、麵豉湯、醃菜及咖啡。師傅即場喺食客面前燒煮靚魚及牛扒，包保夠哂新鮮熱辣辣。燒魚用上柚子醋同薑碎醃煮，魚肉幼嫩，入口酸甜，很是開胃。燒煮牛肉前，師傅會先問各人要幾成熟，小肥最愛見紅，當然係越生越好啦！牛肉粒鬆軟多汁，輕輕點少少鹽，再連同脆巧金黃o既蒜片跟白飯食用已夠香濃味美。

海陸午餐有齊紅肉、海鮮、野菜，份量啱啱好，配埋少少清酒就更上一層樓。為答謝大隊光臨，餐店仲每人送咗個木造清酒杯作為留念，認真客氣。

為咗滿足團友可狂購日本名牌服裝，午飯後揸fit人就帶隊前往青山區度行街街。行到咁上吓，消耗咗不少腳骨力後，小肥就跟住旅遊書推介，同班長輩們去區內一間頗人氣o既cutie咖啡店「Q-Pot Café」嘆咗個下午茶。

設於橫街o既精品咖啡屋其實係同名o既「Q-Pot」首飾店所開辦。店主以其精美o既首飾設計特製出多款飾物甜點，賣相極之的骰可愛，而且極富藝術感。

小店粉色o既裝潢柔和得黎好有童話feel，都幾女性化，男生入到去或許會週身唔自在架。天花上o既倒吊茶壺燈飾正正道出店名「Q-Pot」，趣緻得很。店內o既服務生清一色為女生，個個都咁年輕溫馴，襯到絕呀！

多頁餐牌上o既項目全附有彩圖，唔識日文都一樣咁簡單易明。由於十二人都有意回酒店享用包咗o既歡樂時光酒水小食，我地就各自點選飲品，其中幾杯就跟埋個下午茶套餐，甜品上枱時先自行分黎食：

Ring Plate（1,650円）：戒指甜品真如其名，以馬卡龍及朱古力喺隻印有靚靚玉手o既碟上擺成戒指o既模樣，手腕位置仲好鬼馬地加咗條食得o既朱古力白珍珠手鍊，實在吸精，連過七旬o既蕃薯uncle見狀都忍唔住要影返幾幅相留念。朱古力味馬卡龍香濃鬆化，中間夾有幾粒閃令令o既朱古力寶石，咬落軟滑帶脆，絕對屬好睇又好食之選！

Necklace Plate（1,390円）：甜品以杯仔蛋糕作鍊墜及白滑o既忌廉唧出珍珠頸鍊，加配靚碟營造出美艷o既視覺效果。杯仔蛋糕微甜唔溜，個人只係略嫌糕身偏咗少少乾，所以扣咗一分食物分。

家人近年到東京遊玩都必定會入住「東京凱悅酒店Hyatt Regency Tokyo」，貪其地點夠就腳，會所層o既房間企理寬敞，除咗包有早餐之外，由朝到晚於不同時段更可喺會所酒廊享用咖啡、汽水、小食、酒品等，就算上次遇著大風雪都唔洗驚冇野食或者係悶親。

隔咗一年，酒店好多方面都明顯升哂呢，例如房間內o既地毯、日用品、及雪櫃內o既零食項目。團友們最興奮就係見到會所層o既歡樂時光多咗靚酒選擇，食物中除咗芝士拼盤及多味熱食、冷盤、小點之外，每位貴客仲有專人呈上高質美味o既海鮮或牛肉主食一客，新鮮熱辣，時光當真極度歡樂哦！

親友全為酒客，個個退哂休後太陽未落山都已經可以嘆返幾杯，晚飯時間更加唔洗講啦，所以大多都愛食香口野。記得家人最近都話想試多幾間不同o既食肆，喺日本又冇乜點食過天婦羅，今次就專登揀咗間離酒店不遠，而且有成八十幾年歷史o既老店「天ぷら新宿つな八 総本店」，一嚐聞名o既天婦羅美食。

內外同為木造o既小店和風味濃厚，直入已可見師傅喺左方o既開放式廚房忙碌地炮製天婦羅菜式，令人期待萬分。由於我地一行成十二人，訂座時接線生已道明必需預訂埋套餐，以便師傅準備餸菜，小肥就應推介為全團人點咗個「江戶前膳」。到步並埋位後，各人都只需點上飲品就可以等待飯來張口。

江戶前膳（4,200円）：天婦羅套餐包有明蝦、墨魚、魚貝類兩種、蔬菜兩種、星鰻、爽口小菜、炸什錦、白飯、味噌湯、漬物小菜。天婦羅外層層炸皮不但乾巧脆身，入口更覺鬆化非常，老店o既師傅功力果然深厚！當中個人最愛同樣爽脆彈牙o既天婦羅蝦同野菌，最有驚喜必選凍飲而又甜甜o既粟米湯，不過最開心都係聽到同桌o既長輩邊食邊讚天婦羅老店o既出品高質又抵食！

餐廳只有十幾個位, 早上太陽照入店內, 好有日劇FEEL, 個pancake好食過Gxxx個間,價錢都平D

懷著滿滿期待的到訪，小店在一商場後的小巷，幸好手握手機上的Google Map App還不太難找到。

甫到門口，已有三位日本人在詢問店員有關餐牌上的款式，而店員亦有細心回應及介紹選用的食材。(我是懂一點點日語的啦～)
我準備進店時，店員以閃電速度截停我! 我還以為店要打烊! 
噢~原來是要在門口先下單, 再進店內享用的。(以為被爹發現了,嘻嘻!)

早早已做了功課心裏選好了招牌的 － 牡丹蝦海鮮丼!

三只眼睛亮晶晶的牡丹蝦肥美又新鮮, 一口氣吃了兩只, 還真要回過氣來再下一城~
再試試海膽, 有著一股微咸的海水味道, 夾著燈光下顆顆耀目的魚子, 每粒都爆出鮮甜的魚油香。
啊~ 口中充滿了幸福的感覺! 
相信我, 即使再要偷偷瞞著爸爸, 我也要再來! 

仁川機場一出海關, 馬上去閘口旁的便利店買張T-money, KRW10000一張, 包含咭費KRW3000及KRW7000餘額。

T-money相等於香港的八達通咭, 方便搭地鐵, 巴士及購物, 用它乘地鐵及巴士仲有些少優惠添!

