函館為北海道第一大港口，盛產海鮮，本地人及遊客都愛於市內規模最大o既魚市場「函館朝市」購買及即食魚鮮。

「函館朝市」位於「函館駅」停車場旁，地點方便得很。顧名思義，「朝市」乃朝早營業之市場，場內過三百間室外及室內o既店子早上五、六點就開門，冬天時份亦即連太陽爸爸都未開工；到中午就陸續收工，下午仍開o既大多都係餐店食肆。因為無法控制郵輪到港時間，我地一點左右黎到好多店舖都已關門。市場內見得最多就係函館特產o既烏賊，有活生生o既，亦有烏賊模型及証書。

首次到臨函館，搵食就單靠旅遊書引導，喺「函館朝市」內一家老字號「道乃家」（Michinoya）度午膳。

兩層高o既食店地下為迫迫o既散座，十二人好好彩地被安排入座樓上大廳，空間感更足、更舒適，私隱度亦較高。估計餐店為家庭式作業，樓面位嬸嬸應為老闆娘，態度唔算惡劣，但就感覺唔多鍾意招待華人囉。

彩色o既餐牌圖文並茂，簡單易明，唔識日文都絕對可以用手指點菜。午市套餐同散叫項目價格一樣親民。個人覺得烏賊菜式只屬一般，反而幾款魚生丼就鮮甜美味得多，誠意推介2,000円o既人氣「道下丼」。

遊函館o既旅客早上都會選去「函館朝市」大擦海鮮，中午則會轉移往海邊散步及購物。近海除咗有多間有景睇o既餐廳之外，最多人出入o既就係中央幾座大型o既「金森紅磚倉庫」。

多年前「金森紅磚倉庫」的而且確曾為儲存貨物之倉庫，不過經過時代變遷，而家全部都已改建為美食及購物中心。每個倉館都有獨立o既名稱，入內o既商店食肆都要配合番個主題，例如「金森洋物館」裝潢西化，店子售賣來自多國o既洋物，包括雜貨、服裝、飾物、玩具、精品等，多元化得又名「異國夢之店」。其餘「函館ヒストリープラザ」（「函館歷史廣場 Hakodate History Plaza」）及「BAY HAKODATE」（「函館灣」）內有歷史展廳、教堂、浪漫館、工作坊、啤酒館等，當中最受肥肥家族歡迎必選甜品零食店，一邊試食一邊買手信（其實自己都有份。。。），整個下午好似食咗多輪下午茶咁，行街o既同時不斷補充體力，戰利品之多每人一個背囊真係唔多夠載架。

往返碼頭o既穿梭巴士站設於市中心o既「函館駅」旁，車站正門前方有個鮮紅色o既藝術品，當眼易認，係集合o既好地點。車站每天都有大量遊客進出，站內絕不乏手信商店。此外，長期企滿人o既旅遊資訊中心真係好多料；架上擺放出供大眾免費取閱o既旅遊小冊子，資料充裕；櫃檯亦有多位識講多國語言o既旅遊大使為旅客解答疑問及作出援助，首次訪函館都不必慌張。

獲稱為「東方之珠」o既香港擁有亮如明珠o既靚景，參閱過旅遊指南先知原來「函館」同香港一齊並列為「世界三大夜景」之一，而且同時亦為「日本三大夜景」及「北海道三大夜景」之一，來頭咁猛當然要去睇睇啦！

正當團友諗住坐的士前往「函館山ロープウェイ」（Mt. Hakodate Ropeway「函館山空中纜車」）搭纜車上「函館山」欣賞靚景時，頭髮灰白o既的士叔叔隨即告知因已接近黃昏時份，纜車站必定擠滿人群，恐怕團中年長o既親友排上個幾鐘頭隊會有感吃力，所以就建議由佢同另外一部六人的士載我地上山，可以節省不少時間之餘，大家又可以舒服啲，可謂一舉兩得。

天未黑齊，「函館山」o既瞭望台已企滿遊客等睇日落及夜景。的士叔叔真係叻，深知山上風勢強勁，及已預料太陽落山時間，故亦計好逗留上十五分鐘經已好足夠。「函館山」人山人海，猛風又增加影相難度，好在山頂上有幾位年輕壯漢帶同高梯、射燈等工具，擺好哂陣為旅客捕捉「函館」最靚o既景色，九人得以用五分鐘時間拍下兩張團體靚相，連埋郵費都只係收取2,800円，當真物有所值。結果兩架車照錶收費，來回五十分鐘合共9,000円，計落條數仲抵坐過每人1,200円o既登山纜車，意外地慳咗唔少。

「函館駅」附近餐廳唔多，午市時間想為晚餐預先訂座又唔成功，睇完函館夜色後大隊就約好已返回郵輪o既三位團友於主餐廳集合用餐。由於上船時喺碼頭發現有拉麵車擺檔，我地幾個愛吃湯麵o既為食貓就決意飯後再戰拉麵，當晚「鑽石公主」o既「Chef’s Dinner」（廚師晚餐）亦只能輪為配角，即該晚晚餐之序。

1)      Oshizushi - elegantly pressed prime tuna and salmon sushi：喺西餐廳不時都會食到刺身，食壽司都係第一次。洋化咗o既壽司以甜醬喺碟上繪出花紋，外表新穎雅致，無奈飯中夾入咗青瓜，再混入埋甜醬及山葵食用，組合o既味道好怪囉！

2)      Strawberry Sorbet - infused with lemon and wild thyme：上完頭盤同湯，每人都有一球士多啤梨味雪葩，清新又涼快。

3)      Hotate Gai No Kimiyaki - broiled scallops with sweet Japanese wine sauce, mushrooms, & asparagus：因為有下場，小肥就點咗個較為輕盈o既海鮮主菜。輕輕煎過o既五件帶子底面香脆，中心幼嫩，配上帶甜o既清酒汁醬，效果鮮甜香口。

今次函館一日遊，真係估唔到高潮位居然係臨離港前一刻喺碼頭食嗰碗「元祖バスラーメン」（元祖巴士拉麵）！小小o既巴士拉麵檔只有三人主持，屬家庭式作業；老伯伯喺車尾忙碌地不停煮製拉麵小食，巴士上及室外o既食客就交由兩位熟手友善o既姐姐同嬸嬸招待，整晚爆場運作都十分流暢。

