晌麥士維熟食中心後面兜上去，就係安祥山。其實安祥山係由幾條街組成：Ann Siang Hill、Ann Siang Road、Club Street，整條街都係幾十年歷史嘅古舊樓房，有啲仲頗具南洋風情嘅建築，外表雖古老，內裏卻新潮，五顏六色嘅建築物內，早已被翻新成為一家家充滿潮味嘅型格個性小店，有賣傢俬、時裝、婚紗、書本，甚至Café都有，早已成為當地年輕潮人嘅蒲點。

安祥山位屬牛車水，原本稱為史各士山，百多年前由嚟自馬六甲地主富商謝安祥買入依片小山丘，遂改名為安祥山。依家所見嘅房屋，大部分都係晌1903 - 1941年間建成，當中最有歷史價值係晌Club Street嘅76號屋，建於1891年，當時係有錢商人嘅俱樂部，現在已改建成餐廳。

雖然位處牛車水附近，但感覺就好唔同，無咁商業味重，環境亦都較寧靜。如去開麥士維熟食中心、牛車水，不妨到來逛逛欣賞地道嘅新加坡設計！

睇慣咗城市嘅繁華景象，不妨走進新加坡植物園，逛熱帶雨林，賞花卉美態，野餐於草坪上，可以係一件賞心樂事。如果你係個鍾意「拈花惹草」嘅人，又鍾意玩攝影，依度就啱晒你喇。

1860年興建嘅新加坡植物園，佔地成52公頃，可想而知有幾大。園內精心佈局下，分別有3個湖泊（天鵝湖、交響樂湖、生態湖）同多個主題部份（植物學中心、薑園、國家蘭花園、棕櫚谷、熱帶雨林、進化花園、生態花園、積格巴拉斯兒童花園……），非常多元化嘅一個城市綠洲，上上佢個網址就可詳細了解其中。要行勻晒都幾花時間，我同老婆都係行咗一半都未夠，已用咗幾個鐘，當然，因為我哋行得hea，又猛咁影相，尤其晌國家蘭花園，影唔停，所以先至行咗咁少地方啫。

沿棕櫚谷（Palm Valley）向下行落去，有個交響樂表演台（Symphomy Stage），遇啱時間，仲可以欣賞到新加坡交響樂團同新加坡華樂團嘅表演，費用全免。另外，熱帶雨林（Rain Forest）又係值得一逛，因為依幾片原始叢林留有高大嘅熱帶雨林樹木、新加坡原木材嘅樹木，感覺幾獨特。

如果係親子遊，可以帶佢哋去一去積格巴拉斯兒童花園（Jacob Ballas Children's Garden），嗰度有遊樂區、遊樂場、樹屋、滑梯、迷宮，又有唔少具啟發性、互動性嘅設施令細路仔明白大自然運作嘅知識，介紹光合作用嘅原理、製成咖啡、茶、可可嘅各種植物，頗為有趣。

新加坡嘅烏節路係著名遊客購物區，不過我倆公婆唔好買嘢，所以無安排嚟烏節路，只係當時去新加坡植物園嘅MRT (CC19) 仍未開通，要去MRT烏節路站再轉巴士先去到，故此回程都係要返去烏節路嗰邊先。

由於稍後要去Night Safari，所以就晌ION Orchard嘅美食廣場Food Opera食完嘢先出發，時間好用啲。由於時間仲早，都係5:30pm左右，個肚未算好餓，就叫了一碟烤雞飯同一個蠔煎就算，叫做有嘢到肚。

印尼燒烤
顧名思義，就係賣印尼燒烤，主菜離不開烤雞、咖喱雞、炸雞、烤魚、烤魷魚（佢哋叫烤蘇東，如果唔係睇番英文，睇中文反而唔明添哈哈！），共5款。可以散叫淨餸，SGD3.5 – 4.0，跟飯跟蛋成套餐，單選SGD5.5 – 6.0，雙拼就SGD7.5 – 8.0。

我哋要咗個烤雞飯套餐 (SGD5.5)，烤雞好大件，淋上香濃醬油，味道非常惹味，而白飯又淋咗印尼咖喱，香而不辣，帶有稍重嘅香料同椰奶味；伴菜仲有片煎蛋角，加碗清湯，都唔錯喎！

永馨
依一檔賣炒福建麵、炒粿條、蘿蔔糕、蠔煎，我哋就要咗一份蠔煎 (SGD6.5)，望落都幾大份，但蠔唔多，唔係好值，而且口感比較油。

臨走晌迎門口位檔西得利買多個Butterfly Bun (SGD1.0個架)，類似煎堆，炸嘅包，外形少少蝴蝶狀，買嚟係驚夜啲晌Night Safari肚餓啫。

ION Orchard係個8層高嘅大型購物中心，有新加坡嘅六本木山之稱，有不少國際名牌旗艦店進駐，更雲集咗唔少年輕潮流及生活品味嘅商戶，餐廳食肆又遍布各樓層，有國際知名嘅，有本地風味嘅，算係應有盡有。成個商場可謂集時裝、生活、娛樂、餐飲同藝術於一身，不過，都係嗰句，我哋唔好行商場，但如果你係鍾意買嘢就應該過嚟行吓喇！