27/06/2012

晚上10:20起飛去曼谷, 第一次坐A380, 係有期待嘅.....

航機比細機闊落好多, 不但有好多較新嘅movies睇, 飛机餐都唔錯, 幾好味呢!

空中服務員嘅服務都感滿意, 真係同廉航嘅服務爭好遠呢!

係網站Search咗呢間精品酒店, 佢話係4星, 我就比佢3星半啦! 因為個浴缸同D毛巾比我扣佢哋嘅分.....

係網上睇呢間酒店嘅評分, 話佢唔係咁方便, 因為要行10鐘左右先至到BTS Thonglo 站, 但其實都唔係好遠啫, 沿途有好多食肆同做Spa/Massage嘅地方, 係搵食同做Spa嘅方便之選。

佢哋咁啱6月做promote, 住兩晚連早餐, 就包一程機場接送; 兩晚房費4,000B, 都算合理呢!
當晚到曼谷已經差唔多12:30 am, 有駕酒店私家車接比較安全, 費事係机場講價搵的士咁浪費時間; 另在酒店去BTS站, 有免費Tuk Tuk提供, 都唔錯喎!

由机場去酒店, 約30分鐘內 (零晨時分)。

28/06/2012

酒店嗰package 本身冇寫話包早, 只係話包一程機場接送, 去到問佢哋早餐幾多錢, 佢話包嘅, 叫我哋6:30 am - 10:30 am 落去食早餐......

網站評語話佢哋嘅早餐"麻麻地", 的確係唔豐富, 雖然選擇唔多, 但又不止於好差, 我就覺得不過不失, 起碼可以食飽。

唯一不是太好的是放生果同自選沙律吧嘅枱面處, 有數隻螞蟻遊走, 酒店職員有定時清理, 所以問題不大。

今次來曼谷最主要嘅目的, 就係做Massage, 公司同事介紹, 我再在網上睇吓仲有冇D又平又正, 搵咗成20間, 都係呢間較實惠又企理。

所以決定同朋友買個推油按摩package, 6500B/10次/1.5小時, 我同佢一人一半, 每人5次, 共7.5小時, 所以打算分3次完成佢, 平均每次3個鐘係1300B, 約港幣326左右, 價錢非常合理。

至於手勢, 我倆非常好彩, 分別3次的技師都不錯, 好正
。
我們由於會住3間不同的酒店, 所以去了Health Land 3 間嘅分店幫襯, 分別是 :

1) Ekamai : 由Salil Hotel 向 Sukhumvit Soi 55 行出去Sukhumvit Road, 一直向BTS Ekkamai 站方各行, 去到路口有牌寫著Ekamai Rd Sukhumbit 63, 就轉入去一直行, 約走10 - 15分鐘(慢行), 見到Big C Supermarket, 再一直走約一個街口, 就會見到Health Land Ekamai;

2) Asoke : 乘BTS Asoke 站3號口出, 見到Terminal 21 那邊行, 沿住Soi Shkhumbit 21條大路走, 約走10分鐘, 見到有Health Land招牌, 再轉左, 行幾個舖位左右, 就會見到Health Land Asoke; 

3) Sathorn : 是由 BTS Surasak 站乘的士去的, 約43B。

3間分店中, 裝修最好嘅係Asoke, 又大又靚; 最後做完oil Massage 1.5 hrs, 再加兩個鐘 Herb Thai Massage, 750B, 又有唔同嘅體驗, 一樣咁正!

係 Health Land Ekamai分店做完Massage, 已經是3:30pm, 要醫肚喇, 隨便係Health Land 對面有間小食店, 又見有幾枱人食嘢, 就入去試吓啦!

order咗一碗雞麪, 55B, 唔得, 嗰麪嘅質地唔好, 湯底唔掂, 仲好重梘水味, d雞又冇味兼"鞋"嘅, 失望;

但另一碟鮮蝦炒貴刁, 酸酸辣辣, 隻蝦又爽又新鮮, 好味好開胃, 80B, 呢個貴刁最似樣, 點解分別咁大嘅.....

係Health Land Ekamai 隔離Big C 超市換錢後, 問吓路人由此點去J Avenue, 個個都話好遠, 一定要搭的士, 睇地圖又唔係真係好遠喎, 於是決定行去試吓!