我地一行六人剛好坐喺巴士內之散座，應該都算係最元始o既拉麵車風味。車上貼有餐牌及剪報介紹「元祖バスラーメン」，食過啱口味更可即場購買盒裝即食拉麵，送禮有特色，自己食都好有意思。小店貴精不貴多，只提供一款炒飯、兩款冷麵、六款拉麵、幾味小食及追加配料，價格100円至1,000円，相當便宜。

人家小本經營，座位不多，大家亦好識做地每人叫咗一碗拉麵黎食，細食o既長輩就揀咗500円o既細碗版鹽味拉麵黎試。XO仔點咗客份量都幾勁o既特製拉麵，鹽味湯底香濃而不油膩，拉麵麵條煙韌彈牙，除咗薄薄o既叉燒之外仲伴上大蝦及干貝，整體鮮味無窮，1,000円絕對抵食！

由老伯伯大廚掌舵o既「元祖バスラーメン」出品窩心暖胃，其家人齊心合力更顯溫馨，肥肥家族有緣於函館遇上並可一嚐巴士上嘆拉麵o既滋味，確真令人難忘！

舊年有份搭過「小樽散策巴士」o既家人都讚巴士乾淨好坐，短程車都幫忙慳返唔少腳骨力，所以上岸時一發現巴士公司特意為「鑽石公主」o既旅客增設一天循環巴士專線往返碼頭，心諗來回已經440円，坐多兩程足以歸本有餘，小肥就立刻購下十二張750円o既「一日乘車券」。

一張「一日乘車券」不但可以於即日內任搭「小樽市內線」，憑卷更可於合作商戶享有購物及餐飲優惠，好多景點o既入場費都一樣有得減，減吓減吓就會發覺慳咗好多，絕對化算！

「LeTao」o既芝士蛋糕及特濃朱古力實在令人一試難忘，為求可以食到最新鮮o既糕點，XO仔專登揀喺此店食早餐。

兩層高o既「LeTao」地下為商店，樓上為咖啡茶室，有專𨋢上落。十二人為當日首批客人，唔洗等位即可入座中央張大枱。闊別一年，木造o既裝潢傢俱一樣乾淨企理，樓面年輕o既妹妹仔依然友善有禮。

團友飲食口味各有不同，不過未黎過o既長輩都應細佬推介，試咗個招牌芝士蛋糕「Fromage Double」做早餐。雙層芝士蛋糕鬆軟輕盈，微甜潤澤，原味及朱古力味均得到眾人讚賞。

飲品方面，咖啡及紅茶幫全部都叫咗個972円o既蛋糕套餐。（翻查舊相先知套餐一年前為862円，睇黎日元跌價，多做遊客生意o既「LeTao」都懂得以加價作為應對措施喎。）其餘同小肥一樣係朱古力迷o既就當然係點飲連杯都特別靚o既熱朱古力啦！熱朱古力柔滑醇濃，甘香味美，要飲真係要飲成壺先滿足。

旅途完結後先知原來「LeTao」將十月正式抵港，於中環IFC設置首間分店。新店起步階段只售賣人氣芝士蛋糕、朱古力及多款甜點，當真希望遲啲會擴建埋咖啡屋哦！

享用完豐富o既芝士蛋糕同熱朱古力做早餐後，十二人就由街尾間「小樽音樂盒堂」開始行起。喺紅綠燈口等過馬路時，突然聽到疑似火車聲o既蒸氣聲，方才發現原來音樂盒堂門前有個高高o既「蒸気時計」喺度噴緊白煙。

細閱側旁o既「蒸気時計物語」後，知悉世界上第一個蒸氣時計乃一九七七年由加拿大鐘錶專家Raymond Saunders先生於溫哥華o既煤氣鎮（Gastown District）內所建造而成。小樽市內此座位於心形交差點o既「蒸気時計」重1.5噸、高5.5米，每十五分鐘都會響起音樂及五次汽笛聲，並噴出白煙，因同為Saunders先生於平成六年（即西曆一九九四年）六月二十五日所建成，故兩座蒸氣時計又被稱為有姊妹關係。

小樽有「音樂盒城」之稱，好多遊客都會專登黎搵愛好o既曲調音樂盒，有心人更會自己動手製出獨一無二o既作品，XO仔自問冇乜藝術細胞，不過淨係睇同買都已能自得其樂。

市內聞名o既「小樽オルゴール堂」為音樂盒設有多座建築物，包括博物館、音樂廳、商店、工作坊及動物園。各場館有著不同意義及特色，如果時間容許而又對音樂盒有興趣，當然最好全部去哂，但對半天或一日遊o既旅客黎講，其實行咗本館及2號館都應該足以購下不少手信及紀念品。

「小樽オルゴール堂」o既本館設於「メルヘン交差点」（即「堺町交差点」），門前座蒸氣時計每十五分鐘都會響起，單憑聲音應最易搵得到。堂內o既音樂盒聲清脆悅耳，陳列於三層o既音樂盒琳瑯滿目，個人覺得壽司系列最為搞笑，而最精美就要數七彩o既玻璃系列。

喺小樽除咗可以買到五花八門o既音樂盒之外，其實淨係行一條「堺町通り」都經已足夠買到成幾車手信。

大街兩旁o既商店種類繁多，飾物、皮具、雜貨、餐具、化妝品等，應有盡有，當中當然不乏食得o既糖果、餅乾、糕點等代表。購買零食手信時，個人會主攻小樽或日本限量產品。親友都愛流連於蜂蜜店、朱古力店、餅舖及酒舖，因各大店舖均設有免費試食試飲，早餐唔夠飽都絕對唔洗緊張。

小肥一早已預料團友們會買到停唔到手，又深知佢地唔鍾意拖住個喼行街，故出發前晚聚時就一人送咗個摺得埋o既環保背囊，係咪好醒呢？！

姨媽姨丈們同肥肥家族一年前於小樽初遇「旭壽司」後，壽司屋已成為大家再訪小樽o既必到之處。記得第一次去「旭壽司」時屬非旺季，冇預先訂座都有得坐壽司吧。可惜今次細佬早成兩個月前打定長途電話卻未能成功預留壽司吧位，講真都有啲失望架。

