Crystal 安排o既旅遊巴乘載我地由碼頭到Ruo do Comercio。站口已經企左兩三個姐姐仔，佢地頗為落力地推介市內不同o既觀光巴士，包括我地最終選擇o既雙層Yellow Bus。我地當然係幫襯佢買飛啦，成人票價每張為Euro 19。如果街上冇售票員，大家其實可以上車向車長購買，價錢都係一樣。Lisbon此款官方觀光巴士真係好方便，完全冇限制旅客喺每一個景點停留o既時間，每隔二十分鐘就會有一架巴士，持票者可隨意喺不同站上車落車；旅客鍾意可以慢慢睇，唔鍾意更可以選擇唔落車。大家記得攞份小冊子，因為入面有張大地圖，方便大家知道自己o既位置。

啱啱去完法國，而家黎到葡萄牙，發現兩個地方都好多廣場，噴泉，同柱形紀念碑，莫非依啲就係歐洲o既特色？！

Praça de D. Pedro IV（Pedro IV Square）係廣場個官方名，不過普遍都稱之為Rossio Square。廣場個名同紀念柱都同Pedro IV有關，好明顯係一位重要人物。XO仔細個最怕讀歷史，要上網查先知道Pedro IV原來係葡萄牙國王，亦係第一任巴西皇帝。Rossio Square歷史悠久，又出名靚，據說以前用途好廣，包括用作舉行慶祝活動，鬥牛，處決等。廣場入面有仲個銅像紀念Gil Vicente，葡萄牙人都視佢為葡萄牙版o既莎士比亞，更被譽為葡萄牙劇院之始祖；就連葡萄牙足球隊Gil Vicente FC個名都係因佢而名，真係唔講得笑！

自由大道上好多名店，酒店，係世界最貴大道排行榜中第三十五名。大道上o既建築物設計及馬賽克碎石路都極富有傳統葡萄牙特色。

大道中有一個附噴泉o既紀念碑，據說係為第一次世界大戰中有份參戰o既烈士打造，以表對佢地o既敬意，非常有意思。

Eduardo 係葡萄牙文o既Edward，而Eduardo VII Park其實係因前英國國皇 Edward VII而起名，為紀念佢1902年曾到訪葡萄牙。

公園位於高地，喺嗰度可以清楚望到剛剛經過o既自由大道及Marquess of Pombal Square。每年o既Lisbon書展亦係喺Eduardo VII Park舉行。

據說，Amoreiras Shopping Centre 係Lisbon市內最老o既商場！聽到o既時候真係又少少驚訝，因為個商場外形一啲都唔古老，其實仲可以話係有少少摩登添。上網查證過，原來開業於1985年就已經可以成為市內最老之商場，雖則如此，商場內o既商店絕非古董，好多舖頭名喺香港都見過，只係價錢不同而已。

中肥哥哥真係眼利，而且見識廣博，架巴士一路行，佢好快就指出葡萄牙主要地標之Cristo-Rei 比細佬睇，仲叫我快啲影相。

聽個名Cristo-Rei（Christ the King Statue）都知神聖。葡萄牙信奉天主教，此耶穌基督像係第二次世界大戰後葡萄牙人為感謝主而建造o既。上佢地個官方網頁瀏覽時，小肥發現原來旅客同信徒可以喺耶穌像入面「爬梯」，當然嗰度亦設有教堂，餐廳同精品店啦！

Praça Afonso de Albuquerque，即Afonso de Albuquerque廣場。廣場及廣場中央o既銅像都係紀念「葡萄牙戰神」Afonso de Albuquerque。地方咁開放，有邊個會估得到個廣場後面就係葡萄牙總統o既官邸，貝倫宮呢？

嘩，除左馬車博物館，航海博物館，電力博物館，Lisbon仲有個考古學博物館，真係夠哂多元化。據說，個建築物未變身成博物館之前其實係修士宿舍。

雖然教堂係免費入場，不過佢旁邊o既修道院就要買飛先入得；成人每位Euro 7，長者減一蚊，但必需出示護照。修道院比教堂空曠，感覺好似寧靜左好多。修道院內每條柱同外牆都經過精心設計，細緻o既雕刻令人嘩然。雖則Cloister 入面冇聖像，只係Refectory入面牆上有多幅用磚製成o既聖畫，建築物入面可以見到以前o既告解室同食堂，可以話係另一番味道。

黃巴離開左修道院就沿住海旁行駛，離遠已經見到個半月形o既大石。四眼小肥眼力真係差，要近睇先知依個「發現者紀念碑」（葡文：Padrão dos Descobrimentos；英文：Monument to the Discoveries）原來係隻船，而且船上有好多好多人。可以被雕刻成船上o既全部都係對葡萄牙「發現業」有莫大貢獻o既航海家，探險者，皇室等等。紀念碑個位置好有意思，因為以前葡萄牙就係喺依度出發去探險及對外貿易o既。