由Big C 超市行番去Health Land 再過對面, 一直走至見到Thonglor 10 路牌, 再轉左走, 沿途都見到好多餐廳, Cafe 同私房菜教室, 整條街都有好多日本餐廳, 慢慢行, 一d都唔覺得遠。

約15-20分鐘, 就見到J Avenue, 我哋冇即刻去 J Avenue, 而係轉左行去文堂吉食雞飯。

叫咗一碟雞飯同燒肉飯, 另再叫咗兩杯大大杯嘅泰式檸茶。

雞飯方面, 我本人覺得喺布吉嗰間好食D, 但個燒肉飯唔錯, 同香港嘅好唔同, 有一個甜嘅汁作調味, 幾好食, 有驚喜嘅係杯檸茶, 唔知係熱得濟, 杯檸茶寧舍好飲, 泰式檸茶嗰種味有D似酸梅湯, 好解渴呀!

一共食咗192B

食完雞飯, 行番過對面嘅J Avenue, 原來呢個商場仔冇咩嘢行, 最有睇頭都係個保齡球場同裡面嘅食肆, 再加個超市, 咁不如又食過喇! 就去 Greyhound Cafe 坐低。

阿蘇幾年前喺節目介紹呢間餐廳嘅炸雞翼, 我已經好想嚟Bangkok試, 今次終於食到, 果然冇介紹錯, 好正呀! 而且仲唔貴 110b。

另叫了一客越式春卷, 蔬菜味較重, 好清新, 中和番食炸嘢嘅重口味, 130b; 另一客意式長法包, 共有6件, 有3件是蕃茄洋蔥汁喺上面, 另3件是蘑菇洋蔥, 一酸一鹹, 配合得好好, 原本已經有飽意, 都仍有胃口食埋佢, 唔好浪費, 120b。

下次嚟Bangkok, 我會去試吓其他分店。

喺 Greyhound Cafe 食完, 想慢慢行番酒店，行到距離酒店約兩個街口，就見到Swensen's。

好難忘響布吉食佢哋嘅雪糕新地, 今次嚟Bangkok, 都食咗兩次。

新產品朱古力系列, 一於試吓佢, order咗個Chocolate Deluxe, 69B, 好滿足呀!

又響Siam Center分店食咗個Nutty Banana Basket, 109B, 好消暑呀!

食完個芒果糯米飯, 係時候執拾細軟, 起程轉去另一區的酒店 - 曼谷全季酒店。

在Salil Hotel坐免費Tuk Tuk出 BTS Thonglor站, 最慘嘅事就係拎住行李搭BTS, 上站係有自動電梯, 都比較好, 出站就慘喇,  BTS係有上冇落, 要拎住D行李落樓梯, 真係唔方便呀! BTS唔方便旅客, 都要照顧吓d傷殘人仕啦!

我們係Victory Monument站落車, 由4 號出口旁有條行人天橋, 不用落橋, 一直走至盡頭, 而橋底有一個市集, 叫Victory Point, 天橋樓梯有個商場仔叫Center One, 沿路直走, 直至見到 Century Hotel, 咁就要過馬路喇, 再沿著Century Hotel走5分鐘, 就會見到 All Season!

check in 時雖然多人, 但都算快攞到房!!

入到房, 發覺好多嘢都好舊, 床單, 枕頭, 毛巾都係黃黃的, 傢俱又崩又爛, 嗰toliet盞大燈又壞咗, 只得盞小燈照明, 令到嗰toliet好黑.....

至於wifi上網就好好, 將床同枕頭高度都算舒適, 另外個早餐Buffet 豐富過Salil Hotel,  不過我唸All Season 真係要裝修吓喇!

冇心插柳柳成蔭, 真係冇唸住入呢兩個地方行, 但想買嘢比港童同其他細路, 所以入咗去睇吓, 其實呢兩個地方都幾好行, 起碼Center One 有冷氣啦! 唔買嘢都可以入嚟過吓冷河, 呢個商場比較地道, 好似葵涌廣場/旺角商場嘅形式, 全部都係小商戶, D貨品好啱年青人, 而且價錢唔貴, 三四十元就有交易......

另Victory Point 就係一個小型市集, 有d貨品仲比翟道翟平, 如果想買衣履鞋襪同手飾(即旺角貨類), 呢處比翟道翟好行好多......

30/06/2012

10:30 am出發去翟道翟市集, 打算4:00pm 回程去Health Land Asok做massage, 呢個安排係最好不過啦!