十二人準十二時抵達壽司店，即被入座三張鄰近o既四人枱。木造o既枱櫈乾爽企理，年輕o既服務生都好友善客套，只係年紀最大o既婆婆明顯屬火爆之人。團友對魚生種類一啲都唔陌生，壽司全以舉手式點數，刺身及小食則續張枱叫黎分。由於魚材鮮美，壽司同刺身一樣咁正，個人精選推介脆薄o既鮮螺刺身、鮮濃o既海膽壽司、軟嫩o既帶子壽司、爆於口中o既三文魚籽壽司及爽滑o既兩吃牡丹蝦壽司。因出發前小肥從餐廳網頁下載及打印咗十二張優惠券，結果全體都有球免費哈密瓜雪糕做甜品，清香微甜，極為討好。

壽司午餐豐盛高質，埋單每人八千幾円，團友都大感物有所值。

食完多款刺身壽司做晏，長輩們都話好想飲番杯咖啡消吓滯，可惜壽司屋未有咖啡提供，十二人只好另覓他處。哈，就係咁俾我地發現到隔兩個舖位一間家庭式作業o既咖啡屋「茶房おこばちSabou OKOBACHI」。

只有十多餘座位o既小店就好似人家屋企o既客廳咁，裝潢、間隔、小擺設都流露著無盡o既溫馨。店子由一對中年夫婦開設，正所為「男主外，女主內」，老闆先生自己負責手調咖啡及招待客人，老闆娘大部份時間則躲於小廚房做後勤工作。正因所有凍熱咖啡都要由叔叔一人續杯調製，合共十杯之多真係要花上好多心機同時間。XO仔影完首輪靚相，可能店內冷氣唔夠勁，加上午餐實在食得太多壽司而引發飯氣攻心，居然喺等待期間瞓著咗。短睡片刻後猶如叉咗電，連對眼都好似睜大咗不少，醒來時剛好可享用老先生用心之作。嘩，凍齋啡冰涼幼滑，香濃甘醇，就連免費送贈o既甜餅乾都鬆脆過人，直令眾人都覺得好有意外收穫！

老闆兩夫妻忙碌過後即同小肥閒聊起黎，問及是次旅遊o既詳情，團友們是否全為親戚，極之親切友善。知悉長輩大多年過七旬後，二人大感驚訝o既同時卻不忘大讚女士們保養有道，仲話睇得出細佬耗盡腦汁以日文溝通，臨行前更客氣地加送糖果、明信片及紙扇，以示歡迎我地一遊小樽，小小茶房當真溫情洋溢！

除咗購物之外，小樽其實都有靚景睇o既，其中一個影相熱點就係「小樽運河」，朝早到夜晚長期都企滿旅客。有心黎觀光但又唔想行太多路o既朋友，不妨考慮乘坐人力車，拉車o既全部都係黑黑實實o既靚仔壯漢導遊，極具睇頭，單喺運河旁邊兜返轉感覺應該都唔錯。

正因「小樽運河」為遊客必到之處，運河中段巧妙地設有一個小型廣場。廣場展示出區內o既地圖、當地o既時間及溫度，中央更設有個旅遊資訊豐富o既「小樽観光案內所」，內有精通多國語言o既旅遊大使親身解答疑問，費用全免。雖則潮流興網上打咭，但相信仍有不少旅遊家保持寄明信片o既習慣，故場內有個非常當眼o既鮮紅色大郵筒，唔知喺運河郵筒所收集o既信件會唔會有特別印章呢？！

為拍下運河日與夜不同o既景色，其中比較爛玩o既八位團友就立心黃昏後要重返運河，等待o既時候就喺附近一帶留連。運河周邊都好容易搵到食肆同免稅店，最集中一定係「小樽運河食堂」及「運河Plaza」，不過其實街道上亦可尋到特色小餐廳同商店o既蹤影，結果我地買完又飲，飲完再食，絕無冷場。

有咗上次遊北海道o既經驗，蟹痴團友都話要再返去「北の漁場」食即燒活鱈場蟹。因深知食店只有鱈場蟹一味值得一嚐再嚐，今次細佬就專登安排大家下午茶時間幫襯，貪其地點離車站不遠夠就腳，店內又唔會咁迫人。

為節省時間，安頓好長輩入座後，XO仔迅即同幾位廚神代表行咗去漁場度買活鱈場蟹，並指明要即燒黎食。兩隻靚蟹一登場，就連年長o既團員都要大玩手機先食，幸好天氣唔係咁凍，蟹肉入口時仍然好夠新鮮熱辣，眾人都食得津津有味，無一不讚。

小肥自知有敏感問題，出外遊埠都會避開唔食蟹，所以就襯大家慢慢品嚐即燒活鱈場蟹時，行咗去附近o既店舖繼續狂購手信。返轉頭時先一齊食橙色o既哈密瓜一解餓氣。餐店預先切成一階階o既哈密瓜又甜又多汁，消暑又解熱，喺日本食生果果然係正爆！

手持「小樽散策巴士一日乘車券」埋單即有九折優惠，單據列出共減咗七千幾円，令人豪食完鱈場蟹做下午茶感覺都仲好抵。

食完咁勁量級o既鱈場蟹下午茶後，大肥爸爸就陪伴疲倦o既親友先返回郵輪休息，而小肥就同其餘仍精力充沛o既蒲友繼續尋歡。

團友們嗜杯中物，大多更為威水客，故兩次遊北海道前規劃行徎時，細佬都有諗過要加插一站，去鄰近小樽o既余市度，參觀日本威士忌之父「竹鶴政孝先生」所創辦o既名威士忌廠「余市蒸溜所」（Yoichi Whisky Distillery），無奈兩次都因時間過於緊迫，唔係好夾得到公共交通o既時間表，所以就打消咗念頭。嘻嘻，不過喺互聯網上搜集資料時，卻被XO仔發現「小樽運河」附近有間以此酒廠「日果威士忌」（Nikka Whisky）及其女主人「竹鶴リタ太太」起名o既「Nikka Bar Rita」，緣份就咁引領咗八人一訪小酒吧。

酒吧隱藏於迷你美食廣場「小樽出抜小路」（Otaru Denuki Koji）內，雖則外牆貼有酒牌廣告，不過如果唔係手持資訊，相信真係唔會自己行入去光顧。店子酒窖式o既裝潢暗黑神秘，擺設都用上與酒有關o既酒桶、木盒、酒樽等設計，而酒吧o既商標則用上酒廠女主人o既美影，全部都好到題。