在仁川機場出首爾, 可乘機場巴士或機場鐵路, 巴士可在出境大堂外的巴士站乘搭, 不過先選定下車地點的巴士路線才好, 而機場巴士又分優等和一般兩種，優等機場巴士座椅較一般寬敞。但要注意市中心地點，有多台車同時行經之可能，這時可以自由選擇要搭乘優等或者一般巴士。 而費用大致如下:

優等: 仁川->金浦機場6,500韓元 ; 蘆原，倉洞13,000韓元，其餘首爾各地皆為14,000韓元。
一般: 仁川->金浦機場5,000韓元 ; 首爾各地8,000~9,000韓元。 

雖然搭巴士較方便, 點對點落車不須拎住行李走上走落, 不過我就較推薦乘仁川至首爾的機鐵,  好處係唔怕塞車同慳時間, 而且價錢比乘巴士平差唔多一半, 唯一唔好係要拖行李上落站, 但大致上機鐵站都有自動電梯及升降機設備(注意其他較舊的地鐵站就冇自動電梯或升降機), 當然要不用再轉乘其他地鐵為首選,  及要衡量所住酒店位置如何而決家搭機鐵或巴士呢!

而機鐵亦分兩種, 第一種名為是直達列車, 由仁川直達首爾站, 當中完全冇途經站停, 車廂較豪華及有free wifi, 票價為8000韓元/位; 第二種係一般列車, 由仁川機場出發, 經9個站, 第10個就係終站首爾站, 車程約1小時多些, 與首爾一般地鐵車廂冇異, 但票價就係4150韓元, 如為遷就乘搭機鐵, 就要在機鐵站附近搵住宿, 較多選擇為弘大站, 西江大站 (近新村站) 及首爾站。

首爾地鐵站的路線繁多, 就以明洞為例, 可在綠色線的乙支路站或藍線的明洞站下車, 一個地方有兩條線嘅站, 有D 站仲會重疊在同一地區, 所以要注意出入口地點是否係自己要去嘅地方, 因為有D出口行錯或出錯閘, 係返唔到轉頭的, 我哋亦在弘大站及鍾路站啪錯咭出錯閘而要兜大圈走或再啪多次咭(即比多次錢)而出到所須上落地面出口, 雖然話可以找地鐵職員開閘給乘客, 但很難找地鐵職員, 要按對講機對話, 真係雞同鴨講, 唔想煩咪再 "嘟" 咭囉。

首爾地鐵月台或售票處嘅冷氣只在標準溫度或以上, 特別在月台處, 完全感覺唔到冷氣, 車廂就OK, 好過日本大阪的地鐵同電鐵的弱冷氣, 所以夏天乘地鐵都唔係好似香港咁涼爽。

由於我哋係搭機鐵到首爾, 所以揀住宿, 都係以機鐵沿線站點為首選, 以首爾站, 西江大站及弘大站為主打搜尋, 最後選定了弘大站一帶, 在出發前一個月就算定了呢間 This is Guesthouse。

This is Guesthouse  距離地鐵3號出口約10分鐘步行路程, 位處住宅小區內, 亦算寧靜, 只是民宿冇招牌, 所以到前要查定Google Map,  搵定條路點樣走。在3號出口走出, 一路直走, 沿途會見到有一路軌小公園及一片小草地,  兩旁是行車小路, 行至第4個車行街口及見到一間叫Yoger Presso 的餐廳, 就轉左走至交通燈位過對面馬路, 然後繼續向前走(不要向左或右走), 會經過一個叫東橋兒童公園及對面有一警局, 那就走對了, 由此再走3個街口, 就係延南路3街(Yeonnam-ro3-gil)街口了(見照片) 轉入及見到右面第一個小巷口的盡頭就係This is Guesthouse了, 如在街口有招牌指示就易見好多。如怕找不到, 可先約民宿主人Mr. Lee在地鐵站3號出口等都可以。

由於中東呼吸綜合症, 當日入住只有我哋一家三口同一對新加坡女孩子, 所以更覺寧靜, 但對主人Mr. Lee 就係好大嘅損失, 不過佢都算樂觀面對整個退房潮, 佢仲奇怪問我為何仲嚟首爾, 我梗係答佢支持首爾旅遊業啦!  

Mr. Lee 是一位約三十多歲的肥先生, 能操流利英語, 好幫忙, 整間三層民宿都係由佢親自參與裝修, 當時佢間民宿有D地方仲未完成修理, 佢一個人自己做, 好投入囉! 而執房佢就聘請咗位泰藉姐姐幫手, 泰藉姐姐年約三十歲, 樣貌不錯, 佢同我講都係嚟咗首爾一個月, 要適應一下, 特別係同韓國人溝通。

整間民宿是3層高的小房子, Mr. Lee 會比密碼兩個給客人, 一個是由外面入屋, 另一個是由屋內大廳上樓, 入房就用拍咭入。房子係冇升降機的, 所以要拿行李自行上房。我哋住2樓的三人房, 所以唔覺上落樓梯太辛苦。

房間以藍色為主調, 房內有三張單人床, 有小雪櫃, 鞋架及一個三層架, 冇椅及枱放嘢, 亦冇電視嘈吓, 所以整間房好簡單, 房內浴室算寬敞, 只係冇提供沐浴露及洗頭護髲設備, 所以去了弘大的Diaso買, 都係6000韓元三支(每支有100ML) , 而椅子就喺隔離的五人房攞嚟用住先,  床, 枕及被都唔錯, 乾淨企理價錢抵, 每晚的三人房都只是港幣461連稅, Agoda訂, 好抵住。

晚上此處靜中帶旺, 有不少餐廳在此, 所以完全不愁食方面, 中西韓日菜式都有, 樣樣都想試, 但都唔夠時間, 附近亦有便利店及一間Homeplus 小超市, 好方便。 

好可惜, 呢間民宿在2016年結業了。

check in 完民宿, 馬上出外發掘弘大區的美食, 當時係傍晚5點左右, 在弘大當旺的和諧廣場走走, 和諧廣場大多是食肆店舖居多, 已是放工時間, 所以食肆開始人多等位, 走了一個圈, 見咁多放工一族特別係OL在等位, 我哋都等埋一份啦.......