之前提到Afonso de Albuquerque廣場內o既「貝倫宮」（Palácio Nacional de Belém）係葡萄牙總統o既官邸，點知係離貝倫宮不遠o既海旁又有個「貝倫塔」，原來我地當時身處於「貝倫區」。貝倫塔，又名「Tower of St Vincent」，同Jeronimos Monastery修道院一樣都已經被列入為世界遺產（UNESCO World Heritage Site），因為貝倫塔喺探索時代（Age of Discoveries）負責保衛葡萄牙！

當黃巴返回Praça da Figueira時，已經過左一點半。團長就安排我地坐的士先去食個自助午餐，然後再帶啲女士們去shopping。

我地去到Calçada do Sacramento餐廳o既時候都已經成兩點，所以餐桌上o既食物選擇不多，而且好多都涷哂；好在之前食左幾件葡撻，個肚先唔會太餓。間餐廳最有睇頭就係佢o既新潮裝修同擺設，例如燈飾，佛像，磚牆，枱上o既棉花，同埋單時用黎收錢o既器皿等，真係各具特色，小肥淨係影相都影到手軟。

食飽飯，團長按照原定計劃帶班女士們去shopping。嘩，真係估佢地唔到，行左個半鐘頭都未行得哂街上所有舖頭。

正當女士們忙於買野之際，不愛購物o既XO仔就一邊行一邊影相，以上圖片包括喺Rua Garrett上o既一間好出名既咖啡室，Café a Brasileira。聽Auntie M講，依間咖啡室係Lisbon市內最歷史悠久o既一間，賣o既全部都係巴西咖啡。

此外，喺Rua Garrett上，小肥途經一間教堂，一間以葡萄牙磚所砌成牆o既舖面，以及為紀念葡萄牙詩人Luís de Camões而起名o既Camões Square及其銅像。

因為我地要趕上船，所以女士們未行完街我地都要截的士返碼頭。碼頭有咁多遊客經過，當然唔少得精品店啦，其中都不乏T-Shirt，杯，旗等紀念品；有特色少少o既都係同葡萄牙吉祥物Barcelos Rooster（小公雞）有關。

喺前幾編遊記度曾經提到，郵輪上所有食物同飲品都包哂。喺六樓o既Galaxy Lounge 都唔例外，雖然只係提供飲料，但所有紅酒，白酒，雞尾酒，汽水，果汁，咖啡等等，全部都唔洗比錢，最重要就係可以一邊飲，一邊欣賞Crystal預先安排好o既特備節目！

當晚o既表演嘉賓係一對好年輕o既蘇格蘭兄弟，The MacDonald Brothers，即Craig Macdonald同Brian Macdonald，前者為哥哥。佢地一邊彈奏不同樂器（大哥拉小提琴；細佬仲勁，吹笛，彈結他，鋼琴，同手風琴），一邊唱歌；無論係獨唱，和音，亦或係奏樂都咁悅耳，簡直係繞樑三日！小肥英文唔係太好，加上佢地兩個蘇格蘭口音強勁，好多時都唔係好聽得明佢地喺台上講乜，淨係知個表演好正！嘻嘻，佢地表演完畢，我地high到去搵工作人員同我地請佢地出黎影相添！

睇完咁精彩o既表演，我地就落返去Main Dining Room度食晚飯，繼續講The MacDonald Brothers，因為有幾位團友冇時間去聽。

可能自助午餐唔係食得好多，小肥當晚胃口奇佳：

1)      Chilled Jumbo Prawn Cocktail with Creole Rémoulade – 頭盤食左杯「雞尾蝦」，珍寶蝦香甜爽口，正！

2)      Braised Oxtail Spring Rolls with Peach Chutney and Lamb’s Lettuce – XO仔都係第一次聽到「牛尾春卷」依道菜式，味道同我地中式春卷完全唔同。「牛尾春卷」個皮好薄，而且唔油，牛尾餡又夠多，西式春卷認真唔錯。

3)      Consomme Double with Porcine Flan & Spring Onions – 清湯味道香濃，飲完個胃好暖。

4)      Spaghetti Carbonara with Cream, Bacon, Parmesan and Italian Parsley – 比起市面上可以食到o既Spaghetti Carbonara，Crystal嗰個一啲都唔溜，但係味道又唔會因此而變得淡，麵條又夠al dente，做得好出色！

5)      Broiled Fillet of Mediterranean Sea Bass with a Vinaigrette of Heirloom Tomatoes, Lemon Segments and Capers, on Olive-Smashed Potatoes, Topped with Fine Herb Salad – 主菜揀選食魚，sea bass魚肉幼嫩，配上個帶酸o既汁，意外地食落覺得魚肉好鮮甜。

6)      "All About Chocolate" Double Fudge Chocolate Brownie with Parlor Oreo Ice-Cream and Fudge Sauce – 一頓豐富o既晚餐又點可以少得甜品呢？"All About Chocolate"真係好夠朱古力，味道香甜濃郁，熱食brownie加上雪糕簡直係一絕呀！