店內只有三張四人高櫈散枱及七個吧位，淡季期間型男酒保一人足以應付所有酒客。顧名思義，「Nikka Bar Rita」主要提供威士忌廠所生產之威士忌，包括多款限量版靚酒及威水雞尾酒。由於所有酒品只可堂飲，我地就應型男哥哥推薦，從四款限量品中每人點咗杯合適o既威士忌飲。小肥自知唔係威水酒客，對威士忌認知唔深，難以作出專業品評。單憑酒保為酒廠o既出品及其不同飲用方法之解說，聽後慢慢再細嚐，飲落嗰杯以大舊冰塊浸住o既威士忌又真係幾濃醇香滑喎。

據悉，小酒吧都幾受遊客歡迎，當然大部份都係威士忌愛好者，但原來當中都有好多日藉客人係因為睇咗年多前播出o既日劇《マッサン》（中文譯名「阿政與愛莉」）後而黎，明顯為竹鶴先生以編製o既傳記劇集好有感染力。

黃昏時段於酒吧歡聚，酒後返回「小樽運河」拍下河景夜色，各人肚仔又開始響起雷聲。為方便可於回程前先喺便利店購買樽裝大水，團長就決定喺巴士站附近一家見到有吉位o既「小樽らーめん問屋」（Otaru Ramen Donya）快速食個拉麵做晚餐。

設於停車場旁o既拉麵屋樓底極高，右手邊一排和式四至六人卡位，左邊圍繞住開放式廚房有兩列正常高度o既吧位，右後方位置則有幾張以布簾半掩o既四人半開放式廂房，間隔開揚通爽。可能聽到我地講廣東話o既關係，接待處位姐姐仔都好盡力嘗試用英語對答，不過一知道細佬識講少少日文時，佢即時鬆一口氣，臉上亦展出燦爛o既笑容。

眼見餐牌上o既拉麵款式大多都只係幾百円，圖案又唔似好大碗，八人就每人點咗一碗，然後再分咗兩客餃子。嘩，真係估唔到一碗正常份量o既拉麵居然仲大過小肥個頭，其中哥哥所選o既雜菜拉麵「さんぱち野菜ラーめん」更加係成座小山丘咁高，實屬勁量級！拉麵專門店出品，果然高水準，拉麵煙韌彈牙，XO仔嗰碗塩味湯底芳香濃郁，盡顯簡單美，連稅一千円有找，絕對超值！「小樽らーめん問屋」o既拉麵雖然出色，不過啲餃子就只可以話係不過不失，唔可以話難食，但又講唔出好食囉，學哥哥話齋，250円有五隻算係好合格架啦。

飯後搭乘「小樽散策巴士」返回碼頭後不久，「鑽石公主」號隨即準時地駛離小樽勝納港口。喺房中突然聽見室外響亮o既音樂，小肥就走咗出個露台八吓，原來小樽市特登安排咗一班靚女大跳草裙舞歡送郵輪，其實日本人有陣時都幾熱情架。

「鑽石公主」o既主題餐廳中，除咗有早一晚試過o既意大利代表「Sabatini’s」之外，當中亦有一間亞洲代表「Kai Sushi」主理日式料理。有別於船上其他主題餐廳，「Kai Sushi」不但提供晚餐，而且仲做埋午市，不過由於魚生價格難以預算，以劃一固定收費任客人進食絕對有機會蝕大本，故此埋單係按所點選o既餐飲計算。

「Kai Sushi」間隔開揚，門口先有多張半梳化合併式散座，直入中間一條S字形o既走廊，左邊手有個壽司吧及一列吧位，十二人當日被安排入座後方最近窗o既位置，好夠光猛。服務生態度良好，無奈人手有啲不足，效率就唔係咁高。

餐店午市以做定食為主，主菜可選壽司、刺身、魚生飯、海鮮丼、燒雞、燒魚等等，全部都包有沙律、麵豉湯、熱烏冬或凍蕎麥麵及甜品。小肥好大路地點咗客壽司定食，講真唔難食，但論賣相及質素，碟上八件壽司實難跟岸上o既壽司屋比較，配角o既沙律、麵豉湯都過得去，最好味反而係碗簡單o既熱烏冬同甜品綠茶雪糕配紅豆。

食完晏，大隊就上咗去頂樓等睇靚景。團友們都懶理天空佈滿雲霧，一見到有酒吧就行咗埋去搵酒飲。埋到櫃面，即見阿拉斯加「海巫」牌啤酒買四送一，五枝都只係USD 15， uncle一口氣就要咗一set同班老友記分享，女士們就各自點咗幾杯雞尾酒。

「Tradewinds Bar」本身有瓦遮頭，圍繞住弧形o既酒吧有多個吧位，側邊暗藏o既吸煙區長期都坐滿煙民，好彩啲煙好快就吹走，煙味唔算過份。甲板層中央有個大螢光幕，不時都會播放電影，好天o既日子，左右兩旁o既沙灘椅都會好快俾人霸哂，不過其實吧前幾個露天高櫈先至係睇戲o既最佳位置。酒保只有一人，態度時好時壞，都幾難捉摸，唔知係咪因為睇得戲多影響情緒呢？！

「知床半島」（Shiretoko Peninsula）為北海道最東北部o既半島，島名來自阿伊努語（Ainu）o既「シレトク」（sir-etok），意思為「地球的盡頭」。據悉，此地乃北半球內可見浮冰最南o既位置，故2005年正式被列為「世界自然遺產」之一。

「鑽石公主」到達「知床半島」區域時，天色已由多雲漸變蔚藍，無奈島嶼始終被雲層包圍，從郵輪上遠觀都只係睇得出「知床半島」o既山形，廣播收音又唔係咁清晰，又冇浮冰睇，結果大家吹完幾陣風，影咗幾幅相就決定解散，自由活動過後歡樂時光再匯合。