Myth Jakbol 原來在首爾是人氣食店, 後來在TVB"街坊廚神" 韓國篇都有介紹。此店主食推介係鹵豬手, 非常啱華人口味, 特別係鹵豬手的汁料, 同我哋華人做嘅味道十分相似。

我哋叫了一個適合3人享用嘅原味豬蹄套餐, 包含有凍湯一鍋, 原味豬蹄, 醋汁沙律及3款醃菜, 29000韓圓。

先講原味豬手, 原隻薄切片上碟, 唔辣, 汁料不但似華人的鹵水汁, 而且味道做得好好, 肥瘦均勻, 整片豬蹄入口即感受到肥肉爽瘦肉入味, 一點肥膩感都冇, 真係正到爆;

雜菜沙律, 用一個長碟端出, 好有份量, 內裡另有生洋蔥及小蕃茄, 最驚喜係佢嘅醋汁, 簡直係整個沙律嘅靈魂, 我到現在仍然回味無窮;

凍湯, 起初不知中間啡色一團是什麼, 以為是材料之一, 點知用湯匙一撥,  才發現呢團嘢是結了冰的湯底, 其實湯的味道清淡, 全冇肉味, 材料有青瓜, 大豆芽, 白蘿蔔等蔬菜, 不過最好係完全唔辣, 這可沖淡豬蹄的濃味及消暑之用, 據知冬天就會改為熱湯+白麵條上。

整體係我在首爾所食的韓菜中最難忘的一餐, 無論味道, 價錢及份量都係100分 。推薦呀!

食完豬手, 沿住弘大東橋洞慢走, 在Diaso 買完個人護理用品後, 見對面有一間叫Mango Six的Cafe', 樓下Banner上的甜品相都係以芒果為主, 愛芒的另一半同港童見到就已馬上跑上Cafe' 即試。

可能已是9點半後, Cafe'人流不多, 在室外的坐位較多人坐, 可能可吸煙掛, 另一半同港童馬上出去收銀處點了一客芒果雪糕沙冰, 承惠13000韓圓; 嘩!  折實成"舊水"港幣食一個甜品, 咁貴嘅, 點知送到過嚟, 成個湯碗都裝滿, 雖然唔係大湯碗, 但用香港酒樓食飯碗盛起, 都可分到4碗, 份量都算係值番; 至於味道方面, 芒果雖然算多, 可惜係一個酸芒果, 唔夠甜, 好彩係個雲喱那雪糕縱和番個酸芒果, 加上沙冰內加了奶昔, 都算唔錯, 其實酸芒果都可幫助消化呢!
 

6月27日第一個行程, 就係嚟明洞shopping, 最開心嘅係港童, 樣樣都啱買, 最後連上首爾塔同4D藝術館都reject 埋添, 可想而知明洞幾咁吸引年青人啦!

明洞係集中了韓國各大品牌化妝品店, 潮流服飾, 百貸店及免稅店集中地, 高中低檔次貨品都有交易, 而連鎖食店及特式食店都有分店, 而且小販攤檔亦集中在步行街的中央位置, 有食有賣, 有平有貴, 鍾意shopping 同掃街嘅當然在此忙個不停啦!

PS : 由於6及7月不是韓國士多啤梨嘅季節, 去了多個熱門連鎖食店都吃不到, 但在明洞小販檔竟然比我搵到士多啤梨糯米糍, 雖然貴了點, 要成3000韓圓一粒, 但實在可一解想食士多啤梨的渴望, 而且味道相當不錯, 好甜呢!

上午11點半嚟到明洞, 連早餐都未食, 在中央街行咗個圈, 見到詹姆士芝士排骨個招牌, 馬上走上去食晏喇!

我哋叫了一份輕量芝士排骨(14000 韓圓) 同一份中量芝士排骨 (16000韓圓),  再加一份炒飯 (1000韓圓), 同三罐桃汁(2500韓圓/罐), 合共承惠38500 韓圓。

一鍋滿佈芝士上鋪了約6件排骨, 唔算好大份, 初時想起其他韓國食肆份量, 詹姆士就算小份量了, 叫咗兩份就只得6件排骨, 望落好似唔係好夠食, 後來加了炒飯, 就差唔多了, 可能芝士較飽肚吧!(如喜歡食肉, 真係要叫每人一份嘅量了) 燒排骨 + 芝士捲埋一齊, 果然配搭我好好, 芝士係整鍋嘅主角, 令燒排骨更好味同更膩, 所以不能經常食呢! 完全有犯罪感呀!

炒飯有兩種選擇 :  魚子炒飯 或 白飯加紫菜, 我哋選了後者, 留番些少芝士, 加隻蛋就可炒出完美的炒飯, 個肚好滿足了。

PS : 詹姆士芝士脊骨 其實有好多分店, 在弘大已有兩間, 新村, 東大門, 梨大及惠化都有分店, 去開邊處, 咪喺嗰處食囉!

行咗成日, 買到冇哂現金, 順便去埋中國大使館旁的大使館找換店唱埋錢, 就沿住大使館條路行落去, 去到今晚食晚飯的餐廳 - 王妃家。

王妃家主要是食韓式定食, 有韓牛, 豚肉及醬蟹等, 今晚我哋主要食韓牛。

王妃家在明洞有三家分店, 街頭街尾街中間都有, 佢都係以做遊客生意多, 雖然疫症令首爾遊客大減9成, 佢亦深受影响, 當晚佢哋都有幾枱客人, 但就冇本哋客喎, 唔知係咪因為遊客價呢?

我哋今晚就食咗整個首爾旅程最貴嘅一餐, 有專人燒埋 :

1) 牛脊肉 150g 34000韓圓, 此韓牛肥紋分佈均勻, 上桌時侍應話此牛肉不會預先醃製, 佢烤好後, 可以海鹽或醬汁點食, 牛味會更突出, 果然冇錯, 不肥不膩, 烤得好均勻, 好食!

2) 醬牛排 150g 33000韓圓, 呢款係侍應推介給我哋嘅, 佢話呢款較多港人點選, 好啱我哋口味, 烤後牛味都唔錯, 醬料果然係容易接受嘅味道, 雖然此牛係預先醃製, 但侍應話絕對係新鮮韓牛, 食後真係喎, 好得!

3) 牛肉併盤 150g 32000韓, 係韓牛大雜會, 侍應講咗包含咗牛嘅幾個部位, 但已忘記了, 總之一句講哂, 好味!

