去完九龍瀑布都成12:00pm，都係時候食晏啦！師傅問我哋想食咩，晌咁郊區，真係唔知點答你，倒不如問番師傅有咩好推介啦。佢介紹去九龍瀑布附近嘅「紫竹園」，食餐農家飯，品嚐布依族嘅特色風味。

離開九龍瀑布揸咗10min車左右就到，來到一個小村落，人跡渺渺，靜得緊要，不過，就係咁就有一種寧靜盎然嘅感覺，令人好平和，感覺閒適、恬靜。紫竹園位處小路旁，門外掛住一串又一串嘅粟米，最鍾意係正門兩側嘅對聯：「清啖鮮味招來千里客，布依鄉情留住萬人心」，幾有韻味！

農家作飯甚需時，因為平日唔係經常有客，而我哋又係即興決定去食，所以，晌度食餐飯唔急得，慣住大城市嘅人都要將心情調校一下。故此，趁此空檔晌依個小村落遊走一下，親睹鄉村嘅生活環境。

等咗近半個鐘，終於有得食（其實只得我哋一枱客人），內裡環境好家居，成個大客廳咁，擺放幾張矮矮嘅木枱木凳就係架喇，隔離仲有幾個村民「打牙骹」、抽吓水煙！初初以為得4個餸，跟住陸續有來，最後就係8餸1湯，白飯任裝。本來飯店會另外有飯餸招呼師傅，不過，我哋都邀請埋佢一齊同枱食飯，反正仲係有咁多餸。講明係農家菜，自不然不會大魚大肉，山珍海錯。8個餸，都係啲炒豆、炒菜、煎蛋、燻肉、臘肉……等等，味道來得清啖自然，食出材料本身真味，尤其蔬菜嘅菜味同新鮮度最突出。埋單索價RMB120，我哋就覺得有啲貴，因為都係啲平價材料，只不過，體驗吓農家樂，推動吓佢哋有生意做，況且出嚟玩都無得下下計住計住，所以都覺得無所謂。