晚飯前，嗜杯中物o既幾位長輩決定喺船上一間有歌聽o既「Wheelhouse Bar」歡度良辰。

客廳式設計o既酒吧寬敞開揚，厚墊梳化椅櫈舒適大方，年輕o既侍應亦極為落力友善，酒品全為熟識o既品牌，正價合理，每日更設有買一送一歡樂時光優惠，不難吸引酒客。

酒吧o既環境氣氛本來都唔錯，可惜駐場o既男女二人合唱組合歌喉實在麻麻，男方獨唱時還可以，不過女低音經常走音，喺唔夠冷氣o既情況下都可以令到細佬打哂冷震，真係越聽越驚嚇，結果仲被佢嚇走埋添，唔怪得知「Wheelhouse Bar」最旺場o既時刻往往都係佢地兩個休息o既時候啦！

晚餐返回主餐廳「Santa Fe Dining Room」用膳，餐牌上雖列明當晚主題為「公主意大利晚餐」，不過湯品及主菜均見日本料理菜式，似乎有離題之嫌。除咗多款意大利佳餚可選之外，特別的主題原來係有特別的項目配襯返架；其中要額外俾錢先可享用o既有一系列意大利酒品，而免費任食o既就有由餐廳經理親自烹調o既意大利粉。

1)      Iced Peach Bellini Soup, Peach Puree & Sparkling Prosecco – 微涼o既凍湯以汽酒製出，其桃味芳香甜美，用飲管啜飲更覺清新，只係一小杯o既份量未免吝嗇咗少少。

2)      Penne with Garlic & Tomato Sauce - 經理叔叔煮出o既意粉偏咗少少硬，個人覺得可以再熟少少，幸好蒜香濃郁，調味到位，成功挽回不少分數。

3)      Ebi Furai, Panko-Coated Shrimp with Sweet & Sour Sauce – 深啡色o既炸蝦外皮層炸漿又厚又硬，內裡o既蝦隻如何爽脆都難以補救，實屬敗筆之作。

4)      Miso Soup – 麵豉湯淡而無味，好似開粉落多咗水咁，唔掂！

5)      Tiramisu, Espresso, Zabaglione Cream, Bittersweet Cocoa – 傳統意大利甜品Tiramisu質感好夠軟滑，而且唔會過甜，不過如果可以混入多啲酒，效果應更佳。

飯後周圍行，必去DAISO掃貨，100円店，沿途好多吸引的PANCAKE店，又有好多衫買，仲要幾平個款又不俗，周圍都是阿松呢，仲有calbee本身想食，但太飽了放棄左呀，ALTA，不少女士雜貨，好可愛的草泥馬呀，在這店也逛好一陣子了，見到好可愛的布甸狗主題cafe，之前以為呢間有蛋包飯，入到去先知冇，但店員仍然都好親切的回答及同你講返邊間有，實在太好人了。一直行下周圍睇野，去了KIDDY LAND，都是我們必去之地方，共有4層，好大間呀，好多種類的公仔、精品及玩具呀，原宿真係太多野睇了，shopping。

行左陣，去左必食的pancake，有好多款式選擇。 
要了士多啤梨雪糕pancake，餅皮煙韌，雪糕有好香的士多啤梨味，配上軟滑的cream及微甜的士多啤梨，好味呀。

逛完之後，返酒店擺低戰利品，再去新宿食晚餐了。
聽聞好抵食之下即幫襯了，迴轉壽司，主要分105円及210円兩個價錢，親切的壽司師父，落order不時和我們開玩笑。

吞拿魚壽司，淺綠碟都是105円，味道正常水準，但真係堅抵食。

玉子壽司，好大件的玉子燒呀。

海膽壽司，花紋碟是210円，因為保持新鮮，海膽是要order先有，海膽份量唔算好多，但味道不俗，呢個價食到海膽冇怨言了XD。

吞拿魚腩壽司，食左一件先記得影相，幾好味呀。

雖然唔算太好食，但味道正常水準，而且堅好抵，值得一試呀。

行返去酒店時，又想做下運動，附近有一間棒球場中心。
除左棒球，仲有得打機，同香港的機舖類似，好懷舊的game呀，仲有一陣煙味。打波時記得問人拎手套。300円玩28球，速度由70km/h至130km/h不等，揀了70km，有三支球棒選擇，藍色較輕，適合女子呀，28球裡面有好多打不中XD~但幾好玩呀，之後又去family mart買野食，返到酒店又食宵夜。 

一出車站，已經有必影位了，就是JR原宿駅，是歷史悠久的木建車站，甚有古色古香的味道，沿車站一直行，就是另一個出閘位，車站對面就是竹下通，十分方便。

先去食蛋包飯，原來有期間限定芝麻街做主題，以Elmo為主力，其實對芝麻街冇咩感覺，不過太想食蛋包飯，就幫襯了。

店內不少芝麻街的精品，樓上就是cafe，餐廳內到處都有芝麻街的佈置及Elmo公仔，置身芝麻街的小天地，膠杯及膠餐具，有快餐店之感。

ELMO'S BLOOD ORANGE JUICE(700円)，味道比較酸。

COOKIE MONSTER'S LYCHEE AND GRAPEFRUIT SODA(700円)，荔枝柚子蘇打，荔枝味較香，味道清新，面層厚厚的cream，味道香甜，不俗呀。

ELMO'S CHICKEN CURRY(1600円)，不安的紅色飯，但難得來到就試下，飯口感比較硬，與甜甜地不太辣的咖喱伴食，味道又OK呀，可能因為咖喱不俗，圍邊的是粒粒雞肉，中間的是芝士薯蓉，味道普通，至於對眼及雞仔的脆片，最好不要食，是苦的呀。

BIG BIRD'S OMELET(1600円)，因為是蛋包飯，對這個較有興趣，蛋香滑，入面的茄汁飯味道濃郁，配埋周邊的茄汁醬一起伴食效果更佳，幾好味呀。

為歡迎「鑽石公主」o既旅客，釧路市特意安排免費穿梭巴士往返市中心，每二十分鐘一班，都幾密吓。週五早上，城內車輛不多，十五分鐘唔洗就到站，街道上o既途人全部都係郵輪上o既旅客，感覺都幾荒涼。

市內主要地標除咗有兩個熱點「漁人碼頭MOO」及「和商市場」之外，其實仲有釧路駅同兩個博物館，五個地點o既距離近到連車都唔洗搭，行人路牌數目遠比馬路上o既的士多，明顯遊客都會選擇用雙腿行路。