其實每份牛都只是150g, 雖然有青菜包裹韓牛食, 但都係唔夠飽麻, 所以就叫了三碗紫米飯(佢哋就冇白飯供應),  食完都未有7成飽, 咁都好嘅, 咁就可以比籍口食多一餐。

食完韓牛, 便乘地鐵回弘大返民宿, 在3號出口走出回民宿途中, 有好多食肆, Cafe', 西餐廳及韓式餐廳, 好多都好吸引, 由於食韓牛唔係太飽, 港童已嚷著要食宵夜, 後來經過呢間Cafe' Bonjur, 就入去睇吓有咩蛋糕麵包, 可能真係比較晏, 好多麵包都賣哂, 好彩仲有幾款Cake, 我哋就買了以下3款蛋糕做甜品:

1) 西柚芝士蛋糕 5800韓圓, 係三個蛋糕中最好味嘅, 估唔到西柚同芝士Cake 都可以咁夾, 比食檸檬芝士Cake更好, 唔太酸, 中和咗芝士嘅膩, 而西柚又係我至愛嘅生果, 好like呀!

2) 蕃茄芝士蛋糕 6800韓圓, 係三個蛋糕中最貴嘅, 又估唔到蕃茄可以用嚟造芝士Cake, 蛋糕內亦有蕃茄味道, 其實呢個蛋糕味道唔錯, 但我就較鍾情西柚芝士Cake;

3)  Tiramisu 6500韓圓, 係三個蛋糕中最差嘅, 可能放在雪櫃太耐, 唔係太新鮮, 只食到酒味, 整個Cake嘅外形塌咗, 好唔得!

由於已過9點, 所以未有試咖啡, Cafe' Bonjur 室內佈置簡潔舒適, 仲有圖書角給客人挑選圖書閱讀, 而室外亦甚有藝術氣色, 一座兩層的房子改成Cafe', 無論地下, 1樓及天台都有精緻嘅藝術品裝飾整個Cafe', 店主實很有心思又落本, 在此優雅嘅Cafe'品嚐食物, 簡直係一種享受呢!

28-06-2015 中午出發, 當日陽光普照, 走出延南路, 慢慢欣賞延南洞文青公園。

由民宿行去公園, 首先會見到中央位置是一組噴水池, 連綿兩條街, 水池邊是小石路和青蔥的樹苗, 可讓行人悠閒散步, 再向地鐵方向走去, 一列小草地有假路軌作點綴(我覺得以前係真路軌), 好有書卷氣息, 果然朝早有年青人坐在公園兩旁的Cafe' 又或在樹下看書, 而每晚亦見好多年青人坐在草地上拿著啤酒邊飲邊傾計,  可能正值夏天, 晚上亦有涼風陣陣, 佢哋都甚為享受在公園的休哉悠哉, 嚟到弘大此區, 都覺回復以前的 "青蔥歲月"。
 

慢遊完延南洞文青公園，已經是12點幾，係時候搵食喇！

今次就去公園另一邊嘅小巷探吓路，見了有幾間西餐廳在此，點指兵兵，就揀咗小屋第二層嗰間，枱不多，2人枱約10張左右，老闆係識講英文，真好！可以溝通吓。 

老板約50多歲的紳士, 好nice, 佢經常去中國, 特別係上海同廈門係常去嘅城市, 仲講好鍾意食中國餐, 佢介紹我咃食如下 :

1) Seafood Cream Spaghetti, 13000韓圓, 非常值, 佢哋嘅海鮮唔係急凍海鮮如魷魚, 青口或小蝦等已失去鮮味嘅所謂海鮮, 而係新鮮蟹肉同蝦, 好豪華呀!個忌廉汁煮得好好味, 而且份量都好多, 仲有多兩片法包添!

2) Handmade Hamburger Pan Steak 13000韓圓, 漢堡牛肉係用韓牛造的, 煎後牛肉好香, 調味相當好, 我哋選唔辣, 加埋沙律菜同白飯, 好大碟呢!

3) 飲品係檸檬汁及橙汁, 各4000韓圓, 兩者都好似果汁先生那種, 雖然唔係好抵, 但我哋只叫了兩個主菜三人享用, 唔叫飲品好似唔係咁好, 不過好大杯, 我哋都飲唔哂!

總括而言, 海鮮忌廉意粉好有驚喜, 除好多蟹肉外, 忌廉汁調得好, 整個餐廳氣氛舒適和諧, 老板同侍應待人親切有禮, 如再去首爾, 一定會再到。

 

選了先由安國站2號出口向前直上, 打算行一個半圓, 然後在附近吃午飯後, 再行入三清洞走埋另一邊的韓屋區, 就走番安國站行去仁寺洞。

由安國站2號出口直上, 沿路經過市政府的裁判所, 零星的工藝品店, 較多的是租借韓服店, 港童已嚷著要試, 後來食完晏, 挑了一間韓服店比佢一嘗心願, 就係咁冇時間行埋三清洞那邊的韓屋。

由於韓國一向深受中國文化影響,  佢哋好多傳統嘅文化亦同中國相同, 如中國節日, 飲食習慣, 醫學, 建築等等都同中國文化有著關係, 而韓屋的建築風格跟我哋中國的簡直如出一轍。

在韓屋區不單只看韓屋建築群, 亦有較多飾品店, DIY手作店, 如皮革店, 自製併布等特色小店, 當然亦有好多小型Cafe'及果汁店等, 所以唔係只斋睇歷史建築, 仲可以走入租韓服店租番套韓服, 以韓屋作背景自拍靚相留念, 以我所租那間嘅租金, 租出外約兩小時, 約30000韓圓, 只租在店裡影樓拍照就約20000韓圓, 以上是不包梳頭及化妝, 要另加錢的。


 

由Bukchon-ro 的北村韓屋慢走至三清洞入口, 不經不覺已是三點, 另一半話好肚餓, 冇力行了, 就在附近見到北村百年人蔘雞的logo - 突眼雞, 我哋決定就在此午餐。

原本計劃在遊覽北村後品嚐人蔘雞, 已鎖定兩間 : 1) 北村百年人蔘雞湯 2) 土俗村人蔘雞湯, 由於後者未有到達, 而前者就在景福宮附近, 同我哋有一段距離, 所以取了近者。

北村百年位於安國站2號出口附近, 擁有清幽的室內外環境用餐區,  室外被一片青蔥植物包圍, 環境很好, 可惜夏天有蚊, 而且6月尾的首爾下午亦有30度氣溫, 所以梗係留在室內用餐啦!