真係對翟道翟又愛又恨, 愛佢多嘢買, 種類琳瑯滿目, 咩嘢都有得買, 我就係度用晒D錢, 好彩呢度有銀行, 都好方便去換錢。

因為實在太熱, 真係完全冇胃口食嘢, 只係想飲消暑嘅飲品, 但朋友就話要食,  話唔食冇力行, 所以就選了檔食湯粉嘅檔口坐低, 我哋隨便叫了兩碗魚蛋粉, 炸雞同兩支水, 共140b, 估唔到D魚蛋咁彈牙, 碗粉好好食, 如果唔係咁熱, 我一定食兩碗。

另又買了一杯所謂嘅鮮橙汁, 睇住佢榨汁, 半杯橙汁大半杯冰, 不加糖, 75b/杯。

咁熱, 又買了一個椰皇雪糕, 檔主會先比半杯椰皇汁比你飲, 然後先至比你一個椰皇雪糕球, 雪糕係用椰皇殼盛著, 幾好樣, 仲好好味, 30b。

 
做完Spa ， 已經係9：00 pm  要去食睌飯喇!

由Health Land 行過對面，有間幾隱蔽嘅餐廳，係食意大利餐，算喇，唔周圍搵，入去試試啦!

入面相當熱鬧，大部份都係外國人，老闆亦係外國人, 睇到只剩番兩張細枱，坐無虛席。

叫咗兩樣嘢，火腿鮮蝦pizza同蟹肉意粉，好味又大大碟，蟹肉意粉有好多蟹肉, 所以唔單止唔貴，係非常抵食, 埋單合共500B。

呢度嘅食物係我喺泰國食嘅餐廳中碟頭較大嘅，所以覺得幾抵食。 

1/7/2012, 上午去咗Central World 等名商場行, 跟住坐BTS Surasak站再轉的士去Health Land Sathorn分店做埋last Oil Massage + Herb Thai Massage, 到7:00pm 先至去第三間酒店Novotel Bangkok Fenix Silom check in。

講地點, 呢間Novotel比較差, 距離BTS較遠, 要在Surasak站行約15分鐘至酒店, 所以佢哋嘅房價都比較平, 約hk$500包早。

雖然房間不大, 但浴室比Salil 同All Season乾淨舒服。

值得一讚係佢哋嘅自助早餐, 都幾豐富, 食完早餐可以唔洗食午餐。

另外亦有食佢哋嘅Buffet Dinner, 351B, 約HK$87, 唔貴, 但唔多嘢選擇,  但基本是夠食嘅, 可再加錢點主菜, 視附所點菜式, 約加百多銖都可以; 但部長提議我哋看看是否不夠食, 先至再點主菜, 朋友想點嘅, 但我就覺得唔須要囉!

唯一係佢哋嗰助廚, 唔知係咪想慳電, 關掉大部份嘅助熱器, 所以初時D餸只是暖, 後來同部長講, 佢開番晒d助熱器, 咁就好好多。

02/07/2012 上午10:30，由Novotel Silom 出發打算去Central Pier 搭Chao Phraya Tourist Boat 遊湄南河，順便換錢；在途中，有個肥佬問我個朋友去邊，話教我哋點玩曼谷，同我哋講依家呢個時候冇Tourist Boat搭，要下午１點後至有船坐，提議我哋坐Tuk Tuk 周圍去，可去卧佛寺，皇宮，China Town同佢所講平靚正嘅購物中心，又同我哋搵Tuk Tuk, 仲幫我講埋價，包１個鐘５０B...... ，好熱心啊!

我當然有提防佢啦！仲話幫我換錢添，我梗係好言拒絕佢啦。但我朋友覺得佢嗰提議唔錯，思想過後，我照坐Tuk Tuk，但只去卧佛寺（朋友話未去過，想去睇吓）購物中心同China Town。

其實我想去埋Khao San Road, 但個Tuk Tuk司機唔知我講咩嘢，最尾都係響China Town 放低我哋。

嗰個所謂嘅購物中心，其實係搵遊客笨嘅精品店，有珠寶、皮包、象牙等高檔貨，同肥佬所講的平靚正爭好遠，我覺得肥佬想賺我哋嘅佣金，叫我哋唔好坐船，改搭Tuk Tuk方便去此處。
 
講番China Town, 在橫街有好多攤檔, 好多做批發, 大部份都批發飾品, 文具, 手袋等, 有d似廣州一德路, 喺度買嘢批發零售均可, 好啱遊客買手信呢!

行完China Town嘅批發巿場，又去埋林真香買手信, 完成任務, 係時候去搵嘢食...

朋友話好想食魚翅，其實我已決定唔食魚翅好耐， 但朋友話叫我陪佢食，我打算只食燕窩算了⋯

睇過參考書講過幾間食魚翅店, 我一向食嘢都係行到邊, 食到邊心態, 所以隨意揀間算了, 就揀咗海外天魚翅, 當時地下舖面唔多人, 計埋我哋, 得兩枱.....