「和商市場」離釧路駅只需步行三分鐘，位置十分方便。入口處o既壁報板上貼有商店分佈地圖及彩色o既廣告海報，當中最搶眼嗰三個字就係「勝手丼」，亦即我地個早餐。如果唔想自己動身動手去揀魚材自製魚生飯，館內後方其實有幾近餐館仔一早都已經開咗門，唔食魚生都可以食碗湯麵或冷麵。

市場中央位置擺放有多張餐桌及椅櫈，座位先到先得。場內商店除咗有多款魚鮮海產可選之外，亦有多間售賣海鮮內臟、生果、手信、精品、雜貨等，當中仲有間和服店添，極受外國遊客歡迎。

做好哂資料搜集o既XO仔早一晚已預告親友喺釧路將會先前往「和商市場」，食新鮮魚生飯「勝手丼」做早餐，大家都十分期待。

「勝手丼」（Katte-don）字面上「丼」即「飯」，而「勝手」則可解作為「是但」或「隨便」。據超閃旅遊書記載，話說十多年前喺北海道釧路，有幾個餓著肚子o既窮書生好想食魚生飯，卻因餐廳o既價格過高而轉場去直接同啲魚檔老闆提出要求，希望可以低價購下賣剩o既魚生，然後再去買碗白飯自砌魚生飯。久而久之，魚市場內就越黎越多舖頭散賣白飯同廉價魚生，任客人「勝手」地（即隨意地）揀選魚生放喺白飯上製出「勝手丼」。

場內人群除咗有「鑽石公主」o既搭客之外，本地人都一樣咁多，為免混亂，團長就分配年長o既團友留喺市場中央度霸位，而後生嗰幾個就負責四周購買魚生。

喺「和商市場」內，「勝手丼」個新鮮熱辣o既白飯底好多店舖都有賣，主要分大（300円）、中（200円）、小（150円）三個容量，不過最細嗰碗份量都好多吓，我地十二個人分咗六碗細都覺得叫多咗。眾多魚生店o既店員其實都非常落力地拉客，小肥就遇上其中一家「佐藤商店」入面嗰位超級友善o既肥哥哥，眼見細佬要招呼多位長輩，佢一手就送上大托盤，幫忙擺放已點選咗o既刺身，見到有啲刺身唔多新鮮仲主動抽出換過，真係好老實！得知家人想食靚蟹，佢仲帶埋XO仔過去隔離舖度選購，服務態度誠懇，實在難能可貴。

一碟碟及一片片可即食o既海鮮單價由50円去到3500円，最平o既50円可以食到小碟o既海鞘、200円可以買到三文魚籽、大卜口都只係500円一件、海膽最貴嗰板都只售3500円，食完除返條數，平均每碗「勝手丼」只需千幾円就有交易，價格當真超抵！正所謂「一分錢、一分貨」，咁平o既魚鮮外表梗係唔會好似餐廳入面啲師傅切得咁精美，不過個人覺得魚生o既鮮味尤其突出，自己製作o既「XO勝手丼」冇樣睇得黎但就好好味。

買完魚生，小肥就跟住嗰位老實又友善o既肥哥哥行咗去隔離舖搵佢個靚女朋友買蟹。哈，點知睇返啲相，先發現原來蟹店同魚生店同屬「佐藤商店」旗下，唔怪得知大家friend過打band啦！

靚女姐姐極之客套細心，知悉XO仔只懂少少日文，佢就用好簡單o既語句推薦當做o既三款靚蟹，分別為鱈場蟹、松葉蟹及毛蟹。續一報上價後，仲話廚房有專人烹煮及處理鮮蟹o既服務，食用簡易，叫我地唔洗擔心要拆蟹。細佬因敏感問題好少食蟹，但由於同遊o既團友全為蟹痴，埋位報告完畢後就應佢地所求，買咗兩隻松葉蟹同兩隻毛蟹大家分。平均每隻4000円左右o既靚蟹肉質幼嫩清甜，蟹膏鮮美厚潤，食到成班蟹迷lam lam脷，聽到個單價後更大讚超抵正爆添！

喺「和商市場」中央位置自助飲食後，理應自己清理及收拾餐桌，當我地攞返啲托盤及用具俾「佐藤商店」o既店員時，靚女姐姐特意走出黎借上雪白色o既濕毛巾，並且教埋我地可以喺邊度清洗自攜o既環保餐具，相當客氣。

正當一眾蟹迷忙於細嚐靚蟹時，小肥就走咗去買生果俾大家飯後食。多間水果店o既產品其實都離不開提子、柿、梨、蘋果、蜜瓜、桃、西瓜、菠蘿，而且每間o既售價都好畫一，細佬唯有以貎取果，選擇咗喺間門面最光鮮o既「（有）むさしや」（Musashiya）度狂購。

單憑果實之美態及色澤，XO仔買咗兩款同為1000円有四隻o既白桃及黃金桃，前者尚算香腍，不過後者就酸到大肥爸爸不斷高呼「盲眼佬都開眼」，似乎唔單只係人，連果都不可以貎相！

要喺市場入面食西瓜同蜜瓜依啲咁大o既水果真係好有難度，幸好「（有）むさしや」有售已預先切好o既哈蜜瓜件，哈蜜瓜又甜又滑又多汁，食得輕鬆又乾淨，每份380円真係一啲都唔貴。

經過多輪巡視，咁多款生果中最受顧客歡迎o既好明顯係兩款青色同深紫色o既提子，眼見售貨員添完再添都估佢係好野，深知家人對深紫色o既巨峰提子甜得有啲假o既味道有少少抗拒，小弟就決定一試差不多係人都買o既青提子。山梨產o既青提子大大粒，就算食完啲咁甜o既哈蜜瓜都不減其清新及爽甜，好味到平時唔多食生果o既團友們都食完再食，1280円一大串實屬超值之選，冇得頂呀！

食完個咁豐盛o既早餐後，大隊就慢慢行返巴士站嗰邊。途中見到巴士站隔離有個蛋形o既玻璃屋，所以就行埋去睇，原來建築物名為長春園「Ever Green Garden」，英文縮寫咁啱就係「EGG」，即「蛋」，真係有趣。

免費入場o既長春園因有溫度管制，故一年四季都能保持葉綠花香。場內不斷播出雀鳥叫聲，中央有個長形流水位，不時又會搞啲表演節目，都幾有氣氛架。有一點大家要留意，因部份地面用上大小不一o既石塊砌成，感覺大自然得黎其實可以幾危險吓。