我叫了一個普通人參雞湯及黑蒜人參雞湯, 當然有2份泡菜及蘿蔔, 普通人參雞湯味道清甜, 小雞內依舊有糯米紅棗, 而人參雖然不是名貴種, 但亦甘甜非常,雞雖不肥膩, 但雞味欠奉; 黑蒜人參雞湯內有4粒黑蒜, 湯味則比普通的較濃, 黑蒜連雞湯一起烹調的, 所以湯有黑蒜的甜味, 人參味就被削弱了, 不過論人參味就以普通的較好, 黑蒜湯底反而一般而已。

其實韓國食肆好守原則, 每人最好叫一份餐, 但由於我哋一路行就一路食, 個肚實在都經常半飽, 所以至叫兩份餐免浪費, 再加每人一杯飲品, 令有原則嘅韓國人都認為每人都有幫襯麻。
 

影完韓服照, 慢慢行落仁寺洞, 走至地標建築 - 森吉街(Ssamzigil), 此處就係仁寺洞的中心點, 整條仁寺洞路都係步行街。

仁寺洞的店舖主要售賣工藝品或記念品為主, 租韓服的小店亦不少, 感覺文化氣息較濃厚, 食店亦以韓式為主打, 如想買紀念品, 可在仁寺洞尋寶, 特別係在森吉街(人人廣場),  裡面的小店售賣很多特色文具, 飾品及工藝品, 價錢有平有貴, 唔幫襯都要上去window shopping一下, 包你大開眼界呢!

沿仁寺洞路漫走, 除了有較多工藝品店及精品店外, 當然亦有一系列韓國化妝品牌店駐守, 在這群商店對面, 有一間韓式糕餅店, 名字是韓文的, 相片1有韓文招牌。

糕餅店內的小糕餅賣相十分似日式的草餅, 外形很討好, 其實味道都很似, 餅餡有紅豆, 豆沙及綠豆蓉, 甜度亦可接受, 我哋買了幾款, 有些雪凍了, 味道仲好, 但保鮮期有限, 所以未能買來作手信, 此店除了賣糕餅, 亦有賣甜品, 可以坐低食架。

由於在鍾路地鐵站內行錯方向, 攪到差唔多9點至返到弘大, 在弘大站3號出口直行至大路口, 見到間宵夜火鍋店充滿人氣, 年青人又多, 招牌是寫韓文, 應是食韓式地道火鍋。

餐牌有中文, 亦有相片, 讓外國人容易點餐,  我哋點了一客豚肉+鮮魷魚火鍋及一客鴛鴦蛋餅, 由於唔記我得叫走 "辣" , 整鍋都是 "紅"色湯底, 馬上問可否換少辣, 侍應亦知我哋係遊客, 有禮告之已順應情況幫我哋少"辣" 了, 可惜另一半依然頂唔順而辣到"飛"起, 狂飲三大支茶, 我同港童尚算頂得住; 事實上, 個辣鍋材料相當豐富份量又多, 除了豚肉和魷魚外, 蔬菜如椰菜, 紹菜及洋蔥特別多, 而由於店員見我哋"辣到飛起", 免費給我哋三碟芽菜解辣, 真周到呢!

至於鴛鴦蛋餅, 雖然很普通, 但蛋味豐富, 又可給我哋解辣, 當然欣賞呢!
 

29-06-2015, 今日算早出門口, 11:30AM, 由民宿出去轉右方向走, 周圍遊蕩, 經過此間Cafe', 見裡面都坐了四五枱客人, 於是就選此間作早午餐解決之所。

朱古力Latte 4500韓圜, 起初飲時味道剛好, 但飲到尾段就好甜了;

士多啤梨乳酪 5500韓圜, 終於叫到有士多啤梨的飲品, 酸"May May"的, 好好味;

Recotta Cheese Salad + Ciabatta Bread, 11500韓圓, 主角當然是Ciabatta Bread (一種意大利麵包的名稱)及Recotta Cheese, 芝士包住沙律菜及已加沙律醬的薯仔, 加埋提子乾, 麵包鬆軟煙靭, 唔錯;

食完個完美嘅Brunch, 就行出去弘大的Yangtwa-ro大街乘巴士603號去廣藏市場, 巴士上有韓, 英及中文廣播提醒乘客下車, 所以下車不成問題。

廣藏市場咁出名, 真係要拜韓國節目 - Running Man所賜, 而市場售賣貨品種類繁多, 有床上用品, 衣服, 生熟食品, 乾濕貨品等, 就連工藝品都有售, 真係一處包羅萬有嘅大市場。 

由於正值1點多鐘, 烈日當空, 氣溫十分高, 整個廣藏市場又冇冷氣的,  走過熟食區, 見到炸及烤的熟食, 完全冇胃口, 但在熟食與醃蟹區之間有一檔賣魚旦魚條批發小舖, 門口有售關東煮的魚條, 大大條, 1000韓圜, 非常好食又彈牙, 我哋只幫襯此間, 跟住就向賣生果區出發........

老實說, 韓國的生果售價都幾貴, 同日本價錢差唔多, 初頭以為廣藏市場咁出名而提高市場價錢, 但現場見都幾多韓國本地人幫襯, 之前亦在超市睇過吓生果價錢, 見都算比超市平D, 就買了小梨子, 提子, 紅蘋果和西瓜, 約港幣300元, 另一半話同在香港的價錢差唔多, 不過嚟到都要親身試吓嘅......

生果食後感 :  

小梨子酸甜參半, 個人覺得台中的較好同鮮甜;

提子樣子似巨峰, 味道亦相近 - 好酸呢;

紅蘋果, 清甜爽脆, 同中國出品差唔多, 只冇日本黃林蘋果咁香;

西瓜, size比馬來西亞西瓜大, 不過我哋選了個細碼點, 非常多汁甜美, 係四種生果中最好食嘅。
 

去完廣藏市場, 都只係兩點幾, 天氣都幾熱, 而且行咗四日, 成身都散哂, 真係覺得好勞累, 另一半提議話去汗蒸幕體驗吓, 馬上whatapp問香港嘅朋友, 佢就叫我去呢間易去價錢平嘅Sparex。

Sparex就在東大門Good Morning City地庫B3, 乘地鐵就在東大門歷史文化公園14號出口一出就係, 價錢非常抵, 5400韓圜, 呢個係非繁忙時間價錢, 門口幾位女職員係"阿珠媽" 年紀, 比咗套制服給客人, 我咃就分男女進入更衣室, 入更衣室前, 要把鞋子放進鞋locker, 更衣室另有locker放衣服, 由於入了更衣室後, 就不能拿出電話, 裡面亦禁拍, 我哋一路都冇攞手機出嚟影相,  所以此段相片欠奉。
 
