2018年聖誕遊東京之第六天

12月28日（晴）

乘晚機返港唔洗同行嘅長輩急，可以施施然然。由於是次聖誕東瀛遊食唔到一餐滿意嘅壽司，直令姨媽耿耿於懷，結果朝早退咗酒店房後哥哥就帶路去地圖顯示為最近嘅連鎖壽司屋「梅丘寿司の美登利総本店」渋谷分店食個早午餐。飯後就坐酒店代訂嘅專車去成田機場，將行李寄艙後於貴賓室「ANA Lounge」度候機。團友們都極之滿意與「全日空航空公司」結下緣份，下次再去日本玩都話要encore！

2018年聖誕遊東京之第五天

12月27日（晴）

東瀛遊接近尾聲，早上嘅購物活動安排咗喺午餐地點「てんぷら山の上 ギンザ」（Tempura Yamanoue Ginza）嘅銀座區進行。肥肥家族完全無懼增磅，早餐以柑橘啤酒送朱古力柑橘乾。中午品嚐過高質鮮美嘅天婦羅餐後，就去咗原宿血拼精品及手信，真係冇諗過四層高嘅「Kiddyland」竟然遠比鄰近嘅「Line Friends」旗艦店紛繁多姿及有趣得多！整個聖誕旅程最驚喜嘅一餐就係入黑後於「たでの葉」（Robatayaki Tadenoha）享用嘅野味宴，當真一試難忘！

2018年聖誕遊東京之Boxing Day

12月26日（晴）

Boxing Day可算為是次行程嘅西餐日，午餐喺地牢扒房「島」（Shima）鋸和牛，晚餐就盛裝於銀座名店「L'Osier」享用法國聖誕大餐。由於用餐時間過長，女仕們裝扮需時，結果就跳過哂所有購物活動。

2018年聖誕遊東京之聖誕節

12月25日（晴）

去親東京玩都會盡情咁食，因深知聖誕旺季訂座會難上加難，早於出發半年前已開始跟酒店聯繫有關訂座詳情，列出心儀嘅餐廳後就交由佢地代為編排行程。八人真夠幸運，可於聖誕節中午品嚐Doctor X最愛嘅星級鐵板料理「銀座うかい亭」（Ginza Ukai-Tei）。午餐後於銀座區內購物，靚靚媽咪同家姐們於「三宅一生」（Issey Miyake）不停地試身時，XO仔就去咗附近間「Sanrioworld GINZA」狂購玩具同精品。今次假期最失望都要數喺名酒店餐廳「銀座久兵衛 京王プラザホテル店」（Ginza Kyubey, Keio Plaza Hotel）食嘅聖誕壽司晚餐。

2018年聖誕遊東京之平安夜

12月24日（晴）

多次入住「東京凱悅酒店」（Hyatt Regency Tokyo）都會喺會所層食早餐，今次由於住客過多，會所層早就爆滿，八人就決定一嚐酒店餐廳「日本料理 佳香」嘅日式自助早餐，感覺都唔錯。團友雖然全部都係一家人，但口味始終不一，午餐就分成兩組，怕骨組約咗哥哥個靚女朋友一齊去「日本橋 紫苑」食翅翅，其餘嘅就跟大姨媽去「瓢六亭」食鰻魚餐。當日嘅濕平活動高潮必數精品天堂「東京駅一番街」（Tokyo Character Street），買咗兩個鐘都嫌唔夠喉咁！平安夜晚餐好非一般地於人氣榜熱店「東京肉しゃぶ家」渡過，可謂肚滿腸肥的一天！

2018年聖誕遊東京

近年每逢姨媽們返港，都會順道停多個國家，方便肥肥家族會合並一同玩個短途旅遊，2018年尾三家人就喺東京過咗個令肚仔都一齊咁難忘嘅聖誕節！

 

12月23日（晴）

旺季嘅機票非常緊張，幸好六天遊都搵到位乘搭「全日空航空公司」去東京羽田機場。NH 860航班下午兩點半由香港出發，中午到達機場辦理好手續後就先去咗星空聯盟轄下嘅「新加坡航空銀刃貴賓室」佗佻地午膳及候機。飛機準時起飛及到達，不過最唔好采就係等到行李出哂都唔見大肥爸爸嗰件，結果唯有向機場職員報案，希望航空公司可以代勞搵得返。

家人慣性地入住「東京凱悅酒店」（Hyatt Regency Tokyo），今次亦不例外。由於難以掌握各人嘅抵達時間，晚餐就約好咗喺酒店附近間樓上居酒屋「北の味紀行と地酒　北海道」（簡稱「北海道」）度邊食邊等，意外地食物嘅質量唔差且價錢唔貴，長輩都好滿意。適逢姨丈壽辰，小肥同哥哥當然係早就安排咗份驚喜啦，飯後返酒店即一齊上咗佢間房吹生日蛋糕！

來到德島縣大步危，當然不能錯過日本三大秘湯－祖谷溫泉！整個旅程我最期待就係住這間新祖谷溫泉飯店蔓橋 （新祖谷温泉　ホテルかずら橋）～開頭我都心大心細諗緊住有私人纜車比住客上山露天風呂嘅和之宿，定係住主打德島端燒燒鄉土料理嘅祖谷美人，後來比我發現到新祖谷溫泉飯店蔓橋有齊兩樣，立即二話不說訂房！

去德島只有一個目的，就係去鳴門睇漩渦！不過每日漩渦嘅時間唔同，我哋呢日就係2pm先有得睇，造就我哋成個trip唯一一個早上可以瞓到自然醒，仲可以慢慢嘆brunch，唔駛趕住去搭JR或者巴士就係喺德島！我哋早上特登去搵靚啡，呢間可否庵（Coffee-an） 1980年創業，係一間自家焙煎珈琲専門店。『可否』原來來自於日文「Cafe」嘅發音，昭和時代好流行將無漢字嘅名詞配上漢字發音！成間咖啡店都充滿日式懷舊氣息，好靚！

食完brunch，喺附近嘅德島城跡逛逛，就坐巴士去睇漩渦啦！親身睇到漩渦原來真係好震撼架！

第一天到達宮古島，當時仍不太清楚當地交通,幸運的有車之送到民宿，入到屋間後得知面積不小，有廚房，大大客廳，獨立洗手間，浴室。與香港的地方很不同，是生活的地方，附近超市，便利商店，一般日常生活都解決到，島上主要以架車為主，伊世良大橋的風景超靚，人間天堂，藍色的大海，島嶼與島嶼的之間橋也是景色，感受大自然的美，沙灘也是重點，好想在這游泳，曬太陽，有一天了，這才是生活。我最愛的人與人之間的互動。