日本旅遊業興旺，每個城市都不乏購買手信o既廣場，而釧路o既手信中心就設喺市中心o既漁人碼頭「釧路フィッシャーマンズワーフMOO」度。同之前個長春園「EGG」（Ever Green Garden）一樣，「MOO」其實係「Marine Our Oasis」（『海は私達の憩いの場』）o既英文縮寫，因同日文o既「霧」同音，剛好就標記著有「霧城」之稱o既釧路。

漁人碼頭合共五層高，其中頭幾層都設有餐廳，人流最多o既地下為手信集中地，售買多款北海道特產，包括糖果、餅乾、海鮮及重口味o既芝士等。上半層有個水族館，再上仲有個啤酒園添，不過因為我地太早去，好多餐店同啤酒園都未開門。

由於中午前「MOO漁人碼頭」o既啤酒園未開，等待巴士及團友購物o既時候，大家就決定坐低飲杯咖啡。原本諗住唔好行咁遠，就咁幫襯地下其中一家小餐店，無奈吉位唔多，有啲又唔開，正當連團長都覺得有點不知所措時，幸好遇上館內一位懂得講普通話o既靚女大使，多得佢帶路，先識上去樓上一間有景睇o既咖啡屋「ベイカフェ風車」（Bay Café Misuzu）度坐。

分開咗兩邊o既咖啡廳一邊為正常高度o既餐桌散座，另一邊則為高人一等o既吧位。既然十二人都無意點野食，我地就揀坐窗邊兩排面向海o既高櫈，中間嗰行位沿著樓梯升上去，設計令每個位置都可以觀賞到海景，好有諗頭。

餐店以風車起名，四周都可見小風車擺設，的骰可愛。店內只有一位年長o既婆婆駐守，每杯凍、熱咖啡都係由佢喺開放式小廚房內慢慢調製，人多真係做到一腳踢架。婆婆手調o既凍咖啡香滑甘醇，解渴消暑，真係辛苦哂！

返回碼頭時，即見幾位釧路嬸嬸代表拉著橫額歡送「鑽石公主」號o既搭客。郵輪準下午一點半離開釧路港口，從房間o既露台睇完開船後，我地班為食貓就走咗出去同層o既「Trident Grill」度食快餐醫肚。

位於游泳池旁o既「Trident Grill」由相中o既肥叔叔一人主理，只提供熱狗、漢堡包及薯條可選，全為即叫即煮。見咁遲先食晏，小肥一口氣就點哂三味，只係唔要熱狗舊包，點知大廚好客氣地又加返條腸補數。

新鮮炸起金黃色o既薯條香脆鬆化唔油膩。兩條香腸爽厚肉汁夠，而且煎得好香口。漢堡包鬆軟帶脆，軟潤可口。三款美食各有千秋，可以話係成隻船上最正午餐之選！

前幾篇遊記提及過「鑽石公主」郵輪上有幾間要額外俾錢先去得o既主題餐廳，其中一間就係專門食意大利菜o既「Sabatini’s」。

「Sabatini’s」門面光鮮開揚，室內裝修用上羅馬圓柱、水池、石獅子等歐味濃烈o既設計，感覺華麗典雅。大廳左邊有個開放式廚房，埋位一刻已見幾位師傅仔忙碌地搓麵粉，估計將用作焗製麵包或意大利粉。廳內o既散座分佈得都幾開，十二人被安排入座中央兩張大圓枱，每六個人一張都好鬆動。

值得一讚再讚o既就係樓面服務生o既態度。佢地身穿白色制服，儀容端莊，唔同級及唔同性別o既咁多位都一樣好有禮貌同極為好客。Auntie Y唔小心倒瀉紅酒喺身，女經理不但第一時間上前親自幫忙清理，更自動提出會為貴客免費乾洗襯衫，係咪好專業呢？！

「Sabatini’s」入場費每位29美金，另加15%服務費，可任點兩頁主餐牌及兩頁甜品餐牌上o既項目，酒品特飲同橄欖油則另計。幾款麵包均為大廚敬送之小點。細問下得知頭盤份量都幾大，我地就叫咗幾客黎分，主菜同甜品則各自點選。

1)      Herbed & Spicy Focaccia Grissini – 修長o既麵包條香脆少辣，好醒胃。

2)      Rosemary Flatbread with Air-Cured Parma Prosciutto & Marinated Green and Black Olives – 火腿薄餅輕巧香濃，每人一細件，份量啱啱好。

3)      Calamari Fritti, Crisp Fried Baby Squid in a Cone, Lemon Garlic Dip – 以筒杯上o既炸BB魷魚脆巧乾身，點埋另上o既白色檸檬蒜香忌廉醬，效果惹味又清新，個人like爆！

4)      Penne con Brasato di Manzo, Braised Short Rib over Penne, Grana Padano – 意大利餐廳o既意粉果然冇甩拖，長通粉煙韌帶脆，混入肉香潤甜o既牛肉絲，足以發揮簡單美。

5)      Tris d'Aragosta, Lobster Three Ways - Lobster Tail, Lobster Orzotto and Lobster Bisque Sauce – 主菜龍蝦三重奏因視覺效果問題，上枱時必須要連殼上，然後再續一由侍應熟手地即場喺客人面前拆除，其刀法凌厲，直令細佬諗起星爺部「功夫」。白雪雪o既龍蝦肉本身爽脆彈牙，配上燈黃色o既龍蝦汁更能特顯兩者o既鮮濃甜美，互相輝映，美觀又美味！

6)      Espresso Gelato – 甜品特濃咖啡意大利雪糕香濃微甜，食完兩球都唔覺溜。

總結，比起晚餐僅僅合格o既「鑽石公主」主餐廳，「Sabatini’s」無論係喺環境、服務、食物質素等各方面都顯著地更為優勝！小肥在此可預告俾大家知，「Sabatini’s」係整架郵輪上管理得最好，而菜式亦為最有水準o既餐廳。

餐廳位於一條小河的旁邊, 店外環境很優美, 走過小橋就可到達餐廳
一進到餐廳就聽到很舒服的音樂, 全木製的環境令人有放鬆的感覺, 一個人進來亦不會覺得尷尬~
食式都很特別, 應該很少機會可以在日本食到多國料理吧~菜單還有英文及簡單介紹每款菜式, 不怕會選到自己不喜歡的東西吧~
雖然自己不是素食者, 但看到菜單有不少的素食菜式都覺得很貼心, 照顧到不同需要的客人呢! 
價錢都不會太貴~
白天逛了一整天, 晚上去喝一杯放鬆一下心情, 是一個很好的選擇~
店內放了桌上足球, 當天的客人都很好, 我們都一起玩了一整個晚上呢~
店內每星期二都會舉辦桌上足球比賽, 贏了的人會獲得酒精飲品一杯呢, 希望下次可以來參與吧~~
很推薦這家店, 有機會一定會再去的!