Sparex 唔係豪華型嘅韓蒸幕, 係大眾化類型, 所以受好多韓國上了年紀的人士歡迎, 環境算乾淨, 只係桑拿室好舊, 感覺唔太乾淨外, 其他都OK; 沖涼係冇浴簾或間隔門的, 完全係大解放, 有花灑及坐式沖身, 旁邊有小膠盤供應, 在花灑沖涼位中央位置有三個浴池, 兩個熱嘅, 約40度, 另一個就水喉水溫度兼有按摩的浴池, 而另落一層就係大蒸房及休息室所在地, 蒸房共4個, 各個都係不同的高溫房, 冷凍室共一個, 裡面是零度, 而休息地亦以韓式古代裝修為主, 有餐廳, 價錢唔貴, 我咃買了雪糕, 都係超市價。

如果諗住小休吓, 平平地初試韓蒸幕,  可以到Sparex, 如平時享受慣豪華慣嘅, 就唔好揀呢間了!

去完汗蒸幕, 行過對面就係首爾地標 - 東大門設計廣場, 外型設計非常前衛時尚, 但當中又有歷史意義文物出土, 為咗文物及現代建築, 當然要過去謀殺吓我部相機啦!

設計廊內有售賣來自韓國及外地的設計家的物品, 眼見有文具, 玩具, 家庭用品和裝飾擺設等.....亦有定期嘅展覽, 只係要另比錢參觀, 唔買都嚟欣賞吓呢度嘅建築設計啦!

好快行完東大門設計廣場, 就行去two two 東大門店食炸雞，此店亦有中國籍店員為各位客人服務， 我哋叫了一客 "鴛鴦炸雞"，有外皮金黃酥脆的原味炸雞和招牌為辣味炸雞兩款，店員話係呢處最有人氣嘅招牌炸雞，兩種口味嘅炸雞肉質都幾滑嫩多汁，在原味炸雞淋上Two Two炸雞獨門調配的醬料，醬汁辣中帶甜，融合雞汁與外皮的辣味，又香、又脆、又辣、都幾好吃！

港童就點了一客去骨炸雞, 但就好"鞋"口, 可能大部份都係雞胸肉吧!  另叫了一大杯啤酒, 果然同炸雞非常配合, 另外鮮果沙律裡的水果非常新鮮, 有蘋果, 梨, 提子乾, 小蕃茄及芒果, 只係沙律醬較多, 附上清爽高麗菜絲配沙律汁，爽口解油膩，口感清爽的醃酸蘿蔔，吃起來清脆開胃，十分消暑，和其他韓國餐廳一樣都是無限供應呀！

 

在民宿一出門轉右邊行至街尾, 見到呢間cafe', 最吸引我哋係門口張大banner, 有個好靚嘅士多啤梨雪糕窩夫作招牌, 我哋就入去早餐+午餐了。

cafe'裝修好有書卷味, 整間Cafe' 面積細細但有好多書及雜誌襯托著, 感覺優閒舒適; 當日裡面嘅職員只有3名, 3位都似是90後的年青小伙子, 我點餐時他們都不能簡單會答我, 只能yes or no, 唔緊要啦, 最緊要佢哋都非常有禮貌, 由於6,7月已不是士多啤梨產期, 所以自然令我哋有點失望, 佢指住另一幅芒果窩夫的相片, 示意叫我哋order呢款, 好, 反正我家都是芒果迷, 好可惜, 佢哋又同我講唔夠芒果給我做窩夫, 但會用其他嘢補償云云..... 最後原來係.......

我哋叫了如下飲食 :

1) 原味窩夫和芒果窩夫 : 份量好大, 很脆, 芒果因不夠, 店員送了兩個大雪糕球, 變成芒果雪糕窩夫,     芒果較酸, 雪糕配窩夫當然係最夾啦;

2) 美式涷咖啡, 冇特別之處;

3) 涷檸茶, 以解喝之用

窩夫雖然大大件, 雪糕好好味, 不過窩夫仲未達到好脆口嘅水準, 有可改善的空間。

 

食完窩夫飽飽哋, 由弘大慢慢散步到合井, 一條直路, 好好行, 約慢行20分鍾就到, 當然就係去合井Homeplus 超市掃貨啦!

Mecenatpolis Mall 除了包含Homeplus 呢個大品牌超市外, 仲有好多時裝連鎖店, 家品店及食店, 另外亦有樂天影院, 室內以店舖為主, 室外型造成一個優閒花園, 小朋友可暢懷遊玩, 旁邊當然以食店咖啡店為主, 很適合家庭消閒。

Homeplus 就在Mecenatpolis Mall 地庫, 面積都幾大, 包含超市同小型food court, 最開心係買到最愛嘅生果及零食, 大家買得好開心。

買完手信, Homeplus 超市旁邊係一個小型food court, 只有6間小食店, 以韓日式為主, 我哋見門口的食物模型同價錢好吸引, 就入去試吓。

我哋各自點了自己嘅選擇如下:

1) 炸豬排喬麥冷面定食, 6000韓圜, 唔錯, 喬麥冷麵好多, 炸豬排很脆;

2) 海鮮湯麵 X 2 , 5000韓圜/碗, 有蝦及扇貝, 亦有蔬菜 , 蝦雖然不大隻但很新鮮, 味道OK。

總括來說, 呢處食嘢係今次旅程最平的, 但又唔差, 滿意! 

在Homeplus 食完嘢, 行出嚟, 天色唔太好, 快步由Mecenatpoils Mall 行去對面上水區方向, 經過了渣打銀行轉入內街, 又係另一美食天地。

由於走了不到10分鐘已下大雨, 有傘都不能再走了, 唯有就企在街角欣賞上水區內街的特式小食店, 這裡的食店都有自家的門面設計, 令人目不睱及, 真係要多謝天降大雨, 令我這怱忙的都市人有閒情注足細味每間特式小店的設計, 來這裡要慢走同影相呀! 很有味道呢!

店内的招牌是8种不同味道的五花肉(大蒜、葡萄酒、松叶、香草、咖喱、大酱、辣椒酱、高丽人参)。店員話選用韓国產的新鲜生肉，品質绝對有保证。果然五花肉的肉質超爽, 肉味香, 肉味完全冇比以上八種調味覆蓋, 港童同另一半都食到豎起大姆指呢!