我幫朋友叫咗個300B嘅紅燒蟹肉翅, 屬於最平嗰隻, 另加兩碗冰糖燕窩, 100b/碗

可能係最平嗰種, 所以冇咩魚翅, 只有些少碎翅, 蟹肉都算多, 味道就一般, 冇驚喜

反而個冰糖碎燕窩, 味道不太甜, 碎燕都幾多, 我覺得好抵食囉!



 

食完魚翅, 因為根本唔飽, 就去咗隔離間魚蛋店食魚蛋粉, 佢吸引我入去食嘅原因, 就係佢門口放咗d剛新鮮做好嘅魚蛋同炸魚條

雖然冇豪華裝修, 但感覺地道街坊化, 價錢唔係好平, 但唔貴, 可能有口碑同真材實料

叫咗碗Soi Jui Rice Noodle Soup, 魚蛋同炸魚條每樣有D; 嘩! 好味呀! 湯底清甜, 河粉爽滑, 最正係魚蛋, 彈牙, 爽呀! 如果唔係仲想試其他食店, 我仲想叫多碗食

唔怪得電視台都嚟訪問老闆娘啦!

去完China Town, 就行咗15分鍾, 兜兜轉轉咁先至去到Hua Lamphong地鐵站, 坐地鐵去到Sala Daeng站轉BTS 去Siam。

整個BTS Siam 站都被shopping mall 包圍, 好多人, 我哋對呢d商場興趣不大, 只想嘆吓冷氣, 行吓, 睇吓泰國人嘅大型商場, 最主要都係搵嘢食......

喺幾個相連商場轉咗個圈, 冇咩啱睇啱買, 就去搵嘢食。

朋友話嚟咗5日泰國, 竟然未曾食過泰菜, 好, 就食泰菜。

喺Siam 周圍逛, 都見到好幾間食店幾好, 但唔係泰菜; 隨意在Siam Center 4樓, 見到呢間門口有個大型舊式點歌機, 睇吓門口個Menu, 有泰菜食, 就呢間啦! 唔行喇!

我哋一共點咗3個菜 :

燒豬木瓜沙律  85b, 當然辣, 不過辣得清新, 燒豬肉味道幾好, 唔太乾身
冬蔭功河粉     85b, 已經叫佢小辣, 但都幾辣, 我鐘意, d河粉入晒冬蔭功味道
青咖哩雞肉 + 薄餅 99b, 青咖哩反而唔太辣, 嗰薄餅幾脆, 而且份量都幾多, 略厭雞肉唔夠滑身

另叫清水及加一, 共找數314b, 唔貴喎!

03/07/2012

上午喺Novotel Silom食完豐富嘅Buffet 早餐, 11:00am 就搭酒店免費shuttle bus 去BTS Sala Daeng站 (Novotel Silom 每1小時, 都有shuttle bus 去BTS Sala Daeng站, 要預先同酒店預約便可), 再搭BTS 去Phaya Tai站轉Airport City Line。

由BTS Sala Daeng站到Phaya Tai站, 25b; 由Phaya Tai 站搭Airport City Line, 45B, 泰國都算係眾世界機鐵至平之一, 真係响邊度搵, 唯一係在BTS站冇電梯落, 拎住行李唔方便啫! 如果弱質纖纖, 冇人幫手拎上拎落d行李, 真係唔好揀搭機鐵呀!

我哋好彩搭到11:22am 班車, 11:50pm左右就到咗機場喇, Airport City Line 站唔多, 但站與站之間都好遠, 我哋約搭咗35分鐘, 舒服方便同平之選。

去到机場, check 完in, 見仲有時間, 仲剩少少錢, 又去搵食......

隨便走, 就入咗呢間S&P Restaurant, 快快叫了碟炒飯同炒粉, 係份量少d, 味道同樣子都唔錯, 下次去泰國, 去多次呢間餐廳, 試真d其他菜式, 我知外面嘅分店好似有套餐......

1:45 pm 乘机回港。

今次去曼谷, 旅費如下 :

1) 來回機票 : HK$2050

2) Salil Hotel : HK$510/2晚

3) All Season : HK$315/2晚

4) Novotel Bangkok Fenix Silom : HK$511/2晚

5) 換錢 : hk$2500

6) 信用咭買嘢食嘢 : HK$1633

6) Spa & Massage : HK$997/3次/3.5小時

全程費用HK$8,516, 係我咁多次旅行較高費用嘅一次, 冇計啦! 今次買咗好多嘢, 又要努力做嘢搵錢賺旅費喇!  過多3個禮拜, 又出發去玩 - 台灣環島15天之旅......