 

這是我們在西雅圖的一個晚餐，也是我們兩星期行程中最後的一個晚餐。這一夜，太太的哥堅持同家人說不在家食飯，我們一行四人來到西雅圖北部的對岸，目標就是一間馳名的奄列店，名字叫《Beth's Cafe》 。

這《Beth's Cafe》 為何會那麼出名，為何會令到內子的兄長專程要帶我們來呢? 原因，就是這一家店的特大奄列。在是次行程中的最後一個晚上，我們4人行，來到北部的對岸 Aurora Avenue，找來這一個門面一點也不光鮮的24小時早餐奄列店。

門面的招牌很古舊，同樣，店字的內內外外都很古舊，是名符其實的一間老店。晚上來，沒有燈光，感覺不到其門面的老感覺，但在網上看過一些此店的大白天照，這的確是一個老地方，老牌的老美咖啡店，也即是同我們香港的茶餐廳一樣。

有卡位，仲唔係茶餐廳! 仲要係老牌冰室的樣子。不過，店子的古舊感，就被牆上的圖畫取替了。之前去過一間餐廳，他們會給小朋友一張圖畫紙，小朋友畫好了，就會貼在餐廳門口的牆壁上展示。然而，《Beth's Cafe》 的圖畫就不是由小朋友所畫，是由我們一眾成年人食客畫的，而且可以自由發揮，畫上對這一間餐廳的感想，或其他你喜歡的東西。

牆貼滿了，就連餐牌也不放過。單是我手上的 Menu，已有忍者龜同一個很奇怪的菜頭人來做封面同封底。

同好多在電視劇中見過的舊美式餐廳一樣，餐廳有一座流聲機，可供客人們點歌仔之用。仲有，小店有一個機房，喜愛打 pinball，打槍 game 的朋友，這兒有三部機可以讓你大顯身手。

此店馳名的是奄列，所以我們只看 Omelette 的那一頁 menu，一共有六款 Omelette 可選擇，若是不喜歡指定口味的話，同 pizza 一樣，可以自行配搭。而且他們提供了兩個 size，一個是 6 egg, 另一個是 12 egg。在此，我領會到多一樣野，美國除薯仔、糖同牛奶之外，雞蛋都係唔值錢的東西。說開著仔，Omelette 配一份 Hash Brown，而且這Hash Brown是任食的。

小小溫提，Omelette 原意是每人一份，若是大家要 share 的話，每一位要吉碟用來分享的朋友，要多收 US$1.50。

煎雞蛋的地方，就是正門對著的 open kitchen。N 多盤的雞蛋準備就緒，廚子們的最主要工作，就是煎 Omelette。

6隻蛋的是太太要的 The Veggie，淨是 Omelette 本身，已經佔用了一整個大碟。再計埋底層的一大片 Hash Brown，加上兩片多士，這，絕對是兩個中國人的份量。素食版的 Omelette，餡料有蕃茄、蘑菇及黑橄欖，亦因為有黑橄欖在內，味道不會太過單調。幸好這東西沒有加入芝士，若是有......沒可能食得晒。

我們另外點了一份 12隻蛋的，味道是 Southwestern Exposure，這一個 Omelette 已經不能用碟食盛載，店方用的，是一個圓形的 Pizza 盤。美國南部的口味，帶辣，而他們說，其所用的辣醬是以胡椒、洋蔥、蕃茄、辣椒及牛肉去煮成，入口份外的有味道，餡料再加上了邪惡的芝士，墨西哥辣醬，同 sour cream，味道十分之野性。

切開一看，我早說過了，這 Omelette 不單是蛋，內心餡的份量也好勁，是日我們4個人分一份6隻蛋的及12隻蛋的，兩份都要....打包。

食 Omelette 想要惹味多一點，此店有不同的辣醬供你選擇，而辣醬全都是勁野，喜歡辣的，落一落，入口的味道感覺更爽。

此店的更甚最，是這一個 Chocolate Peanut Butter Brownie Milkshake，店方早說明了，這一杯飲料是兩人份量，至少要兩個人飲。我們一行四人，就弄出了4支飲管、4隻匙羹的這個怪模樣。

Cream，勁大，兩件 Brownie，勁大，整杯飲品，又大又漏，而且其朱古力味其實不重，最重的，是花生醬味，我們4人都覺得，我們正在飲一杯花生醬落肚。

來美國，食的正宗美餐不多，但我感覺到，這一個簡單，簡陋的 24小時 breakfast 店，是最具風味的。來西雅圖玩的朋友，值得抄低地址，自行找方法來啊....公交辨法教不到大家了，因為，我們是開車過來的。

從三藩市回程去西雅圖，我用了一整天的時間。一早9點開車，凌晨2點才到。說真，全程跑 I5，其實是幾悶的，在 Sacramento 周邊的大直路，俄勒岡州的大直路，少一點咖啡，少一點精神，真的會悶到睡著。

說I5，最精彩的一段，就是過了 Redding 之後的一段山路，最高點是海拔4310呎。我們在 Redding 遇上了大雨，車子開始在北加州上山時，雨變雪了.....幸好，雪不算太大，仍舊可以通車。

除下雪，加上路上有少少驚險之外，都沒有什麼了。 全程高速 I5 回西雅圖，我負責開車，早已經開到沒有感覺了。  

坐由 Seattle Center 開過來的 Monorail，另一端的終點站就是叫《Westlake Center》了。

這可以說是西雅圖的最市中心地帶，美國人稱之為 downtown，不過，相對上，這一個 Shopping Center 又的確不是很巨大。

雖如此，這兒百貨公司林立，要有的商店也應有盡有，算是幾好的了。

來時是聖誕，商場內外的氣氛也份外的好。