五花腩各種味道都有其特色, 仲好好味外, 我哋好欣賞此店的卓頭, order完畢, 馬上把一排八小碟五花腩擺上, 每隔都有肉的調味資料, 而上蔬菜時亦大堆頭, 一大籃菜是作包裹著燒好的肉食用, 當上大盤湯時, 見湯清澈, 所以未有要求走"辣", 點知就出事了, 呢個湯後來越煮越紅, 更越煮越辣, 湯裡的海鮮有蝦及青口, 但太辣了, 真係吃不消了。

我哋所選的是 八色燒肉套餐, 大致供2-3人, 35000韓圜, 份量剛剛好, 蔬菜係冇限添加, 此套餐係冇包含白飯, 如要就要另加錢。

Hello Kitty Cafe' 就在弘大八色燒肉隔離, Cafe' 位於一間大宅內, 有好多大樹圍繞, 如冇招牌就真係好難搵。

在大雨及隱蔽的林蔭下, 無意間見到Hello Kitty 小招牌, Cafe'外的小花園有很多影相位及布景, 而室內的的場景位亦標緻可愛, 有Hello Kitty大廳同睡房

唔幫襯都可以在餐廳影相的, 但一場來到, 當然小試其餅食, 叫了士多啤梨蛋糕(10,000韓圓),  個蛋糕應該雪了太久, 蛋糕嘅質感已變了硬, 那片士多啤梨外層, 太甜了, 非常差嘅出品, 簡直不能下嚥, 至於Tirmisu (10,000韓圓)稍為可以入口, 但都不新鮮, 亦都是雪了太久的主因, 在咁靚嘅主題餐廳吃難食的甜品, 好失望囉!

弘大是一個非常年青嘅社區, 在此地走走, 令人都 "後生"D, 在弘大有很多小店及小餐廳, 大部份都是非常合年青人style, 衣履鞋襪及飾物全部都屬潮流尖端, 餐館都是年青一代的聚腳點, 由於很多年青人都係學生哥, 在此消費都不是太貴, 非常推薦在弘大住宿。

行完弘大, 已累到不得了, 港童又嚷著要去近民宿那間熱狗店。

由於仲係好飽, 所以只叫少少試吓味:

1) 雙層芝士熱狗, 4500韓圜, 味道好豐富, 醬汁帶起整個熱狗的味道, size都算大；

2) 芝士薯條, 3500韓圜，不醮茄汁而是沾芝士醬，香脆的薯條＋芝士醬，真的好好味；

3) 忌廉湯, 2500韓圜，不太濃，湯有很多麵包粒，好飽肚啊！

完滿地完成整個重遊首爾的旅程，總結後旅費用如下：

１）來回首爾連稅包行李X 3 HK$4578；

２）唱錢HK$2000；

３）This is Guesthouse 5晚3人房 : HK$2305;

4)   食, 買及交通 : HK$8000

合共HK$16883, 平均每人約HK$5628。

郵輪河第二晚「Formal Dinner」名為「Captain’s Gala Dinner」，菜式明顯比平時豐富，除咗主菜有龍蝦之外，最後甜品上時仲要係由全場o既服務生合作唱歌、跳舞、拍手，圍住個圈咁攞出多份焗雪山，成功牽起一段高潮，好有氣氛。

1)      Tian of Crab, Scallop and Shrimp, duo of caviar, papaya dressing：蟹肉帶子蝦沙律鮮嫩軟潤，簡單配上香橙更覺清新。

2)      Ravioli di Vitello in Salsa di Funghi Porcini, veal pasta, porcini mushroom sauce：個人略嫌意大利雲吞過腍偏咸，有少少失望。

3)      Broiled Lobster Tail and King Prawns, grilled asparagus, rice pilaf, lemon butter：每隻龍蝦均連殼上，顏色鮮美，並由哥哥熟手地續一去殼，服務實在周到。龍蝦爽脆彈牙，且鮮甜無比，可以話係「鑽石公主」個廚房咁多餐飯入面煮得最正o既一道主菜！

4)      Baked Alaska：據親友所講，郵輪河都會慣性於結束前一晚o既「Formal Dinner」以此道焗雪山作為甜品。因防火條例不再容許服務生於大堂位置點火，所以雪山上枱時已不再有火焰。帶有強烈酒味o既焗雪山中間為層次分明o既三色雪糕，入口涼快香滑，勁啱細佬口味。

細閱網上o既資料及於碼頭索取o既小冊子，得知青森有兩個同「A」字有關o既地標，其中之一個就係外型呈「A」字o既「青森県観光物産館アスパム」（Aomori Tourist Information Center, ASPAM）。

「ASPAM」係青森市中心內o既旅客中心，入內有多位精通英語及普通話o既大使提供免費旅遊資訊，亦有不少地圖及指南任遊客取閱。除此之外，十五層高o既「A」字塔仲有表演舞台、免稅店、餐廳、瞭望台等設施。

團長喺「ASPAM」地下層攞哂料後，即決定當日只到蘋果酒廠「A Factory」一個景點享受歡樂時光。因早上時間充裕，大多餐廳又要等到中午先開門，我地就上咗去「A」字塔十三樓個瞭望台度一覽整個城市o既風貌。

「ASPAM」所有入場券都係以自助售票機賣出，共分A、B、C三款：800円o既A套票包有瞭望台入場券及電影院戲飛；600円o既B票只包電影院戲飛；而我地所購o既400円C票則包有瞭望台入場券及限定飲品一杯。喺瞭望台可360°觀賞青森市全景，玻璃窗上印出對應景物o既名稱，清晰透徹。十二人嗰朝早仲要包場，毫不拘束，爽呀！

要喺青森街上搵到啱家人口味o既食肆真係唔容易，十二人結果都係走咗入去一間香港不時都會見到o既「大戸屋ごはん処」。

店子木造o既間隔清爽光猛，簡單樸素。靚女姐姐態度溫婉有禮，見我地一行十二人實難坐埋一齊，故亦非常有善地主動提出安排我地分開坐，起碼唔洗多位長輩喺門外等，最後入座o既XO仔同哥哥就自己坐。

天口咁熱，點食物前當然係要先啤一啤佢啦！小肥兩兄弟比較大食，每人叫咗個包有前菜、麵豉湯、飯及燉蛋o既套餐之餘，仲加咗客唐揚炸雞。

1)      チキン唐揚げ（298円）：一客兩件o既唐揚炸雞炸得好乾身脆巧，一啲都唔油膩，肉質亦軟嫩非常，簡單美味。

2)      小牛たん + 五穀ご飯（1,360円）：牛魔王XO仔點咗個牛脷午餐，配健康o既五穀飯。五穀飯比想像中冇咁硬，好易入口；個人略嫌牛脷過熟咗少少，所以咬落偏韌，不過單睇價錢1,360円絕對收貨。

日本好多地方都有歷史悠久o既祭典，有關o既慶祝活動大多都係每年舉辦一次，青森咁大個城市都一樣唔例外，有個聞名o既「睡魔祭」。據悉，於八月舉行o既「青森睡魔祭」都會有熱鬧o既歌舞及大型o既睡魔燈籠遊行，用意係為驅趕炎炎夏日出動妨礙人民工作o既睡魔，祈求五穀豐收。

有興趣加深對此祭典認識o既朋友不妨一訪設於離「青森駅」不遠o既「ねぶた ワラッセ Nebuta House Warasse」（睡魔博物館）。火紅色o既博物館內除咗以文字及影片講解「睡魔祭」三百多年o既歷史，更展出多個可觸摸o既睡魔燈籠，觀賞者可理解燈籠製作過程、親身製造燈籠及感受慶典o既氣氛，一個大人o既入場費都只係600円，當真絕對超值。

相信一提起青森，大多人都會諗起蘋果同蘋果汁，但其實青森亦盛產蘋果汽酒。市內有名o既超市廣場「A-FACTORY」鄰近睡魔博物館「ねぶた ワラッセ Nebuta House Warasse」，遊客觀賞完博物館如果覺得肚餓或口乾，又想品嚐以青森蘋果製出o既甜品及飲品，「A-FACTORY」真係一個好好o既歇腳點。

兩層高o既「A-FACTORY」冷氣充足，地下一邊為超級市場，售賣多款新鮮蔬果、甜點糕餅、果汁汽水、茶葉咖啡、手信紀念品等，另外一邊則有幾間快餐及甜品店圍繞著中央o既自助用餐區。通往上層o既樓梯兩旁及上下方為以玻璃窗分隔o既「蘋果汽酒製作工坊」，環境極之潔淨衛生。一樓樓梯左方為自助式購票試酒區域，右方為開揚o既咖啡店。十二人一同購下可試齊所有酒品o既套票，然後自己埋位後再分成細細杯黎試飲，個人覺得蘋果汽酒清爽得黎主要都係得個甜，唔係好夠酒味。

喺「A-FACTORY」樓上試完蘋果汽酒，大隊就走咗落去地下o既美食廣場中有甜品食o既「SKIP EGG」度嘆咗個下午茶。

小店一眼睇哂，樑上o既黑板寫出日英對照o既食物及飲品餐牌，桌上展出多款甜品西餅，由滿臉笑容o既妹妹仔一人獨自主理。

每人點咗杯飲品後，長輩們就分咗幾客甜品，而一向鍾情朱古力又唔想咁易肥o既XO仔就獨食咗一客朱古力香蕉法式可麗餅「Crêpes de Chocolate Banane」，結果俾大肥寸咗句「獨食難肥唔等於獨食唔肥架，嘩哈哈！」。熱辣辣o既可麗餅香軟甜美，塗上忌廉能增添鮮滑，簡單伴上朱古力醬同香蕉食已夠清新美妙。

由於青森市o既商場當真唔及東京及北海道嗰啲好行，其中幾位團友離開咗「A-FACTORY」就立即返咗上船。太陽未落山，團長就提議留低o既團友早啲喺街上一間門外掛著「歡迎鑽石公主郵輪旅客光臨青森」字句o既「南大門」輕食頭輪晚餐，如果趕得切搭早一班車返碼頭就食多餐。

韓式燒肉店環境光鮮寬敞，抽氣都做得唔錯。樓面雖則只有一位姐姐仔忙碌地為全場人服務，其中一枱人仲要係好明顯地飲醉酒想鬧事嗰隻，但其態度仍能保持友善客套，實屬難得。

人多好叫餸，八口子就分咗幾款前菜冷盤、以牛隻不同部位組成o既和牛拼盤（カルビ満喫全種盛）、牛脷拼盤（よくばり牛タン３点盛 )、煎蛋、冷麵及熱湯麵。前菜中以白雪雪o既凍豆腐最滑溜甜美，韓燒和牛每個部位都有其獨特之處，質高味美，香軟可口，仲要唔係貴，大家都食得好開心。

返回郵輪後，兩批團友就喺主餐廳集合再食晚餐。因深知「鑽石公主」號餐飲質素較為參差，XO仔同已熟落咗o既哥哥仔點上多道菜時，特別講明全部都只要頭盤份量，希望試多幾款。

1)      Kushi Yaki, Japanese eggplant, mushrooms, sea salt：燒茄子及蘑菇質感軟腍，不過調味欠奉，個人覺得好麻麻。

2)      Trio of Seafood, Citrus and Avocado, lobster, shrimp and squid with orange filets, lime-cilantro vinaigrette：海鮮三重奏含龍蝦肉、蝦仔及魷魚，酸甜醒胃，清新爽滑。

3)      Hiya-Yakko - fresh tofu with ginger, scallions & soy sauce：豆腐幼嫩清香，簡單可口。

4)      Caesar Salad：凱撒沙律新鮮爽脆，屬安全之選。

5)      Double Beef Consommé, mini choux buns and green onions：牛肉清湯鹽份過多，直頭多到細佬要咪埋眼黎飲。。。

6)      Linguine alla Vongole, noodles with littleneck clams in cream sauce and parsley：唔知係咪煮得太耐定係太過多汁所致呢，意粉麵條食落過腍，而且越食越咸，失敗之作也。

7)      Deep Dish Apple Pie with vanilla anglaise：蘋果批味道清香，伴上雲尼拿雪糕原本係最佳拍檔，無奈蘋果批唔夠熱，就是差一點點。。。

又一間無意中發現的隱蔽大美味。

午餐連飲品和小份甜品，要了紅茶和自家製芝士布甸。期望不高之下，布甸是意想不到的清新好吃！上頭的是鮮製的香橙果醬，還帶著點點的甘澀橙皮。
最喜歡這種光線充沛的環境，愜意。完全被這走北歐風格的小天地迷住。